Wɛ ombovusɛka onto ɔmɔtshi w’ɔkɔpɛ? Lá winá wɔ yɛnyi wɔsɔ, wɛ nkoka ndawopola mbala imɔtshi ente: ‘Oyalakaso mo ntsha tombovɔ? Langɛna anto wami kana tolongo tɔmi tombovɔ́ lofu lɔmɔtshi?’ Lá wekelo wɔnɛ la wokilika, tongisola nsakiso yekembɛ yemá Bible.

1. Oyalakaso mo ntsha tombovɔ?

Yeso ɛdjɛka nyɔyi l’ilɔ yɛ wolo. Onto wolekɔ́ l’ilɔ yɛ wolo apewe akambo ankfumɔ waheta l’edjena k’oyɛnde. Wopo wɔkɔnge nyɔyi oyɛnde ngete ilɔ? M’ɔkɔngɔ wɔ onto mvɔ, nde apoke olando lonkina. Nde apoyawoke olengedji ayale ngandji kɛkɔnge kɛ ndokaka tolongo tɔnde kana ase nkfumbo kɛnde. Bible ntepelaka ante: ‘Waambovɔ́ wapewe kaanga djoyi.’—Wala Losanghanyɛ 9:5.

2. Wapɔ wɔkɔnge w’owaso má ndjewa nsɔsɔlɔ lá nkambo djɛ nyɔyi?

Anto efula ndjokaka nyɔyi edjinge kaanga edjo wɔma! Koko akambo watepela Bible lá nkambo djɛ nyɔyi nkoka nkokembɛ. Yeso atepelaka ante: ‘Akambo wa nsɔsɔlɔ wangonyotshungola.’ (Djɔanɛ 8:32) Lá lɛdji lotshikitana la kɛnɛ kɛ nkɛlɛsiya mɔtshi olakanyɛwɔ, Bible apalakanyɛ ante onto alekɔ l’anyima wapavu wakindjɛka mbika m’ɔkɔngɔ wɔ nyɔyi. Djɛkondeke lako onto wɛna ndjolo m’ɔkɔngɔ wɔ nyɔyi. Lonkina, ladjikɛnde anto wambovɔ wapewe kaanga djoyi mmɔ, iwɔ wapakoke ntonanghela nyɛtshi. Djɛkondeke topakoke ndaananghela akambo amɔtshi djɛ nkitshakitshɛ nkɛlɛ kɛwɔ kana ndaatɛmɔla edjinge topakoke ndɔmba lá nkambo djɛwɔ.

Anto amɔtshi ntepelaka ambɔ iwɔ nkoka nsawola l’edjo. Ntshende nkambo ntshɔ mpakoke nanghema. Ngete sɔmbɛna, anto wambovɔ ‘wapewe djoyi.’ Anto wakanelá ambɔ wangosawolake l’anto wawɔ wa ngandji wambovɔ, osawolakawɔ winá enkfumɔ nde l’ɛdjɛngɛ wɛlɔta alemba w’anto wambovɔ. Okama papoo djɛ ndjewa nsɔsɔlɔ lá nkambo djɛ nyɔyi ntolamaka me ɛdjɛngɛ. Yehova ntoshimbaka dj’ipa iso nsawola la waambovɔ, ladjikɛnde nde ndjewaka ante nangha nkambo djɛsɔ oyɛwɔ nde nsawola l’ɛdjɛngɛ edjinge nkambo djɛsɔ ngotoyakala mbalaka.—Wala Mvungo K’ɛlɛmbɛ 18:10-12.

3. Hona djɛ ndjewa wopo w’oyalakaso nsɔsɔlɔ ntsha tombovɔ

L’andja w’otondo, anto walekɔ la tokanyi totshikitanyi lá kɛnɛ keheteka m’ɔkɔngɔ wɔ nyɔyi k’onto. Ɛɛlé, apalekɔ tokanyi tonkfumɔ tɔsɔ ndeke nsɔsɔlɔ.

• Kɛkɔnge kɛ anto efula wa l’edjena k’oyalɛ awolakawɔ lá nkambo djɛ wopo woyalakaso ntsha tombovɔ?

 4. Wapɔ w’owaso má ndjewa nsɔsɔlɔ lá nkambo djɛ nyɔyi

Ndjewa nsɔsɔlɔ lá nkambo djɛ nyɔyi ntotshungolaka má wɔma wɔ waambovɔ́. Wala Losanghanyɛ 9:10, ko kadjimola lá woopó wɔnɛ:

• Oyɛwɔ mo, anto wambovɔ́ nkoka ntonanghela nyɛtshi?

Akambo wa nsɔsɔlɔ welá Bible ntotshungolaka lonkina má tokanyi t’anto watepelá ambɔ iso ladjɛ nkitshakitshɛ nkɛlɛ kɛ anto wambovɔ́ kana kaanga ndaatɛmɔla. Wala Izaya 8:19 edjinge Ndjiso 4:11, ko kadjimola lá woopó wɔnɛ:

• Okanelɛ mo, wopo wɔkɔnge Yehova ɔsande onto wɔtɛmɔla anto wambovɔ kana wohona okotshɔ mewɔ?

5. Ndjewa nsɔsɔlɔ lá nkambo djɛ nyɔyi ntokembɛka

Anto efula wekaka ambɔ winá w’iyongovɔ́, wangɔtɛna ndjolo má nanghedji djɛwɔ djɛ nyɛtshi dj’iyananghaka winá w’iyayalaka la lowiko. Koko alekɔ nkambo djekembɛ djɛ ndjewa ente, lako onto wɛna ndjolo m’ɔkɔngɔ wɔ nyɔyi, ayale kaanga akambo wa nyɛtshi wakɔnge w’onto ndananghe. Wala Ɔrɔma 6:7, ko kadjimola lá woopó wɔnɛ:

• Ntsha nyɔyi ntshungolaka anto má mpekanto ngo ngete Bible otepelande, okanela ente anto wambovɔ́ wɛna ndjolo l’ɔtɛ w’evunga wɛwɔ wemboheta?

Winá wɔ sotaleke ndjewa Yehova, ndeke songoleka nsipisoyɛ ente Yehova apɛnyɛká anto wambovɔ́ ndjolo kaanga ndambo daambi. Wala Mvungo k’Ɛlɛmbɛ 32:4 edjinge 1 Djɔanɛ 4:8, ko kadjimola lá weepó wɛnɛ:

• Ndjambe kelekɔ́ la wekeka wotepelawɔ lá avɛrse wanɛ, nkoka nyɛnyɛ anto wambovɔ́ ndjolo?

• Ɔmbɛna ente ndjewa nsɔsɔlɔ lá nkambo djɛ nyɔyi ntokembɛka? Lamo?

 LÁ YOPASƐ

Winá wɔ onto ovɔnde, lowiko lɔnde ndjopɛka. Anto wambovɔ wapɛnyi ndjolo edjinge wapakoke nanghela anto wawika nyɛtshi.

Mvungo

• Oyalakaso mo ntsha tombovɔ?

• Wapɔ wɔkɔnge w’owaso má ndjewa nsɔsɔlɔ lá nkambo djɛ nyɔyi?

• Wopo wɔkɔnge ndjewa nsɔsɔlɔ lá nkambo djɛ nyɔyi otokembɛwɔ?