Lá otepela we Hebre, Betele ɔkɔpawɔ ntepela nde “Mvulu ke Ndjambe.” (Ewangelo 28:17, 19, note) Djína gkɔsɔ gkokana solo l’amvulu ye Atemwe ye Yehova yombolonghanyɛ́ l’andja w’otondo dje nkoka nkɛndjɛ la nkeketshɛ olemo we nsakola losango le wɔlɔ m’amvulu ikɔ. Iloyi inalondjɛ okambakawɔ nde lá Biro dj’ekekete dj’Atemwe ye Yehova lá New York (État de New York) lá États-Unis. Ma Biro gkɔ nde ɔlendakawɔ olemo wonananghema lá wabiro ye filiale l’ewila efula. Oloyi w’anto wanakambaka l’amvulu ikɔ wetamake amɔ nkfumbo ke Betele. Ngo te oyalakawɔ lá nkfumbo, ase Betele wayalake la wakambake olemo esanga, walɛke toma koko esanga, la wekake Bible esanga.​—Yeembo 133:1.

Itena ye wɔlɔ efula dje anto nkoka ndjaapɛyɛ otondo ngo te lá nkfumbo: Lá Betele nkfumɔ, Atemwe y’ampame la ye wamato wamboyapɛyɛ́ otondo dje nanghaka ɛkɔpa ke Ndjambe la dje mfudjɛ akambo analendana la wɔlɔ w’Onkfumi. (Mateo 6:33) Lako onto onafutamaka, koko waapɛyɛke yankfumɔ mvulu ke ndjetama, toma te ndɛ, l’ifafalanga y’iwɔ nkoka ndjaakotshɛ lá tokakambo tɔmɔtshi tona ewɔ la djonyi. Lá Betele, onto l’onto alekɔ l’olemo we nd’eko: amɔtshi lá biro, ankina lá nkuku, kondo lá mvulu k’oleelo. Ankina wakambake lá masinyi ke mposɛ ekanda kondo ke mamanyɛ ekanda, ankina wombake amvulu, wasolake dtshendja, wawongiɛke amasinyi, la nghonyi la nghonyi.

Etena kekambemá olemo efula dje nkotshɛ olemo we nsakola losango. Ekete ke ntondontondo ke Betele ɔkɔpakawɔ nangha nde nkapanyɛ solo ye ma Bible le anto efula. Kolenda kondo ikakanda ikinɛ, yombofundamá ngo lá gkambo gkɔsɔ. Iloyi inalɔndjɛ nde lolendaki olemo we mfunda ikakanda ikɔ, ko yombotomama lá Internet te ankama l’ankama y’eloyi w’ankadjimodji l’andja w’otondo; yombofundama l’amasinyi y’osadju osadju lá Wabetele efula, ko yombotomama ta etshumano ndeka 110 000. Eyale olemo ɔkɔ nke wonanghemá dje okanda mposa, nkfumbo ke Betele wapasambaka nkotshɛ dje olemo we djonyi ɔkɔnɛ we nsakola losango le wɔlɔ wokoke ntshɔ ta ntondo.​—Marko 13:10.

• Okambaka lá Betele na, la akambo akɔ nke yombolonganyɛ́ dje ndjaakotshɛ?

• Olemo ɔkɔ nke w’osadju osadju ase Betele okotshɛkawɔ dje wotshu ta ntondo?