Anto efula wambɔkɔmbá ntshɔ t’amvulu ye ndjambe gkambo wɛna amɔ lako onto waakotshɛ́ dje iwɔ mba nsakiso lá wepó we gkekete lá gkambo dje lowiko, kankina ko wapawa ekeketshelo lako. Koko ewɔ wɔlɔ dje wɛ ntshɔka ta nsanghanyɛ y’Atemwe ye Yehova la nke? Nghɔnghɛna nke lá nsanghanyɛ ikɔ?

Osasa we ndjalá l’anto we ngandji la w’osangasango. Ma mbisa ke nyoyi ke Yeso, walonghanyɛka akristo l’etshumano. Iwɔ wananghaki nsanghanyɛ dje nyumiɛ Ndjambe, ndjeka Afundelo, la ndjaakeketshɛ yomɛlɛyɔmɛlɛ. (Hebero 10:24, 25) Gkambo nsanghanyɛ y’iwɔkɔ yoyalaká nde y’anto we ngandji, iwɔ waokaki amɔ walekɔ solo l’anteiantei k’ambayi ye solo, amɔ walekɔ onto la won’e ise. (2 Tesalɔnikɛ 1:3; 3 Djɔanɛ 14) Iso koko onanghakisɔ ngo wopo ɔkɔ, ko tokake osasa ngo wopo ɔkɔ.

Wɔlɔ we ndjeka wopo we ndɔnda tɔkfɔ́ te Bible. Ngo te yoyalaká lá deko nambetá, totshumanake ampame, wamato, la wana esanga. Wetsha we wɔlɔ watolakanyɛke ma Bible wopo we ndjewa ndɔnda tɔkfɔ́ te Bible lá lowiko l’isoko le lofu la lofu. (Mvungo K’ɛlɛmbɛ 31:12; Nɛhɛmiya 8:8) Onto l’onto nkokaka ndjɔndɔla nde wambombola wopó, onto l’onto nkokaka ntshumba tembo esanga l’anto ankina, dje nkoka nyɛnyɛ djawo la gkongelo dje nd’eko dj’okristo.​—Hebero 10:23.

Wɔlɔ we nyɛna djawo dj’ɛko le Ndjambe mbokemba. Ɔpɔstɔlɔ Paulo asimelaka otshumano ɔmɔtshi we mfu ye nd’eko ante: “Nkombola dje nkɛɛna, . . . dje nkoka nkeketshana ma djawo dj’onto l’onto, ma djawo dj’inyoko la dj’ɛmi.” (Ɔrɔma 1:11, 12) Te opomanakiso mbala la mbala la win’aso akristo lá nsanghanyɛ y’isoko, djawo la gkano dj’isoko dje ndɔnda tɔkfɔ́ te Bible gkeketalake.

Wɛnyi mo: ongawola ntshɔ ta losanghanyɛ lonɛ loyayé l’otshumano w’isoko dje wɛ nghomɛlɛ nyɛna akambo akasɔ? Wangokosangela wɔlɔ efula. Wapalɔmbaka mfalanga dje onto ndjɔtshɔ lá nsanghanyɛ y’isoko; wapetshɛka donga dje anto ndjilá mfalanga.

• Nsanghanyɛ y’etshumano w’isoko olandakawɔ lokolo le wa na?

• Okokiso mba wɔlɔ ɔkɔ nke nde totshɔ ta nsanghanyɛ y’isoko?