Dje ndeka nsakola “losango le wɔlɔ” l“ewila enkfumɔ, l’etonga enkfumɔ, l’etepela enkfumɔ, la l’anto ankfumɔ,” tofundake ekanda l’etepela ndeka 700. (Ndjiso 14:6) Okokakiso nangha wom’olemo ɔkɔsɔ wɔpɔ ɔkɔ nke? Otokotshɛka nde oloyi ɔmɔtshi w’amfundji-ekanda la w’ankadjimodji te 3 300 l’andja w’otondo; yankfumɔ ngo Atemwe ye Yehova.

Akambo ofundamakawɔ ntondontondo nde l’Anglɛ. Iloyi inalɔndjɛ walendake olemo we Departema dj’Amfundji lá Biro dj’isoko dj’ekekete nalendaka olemo l’andja w’otondo. Departema gkɔ donghanyɛke olemo we amfundji wanayalaka lá Biro dj’ekekete la we amfundji wanayalaka lá abiro y’afiliale imɔtshi. Wɔlɔ we ndjalá la oloyi w’amfundji we wopo la wopo nde etokotshɛke dje isɔ ntepela akambo we djalelo dj’anto wopo la wopo. Djɔko nde anto we m’ewila efula osangasangakawɔ l’ekanda w’isoko.

Wasiyɛka mfunda, watomake akambo akɔ te ankandjimodji. Wasiyɛka ndenda nde toyɔyi te mbongiɛ tolekɔ la ndjawola toyɔyi tonayombɔwɔngiɛ, akambo ankfumɔ watomamake lá Internet te eloyi w’ankadjimodji l’andja w’otondo. Ankadjimodji akɔ wakadjimolake akambo l’otepela w’iwɔkɔ, ko walendake wɔlɔ dj’epa nyɛnghama lá djoyi mɔtshi, la walendake nde akambo we yombofunda wakokana wɔlɔ la wopo wotepelakawɔ l’otepela w’iwɔko. Wananghake la wolo dje nsɔna “etepela we sikisiki we solo” wenaposɛ ikanyi ye l’Anglɛ wɔlɔ l’otepela w’iwɔko.​—Losanghanyɛ 12:10.

Waordinatɛrɛ ikotshɛke dj’olemo ntshɔ osadju osadju. Ordinatɛrɛ apakoke nkita omfundji kondo onkadjimodji. Koko olemo w’iwɔko nkokaka ntshɔ osadju osadju nde wokambema la waordinatɛrɛ inalekɔ la wadiksiɔnɛrɛ, waprograme y’olemo, la gkete nkina dje nkamba olemo. Atemwe ye Yehova wamonanghá programɛ ɛmɔtshi k’elektronike enetakawɔ système électronique d’édition multilingue (MEPS) dje nkoka mfunda akambo l’epela efula, nonghanyɛ akambo akɔ l’asango, la mbongiɛ akambo ankfumɔ lá ntondo ke ntoma tofunda lá ɛmprimɛri.

Nde onanghakiso olemo onkfumɔ ɔkɔsɔ, eyale kondo dje etepela wepakɔ l’anto efula, la nke? Gkambo nde ɛkɔpa ke Yehova kewɔ nde ente “anto we wopo onkfumɔ wakoke mbika la wakoke mba ewo ke sikisiki ke solo.”​—1 Timɔte 2:3, 4.

• Ekanda w’isoko ofundamakawɔ wopo ɔkɔ nke?

• Okadjimolakiso ekanda w’isoko l’etepela efula nghɔnɛ la nke?