L’olonghanyelo w’isoko, topayalaka l’ankfumi y’etolo wanɛ walongolaká lofuto. Koko, ngo te akambo yonanghemaká l’otshumano w’akristo we ntondo, akristo amɔtshi wanɛ wɛdjé wilamake alami dj’iwɔ “mbakanyɛ otshumano we Ndjambe.” (Elemo 20:28) Ankɔlɔma ikɔ walekɔ ampame inalekɔ la djokanelo dje wɔlɔ efula la Yehova. Iwɔ wakɛndjɛke otshumano la woolamake, “epa amɔ la ntshindama, koko l’ɛkɔpa; epa la mbɔkɔ́ kepa wɔlɔ, koko l’osasa lá ntondo ke Ndjambe.” (1 Pɛtɛlɔ 5:1-3) Otonanghelakawɔ olemo ɔkɔ nke?

Watowakanyɛke la watolamake. Ankɔloma wapɛyɛke alako we ma Bible la wakotshɛke otshumamo dje womaleme Yehova wɔlɔ. Iwɔ wewa amɔ olemo we Ndjambe nyombaapɛyɛ́ opakɔ tɔla, djɔko nde yopaapamelaka anto we Ndjambe; okambakawɔ nde dje ndjawonela wɔlɔ l’osasa. (2 Kɔrɛntɔ 1:24) Ngo te olami w’ampanga onanghakande lá wolo dje mbakanyɛ mpanga emɛmɔ, ankɔlɔma koko wananghake la wolo dje ndjewa onto l’onto l’otshumano.​—Woongo 27:23.

Watekiɛke wopo we nangha ɛkɔpa ke Ndjambe. Lobengo la lobengo, ankɔlɔma wakɛndjɛke nsanghanyɛ y’otshumano dje nkembiɛ djawo dj’isoko. (Elemo 15:32) Ampame ikɔ inambayapɛyɛ́ wakɛndjɛke kankina ko olemo we nsakola losango le wɔlɔ, wakambake l’iso, la watokfumbake l’akambo ankfumɔ w’olemo we Ndjambe.

Watokembiɛke onto l’onto. Dje nkotshɛ onto l’onto ayale la djokanelo dje wɔlɔ nya Yehova, ankɔlɔma y’otshumano w’isoko wakoka ndjɛ yotowembola lá mvulu k’isoko kondo ndjambá l’iso lá Mvulu k’Onkfumi, dje ntokotshɛ la ntokeketshɛ la alako we ma Bible.​—Djakɔbɔ 5:14, 15.

Wimiɛka olemo w’iwɔkɔ l’otshumano, ankoloma efula wayalake la djonyi dje mba wíná we nangha la ndjila yimba l’elemo w’iwɔko enkina la lá nkfumbo y’iwɔko. Elekɔ wɔlɔ dj’iso nɛmɛyɛka boto dj’isoko gkɔ nakambaka olemo la wolo efula.​—1 Tesalɔnikɛ 5:12, 13.

• Olemo w’ankoloma y’otshumano nke?

• Ankɔlɔma watokotshɛkawɔ onto l’onto wopo ɔkɔ nke?