WEKELO 16

Kɛkɔnge kɛ Yeso ndananghe winá wɔ ndayalaka lanɛ lá looko?

NDJOKA LÁ

Anto efula ndɔsaka Yeso etengo wɔna wɔ daambi wopalekɔ l’onseedji, etengo ɔprɔfɛtɛ ɔmɔtshi wɔ yimba kana etengo mpame kɛmɔtshi kesuwa la nyɔyi. Iso nkoka ndjewa akambo efula walendana lande má nshishima lowiko lɔnde lɔ lanɛ lá looko? Lá wekelo wɔnɛ, tɔngɛna akambo amɔtshi waleka djonyi wa Yeso ndananghe edjinge wopo w’okokawɔ nkokotshɛ́.

1. Olemo wɔkɔnge wolekisá djonyi le Yeso?

Olemo wolekisá djonyi le Yeso nde ‘ndjewoyɛ losango lɔ wɔlɔ l’Onkfumi wɔ Ndjambe.’ (Wala Luka 4:43.) Nde apoposanyɛki losango lɔ wɔlɔ l’ente Ndjambe angila onkfumi kana lowandji, longimɛ akambo ankfumɔ wɛnyɛ anto ndjolo. a L’ilá k’ɛnɔnyi esato l’etenyi, Yeso apoposanyɛka losango l’okembɛ lɔsɔ l’entete k’enkfumɔ.—Mateo 9:35.

2. Ansese wa Yeso ndananghaka yɛnyɛka nge?

Bible ntepelaka ‘ansese, akambo wa nkfulu, akambo wa nkamɔ la tolembetelo tɔ Ndjambe ndananghe má lotshimbo [lɔ Yeso].’ (Elemo 2:22) Má nkfulu kɛ Ndjambe, Yeso ayalaka l’akoka wa mvumbɛ mpoyi yɛ nkekete, ndesɛ miliyɔ y’anto, nsadjɛ ase elando edjinge kaanga nkfundola edjo. (Mateo 8:23-27; 14:15-21; Marko 6:56; Luka 7:11-17) Ansese wa Yeso ndananghe wɛnyɛka papoo ente ndatomamá nde me Ndjambe. Wɛnyɛka lonkina ente Yehova alekɔ la nkfulu kɛ nshiyɛ ekakasano wɛso enkfumɔ.

3. Olakanyelo wɔkɔnge w’okokaso mba má wopo wɔ lowiko lowikisá Yeso?

Yeso alɛmɛyɛki Yehova l’akambo ankfumɔ. (Wala Djɔanɛ 8:29.) Kaanga l’anteyi k’onanyelo, Yeso ananghaka la nkɔmano nkfumɔ akambo ankfumɔ w’ɔlɔmbisá Isɛkɛnde djɛ nangha. Nde ɛnyɛka ante anto nkoka nkambela Ndjambe, kaanga l’anteyi k’ekakasano. Djɛkondeke, Yeso ‘atotshikelaka ndjɔmbɔmba k’iso ndookilika wɔlɔwɔlɔ lá wina wande.’—1 Pɛtɛlɔ 2:21.

TSHIMOLA

Tokolenda wopo wɔ Yeso ndapoposanyɛ losango lɔ wɔlɔ la wɔ ndananghe ansese.

4. Yeso apoposanyɛka losango lɔ wɔlɔ

Yeso akɛndaki nkama yɛ kilɔmɛtrɛ lá entayimbo w’evutu djɛ ntapoposanyɛ losango lɔ wɔlɔ le anto efula. Wala Luka 8:1, ko kadjimola lá weepó wɛnɛ:

Yeso ndapoposanyɛka ngo le anto wayɛki ndowekameyɛ toko?
Welo wɛkɔnge Yeso ndilaka djɛ ntana anto?

Ndjambe alakaka ante Mesiya angoopoposanyɛ losango lɔ wɔlɔ. Wala Izaya 61:1, 2, ko kadjimola lá weepó wɛnɛ:

Wopo wɔkɔnge Yeso ndakotshɛ prɔfɛsi kɛsɔ?
Okanelɛ etemo, anto walekɔ la djonyi djɛ ndjoka losango lɔ wɔlɔ lɔɔko kɛnɛ?

5. Yeso alakanyɛka anto akambo wa nsɔsɔlɔ wa djonyi

Má djiko djɛ nde mpoposanyɛ losango lɔ wɔlɔ lolendaná l’Onkfumi wɔ Ndjambe, Yeso alakanyɛka anto akambo wa djonyi. Tokolenda ndjɔmbɔmba imangha toko yemá nyangho Djamba djɛnde djɛ l’onkókó. Wala Mateo 6:14, 34 edjinge 7:12, ko kadjimola lá weepó wɛnɛ:

Alako wakɔnge wa djonyi Yeso ndapɛyɛ l’avɛrse wanɛ?
Okanelɛ ente mo, alako wasɔ walekɔ djonyi tii lɔɔko kɛnɛ?

6. Yeso ananghaka ansese

Yehova apɛyɛka Yeso nkfulu kɛ nangha ansese efula. Djɛ nyɛna ndjɔmbɔmba kɛmɔtshi, wala Marko 5:25-34 kana lenda VIDEO. Ko masɔ kadjimola lá weepó wɛwɔlamá.

VIDEO: Yeso ambosadjɛ omoto ɔmɔtshi (5:10)

Lá video djɛnɛ, kɛkɔnge k’awolisá omoto woyalaki l’olando?
Kɛkɔnge kekokamoyɛ lá nsese djɛnɛ?

Wala Djɔanɛ 5:36, ko kadjimola lá woopó wɔnɛ:

Ansese wa Yeso ndananghe ‘okoshikikɛwɔ’ kana ɔkɛnyɛwɔ nge lá nkambo djɛnde?

Ongewake?

Akambo efula w’ewaso lá nkambo djɛ Yeso ntepelamá l’enkanda ɛnɛyi welá Bible w’etawɔ Evanjiliyo ntepela ente: Mateo, Marko, Luka la Djɔanɛ. Onfunyi onkfumɔ w’Evanjiliyo afunaka akambo amɔtshi watshikitanyi walendana la Yeso. Enkanda wɛkɔ ɛnɛyi ntokotshɛka djɛ ndembetela lowiko lɔ Yeso wɔlɔwɔlɔ.

MATEO

ndeke lofunisá Evanjiliyo wɔnde ntondo. Wɔkɔkɔmɛ nghɔmɔ ɛnsɔsɔ lá elakanyelo wɛ Yeso, pekapeka lá kɛnɛ kɛ ndatepela lá nkambo dj’onkfumi wɔ Ndjambe.
MARKO

afunaka Evanjiliyo woleka itenyi. Wɔkɔndɔla akambo efula wa wɔlɔ.
LUKA

ntoshimelaka wopo wɔ lɔlɔmbɔ yayalaka djonyi efula le Yeso la wopo wɔ ndananghelaka amato akambo.
DJƆANƐ

Ntɛnyɛka akambo efula walendana la lonto lɔ Yeso má wamba efula wa Yeso ndasawola nya tolongo tɔnde l’anto ankina.