Bible ewoyɛka ante ma mbisa ke nyoyi ke Kristo, andakodji w’ongolo wangoposa m’oloyi w’akrito we ntondo, ko wangɛngiɛ solo ke Bible. (Elemo 20:29, 30) Ma mbisa, akambo wayɛka yɛnama ngo wopo ɔkɔ. Wayɛka yovungusanyɛ alako we Yeso la tokanyi t’apanghano, ko lokikristo l’ongolo yomboposa. (2 Timɔte 4:3, 4) Yako wopo ɔkɔ nke okokiso ndjewa lɔkɔ ɛkɛnɛ ente tosipisoyɛ wɔlɔ akambo we Bible olakanyɛnde solo?

Wíná wokokaka dje Yehova ndjisola solo. Yehova ewoyɛka ante lá ‘wíná w’ekomo, ewo ke solo engoyala efula.’ (Danyɛlɛ 12:4) Lá 1870, iloyi imɔtshi y’anto wanɛ wonaki solo wayɛka yɛna amɔ elakanyelo efula we dtolo dje ndjambe wepakɔ ma Bible. M’anko, yomona wopo we nsipisoyɛ wɔlɔ elakanyelo we Bible te yoyalaká ma bango, ko Yehova nyombaakotshɛ dje iwɔ nkoka nsipoyɛ afundelo wɔlɔ.

Anto wanɛ wonaki solo l’otema ɔmɔ wekaka Bible la gkɔmiɛ. Ambeki we Bible akɔ w’otshilo wayalaki la wopo ɔmɔtshi we ndjeka Bible wonɛ ɔlɔndaso kondo lɔko ɛkɛnɛ. Walendaki djoyi m-mɔ m-mɔ dje Bible. Nde wamɔmɔ lá djoyi mɔtshi dje yopoke wɔlɔ, wawonaki avɛrsɛ ankina dje nkoka nkandola djoyi gkɔ. Nde wamɛna amɔ ikanyi ye yombowa yokana l’afundelo ankina we Bible, wafundaki ikanyi ikɔ. Te yotshikaká Bible djoyakandole yomɛlɛ nghonyi, wayɛka y’isola solo lá gkambo dje djína dje Ndjambe l’Onkfumi we nd’eko, dje ɛkɔpa ke Ndjambe lá gkambo dj’anto la looko, wopo we anto wanɛ wambovɔ́ oyalakawɔ, la lá gkambo dje gkongelo dje gkfundjɔ. Ma nyonanyona wopo ɔkɔ, wayɛka yotshungvɔ m’elakanyelo l’akambo efula w’ongolo.​—Djɔanɛ 8:31, 32.

Lá 1879, Ambeki we Bible wɛnaka amɔ wíná ombokoka dje mpoposanyɛ solo. Ko lá mvula ɛkɔ, yombowanga mposɛ jurnale Etange k’Olami kewoyɛ Onkfumi we Yehova [La Tour de Garde annonce le Royaume de Jéhovah], jurnale nɛ oposɛso tii lɔko ɛkɛnɛ. Lá lɔko ɛkɛnɛ, tosakola solo ke Bible l’ewila 240 la l’etepela te ndekana 750. Toyɛki tɔtɛnyi ewo ke solo embofulana wopo ɔkɔnɛ!

• Ma mbisa ke nyoyi ke Kristo, solo ke Bible yoyale mo?

• Sokoke nkalo ndjisola solo ke Bible wopo ɔkɔ nke?