Ngo te djína Mvulu k’Onkfumi djɛnyɛwɔ, akambo wanɛ olakanyɛkawɔ l’amvulu ikɔ otepelakawɔ efula nde dje Onkfumi we Ndjambe, djoyi na Yeso nyolekaká ntepela l’elakanyelo we nd’eko.​—Luka 8:1.

Ewɔ nde totena t’epikamelo k’etolo ke solo lá mbandja. Olemo we nsakola losango le wɔlɔ onanghemakawɔ lá mbandja nde m’Amvulu y’Onkfumi. (Mateo 24:14) Amvulu y’Onkfumi ipayalaká wopo ɔmɔ, eyale l’epikelo, eyale l’ɔnɛnɛ. Koko inkfumɔ ilekɔ mvulu y’ipa nyona andekola; mbala imɔtshi, etshumano djudji wananghake nsanghanyɛ lá Mvulu k’Onkfumi ɛmɔ. Lá deko dje lomilomi anɛ, tombopika Amvulu y’Onkfumi ndeka nunu djomi (totepele ente itano lofu la lofu), gkambo etshumano weyafule ngo mfula. Okokakawɔ mpikama nghɔsɔ wopo ɔkɔ nke?​—Mateo 19:26.

Ipikamakawɔ nde la djɛlɔ dj’akapo nɛ otomakawɔ ta bomba m-mɔ. Watomake djɛlɔ dj’akapo akɔ ta biro dje filiale dje nkoka mpɛyɛ etshumano wenalekɔ la djonyi dje mpika kondo mbongiɛ Mvulu k’Onkfumi.

Ipikamakawɔ nde me anto wopo la wopo wanayapɛyɛ l’ɛkɔpa k’iwɔko bpá nyona lofuto. L’ewila efula, wambolonghanyɛ́ eloyi w’ampiki ye Amvulu y’Onkfumi. Eloyi w’ankambi wanapikaka esanga la winaso wanayapɛyɛka l’ɛkɔpa k’iwɔko wetetake m’otshumano ɔkɔnɛ t’otshumano onkina, kondo ta dtena dj’otale l’owila ɔkɔ, dje nkotshɛ etshumano we mbandja ikɔ l’olemo we mpika Amvulu y’Onkfumi y’iwɔkɔ. Lá dtena mɔtshi, Atemwe wanɛdjé wilamake l’olemo we ndenda olemo we mpika kondo we mbongiɛ Amvulu y’Onkfumi ye ompandju ɔmɔtshi nghonyi wona yombaapɛyɛ́. Atemwe efula inewaka elemo ɛmɔtshi wayɛke l’ɛkɔpa k’iwɔko yokamba olemo we mpika Mvulu k’Onkfumi, koko ase otshumano w’etena ɛkɔ nde wanalekaka nkamba olemo ɔkɔ. M’edjimo ke Yehova la ma wolo w’anto we nd’eko wanayapɛyɛka l’otema ɔmɔ nde akambo akasɔ okokakawɔ nanghema.​—Yeembo 127:1; Kɔlɔsɛ 3:23.

• Etakiso dtena dj’iso nyumiɛ Yehova ente Mvulu y’Onkfumi la nke?

• Okokakiso mpika Amvulu y’Onkfumi l’andja w’otondo wopo ɔkɔ nke?