Mbala efula etakawɔ “lowanga” nde onto onakembola nkɛtshi ye bango, onto onadjipola mboka dje anto ankina ndjɔɔlɔnda. Tokoka ntepela ente Yeso koko nyoyalaká nde lowanga, gkambo atomamaka lá looko dje ndjɛ yonangha olemo we mpɛyɛ anto lowiko la ndjipola mboka k’ewiko. (Mateo 20:28) Lɔkɔ ɛkɛnɛ, ambeki we nd’eko wowokola, gkambo wetshɛke wíná efula l’olemo we ‘mpiloyɛ anto ambeki.’ (Mateo 28:19, 20) Amɔtshi wambingelá l’olemo wonetakaso ente “lowanga.”

Lowanga nde onto wosakolaká losango le wɔlɔ wíná onkfumɔ. Atemwe ye Yehova ankfumɔ walekɔ ansakodji we losango le wɔlɔ. Koko, wamɔtshi wamboyalonghanyɛ́ dje ndjalá lowanga l’itshinda, dje ndjetshɛka wíná 70 ngɔndɔ la ngɔndɔ l’olemo we nsakola losango le wɔlɔ. Dje ndonga l’olemo ɔkɔ, anto efula watonake nkamba elemo wenalombaka ndjetshɛ wíná efula. Atemwe imɔtshi wasɔnamake dje ntshɔ tokamba olemo we lowanga l’ekekete lá dtena nalekɔ la djonyi efula dj’ansakodji w’Onkfumi. Iwɔ wetshɛke wíná 130 kondo ndeka l’olemo we nsakola losango le wɔlɔ. Anto wanakamba olemo we lowanga wambekelá la lowiko lopa andekola. Wilake otema amɔ Yehova angapɛyɛ gkete nɛ djonamá dje onto nkoka ndjalá la lowiko. (Mateo 6:31-33; 1 Timɔte 6:6-8) Wanɛ wapakoke nangha olemo we lowanga wíná onkfumɔ wakoka ndjalá lowanga lokotshɛ nde wambowa mbamba. Iwɔ wasakolake wíná 30 kondo 50 lá ngɔndɔ.

Lowanga ɛnyɛnde nde ngandji k’okande Ndjambe l’anto. Ngo te Yeso, iso ko tɛna ente anto efula walekɔ la djonyi efula dje ndjewa Ndjambe la ikanyi ye nd’eko. (Marko 6:34) Ntshende iso tewa akambo wakoká ndjaakotshɛ ma wíná ɔkɔsɔ, dje iwɔ nkoka ndendeyɛ etsho weyayé la bale ntshitshi. Ngandji k’anto nde lotomaka lowanga apɛyɛ l’otema ɔmɔ wíná la nkfulu ye nd’eko dje nkotshɛ anto dje iwɔ nkoka ndjewa losango le wɔlɔ. (Mateo 22:39; 1 Tesalɔnikɛ 2:8) Gkambo gkɔsɔ nkembiɛká djawo dje nd’eko efula, ndjoomamaká te Ndjambe, la ndjɔɔpɛyɛká osasa efula.​—Elemo 20:35.

• Te le wɛ, lowanga oyalakande mo?

• Anto amɔtshi onanghakawɔ olemo we lowanga la nke?