WEKELO 17
Wopo w’onto wɔkɔnge wolekɔ́ Yeso?
Winá w’ekaso akambo wa Yeso ndatepelá la ndananghaká winá wɔ ndayalaka lá looko, tɔnghɛna wekeka wangototshinda djɛ ndasukanyɛ lande edjinge la Papa kɛnde, Yehova. Iya wekeka amɔtshi wakɔnge l’anteyi kɛ wekeka wa wɔlɔ lombombo wasɔ? Wopo wɔkɔnge w’okokaso ndjokola Yeso lá lowiko lɔso?
1. Lá topo tɔkɔnge Yeso oyɛnde ngo ngete Papa kɛnde?
Winá wɔ ndayalaka l’olongo, Yeso ákɔmɛki wopo wɔ Papa kɛnde kɛ ngandji ndananghaká akambo edjinge nde ekaka akambo lombombe me nde l’ila kɛ miliyara y’ɛnɔnyi. Eposelo welekɔ má nkambo djɛsɔ nde, nde ntɔnɔlaka, ndawokaka edjinge nanghaka akambo ngo ngete Papa kɛnde. (Wala Djɔanɛ 5:19.) Lá nsɔsɔlɔ, Yeso ndjokolaka lonto lɔ Papa kɛnde lá yopo yɛ djɔ. Djɛkondeke ndatepela ante: ‘Kanga lɔmɔnyɛna ambɛna Papa.’ (Djɔanɛ 14:9) Winá w’ekɛ akambo walendana la lonto lɔ Yeso, ongolembetela Yehova wɔlɔwɔlɔ. Ndjɔmbɔmba, djandji djɛ Yeso ndokaka anto, nyɛnyɛka wopo wɔ Yehova oyawokakande lá nkambo djɛko.
2. Wopo wɔkɔnge Yeso ndɛnyɛ ante nde nkɔpaka Yehova?
Yeso atepelaka ante: ‘Djɛ andja ndjewa ambɔ lemi nkɔpaka Papa, ngo ngete Papa ndanshimela djɛ nangha, ndeke onanghami.’ (Djɔanɛ 14:31) Winá wɔ ndayalaka lanɛ lá looko, Yeso ɛnyɛka ngandji k’efula kɛ ndokaka Papa kɛnde má ndjala la ntshunamo tende kaanga lá winá woyalaki wolo nangha nkambo djɛsɔ. Yeso akɔpaki lonkina nshimela anto akambo walendana la Papa kɛnde la nkotshɛ́ anto ankina dj’iwɔ ndjala la djokanelo djɛ wɔlɔ la Papa kɛnde.—Djɔanɛ 14:23.
3. Wopo wɔkɔnge Yeso ndɛnyɛ ante nde ndjokaka anto ngandji?
Bible ntepelaka ante Yeso ‘nkɔpaka wana w’anto lombombe.’ (Woongo 8:31, nɔtɛ kelánse kɛ nkishi) Nde ɛnyɛka ngandji kɛsɔ má nkembɛ la nkotshɛ́ anto. Ansese wa ndananghaka watɛnyɛki ngo wolo wɔnde toko, koko edjinge djandji djɛnde. (Marko 1:40-42) Nde ananghelaki anto akambo la ngandji edjinge ipa l’isɔnɔdji. Etepela wɛnde wakembɛki la wɛpɛyɛki anto w’eloko wɛlɔ ankfumɔ wowekameyɛki nkongi. Ngo má ngandji kɛ ndokaka anto ndeke Yeso ndawola nyɛna ndjolo la mvɔ. Koko nde akɔpaki pekapeka anto walɛmɛyɛki akambo wa ndalakanyɛka.—Wala Djɔanɛ 15:13, 14.
TSHIMOLA
Eka djɛ ndjewa akambo efula walendana la lonto lɔ Yeso. Edjinge lenda wopo w’okokɛ ndjala la ngandji edjinge la lokapo etengo nde.
4. Yeso nkɔpaka Papa kɛnde
Ndjɔmbɔmba kɛ Yeso, ntolakanyɛka wopo w’okokaso nyɛnyɛ ngandji k’okaso Ndjambe. Wala Luka 6:12 edjinge Djɔanɛ 15:10; 17:26. M’ɔkɔngɔ wɔ mbala vɛrse nkfumɔ, kadjimola lá woopó wɔnɛ:
-
Lá ndjɔmbɔmba kɛ Yeso, wopo wɔkɔnge w’okokaso nyɛnyɛ ente iso nkɔpaka Yehova?
Yeso akɔpaki Papa kɛnde lombombe la asawolaki nyande winá la winá má lɔlɔmbɔ
5. Yeso ndakiyanyɛka lá nkambo dj’anto walekɔ́ la djonyi dj’okotshɔ
Yeso ahetshɛki ehomba w’anto ankina lá ntondo kɛ wɛnde. Kaanga lá winá wɛ ndalɛmbaka, nde akambaki la winá edjinge wolo wɔnde djɛ nkotshɛ́ anto. Wala Marko 6:30-44, ko kadjimola lá weepó wɛnɛ:
-
Lá ɔkɔndɔ wɔnɛ, wopo wɔkɔnge Yeso ndɛnyɛ ante nde ndakiyanyɛka lá nkambo dj’anto ankina?—Lenda vɛrse 31, 34, 41, edjinge 42.
-
Kɛkɔnge ketshindaki Yeso djɛ nkótshɛ́ anto?—Lenda vɛrse 34.
-
Ladjikɛnde Yeso okolande nde nanghedji djɛ Papa kɛnde, nkambo djɛsɔ okolakanyɛwɔ nge lá nkambo djɛ Yehova?
-
Lá topo tɔkɔnge tɔmɔtshi tokokaso ndjokola eyalelo kɛ Yeso kɛ ndakiyanyɛ lá nkambo dj’anto ankina?
6. Yeso alekɔ kanga lokapo
Yeso ayalaka la lokapo kaanga ndotayala la nkete efula djela demba, nde atokembɛ edjinge iso djɛ ndjala la lokapo. Wala Elemo 20:35, ko kadjimola lá woopó wɔwɔlamá wɔnɛ:
-
Lá nkilika Yeso, wopo wɔkɔnge w’okokaso ndjala l’osasa?
Lenda VIDEO, ko kadjimola lá woopó wɔwɔlamá wɔnɛ:
-
Topo tɔmɔtshi tɔkɔnge t’okokaso nyɛnyɛ lokapo lɔso, ayale kaanga topalekɔ la nkete efula kana okfudji?
Ongewake?
Bible ntokembɛka dj’iso ndɔmbaka Yehova lá djiina djɛ Yeso. (Wala Djɔanɛ 16:23, 24) Winá wɔlɔmbaso nghɔsɔ, tɛnyɛ ente tolekɔ la djedjɛ lá kɛnɛ kɛ Yeso ndananghe djɛ ntokotshɛ́ dj’iso ndjalá tolongo tɔ Yehova.
ANTO EFULA NTEPELAKA AMBƆ: “Ndjambe apatilaka yimba.”
-
Ladjijkɛnde Yeso ndjokolaka lonto lɔ Papa kɛnde, wopo wɔkɔnge nanghedji djɛnde ɛnyɛwɔ ambɔ Yehova ntilaka yimba?
LÁ YOPASƐ
Yeso nkɔpaka Yehova edjinge nkɔpaka anto. Mande Yeso alekɔ etengo Papa kɛnde, winá wɔ ngotaleke ndjewa Yeso, ndeke ngotaleke ndjewa Yehova.
Mvungo
-
Lá nkilika ndjɔmbɔmba kɛ Yeso, wopo wɔkɔnge w’okokaso nyɛnyɛ ngandji k’okaso Yehova?
-
Lá nkilika ndjɔmbɔmba kɛ Yeso, wopo wɔkɔnge w’okokaso nyɛnyɛ ente iso ndjokaka anto ankina ngandji?
-
Djekeka djɛkɔnge djɛ Yeso dj’olekɛ nkɔpa?
TOKANYI TONKINA
Lenda wekeka amɔtshi wa Yeso w’okokɛ ndjokola.
“Djɛ ndjokola Yeso toyale . . .” (Yeso—mboka, nsɔsɔlɔ la lowiko, nkishi 317 lá Otetela)
Lenda lamo oyɛwɔ djonyi ndɔmba lá djiina djɛ Yeso.
‘Lamo ndɔmba lá djiina djɛ Yeso?’ (Etange k’Olami, Ngɔndɔ k’ape 1, 2008 lá Otetela)
Kɛkɔnge ketepela Bible lá nkambo dj’ɛnamelo kɛ Yeso?
Olakanyelo wɔkɔnge w’owaso má wopo wɔ Yeso ndananghelaka amato akambo?
