Lá deko la deko, Atemwe ye Yehova wayalaki la ekadjimwelo wopo la wopo we Bible, waposɛki Abible wopo la wopo ma masinyi, la wapeyɛki anto Abible akɔ. Koko l’ekomekomo, toyɛka yɛna djonyi dje mposɛ okadjimwelo onkina we bango wonɛ wokoká nkotshɛ anto dje mba “ewo ke sikisiki ke solo.” (1 Timɔte 2:3, 4) Djɔko nde lá 1950, sowange mposɛ ndambo ndambo okadjimwelo w’isoko we Bible, Okadjimwelo w’andja we bango, l’Anglɛ. Wambokadjimolá Bible gkɔ la wopo we sikisiki kankina ko la gkɔmano l’etepela ndekana 130.

Tayalaki la djonyi dje Bible napakɔ wolo lá nsipoyɛ. Deko nde djeete, etepela ko weyatshikitana. Djɔko nde ekadjimwelo efula we Bible weyalake l’etepela ɛmotshi wepokamá wɔlɔ, gkambo wepaposɛ tokanyi pololo kondo wepatepelamaka efula kape. Kankina koko wambisolá ekanda we Bible wenafundamaki l’ɛwɔ embetá iláá efula. Ekanda ɛkɔ welekɔ l’akambo we sikaa; wepatshikitana efula l’ekanda wenafundamisá ntondontondo. Ma ndenda ekanda ɛkɔ, anto wamboleká nsipoyɛ́ wɔlɔ etepela we Hebre, w’Arameyɛ, la we Grɛkɛ we lá Bible.

Tayalaki la djonyi dje okadjimwelo we Bible wonalɛmɛyɛ Otepela we Ndjambe. Anto wanakadjimolaka Bible wapakɔ la dje nangha akambo lɛdji lɔkɔpawɔ; ewɔ nde la dje ndɔnda afundelo wanafulamisá l’edjimo ke Ndjambe lá wopo we yofundamá l’ekanda we ntondo. Koko olendaka l’ekadjimwelo efula we Bible, ankadjimodji watilá djína dje Ndjambe, Yehova, l’Afundelo w’ekina.

Tayalaki la djonyi dje Bible nɛ djilá Ɔmɛlɛ ekete lumu. (2 Samwɛlɛ 23:2) Lá Bible dje Traduction du monde nouveau, wambokalɔ ndjilá djína dje Yehova mbala te 7 000 laye ekanda we Bible wenambeta iláá ɛnyɛwɔ djína gkɔ, ngo te wɛnyi lá foto ekenyi l’anse. (Yeembo 83:18) Ankadjimodji wonaka akambo efula lá dtena la dtena dje nkoka mposɛ Bible gkɔ. M’anko yomboyɛ yoposɛ Bible dje wɔlɔ ntanga, nɛ bposɛ́ tokanyi te Ndjambe pololo. Kondo nde opakɔ la Bible dj’Okadjimwelo w’andja we bango l’otepela w’inyoko, tombokolɔmba ente yalá la nsawo ke wɔlɔ ke ntangaka Otepela we Yehova lofu la lofu.​—Yosua 1:8; Yeembo 1:2, 3.

• Soye yɛna djonyi dje mposɛ okadjimwelo we bango la nke?

• Onto wɔkɔpá ndjewa ɛkɔpa ke Ndjambe ende la dje ndjalá la nsawo ke wɔlɔ ɛkɔ nke?