Wɛna l’afoto y’ikakanda ikinɛ wopo we Atemwe ye Yehova ɔlɔtakawɔ wɔlɔ nde wamboyɛ ya nsanghanyɛ y’iwɔko? Ɔkɔpakisɔ nonghanyɛ ɔlɔtɔ la vo dj’isoko wɔlɔ nghɔnyi la nke?

Dje nyɛnyɛ ente tolɛmɛyɛ Ndjambe k’isoko. Solo, Ndjambe apalendaka ngo wɔlɔ w’elongi. (1 Samwɛlɛ 16:7) Koko nde tombotshumana dje ndjowumiɛ, tɔkɔpake efula nyɛnyɛ ente tɔlɛmɛyɛ ole Ndjambe ole winaso akristo. Kolenda, nde tɔkɔpa ntshɔ tɛnana la nkfumi ɛmɔtshi, topangɔlɔta ɔlɔtalɔta, gkambo tɔlɛmɛyɛ ekopo ke nkfumi ɛkɔ. Elekɔ ngo wopo ɔkɔ te otshɔkiso ta nsanghanyɛ y’isoko: ɔlɔto la vo dj’isoko nyɛnyɛká ente tila Yehova Ndjambe lumu, nde Nkfumi k’ewila, kankina ko tila etena koyɛkiso yoowumiɛ lumu.​—Jɛrɛmi 10:7.

Dje nyɛnyɛ tɔkfɔ́ tɔnɛ tolandiso lá lowiko l’isoko. Bible atosimela iso akristo ante tɔlɔte “bpá l’andekola kankina ko la tokanyi te wɔlɔ.” (1 Timɔte 2:9, 10) Ndɔta “bpá l’andekola” ɔkɔpawɔ ntepela nde ntona ɔlɔtɔ we anto wakolende ngo wɛ, we ndɛngola anto awale, we nyɛnyɛ demba l’andja. Kankina ko ndjalá la “tokanyi te wɔlɔ” etokotshɛke dje iso ndjewa nsɔna ɔlɔtɔ we wɔlɔ, epa we tshangatshanga. Koko kondo ewɔ nghɔsɔ, alako akasɔ watshikela onto l’onto mbamba ke nsɔna ɔlɔtɔ lá wopo wonɛ wɔkɔpande. Kondo nde topaposɛ djoyi m’ɔlɔmɔ, ɔlɔtɔ w’isoko we wɔlɔ wokoka “mbɔngiɛ elakanyelo we Onto onambotowikiɛ” la “ntombola Ndjambe.” (Tito 2:10; 1 Pɛtɛlɔ 2:12) Ɛɛ, nde tɔlɔta wɔlɔ ta nsanghanyɛ y’isoko, tokoka nsepa anto dje wakope nkambela Yehova.

Koko, totshikake ɔlɔtɔ w’ɛko wokopekesanyɛ ndjɛ ya nsanghanyɛ lá Mvulu k’Onkfumi. Topakɔ la djonyi dje ndjalá la dtshendja dje dtsho kondo dje wɔlɔ efula dje ɔlɔtɔ w’isoko nkoka nyɛnama wɔlɔ, pɛlɛlɛ, la wɔnɛ wolonghaná.

• Gkambo gkɔ nke eso la dje ndjalá l’ɔlɔtɔ we wɔlɔ nde tila Ndjambe lumu?

• Alako we Bible akɔ nke olamakiso lá gkambo dj’ɔlɔtɔ la vo?