Lá lofu lɔ lobengo, Ngɔndɔ kɛ djomi l’ɔmɔ 20, 2022, COP27 Otshikitano w’ewila wel’États-Unies lá kɛnɛ kelendana la otshikitano wɔ deko woshiyaka. Kaanga nkano dj’ɔsamisá oyalawɔ wolo efula djɛ nkotshɛ mfalanga yel’ewila efula wepomana la ndjolo yeyɛ má nkete djetongamisá, efula ndjewaka ambɔ nkambo djɛsɔ djepangokandola ikɔkɔ yɛ nkambo.

•   António Guterres secrétaire général kɛ Nations Unies atepelaka lá Ngɔndɔ kɛ djomi l’ɔmɔ 19, 2022 ante: “Lemi nsuka ikanyi yɛ nonghanyɛ mfalanga yelendana la otshitanelo la mbalaka, koko lá topo tonkfumɔ, nkambo djɛsɔ djepango koma ngo lasɔ . . . Looko lɔso lɔnɛ ndɔmbaka akambo efula wa nangha lankeke lankeke.”

•   Ngɔndɔ kɛ djomi l’ɔmɔ 20, 2022, Mary Robinson président kɛ ntondo k’owila wɔ Irlande la commissaire kɛ ntondo kelá Nations Unies lá droits de l’homme atepelaka ante, “Andja walekɔ winá enkfumɔ ngo l’ekakasano weyɛ má taane.”

 Elangala ndeke loleka nkiyana la kɛnɛ kelendana lá looko lɔso lá etsho weyaye. Kaango oyɛwɔ nghɔsɔ, ewila nkoka nkamba esanga edjinge nɛmɛyɛ alaka wawɔ djɛ nangha la wolo lá kɛnɛ kelendana la otshikitano wɔ deko? Bible otepelande mo?

 Bible ɛnyɛ ante, kaanga olemo wɔ wolo wokambema la welo wɛ kɔɔ w’anto walendana la nkambo djɛsɔ ilawɔ, efulelo wɛ ewila efula yongonangha djɛ ndɔngɔsɔla etshitanelo kɛ deko wepangoyala l’eposelo wɛ wɔlɔ. Tokolenda donga mpe:

•   ‘Ekete kɛmbɔhɛngama kepangosembɔ.’—Losanghanyɛ 1:15.

   Nsakiso: Enkfumi wɛ wana w’anto wepalekɔ l’akoka wa nsiyɛ kɛnɛ k’ɔkɔpaso. (Jɛrɛmi 10:23) Kanga ewila okokawɔ ntshumana, wapakoke nshiyɛ akambo wa looko, kaanga ilakawɔ welo wɛwɔ enkfumo.

•   ‘Ladjikɛnde anto wangoyakɔpake ngo yɔmɛlɛ, wangɔkɔpa mfalanga, . . . wapangɔkɔpa ndjokana.’—2 Timɔte 3:2, 3.

   Nsakiso: Bible alakaka l’eshikikelo ante efula k’anto l’etsho wɛso wɛnɛ wangoyala anto wa lokaki la wapangoyala l’akoka wa nkamba esanga lá wayi wa wɔlɔ.

 Djɛkondeke, looko lɔso lɔnɛ lopangɔlɔndjɛma kaanga me onkfumi ɔmɔ wɔ wana w’anto. Ndjambe ambolonghanyɛ Owandji ɔmɔtshi l’andja w’otondo wolekɔ l’akoka, Yeso Kristo. Lá nkambo djɛsɔ Bible ante:

•   ‘Lowandji lonkfumo longoyala l’apeka wande. Wangoweta Ondaki wo wolo, Ndjambe kɛ nkfulu, Papa kɛ lotshinda, Wɔna nkfumi kɛ vu.’—Izaya 9:6, nɔtɛ kel’ekomo kɛ nkishi.

 Yeso ndeke owandji wɔ Onkfumi wɔ Ndjambe kana onkfumi wɔ l’olongo. (Mateo 6:10) Nde alekɔ la nkfulu, la balo, edjinge la mposɛ kɛ ndɔngɔsɔla looko lɔso la koko anto wawika l’eteyi. (Yeembo 72:12, 16) L’anse kɛnde, onkfumi wel’olongo wɔsɔ wongoshimba ‘watshita looko’ ko wɔngɔlɔngɔsɔla looko.—Ndjiso 11:18, nɔtɛ kel’ekomo kɛ nkishi; Izaya 35:1, 7.

 Djɛ ndjewa akambo akina efula walendana la nkando kengowayema lá otshitanelo wɔ deko, wala djamba: “Otshikitano wɔ deko djɛ taane edjinge etsho wɛso wɛnɛ—Bible otepelande mo.”