•   “Chine ewoyɛ ‘tane tɔ wolo’ la ɔhɔ w’asato woleka wolo.”—The Guardian, Ngɔndɔ kɛ djuwa 7, 2022.

•   “Osambo w’ekekete wɔ washi l’Afrique wongokindjɛ ntshɔ tii tá ɔnɔnyi w’atano.”—UN News, Ngɔndɔ k’enanɛyi 26, 2022.

•   “Lá ntenyi ntshato djelá Europe, ntenyi mpe djewoyɛ ambɔ walekɔ l’osambo wɔ washi, lá kɛnɛ kelekɔ́ nsɔsɔlɔ, angoleka nyɛtshi l’ilá k’ɛnɔnyi 500.”—BBC News, Ngɔndɔ k’enanɛyi 23, 2022.

 Efula kɛ andjewi yɛ wayi wewoyɛ ambɔ washi wangokindjɛ nyoma edjinge kɛsɔ kengonanghema lá yopo yeleka nyɛtshi lombombe. Nkongi mɔtshi dekɔ djɛ wɔlɔ l’etsho weyaye? Kɛkɔnge kɛ Bible otepelande?

 Bible ambotepelá dj’etsho wɛso ante:

•   “Ndja yɛ nkasa ingoyala l’edjena la edjena.”—Luka 21:11.

 Osambo wɔ washi ndjakalaka osango wɔ nkete djɛndɛ. Osambo wɔ nkete djɛ ndɛ wɔ nghɔsɔ, ndjolo, edjinge lɔnyɔyi loposa, nkotshɛka prɔfɛsi yelá Bible.—Ndjiso 6:6, 8.

 Bible ntepelaka elonga kɛ nsɔsɔlɔ kɛ washi yotaleke ngo nyoma. Atepela ante:

•   “Nde apalekɔ l’akoka wa ndɔdjɛ ekolo wɛnde.”—Jɛrɛmi 10:23.

 Kɛsɔ nsakisolaka ente anto wapalekɔ l’akoka wa “ndɔndjɛ lokolo [ekolo wɛwɔ] lɔnde,” kana ndalɔndjɛ iyɔmɛlɛ. Mbala efula ɛlɔndjɛlɔ kɛwɔ kɛ nyɛtshi nanghaka djɛ taane la osambo wɔ washi ndjala.

•   Andjewi yɛ wayi wa siansɛ nsangaka lolemi djɛ ntepela ambɔ, elemo wɛ wana w’anto nanghaka djɛ taane tɔ wolo mbala, ko kɛsɔ nanghaka djɛ nyomɛ washi.

•   Ohonelo wɔ la lokaki edjinge etshitanelo kɛ nkete djetongamisá dj’etengo etamba, ɛpɔndjɛlɔ, la osambo wɔ ndjewa nkamba la nkete djetongamisá, ambila nkete djɛ ntshó djelá washi lá mbalaka.

 Koko, Bible ntɔpɛyɛka nkongi.

 Bible ndakaka ante Ndjambe angokandola nkambo djelendana la osambo wɔ washi. Lá wopo wɔkɔnge?

1.  1. Ndjambe “angotshita anto watshita looko.” (Ndjiso 11:18) Nde angotana nkando lá nkambo dj’osambo wɔ washi, anto wa nyɛtshi, wa lokaki wa nanghedji djɛwɔ djetshita looko.—2 Timɔte 3:1, 2.

2.  2. “Looko l’onkawo longolola kfu la washi.” (Izaya 35:1, 6, 7) Ndjambe akɔpa nkadjimola ekakasano weyɛ má taane la looko longokadjimɔ paradiso.

3.  3. “Wɛ ndjilaka looko yimba, má ndowila etɛtɔ k’efula la okfudji w’efula.” (Yeembo 65:9) Má ɛtshɔkɔ wɛ Ndjambe, looko longolola kfu la olelo edjinge la washi wa piyɔɔ lá djena nkfumɔ.