Ase Betele wakambake elemo lá wadepartema wopo la wopo, dje olemo we nsakola losango wonangheme wɔlɔ lá mbandja ɛmɔtshi kondo lá mbandja imɔtshi. Wamɔtshi wakambake olemo we nkadjimola ekanda l’etepela enkina; ankina wakambake lá ɛmprimeri dje mposɛ wajurnale, ankina wilake ekanda lá nkombo, ankina wakambake lá wadepo dj’ekanda, ankina wananghake wa-CD la wavideo, kondo ko elemo enkina.

Komite ke filiale nde lolendaka olemo. Iloyi inalɔndjɛ ipɛyɛke Komite ke filiale olemo we nama filiale. Komite ɛkɔ eyalake l’ankɔlɔma isato kondo ndeka, anto wanambewá akambo efula. Komite ke filiale etomelake Iloyi inalɔndjɛ nsango ye olemo l’owila l’owila wona olamakawɔ, la nsango y’ekakatano enkfumɔ wɛnamboposa. Nsango ikɔ ikotshɛke Iloyi inalɔndjɛ lá nsona akambo wanakoka ndjílama l’ekanda we bango la lá nsanghanyɛ y’otshumano la nsanghanyɛ ye gkekete. Watomake mbala la mbala ampɛna ye Iloyi inalɔndjɛ towembola wafiliale la tokotshɛ Wakomite ye filiale dje iwɔ ndjewa nangha elemo w’iwɔko wɔlɔ. (Woongo 11:14) Mpɛna ke Iloyi inalɔndjɛ ananghake akambo efula nde amboyɛ; ananghake ko diskuru dje nkeketshɛ ansakodji we l’owila we filiale ɛkɔ.

Wakotshɛke etshumano w’owila ɔkɔ. Winaso amɔtshi lá biro dje filiale wayalake l’olemo we ndjawola amɔ otshumano we bango wowotame. Akristo ankina ko walendake olemo w’anto wanalekɔ l’olemo we lowanga, we wamisionɛrɛ, la w’alami we ndjingandjinga wanakamba l’ewila wenalendama ma filiale ɛkɔ. Walonghanyɛke nsanghanyɛ ye gkekete, walendake olemo we mpika Amvulu y’Onkfumi, la wananghake la wolo dje ekanda wetomame t’etshumano dje ndjaakotshɛ lá djonyi dj’iwɔko. Olemo onkfumɔ wonanghemá la biro dje filiale oyalakawɔ ngo dje nkotshɛ dje olemo we nsakola losango wonangheme l’ɔlɔngɔ.​—1 Kɔrɛntɔ 14:33, 40.

• Komite ke filiale okotshɛkawɔ Iloyi inalondjɛ wopo ɔkɔ nke?

• Biro dje filiale onanghakawɔ elemo ɛkɔ nke?