Djína dj’ekina dje Ndjambe mbofundamá lá Mvulu k’Onkfumi enkfumɔ k’Atemwe ye Yehova. Djɔko nde te l’eso, nama mvulu ɛkɔ pɛlɛlɛ la wɔlɔ lá wiso, kondo ko mbɔngiɛ mvulu ɛkɔ, elekɔ djoyi dje lumu la dj’ekekete efula l’etolo ke Ndjambe k’isoko. Onto onkfumɔ nkokaka nkamba olemo ɔkɔ.

Awolá dje ndjɔmba Mvulu ndambo ma mbisa ke losanghanyɛ. Ma mbisa ke losanghanyɛ onkfumɔ, Atemwe y’ampame la ye wamato wayalake l’osasa we ndjɔmba Mvulu k’Onkfumi ndambo dje ndjíla gkete l’ɔlɔngɔ. Mbala ɛmɔ lá lobengo, wɔmbake kankina Mvulu k’Onkfumi wɔlɔwɔlɔ. Nkɔlɔma kondo onkambi onakotshɛ l’olemo ɔmɔtshi nde lolendaka olemo ɔkɔ, lá ndjalonde gkisi nɛnyɛ akambo wanalekɔ la dje nanghemá. Lá ndenda lokopo le Mvulu kewɔ, amɔtshi wɔmbake l’ɔnkɔmbɔ, ankina wasolake loombo la wasi, ankina ko wakfutolake etoko, walonghanyɛke ankɔsa, wasolake ankomba, adindisi la tolendeyɛ, waponyolake gkete lá djala, wimiɛke Mvulu etoko l’andja, la wɔmbake bandja. Kondo mbala ɛmɔ lá mvula, wasonake lofu ɔmɔ dje ndjɔmba djɔmbɔ dj’ekekete. Tɔpɛyɛke wana w’isoko tolelemo tɔmɔtshi ndj’iwɔ ndjewa nɛmɛyɛ etena k’isoko ke nyumiɛ Ndjambe.​—Losanghanyɛ 5:1.

Kotshɛ́ dje nonghanyɛ gkete nambopitana. Mvula la mvula, totɔtanyɛke Mvulu k’Onkfumi wɔlɔwɔlɔ, l’eteyi la l’andja. Nde tɔmɛna ekete ɛmɔtshi kona mpitana, tɔwɔngiɛke dje Mvulu ntshikala ngo wɔlɔ, la dj’epa mpita djɛlɔ opitapita. (2 Ɛkɔndɔ 24:13; 34:10) Mvulu k’Onkfumi k’epá mbindo la kelamemá wɔlɔ nde etena enakoka dje iso nyumiɛ Ndjambe k’isoko. Nde toyapɛyɛ l’olemo ɔkɔ, tɔnghɛnyɛ ente tɔkɔpa ole Yehova ole etena ke owumiɛkiso. (Yeembo 122:1) Kankina ko Mvulu ke nghɔsɔ kɛnamake wɔlɔ le anto wanatodjingie.​—2 Kɔrɛntɔ 6:3.

• Sopakɔ la dje mbopela mbɔngiɛka etena kilakisio Ndjambe lumu la nke?

• Yombolonghanyɛ́ mo dje Mvulu k’Onkfumi ntshikalaka pɛlɛlɛ?