Ekakasano wɛ wayi wa mfalanga wengoshiya lofu lɔmɔtshi?
Lá ambandja wopo la wopo, anto watɔmbɔkɔ lá entayimbo ladjikɛnde w’ɛna ambɔ ekakasano wɛ wayi wa mfalanga wepananghema la sii. Ekakasano wɛsɔ welekaka lombombe lá eleko k’opela wɔ nyɛtshi wɔ coronavirus, kenanghisá dj’ipa anto ndjala l’osasa, ndjipama l’amvulu, nsamba nkete dj’oyɛwɔ la ndjonyi edjinge nsamba mba bɔki djime tofulumɛ.
Ekakasano wɛ wayi wa mfalanga wengoshiya lofu lɔmɔtshi? Ee. Bible mpakisolaka kɛnɛ kɛ Ndjambe ndonghonangha djɛ nshiyɛ ekakasano wɛsɔ.
Ekakasano wɛ wayi wa mfalanga wɛ Ndjambe ndongoshiyɛ
Okakasano: Anto wapakɔpɛ ndjila nanghanyi yɛ wayi wa mfalanga yekotshɛ mposɛ y’anto ankfumɔ.
Nkando: Ndjambe angimɛ enkfumi wɛ wana w’anto, ko angɔhɛnyɛ l’onkfumi wɔkɔ, onkfumi w’eta Bible ante Onkfumi wɔ Ndjambe. Wɔngɔlɔndjɛ olongo la looko lonkfumɔ.—Danyɛlɛ 2:44; Mateo 6:10.
Lɔɔla: Mande Onkfumi wɔ Ndjambe wɔngɔlɔndjɛ looko l’otondo, akambo wangɔlɔndjɛma lá lɛdji loleka wɔlɔ. Anto w’ɛmvɔ wapangoyala lonkina la anto wapangokanela akambo wa ntondo. (Yeembo 9:7-9, 18) Koko, wangosasanga la olemo wɔwɔ edjinge wangosasanga esanga l’ankfumbo yɛwɔ. Bible ntɔpɛyɛka daka djɛnɛ: ‘Iwɔ wangopika amvulu ko wangintasɛ l’eteyi, edjinge wangokamba awedji wa vinyo ko wangɔlɛka mbambo m’eteyi. Iwɔ wapangopika amvulu djɛ onto onkina nd’intasɛ l’eteyi, la wapangokamba awedji djɛ anto ankina ndɔlɛ.’—Izaya 65:21, 22.
Okakasano: Anto wapakoke nshimba akambo wayakalaká ndjolo la wakomɛka djɛ nsamba nkete dj’oyalakawɔ la djonyi lá lowiko.
Nkando: Má lotshimbo lɔ Onkfumi wɔnde, Ndjambe angimɛ akambo ankfumɔ wa wɔma la wapile vu.
Lɔɔla: Lanse k’Onkfumi wɔ Ndjambe, anto wapangopomana lonkina la akambo waakomɛ djɛ ntshutshɛ nkete djɛwɔ djɛ mbika kana djɛ ase nkfumbo yɛwɔ. Ndjɔmbɔmba, ambandji, ndjala, edjinge elando wɛ nyɛtshi wepangoyala lonkina. (Yeembo 46:9; 72:16; Izaya 33:24) Ndjambe ntepelaka ante: ‘Anto wami wangintasɛ lá edjena kɛ vu efula, lá wintaselo wɔ lotoyi ntshitshi edjinge lá djena djɛ mpomola djɛ vu.’—Izaya 32:18.
Okakasano: Anto wa lokaki la wahonaká ngo wapɔ wɔwɔ yɔmɛlɛ wangonanghelake winawɔ akambo la ntshamba djɛ sii.
Nkando: Anto wangɔlɔndjɛma l’anse k’Onkfumi wɔ Ndjambe wangeka wopo wɔ nyɛnyɛ ankina ngandji l’edjena kɛ mpetshɛ wapɔ wɛwɔ l’edjena kɛ ntondo.—Mateo 22:37-39.
Lɔɔla: L’anse k’Onkfumi wɔ Ndjambe, onto onkfumɔ angɛnyɛ ngandji keyalaka la Ndjambe, ‘kepahonaka wapɔ wɔnde nyɔmɛlɛ. (1 Kɔrɛtɔ 13:4, 5) Bible ntepelaka ante: ‘Iwɔ wapangonangha kaanga nyɛtshi kana ntshita onkókó wɔmi w’ekina onkfumɔ, ladjikɛnde looko longolola nsɔsɔlɔ la balo djɛ Yehova a etengo washi yololaka lá ndjale.’—Izaya 11:9.
Bible nyɛnyɛka ante andja wanɛ wambokoma l’ekomo edjinge lako ilá Ndjambe angokotshɛ daka djɛnde djɛ nshiyɛ ekakasano enkfumɔ welendana la mfalanga. b (Yeembo 12:5) Lá ntondo kɛ akambo ankfumɔ nanghema, tɔkfɔ tɔ Bible nkoka nkokotshɛ́ djɛ wɛ ndonga ekakasano welendana la mfalanga win’ɔsɔ. Ndjɔmbɔmba, lenda wamba “Comment vivre avec moins” edjinge “L’argent et vous.”
a Yehova alekɔ djiina djɛ Ndjambe dj’otanaso lá Bible.—Yeembo 83:18.
b Djɛ ndjewa lamo okokɛ nyɛnyɛ djawo ta Bible, lenda djamba “La Bible: une source de vérités fiable.”
