Lɔɔko kɛnɛ, djena efula l’andja w’ɛna ndjolo la taane t’ipa wɔs’ɔdjɔmba lá wopo wɔ yɔtɛnaká ntondo. Lenda wopo w’otepela nsango yɛnɛ:

•   Agence américaine d’observation océanique et atmosphérique [NOAA], lá États-Unis, département du Commerce, lofu 13 Ngɔndɔ k’esambele 2023, w’ewoyɛka nghɔnɛ: “Lá Ngɔndɔ kɛ djuwa, andja wambo pomana l’eleko kɛ yaane y’ipa wɔs’ɔdjɔmba má bango djɛ sawange ndenda akambo wa taane l’andja w’otondo, ambokoma ɛnɔnyi efula.”

•   Lá Ngɔndɔ k’esambele 17, 2023, Agence spatiale européenne, w’ewoyɛka ambɔ: “Italie, Espagne, France, Allemange edjinge Pologne wapomanaka la taane tɔ wolo efula, edjinge la mpoye yɛ tɔyɛ tii tá degré 48°C lá ntshanga djelá Sicile edjinge djelá Sardaigne, lá lɛdji lɔ yɔtɛnaka taane tɔ nghɔsɔ ntondo lá Europe.”

•   Lá Ngɔndɔ k’esambele 17, 2023, Stefan Uhlenbrook, directeur de l’hydrologie, de l’eau et de la cryosphère à l’Organisation météorologique mondiale, atepelaka ante: “Etengo taane yomboleka lá looko, tongoyala ladjɛ mpomana l’ambalaka yɛ nkekete, yengokoká ndjakala dola djɛ nkekete.”

 Ofulelo wɔ tolembetelo tolendana la wayi wa taane tɔ wolo nyotshimbɛka timba? Tokolenda kɛnɛ kɛ Bible otepelande lá nkambo djɛsɔ winá wɔsɔ.

 Ee. Taane tɔ wolo tɔtɔnga lá looko l’otondo edjinge akambo ankina ndjokanaka la akambo wa Bible ndalake l’etsho wɛso. Ndjɔmbɔmba, Yeso alakaka ante tɔngɛna ‘akambo wa wɔma.’ (Luka 21:11) Wopo wɔ yaane ɔpɛtawɔ l’andja w’otondo, kɛsɔ kembotshinda anto efula djɛ nkanela ambɔ anto wangotshita looko l’otondo.

 Lako. Ndjambe atongaka looko djɛ ndjala intaselo kɛsɔ kɛ lotshinda; apangopɛyɛ wana w’anto mbamba k’iwɔ ntshita looko. (Yeembo 115:16; Losanghanyɛ 1:4) Djɛkondeke, ndalake ante ‘angotshita waatshita looko.’​—Ndjiso 11:18.

 Bible nyɛnyɛka ante Ndjambe alekɔ l’akoka wa nama looko má ambalaka inkfumɔ edjinge anghonangha nkambo djɛsɔ.

•   “[Ndjambe] angovumbɛke lompopo l’ekekete, anyɛnghu w’andjale yɛ nkekete wangotshikalake vu.” (Yeembo 107:29) Ndjambe alekɔ la nkfulu kɛ ndɔndjɛ nkete nkfumɔ djɛ ndombotonga. Nde alekɔ la nkfulu kɛ ndɔngɔsɔla ekakasano wɛ taane yomboyakala anto.

•   “Ongilelake looko yimba, djɛ ndɔpɛyɛ nkete efula; ongonanghake djɛ nde ndjala l’okfudji w’efula.” (Yeembo 65:9) Má okotshɔ wɔ Ndjambe, looko longokoma paradiso.

 Djɛ ndjewa akambo ankina walendana alaka wa Bible ɔpɛyɛnde djɛ ndɔngɔsɔla andja, lenda djamba “Qui sauvera la terre ?”