Yehova ambɔtɔpɛyɛ́ opapɛyɛ wɔ wɔlɔ efula Bible, dekɔ la tonkankanda 66. Koko okoka ndawopola ente: ‘Bible yaye mampe? Kange ikɔkɔ yɛ Bible na?’ Djɛ nkadjimola lá weepó wɛsɔ, ntshɔ tokoshishima wopo wɔ losango lɔ Ndjambe lotanaso lá Bible yakome leso.

1. Ntsha anto ndeke lofunisá Bible, lamo otepelaso ente Ndjambe ndeke kanga Bible?

Anto 40 ndeke lofunisá Bible l’ilá k’ɛnɔnyi etengo 1 600, ntepela ente ntateyɛ má 1513 N.D.D. tii tá 98 D.D. Anfunyi yɛkɔ wayalaki la nkopo yɛ mbiko itshikitanyi. Amɔtshi wayalaki anami w’ɛnkɔkɔ, ansaki ndjale la ankfumi yɛ nkanga. Kaanga oyɛwɔ nghɔsɔ, Bible dj’otondo ndjokanaka. Wopo wɔkɔnge nkambo djɛsɔ okokawɔ nanghema? Ladjikɛnde Ndjambe ndeke lolekɔ́ Ikɔkɔ yɛ Bible. (Wala 1 Tesalɔnikɛ 2:13.) Anto wafunisá watafuna tokanyi tɔwɔ, koko iyafune nde tokanyi tɔ Ndjambe. Mande, ‘watshindamaka la nyuma kɛnde.’ a (2 Pɛtɛlɔ 1:21) Ndjambe akambaka la nyuma kɛnde k’ekina djɛ ndɔndjɛ ampame ntepela ente ndatshinda dj’iwɔ mfuna tokanyi tɔnde.—2 Timɔte 3:16.

2. Bible oyɛwɔ djɛ wa na?

‘Ewila enkfumɔ, tɔkɔlɛ, etepela la anto ankfumɔ’ nkoka mba wapɔ má ndjewa nsango yɛ wɔlɔ yetepela Bible. (Wala Ndjiso 14:6.) Ndjambe ananghaka djɛ Bible mposa l’etepela efula ntshikitana l’enkanda enkina weposɛ wana w’anto. Onto onkfumɔ nkoka ndjala la Bible. Djoyi djɛsɔ dekɔ nsɔsɔlɔ ayale edjena kɛkɔnge k’oyɛ kana otepela wɔkɔnge w’otepelɛ.

3. Yehova ndananghe mo djɛ Bible namema?

Bible djefunamaka la nkete djetshikitanyi djepatshikala ilá, etengo mposo y’anyama, la papirisɛ. Koko anto wakɔpaki Bible wasangolaka edjinge wakalɔka nsangola la ɛwɔ. Kaanga anto amɔtshi wayalaki la nkfulu k’efula yahone ntshita Bible, anto ankina wayalaki entshupa djɛ djila mbiko yɛwɔ lá mbalaka ngo djɛ nama Bible. Yehova atawola kaanga ekete kana onto ndooshimba djɛnde ntewola losango lɔnde. Bible ntepelaka ante: ‘Otepela wɔ Ndjambe kɛso wongotshikala lotshinda lotshinda.’—Izaya 40:8.

 TSHIMOLA

5. Bible djelamemaka m’onanyelo

 6. Onkanda w’anto ankfumɔ

Lá nkilika ɛkɔndɔ, Bible alekɔ onkanda womboleka nkadjimɔma la nkapema l’andja w’otondo. Wala Elemo 10:34, 35, ko kadjimola lá weepó wɛnɛ:

• Ladjikɛnge Ndjambe ɔkɔpande dj’Otepela wɔnde nkadjimɔma la ntshanghana l’andja w’otondo?

• Kɛkɔnge kekosasangɛ lá Bible?

 LÁ YOPASƐ

Bible ndekɔ Otepela wɔ Ndjambe, edjinge nde nkɔpaka dj’onto onkfumɔ ndjala la djɛkɔ.

Mvungo

• Winá w’otepelaso ente Ndjambe atshindaka anto má nyuma kɛnde k’ekina djɛ mfuna Bible, kɛkɔnge kesakisola djoyi djɛsɔ?

• Kɛkɔnge kembokokamoyɛ lá wopo wɔ Bible yombolamema, yombokadjimɔma, edjinge yombokapanyema?

• Oyawokɛ ngete mo winá w’ewɛ ente Ndjambe ananghaka la wolo djɛ ntɔmpɛyɛ Otepela wɔnde?