WEKELO 21
Wopo wɔkɔnge losango lɔ wɔlɔ opoposanyemawɔ?
Má lotshimbo l’Onkfumi wɔnde, Yehova oshiyɛ ekakasano wɛso enkfumɔ lako ilá. Ɔsɔ alekɔ losango lɔ wɔlɔ lombombe lɔsopakoke mbomba ngo le so! Yeso ashimelaka ambeki wande djɛ ntshanghanyɛ losango lɔsɔ le anto ankfumɔ. (Mateo 28:19, 20) Wopo wɔkɔnge Ewakɛ wɛ Yehova okotshɛwɔ ɔlɛmbɛ wɔ Yeso wɔsɔ?
1. Wopo wɔkɔnge Mateo 24:14 okotshamawɔ lɔɔko kɛnɛ?
Yeso ewoyɛka ante: ‘Losango lɔ wɔlɔ l’Onkfumi longopoposanyema lá looko l’otondo.’ (Mateo 24:14) Ewakɛ wɛ Yehova walekɔ l’osasa wɔ nangha olemo wɔ djonyi wɔsɔ. Topoposanyɛ losango lɔ wɔlɔ l’Onkfumi lá looko l’otondo l’etepela ndekana 1 000! Olemo w’ekekete wɔsɔ ndɔmbaka ndjilá welo efula la ndjala l’olonghanyelo wɔ wɔlɔ. Olemo wɔsɔ wopakoke nanghema ipa l’okotshɔ wɔ Yehova.
2. Weló wɛkɔnge w’ilaso djɛ mpoposanyɛ?
Iso mpoposanyɛka lá djena nkfumɔ dj’otanaso anto. Ngo ngete Akristo wa l’ɛtɛndɔ kɛ ntondo, iso mpoposanyɛka ‘mvulu la mvulu.’ (Elemo 5:42) Yopo y’olemo w’ipoposanyɛ yɛ wɔlɔ yɛsɔ ntokotshɛka djɛ mpomana la miliyɔ y’anto ɔnɔnyi onkfumɔ. Ladjikɛnde anto wapayalaka winá enkfumɔ ngo l’amvulu yɛwɔ, iso mpoposanyɛka lonkina lá djena djelá ntshandjawala. Iso mponaka winá enkfumɔ mbamba yɛ nshimela anto ankina akambo walendana la Yehova edjinge tokanyi tɔnde.
3. Oye l’odjito wɔ mpoposanyɛ losango lɔ wɔlɔ na?
Okristo onkfumɔ wɔ nsɔsɔlɔ alekɔ l’odjito wɔ mpoposanyɛ anto ankina losango lɔ wɔlɔ. Tɔngɔsake odjito wɔso wɔsɔ la ntshina lombombe. Iso mpoposanyɛka lá wopo wɛlama l’akoka waso, ladjikɛnde tewa ente mbiko y’anto ilekɔ lá mbalaka. (Wala 1 Timɔte 4:16.) Iso topafutama mfalanga l’olemo wɔso, ladjikɛnde Bible ntpelaka ante: ‘Nyowaka owawa, nyɔpɛyɛ ɔpɛyɛpɛyɛ.’ (Mateo 10:7, 8) Ape anto ankfumɔ ndeke l’awola losango lɔso. Koko kaanga oyɛwɔ nghɔsɔ, iso nkindjɛka mpoposanyɛ ladjikɛnde olemo wɔkɔ wolekɔ etenyi kɛmɔtshi k’ɔtɛmwɛlɔ wɔso edjinge nsasangɛka Yehova.
TSHIMOLA
Tolende welo wila Ewakɛ wɛ Yehova djɛ mpoposanyɛ l’andja w’otondo, la wopo wɔ Yehova otokotshɛ́nde.
Olemo w’ipoposanyɛ l’andja w’otondo: A) Costa Rica, B) États-Unis, C) Bénin, D) Thaïlande, E) Yap, F) Suède
4. Iso nanghaka la wolo djɛ mpoposanyɛ le anto ankfumɔ
Ewakɛ wɛ Yehova ndjilaka weló lombombe djɛ mpoposanyɛ losango lɔ wɔlɔ le anto welá djena nkfumɔ. Lenda VIDEO, ko kadjimola lá woopó wɔwɔlamá.
-
Kɛkɔnge kekokamoyɛ winá w’ɛnɛ weló enkfumɔ wilá Ewakɛ wɛ Yehova djɛ mpoposanyɛ?
Wala Mateo 22:39 edjinge Ɔrɔma 10:13-15, ko kadjimola lá weepó wɛnɛ:
-
Wopo wɔkɔnge olemo wɔso w’ipoposanyɛ ɛnyɛwɔ ente iso nkɔpaka winaso anto?
-
Yehova okakande mo lá nkambo dj’anto wapoposanyɛ losango lɔ wɔlɔ?—Lenda vɛrse 15.
5. Tokamba esanga la Ndjambe
Ɛkɔndɔ efula nyɛnyɛka djɛ Yehova ndeke lɔlɔndjɛ olemo wɔso. Ndjɔmbɔmba, lá Nouvelle-Zélande, wɔnanyɔ Paul apomanaka nya mama kɛmɔtshi l’olemo w’ipoposanyɛ wɔ mvulu la mvulu m’ɔkɔngɔ wɔ midi. Lá nkɛsɛ djɛ lofu lɔkɔ, mama kɛkɔ alɔmbaka Ndjambe, nde alumolaka djiina djɛ Ndjambe, Yehova lá lɔlɔmbɔ lɔnde. Nde alɔmbaka djɛ onto ɔmɔtshi ndjɛ ndoolenda. Paul atepela ante: “Winá esato m’ɔkɔngɔ, nkɔkɔlaka lá lokfuke lɔnde.”
Wala 1 Kɔrɛtɔ 3:9, ko kadjimola lá woopó wɔnɛ:
-
Wopo wɔkɔnge ndjɔmbɔmba k’etengo kɛ wɔnanyɔ welá Nouvelle-Zélande ɛnyɛwɔ ente Yehova ndeke lɔlɔndjɛ olemo wɔso w’ipoposanyɛ?
Wala Elemo 1:8, ko kadjimola lá woopó wɔnɛ:
-
Ladjikɛnge oyɛso la djonyi dj’okotshɔ wɔ Yehova djɛ mpoposanyɛ?
Ongewake?
Mbengo inkfumɔ lá losanghanyɛ lɔso lɔ l’anteyi kɛ lobengo, iso mbaka okfumbelo djɛ ntokotshɛ djɛ mpoposanyɛ wɔlɔ. Ntsha ombingelaká lá losanghanyɛ lɔmɔtshi lɔ l’anteyi kɛ lobengo, okanelɛ mo lá nkambo djɛ okfumbelo wɔpɛyama wɔsɔ?
6. Iso nɛmɛyɛka ɔlɛmbɛ wɔ Ndjambe wotoshimela djɛ mpoposanyɛ
L’eleko kɛ ntondo, antonyi wakɔpaka nshimba ambeki wa Yeso djɛ mpoposanyɛ. Akristo wa ntondo waseelaka lotshungɔ lɔwɔ lɔ mpoposanyɛ má ‘ndjewanyɛ losango lɔ wɔlɔ láka lɛɛta.’ (Filipɛ 1:7) Ewakɛ wɛ Yehova wanangha wopo wɔk’ɔmɔ lɔɔko kɛnɛ. a
Wala Elemo 5:27-42, ko masɔ kadjimola lá woopó wɔnɛ:
-
Ladjikɛnge sopakoke ntshika mpoposanyɛ?—Lenda vɛrse 29, 38, edjinge 39.
ANTO WAKOKA NKOPOLA AMBƆ: “Ladjikɛnge Ewakɛ wɛ Yehova opoposanyɛkawɔ mvulu la mvulu?”
-
Wɛ ngongokadjimola ente mo?
LÁ YOPASƐ
Yeso ashimelaka ambeki wande djɛ mpoposanyɛ losango lɔ wɔlɔ l’andja w’otondo. Yehova akotshɛ enkambi wɛnde djɛ nkamba olemo wɔsɔ.
Mvungo
-
Wopo wɔkɔnge losango lɔ wɔlɔ opoposanyemawɔ l’andja w’otondo?
-
Wopo wɔkɔnge olemo wɔso w’ipoposanyɛ ɛnyɛwɔ ente iso nkɔpaka winaso anto?
-
Okanela ente olemo w’ipoposanyɛ nkoka ntɔpɛyɛ osasa? Lamo?
TOKANYI TONKINA
Lenda wopo wɔ Ewakɛ wɛ Yehova opoposanyɛwɔ l’angando yɛ nkekete.
Olemo w’ipoposanyɛ wotshikitanyi wonanghemaka lá Paris (5:11)
Welo wɛkɔnge wilisá Ewakɛ wɛ Yehova djɛ mpoposanyɛ ase olotshi?
Ekameyɛ wopo w’ɔkɔndɔla nsakodji kɛmɔtshi osasa wolekɔ́ lande lá wopo w’oyapɛyɛnde l’olemo w’ipoposanyɛ.
Hona djɛ ndjewa donga dj’isawa lá tominanyi djembokotshɛ́ djɛ losango lɔ wɔlɔ ntshɔ tá ntondo.
a Ndjambe ndeke lototoma djɛ mpoposanyɛ. Djɛkondeke, iso Ewakɛ wɛ Yehova topalekɔ la djonyi djɛ lotshungɔ lɔ me ewandji wɛ wana w’anto djɛ mpoposanyɛ losango lɔ wɔlɔ.
