Lá ntondo ke nde mvɔ, Yeso atepelaka ante: “Losango le wɔlɔ okɔnɛ l’Onkfumi longosakolama lá looko onkfumɔ l’anto te owakiɛ l’ewila enkfumɔ, ma mbisa ɛkɔ ekomo engoyɛke. (Mateo 24:14) Olemo ɔkɔ we nsakola losango l’Onkfumi lá looko onkfumɔ yoyale la dje nanghema wopo ɔkɔ nke? Ngo lá ndɔnda lokolo le Yeso nyotshike lá winá we nyoyalaká l’anɛ lá looko.​—Luka 8:1.

Tonanghake la wolo dje ntshɔ tolenda anto lakawɔ. Yeso akfumbaka ambeki we nd’eko dje iwɔ nsakola losango le wɔlɔ ma mvulu la mvulu. (Mateo 10:11-13; Elemo 5:42; 20:20) Akristo we ntondo wayalaki la dtena dje yaapɛyɛ́ dje ntshɔ tosakola losango. (Mateo 10:5, 6; 2 Kɔrɛntɔ 10:13) Lɔko ɛkɛnɛ, iso koko tombolonghanyɛ́ akambo dje olemo w’isoko we nsakola wonangheme wɔlɔ: wambɔpɛyɛ́ otshumano l’otshumano etena k’iwɔ nsakola. Ɔsɔ nde lotokotshɛka dj’iso nkokiɛ olemo we “nsakola anto losango la mpɛyɛ owakiɛ we kɔɔkɔɔ,” te Yeso nyotepelá.​—Elemo 10:42.

Tonanghake la wolo dje nkomela anto laye ewɔ. Yeso atotshikelaka ndjɔmbomba enkina lá wopo we nyosakolaká anto lá dtshandjawala, lá nkidj’e ndjale kondo lá bpekfu dje anto yoyɛká yotɛka wasi. (Marko 4:1; Djɔanɛ 4:5-15) Iso koko tambake l’anto lá gkambo dje Bible, eyale l’etena ɛkɔ nke: l’amboka, lá dtena dj’osadjɛwɔ gkete, l’awandja w’anto oyɛkawɔ yokinyanse, kondo lá telefone. Nde mbamba ɛmbɔdjɛ, tambake ko l’ase dtshuk’a mvulu, l’ambayi ye kalasa, l’ambayi y’olemo, kankina ko la boto la bondo. M’elemo enkfumɔ ɛkɛsɔ, wamiliyo la miliyo y’anto wambowá mbamba ke ndjoka ‘losango le wɔlɔ l’ewiko’ lá looko onkfumɔ.​—Yeembo 96:2.

Wewa onto ɔmɔtshi ona wokanele ente okoka ndjoosimela losango le wɔlɔ l’Onkfumi, la wɔlɔ w’Onkfumi ɔkɔ yongoyakala? Tisake losango ɔkɔ ngo dje wɔlɔ w’ɛko nghɔmɛlɛ. Simelá anto ankina osadju’osadju!

• Losango le wɔlɔ ɔkɔ nke lonalekɔ la dje nsakolama?

• Wopo oko nke Atemwe ye Yehova okolakawɔ Yeso lá wopo we nsakola losango?