Mvula la mvula, olonghanyelo w’isoko wokapanyɛke Wabible l’ekanda enkina miliyo nkama la nkama, bpá ndɔmba anto mfalanga. Topikake la tɔwɔngieke Amvulu y’Onkfumi la abiro y’afiliale. Tokotshɛke ase Betele la wamisionɛrɛ nunu la nunu, kankina ko tokotshɛke winaso nde wambowa mbalaka. Mbala imɔtshi okoka ndjombola ente: “Mfalanga ye nangha akambo ankfumɔ akaso yɔdjɛkawɔ ma mpe?”

Topalombaka dime, topananghaka ɔwɛkɔ, la topetshetshɛka alonga dje ndɔmba mfalanga. Kondo ɛlɔmbawɔ mfalanga efula dje nkɛndjɛ olemo w’isoko we nsakola losango le wɔlɔ, topalɔmbaka anto mfalanga. Embeta mvula nkama, nimero k’epe ke jurnale Etange k’Olami [La Tour de Garde] ketepelaka ante te l’eso, Yehova nde lotokotshɛ, ko topangolɔmba kondo topangona mfalanga m’onto; ko tii lɔko ɛkɛnɛ, ewɔ ko ngo nghɔsɔ!​—Mateo 10:8.

Akapo w’anto ɔpɛyɛwakawɔ l’ɛkɔpa k’iwɔko nde lokotshɛka olemo w’isoko. Anto efula wakopake olemo w’okambasó dje ndjekiɛ anto Bible, ko wapɛyɛke gkete dje nkotshɛ olemo ɔkɔ. Atemwe yomɛlɛ ko wapɛyɛke l’osasa wíná w’iwɔko, nkfulu y’iwɔko, mfalanga y’iwɔko la gkete nkina dje ɛkɔpa ke Ndjambe enangheme lá looko onkfumɔ. (1 Ɛkɔndɔ 29:9) Lá Mvulu k’Onkfumi la lá nsanghanyɛ y’isoko ye gkekete, tɔsɛsɛtɛ toyalake dje onto onakɔpa akoke ndjíla gkapo dje nd’eko l’anko. Efula ke mfalanga ikɔ oyɛkawɔ nde me anto wanɛ wapakɔ la mfalanga efula, anto wanalekɔ ngo te ikombe ye wadji’e odjo onɛ Yeso nyodjumiɛ́ lá gkambo dje mɛya ipe inɛ nyile l’ɔsɛtɛ we bomba dje tempelo. (Luka 21:1-4) Ɛɛ, onto onkfumɔ akoka mbala la mbala “mbomba ekete” ke mpɛyɛ, “ngo te nyombokána l’otema we nd’eko.”​—1 Kɔrɛntɔ 16:2; 2 Kɔrɛntɔ 9:7.

Iso tokanela solo ente Yehova angokindjɛ nkɔta etema w’anto wanakɔpa ‘ndjɔɔpɛyɛ lumu la gkete dj’iwɔko dje lumu’ dje nkotshɛ olemo w’Onkfumi, dje ɛkɔpa ke nd’eko enangheme.​—Woongo 3:9.

• Otshikitaniso la dtolo nkina wopo ɔkɔ nke?

• Ónanghakiso mo l’akapo we anto ɔpɛyɛkawɔ l’ɛkɔpa ngandji k’iwoko?