Ndjambe ke sɔlɔ nde Ontongi wɛ nkete nkfumɔ. Apakotshi ewangelo, apakotshi ekomo. (Yeembo 90:2) Nde nde Nkanga nsango yɛ wɔlɔ ye lá Bible. (1 Timɔte 1:11) Nkambo Ndjambe nde lɔmbɔtɔpɛyɛ́ lowiko, eso la djɛ ndjoowumiɛ ngo nde.​—Tangá Ndjiso 4:11.

 Lako onto wɔmɛná Ndjambe nkambo nde alekɔ Edjimo; wopo we lowiko le Ndjambe ndeka wopo we lowiko le ntongami nkfumɔ nalekɔ lá looko. (Djɔanɛ 1:18; 4:24) Koko, toyokoka nyɛna djalelo dje Ndjambe lá ndenda nkete nɛ nyonanghé. Olendaka mbambo la nsoso wopo la wopo, onghɛna ente Ndjambe alekɔ la ngandji kankina ko la djanya efula. Olendaka wopo wɔ andja ewɔ ekekete, onghɛna ente Ndjambe alekɔ la nkfulu efula.​—Tangá Ɔrɔma 1:20.

 Tokoka ndjewa djalelo dje Ndjambe wɔlɔwɔlɔ nde totanga Bible. Bible atosimela akambo wa Ndjambe okopakande la wotonakande, wopo wonanghelakande anto akambo, la wopo wonanghakande nde onto amonangha akambo wa wɔlɔ la akambo apɔlɔ.​—Tangá Yeembo 103:7-10.

 Yeso atepelaka ante: “Papa k’isoko l’olongo, djína djɛko djale ekina.” (Mateo 6:9) Kondo Ndjambe oyalakande la nkombo efula, ende la djína ngo mɔ. Anto l’anto wetake djína nkɔ lá wopo wɔ l’otepela w’iwɔko. Lá Losongomino, mbala efula wetake djína nkɔ amɔ “Yehova.” Koko anto amɔtshi wetake amɔ “Yawe.”​—Tangá Yeembo 83:18.

 Lá Wa bible efula, wamimɛ́ djína djɛ Ndjambe ko wambokitshɛ́ nkombo inkina, tɔsi te Nkfumi kondo Ndjambe.  Koko laye Bible yofundamá, djína djɛ Ndjambe djilamaka mbala te 7 000. Yeso ewoyɛka djína djɛ Ndjambe la wíná we nyolakanyɛká anto akambo wa Ndjambe.​—Tangá Djɔanɛ 17:26.

 Lenda video Ndjambe alekɔ la Djiina?

 Okanele ente ndjolo yomboleka l’andja nde kambo Yehova Ndjambe apatilaka yimba? Anto amɔtshi watepelake amɔ Ndjambe atɛnyɛke ndjolo djɛ ntosɛsa, koko ntshende ongolo.​—Tangá Djakɔbɔ 1:13.

 Ndjambe ilaka onto lumu, nkambo ɔpɛyɛka wolo wɔ nde nsɔna akambo nde nyɔmɛlɛ. Topokaka osasa te eso la wolo wɔ nsɔna sɔmɛlɛ nde tɔkɔpa nkambela Ndjambe ndo topakɔpe? (Yosua 24:15) Koko anto efula ɔsɔnakawɔ nde nanghela winawɔ anto akambo apɔlɔ, djɔko nde ndjolo yombololá lá looko. Yehova okake bale olando efula lá nyɛna akambo apɔlɔ akɔ.​—Tangá Ewangelo 6:5, 6.

 Yehova Ndjambe atilake yimba efula. Akopakande nde toyale l’osasa lá lowiko. Lako ilá, osiyɛ ndjolo inkfumɔ ole anto wanapɔpɔla akambo wanayakala ndjolo. Koko lá wíná ɔkɔsɔ, nde ewa nkambo nkɔ nke otshikande ndjolo ikoyala. Tɔnghɛna djoyi nkɔ lá wekelo we 8.​—Tangá 2 Pɛtɛlɔ 2:9; 3:7, 13.

 Yehova ateta ante tomaleme, tambe la nde ma dɔmbɛlɔ. Ilake onto l’onto yimba. (Yeembo 65:2; 145:18) Akɔpake ntimeyɛ evungá. Ɛnake nde tonangha la wolo dje ndjosangasangɛ, kondo ovungakisɔ lá wíná ɛmɔtshi. Djɔko nde, kondo sɔlɔ eso ase nkɔmɔ, tokoka ndjalá la djokanelo dje wɔlɔ la Ndjambe.​—Tangá Yeembo 103:12-14; Djakɔbɔ 4:8.

 Nkambo Yehova nde lɔtɔpɛyisá lowiko, tolekɔ la dje ndjɔkɔpa ndeka anto ankfumɔ. (Marko 12:30) Nde omboyapɛyɛ lá ndjeka akambo wɛ Ndjambe la nangha akambo wanɛ ɔlɔmbande djɛ wɛ nyɛnyɛ ngandji k’ɛko te nde, ongomalema efula.​—Tangá 1 Timɔte 2:4; 1 Djɔanɛ 5:3.