Anto efula l’andja wambowanga nyɛna nyɛtshi ndjaka nyama ngo djɛ ndɛ kana djɛ nkfumba ekete kɛmɔtshi.

•   “Véganisme oyɛwɔnde yopo imɔtshi yɛ lowiko yɛ onto ndɔmbɔsɔna djɛ nangha kenkfumɔ k’okokande dj ntona topo tonkfumɔ tɔ anto ɛnyɛkawɔ anyama ndjolo kana djɛ mba olelo, ntshendja edjinge nkete nkina.”​—The Vegan Society.

 Anto amɔtshi l’ekfumbo kɛ lowiko lɔkɔ ape ngo djɛ ndjokela anyama djandji, koko djɛ ndalama má akambo walendana alemba wawɔ, kana má kɛnɛ kelendana la ntolo djɛwɔ.

•   “Le anto efula, veganisme apasakisola ntona djɛ ndɛ nyama kana nsamba nkamba l’ekete kenanghema me anyama, koko ɔsɔ oyɛwɔ nde djawo dj’onto, la yopo imɔtshi yɛ lowiko yoyɛwɔ ladjɛ nkilika ntsha wakɔpa andja mbɔnga.”​—Britannica Academic.

 Veganisme oyɛnde nde nkando kɛmɔtshi kɛ l’etsho weyaye lá ekakasano welá looko? Iya Bible otepelande mo?

 Bible ntepelaka ante Ontongi wɔso, Yehova Ndjambe, a nyɛnaka ante anto ndeka anyama edjinge apɛyɛka anto lowandji lá djiko dj’anyama. (Ewangelo 1:27, 28) Djɛkondeke, Ndjambe apɛyɛka onto lotshungɔ lɔ ndɛ nyama. (Ewangelo 9:3) Koko, nde apakɔpɛ nyɛnyɛ nyama ndjolo.​—Woongo 12:10.

 Lá nkilika Bible, ndjaka kana ndɛ nyama oyɛwɔ nde nkambo dj’onto l’onto nyɔmɛlɛ. b Nkano djɛso lá nkambo djɛkɔ mpatokomɛka anto wa wɔlɔ lombombe lá wiso wa Ndjambe. (1 Kɔrɛtɔ 8:8) Lako onto wolekɔ́ la lotshungɔ lɔ ntepela nyɛtshi lá nkano dj’onto onkina ndɔmbɔsa lá nkambo djɛ ndɛ nyama kana lako.​—Ɔrɔma 14:3.

 Bible nyɛnyɛka ante ape akano w’ɔsaso ndeke lonangha djɛ andja wanɛ mbɔnga. Efula akambo wa pɔlitikɛ, mbiko y’anto, edjinge akambo wa etshitanelo kɛ lohoye ndeke loyakala ekakasano efula lá looko lɔnɛ, edjinge lako kaanga onto ɔmɔ wokoka ndɔngɔsɔla. Bible atepela ante:

•   ‘Kembɔhɛngama kepakoke nsembwama.’​—Losanghanyɛ 1:15.

 Ontongi wɔso angoshiyɛ ekakasano w’opomanaso wɛnɛ. Bible nkambaka l’etepela wɛ ndjingingi djɛ ntepela akambo wa Ndjambe ndonghonangha.

•   ‘Ko nyɛnaka olongo wɔ bango la looko lɔ bango; mande olongo wɔ ntondo la looko lɔ ntondo wodjipisanaka, edjinge ndjale ketayala lonkina.’​—Ndjiso 21:1.

 Ndjambe angimɛ enkfumi wɛ wana w’anto, kana ‘olongo wɔ bango,’ edjinge angila ‘olongo wɔ bango,’ wolekɔ́ Onkfumi kana guvɛrnɛma djɛnde djelekɔ́ l’olongo. Onkfumi wɔnde wongimɛ ‘looko lɔ ntondo’ kana ntepela ente anto wapɔlɔ, ko wɔngɔlɔndjɛ ‘looko lɔ bango,’ kana anto walɛmɛyɛka onkfumi wɔnde la ngandji k’ekfumɔ.

 Ngo l’anse kɛ ɛlɔndjɛlɔ kɛ Onkfumi wɔ Ndjambe ndeke anto yongeka wopo wɔ mbika lá yopo yɛ vu esanga la anyama edjinge kɛnɛ kadjingi.​—Izaya 11:6-9.