Ɔkɔpa ntɔtanyɛ akambo wɔlɔ dje mfudjɛ ewo k’ɛko ke Bible? Ɔkɔpa ndjewa vɛrsɛ mɔtshi wɔlɔ, onto ɔmɔtshi wɔlɔ, etena ɛmɔtshi kondo ekete ɛmɔtshi lá Bible? Ndo koko woyawombolake nde Otepela we Ndjambe wokoka nkokotshɛ l’okakatano w’ɛko ɔmɔtshi? Nde nghɔsɔ, tshoká ta biblioteke dje Mvulu k’Onkfumi.

Djalake la gkete dje nkoka ntɔtanyɛ akambo wɔlɔ. Tokanela ente opakɔ l’ekanda enkfumɔ we Atemwe ye Yehova yomboposɛ́ dje nsipisoyɛ Bible l’otepela w’inyoko. Koko lá biblioteke dje Mvulu k’Onkfumi, ekanda efula we bango welekɔ. Nkokaka ndjalá ko l’ekadjimwelo wopo la wopo we Bible, la diksionere dje wɔlɔ, kankina ko l’ekanda enkina we wɛ nkoka ndenda. Oyokoka ntshɔ ta biblioteke lá ntondo kondo lá mbisa ke nsanghanyɛ. Nde wambilá ordinatere l’anko, mbala imɔtshi wolekɔ la Watchtower Library. Ewɔ nde programe ɛmɔtshi ke ordinatere enayalaka l’ekanda w’isoko efula. Lá programe ɛkɔ, elekɔ wɔdju dje wɛ nyona nsakiso ke djambá mɔtshi, otepela kondo vɛrsɛ mɔtshi dje Bible.

Nkokaka nkotshɛ ambeki we Kalasa k’Olemo we Teokrasi. Nde ɔmbɔpɛyɛ́ djína lá kalasa ɛkɔ, okoka ntshɔka ta biblioteke dje Mvulu k’Onkfumi nde olonghanyɛ wamba w’ɛko. Olami we kalasa ɛkɔ nde lolendeka biblioteke. Alekɔ la dje nangha la wolo dje ekanda we bango wetasambemake lá biblioteke la akambo wayale l’ɔlɔngɔ. Olami ɔkɔ kondo Temwe enekaka Bible la wɛ wayokoka nkɛnyɛ akambo wanɛ wone. Koko, elekɔ ɔlɛmbɛ dje mposɛ ekanda we biblioteke ma Mvulu k’Onkfumi. Kankina ko ngo nama ekanda ɛkɔ wɔlɔ; epakɔ mfunda l’etei.

Bible ante dje “mba ewo ke Ndjambe,” ngo nyona te onakawɔ “lɔkɔmɔ lona yombisá.” (Woongo 2:1-5) Biblioteke dje Mvulu k’Onkfumi nkokaka nkokotshɛ dje wɛ mbanga nyona lɔkɔmɔ ɔkɔ.

• Gkete dje ntɔtanyɛ akambo gkɔ nke nalekɔ lá biblioteke dje Mvulu k’Onkfumi?

• Okoka nkokotshɛ dje wɛ ndjewa nyona akambo wɔlɔ lá biblioteke na?