Yehova, Ɔmɛlɛ nsango ye wɔlɔ, alekɔ Ndjambe k’osasa; nde nkɔpaká nkfumbo iyale l’osasa. (1 Timɔte 1:11) Djɛ ndjalá l’osasa lá bala, ngo bala ndjewama le Lɛta, nkambo bala djɛ nghɔsɔ nde lɔpɛyɛka ambotshi la wana vu. Okristo alekɔ la djɛ nɛmɛyɛ ɛlɛmbɛ wɛ mbandja lá nkambo djɛ mfundjɛ bala lá buku.​—Tangá Luka 2:1, 4, 5.

 Le Ndjambe, bala ewɔ la djɛ ndjalá mo? Le nde, bala ewɔ la djɛ ndjalá nde osangá wɛ mpame la womoto itshinda. Yehova akopakande nde mpame ayale la nkɔmano ye wadji, la wadji koko ayale la nkɔmano te wome. (Hebero 13:4) Apakɔpaka ndjaka bala. (Malaki 2:16) Koko awolake djɛ okristo ndjaka bala ko mpɛtshɛ bala nkina nde wambowunda wadji kondo wome djiwi.​—Tangá Mateo 19:3-6, 9.

 Yehova atongaka mpame la womoto djɛ iwɔ ndjaakotshɛka lá bala. (Ewangelo 2:18) Mpame nde ɔtɛ wɔ nkfumbo; ko alekɔ la djɛ ndjalá onto wɔ ntondo wonanghá la wolo djɛ nkokiɛ mposɛ yɛ demba yɛ nkfumbo, la wetshɛ́ nkfumbo akambo wa Ndjambe. Alekɔ la djɛ nyona la ngandji wɔlɔ wɔ wadjɛko. Mpame la wadji walekɔ la djɛ nkɔpana la nɛmɛyana. Mpame nya wadji ewɔ yankfumɔ ngo anto wa gkɔmɔ, ko djɛ bala ndomba wɔlɔ, ngo onto l’onto ndjewa ndjetsheyɛ winande evunga.​—Tangá Ɛfɛsɛ 4:31, 32; 5:22-25, 33; 1 Pɛtɛlɔ 3:7.

 Nde bala djɛnyo dekɔ l’ekakatano, ngo nyo nyape wadji la wome nyona ndjaananghela akambo la ngandji. (1 Kɔrɛntɔ 13:4, 5) Otepela wɔ Ndjambe wɔpɛnyɛ́ ante dje nsiyɛ ekakatano wɛ bala, wadji la wome walekɔ la djɛ ndjatana.​—Tangá 1 Kɔrɛntɔ 7:10-13.

 Yehova akɔpande nde nyoyale l’osasa. Akopɛyɛ alako wa wɔlɔ efula djɛ nyo ndjɛtshɛ ɔlɛngɛ wɔnyo wɔlɔ. Ɔkopande nde ante nyowa djanya ma balo dj’ambotshi wanyo, iwɔ wanɛnisá olongo ntondo. (Kɔlɔsɛ 3:20) Yehova ɔkɔpande kankina nde ante nyoke osasa wɔ nangha ɛkɔpa kɛ nde, Ontongi, la kɛ Wɔnɛ Nde.​—Tangá Losanghanyɛ 11:9–12:1; Mateo 19:13-15; 21:15, 16.

 Ngo nkamba la wolo dje mbayela wana ekete kɛ ndɛ, etena kɛ ndjetama la esendja kɛ ndɔta. (1 Timɔte 5:8) Koko djɛ wana ndjalá l’osasa, ngo ndjaawekɛ kankina djɛ iwɔ nkɔpa Ndjambe la elakanyelo wɛ nde. (Ɛfɛsɛ 6:4) Ma wopo ɔnɛ ɛnyɛnyo ngandji te Ndjambe, nyongotshikela wana ndjɔmbɔmba k’ekekete efula l’etema. Nde dako nɛ aapɛyɛnyo oyɛwɔ nde ma Otepela wɔ Ndjambe, nyokoka nkfumba tokanyi tɔwɔ wɔlɔ efula.​—Tangá Mvungo K’ɛlɛmbɛ 6:4-7; Woongo 22:6.

 Wana wafulake wɔlɔ te ambotshi wawedjɛ la watómbóla. Walekɔ ko la djonyi djɛ mvungó la ikako. Ekfumbá kɛ nghɔsɔ kengowangoyɛ wana ma eyalelo kɛpɔlɔ. (Woongo 22:15) Koko, epakɔ nsembola wana lonkfunkfulu kondo la losele lako.​—Tangá Kɔlɔsɛ 3:21.

 Atemwe ye Yehova waposɛke ekanda efula dje nkoka nkotshɛ ambotshi la wana. Tokanyi t’ekanda ɛkɔ ndjokanaká la Bible.​—Tangá Yeembo 19:7, 11.