Iso ntshɔká mbala la mbala ta nsanghanyɛ y’isoko kondo nde ɛlɔmba dj’iso ndjitola okonda w’ekekete, ntɔngela yane kondo mvula. Gkambo gkɔ nke Atemwe ye Yehova onanghakiso la wolo dje ntshɔ tosanghana la winaso akristo, eyale tolekɔ l’ekakatano we lowiko, kondo l’enyɔnghɛdji ma mbisa k’olemo?

Nsanghanyɛ itokotshɛke dj’iso ndjoyawoka wɔlɔ. Dje akristo wanɛ osanghanakisɔ l’iwɔ, ɔpɔstɔlɔ Paulo afundaka nghɔnɛ ante: “Toyalende sɔmɛlɛsɔmɛlɛ.” (Hebero 10:24) Otepela ɔkɔsɔ ɔkɔpawɔ nyɛnyɛ nd’ante ‘tokanele wɔlɔwɔlɔ,’ tewane. Etepela we Paulo wetotoma dje nkanelaka winaso. Nde tomona dje ndjewa nkfumbo y’akristo ankina, tonghɛna ente iwɔ koko wayalaki l’ekakatano ɛmɔtshi wena esɔ lawɔ, koko wambosiyɛ ekakatano ɛkɔ. Wakoka ntokotshɛ dje iso koko nsiyɛ ekakatano w’isoko.

Nsanghanyɛ mfudjɛka ombayi we solo. Lá nsanghanyɛ y’isoko, topatshɔka totshumana nde la gkɛndɛlo dje totoko; otshumanakiso nde l’ambayi ye solosolo. Mbala imɔtshi koko tetshɛke wíná sankfumɔ esanga dje nkoka nkanyɛ lá wopo we wɔlɔ. Owakiso wɔlɔ ɔkɔ nke lá nangha nghɔsɔ? Ɛtɔpɛyɛke mbamba k’iso ndjawewa sɔmɛlɛsɔmɛlɛ, la efudjɛke ngandji l’anteyi k’isoko. Ko oka nde winaso ɔmɔtshi amboyala l’ekakatano, topakandakandaka dje ndjookotshɛ, gkambo iso la nde tomboyalá ambayi ye wolo efula. (Woongo 17:17) Nde tosanghana l’anto ankfumɔ w’otshumano w’isoko, tɛnyɛ ente “tokanelana sɔmɛlɛsɔmɛlɛ.”​—1 Kɔrɛntɔ 12:25, 26.

Tokokeketshɛ dje wɛ nsɔna ambayi l’antei k’anto wananangha ɛkɔpa ke Ndjambe. Ongowa ambayi ye nghɔsɔ l’antei k’Atemwe ye Yehova. Tɔmbɔkɔlɔmba dj’epa wɛ ntshika ekete ɛmɔtshi ekopekesanyɛ dje nsanghanaka l’iso.

• Ewɔ wɔlɔ l’eso dje nsanghanaka lá nsanghanyɛ la nke?

• Nghongowanga ndjɛ ya nsanghanyɛ ye otshumano w’isoko wíná ɔkɔ nke?