WEKELO 35
Wopo wɔ ndɔsa akano wa wɔlɔ
Isankfumɔ tɔngɔsake akano. Akano efula w’ɔsaso nkoka ntoposeyɛ lɔɔla lɔ wɔlɔ kana lɔ nyɛtshi leso edjinge lá djokanelo djɛso la Yehova. Ndjɔmbɔmba, tokoka ndɔsa nkano djɛ nsɔna edjena kɛ ntintasɛ, olemo wɔ nkamba djɛ mba lofalanga, kana nkano djɛ ntshuka. Ntsha iso ndɔsa akano wa wɔlɔ, tongoyala l’osasa la tongosasangɛ Yehova.
1. Wopo wɔkɔnge Bible okokande ntokotshɛ́ djɛ ndɔsa akano wa wɔlɔ?
Lá ntondo kɛ ndɔsa nkano, lɔmba Yehova okotshɔ la wala Bible djɛ ndjewa ikanyi yɛnde lá nkambo djɛkɔ. (Wala Woongo 2:3-6.) L’akambo amɔtshi Yehova ambila ɔlɛmbɛ wokama papoo. Djɛkondeke, nkano djeleka wɔlɔ ndɔsa nde, nɛmɛyɛ ɛlɛmbɛ wɛnde.
Otepelaso mo ntsha Bible mpalekɔ l’ɔlɛmbɛ kɔɔ lá nkambo dj’ɔkɔpɛ nangha? Yehova angokindjɛ nkɔlɔndjɛ ‘lá mboka k’okokɛ nkɛnda.’ (Izaya 48:17) Lá wopo wɔkɔnge? Tɔkfɔ tɔmɔtshi tokoka nkɔlɔndjɛ. Tɔkfɔ telá Bible tolekɔ wayi wa nsɔsɔlɔ watɛnyɛ tokanyi la wopo wɔ Ndjambe okakande. Winá wowalaso djamba mɔtshi djelá Bible, iso ndjisolaka ikanyi yɛ Ndjambe lá nkambo la nkambo. Winá w’osipisoyɛso wopo wɔ Yehova okande, tɔngɔsa akano wosasangɛ.
2. Akambo wakɔnge w’okokaso ntɔnɔla lá ntondo kɛ ndɔsa nkano?
Bible ntepelaka ante: ‘Onto wɔ ntɔnɔ ntɔnɔlaka lá djina nkfumɔ dj’otapolande.’ (Woongo 14:15) Nkambo ntshɔ nsakisolaka ante, lá ntondo k’iso ndɔsa nkano mɔtshi, ngo iso ntɔnɔlaka lá kɛnɛ kengoposá. Winá wɔtɔnɔlɛ lá nkambo la nkambo, lokawopole ente: ‘Ikfɔ yɛkɔnge yelá Bible yokokami nkamba la yɛkɔ lá nkambo djɛnɛ? Nkano djɛkɔnge djekoka mpɛyɛ lemi mvu djɛ l’eteyi k’oloko? Nkano djɛmi okokawɔ ndjala la lɔɔla lɔkɔnge t’anto ankina? Nkambo deki djonyi nde ndaawopola ente, nkano djɛ mɔmɔsa djɛnɛ ngosasangɛ Yehova?’—Mvungo K’ɛlɛmbɛ 32:29.
Ngo Yehova toko ndeke lokoka ntoshimela akambo walekɔ́ wɔlɔ la wa nyɛtshi. Winá w’osipisoyɛso ɛlɛmbɛ la tɔkfɔ tɔnde, la wɔsaso nkano djɛ nɛmɛyɛ akambo wakɔ, tongoyala la nkfum’oloko kɛ wɔlɔ. Nkfum’oloko alekɔ enanghedji kɛso kɛ lowotshɔ kɛtɛnyɛ́ akano w’ɔsaso ntsha walekɔ wɔlɔ kana nyɛtshi. (Ɔrɔma 2:14, 15) Nkfum’oloko kembokfumbamá l’akambo wa wɔlɔ ntokotshɛka djɛ ndɔsa akano wa wɔlɔ.
TSHIMOLA
Lenda akambo ankina wɛnyɛ djonyi djelekɔ́ la tɔkfɔ telá Bible edjinge wopo wotokotshɛ́ nkfum’oloko ntsha tɔkɔpa ndɔsa nkano mɔtshi.
3. Awola djɛ Bible nkɔlɔndjɛ
Wopo wɔkɔnge tɔkfɔ telá Bible okokawɔ ntokotshɛ́ winá wɔsaso akano? Lenda VIDEO, ko kadjimola lá weepó wel’anse.
-
Opapɛyɛ wɔkɔnge wɔ ntshó wɔ Yehova ndatɔpɛyɛ?
-
Ladjikɛnge Yehova ndatɔpɛyɛ opapɛyɛ wɔsɔ?
-
Kɛkɔnge kɛ Yehova ndɔtɔpɛyɛ djɛ́ ntokotshɛ́ djɛ nsɔnaka akano wa wɔlɔ?
Djɛ nyɛna ndjɔmbɔmba k’ikfɔ imɔtshi yelekɔ́ lá Bible, wala Ɛfɛsɛ 5:15, 16. Ko m’eteyi, nyosawole wopo w’okokanyo nkamba la ‘winá wɛnyo lá lɛdji loleka wɔlɔ’ djɛ . . .
-
mbalaka Bible lofu la lofu.
-
mpetshɛka winá la wadjɛko kana womɛko, wana wako edjinge l’ambotshi wako.
-
ndjingelaka nsanghanyɛ yel’otshumano.
4. Kfumba nkfum’oloko kɛko djɛ ndɔsa akano wa wɔlɔ
Ntsha ɔlɛmbɛ ɔmɔtshi wokama papɔɔ l’Afunelo wolekɔ lá nkambo mɔtshi, mbɔ koko topangoyala l’okakasano wɔ djewa kɛnɛ k’oyɛso ladjɛ nangha. Iya otepelaso mo ntsha lako ɔlɛmbɛ wɔ kɔɔ? Lenda VIDEO, ko kadjimola lá woopó wɔ l’anse.
-
Lá video djɛnɛ, kɛkɔnge kenanghisá nkaana kɛso Emma djɛ nkfumba nkfum’oloko kɛnde edjinge ndɔsa akano wasasangɛ Yehova?
Ladjikɛnge yopalekɔ́ wɔlɔ ndɔmba anto ankina djɛ ntɔsɛla akano? Wala Hebero 5:14, ko kadjimola lá weepó wɛnɛ:
-
Kaanga oyɛwɔ wɔdju ndɔmba anto ankina djɛ ntɔsɛla akano, ladjikɛnge oyɛwɔ wɔlɔ iso nkamba la nkoka djɛso djɛ ntɔnɔla?
-
Mpeko djɛkɔnge dj’okokaso nkamba la djɛkɔ djɛ nkfumba nkfum’oloko yɛso djɛ ndɔsa akano wa wɔlɔ?
Lá ndjɔmbɔmba kɛ kartɛ, nkfum’oloko kɛso ntokotshɛka djɛ ndɔsa akano wa wɔlɔ
5. Lɛmɛyɛ nkfum’oloko y’anto ankina
Anto ankfumɔ wapɔsaka akano ngo wopo ɔmɔ. Wopo wɔkɔnge w’okokaso nyɛnyɛ ente iso nɛmɛyɛka nkfum’oloko y’anto ankina? Tɔkɔsa ndjɔmbɔmba ipe yɛnɛ:
Ndjɔmbɔmba 1: Nkaana kɛmɔtshi kɛkɔpaka ndaalɛnga la nangha lɔwɔlɛ efula ambɔsɛkɔ t’otshumano ɔmɔtshi wɔ ankaana yel’eteyi efula wapalɔtɛ kana wapananghe lɔwɔlɛ lá yopo yɛsɔ.
Wala Ɔrɔma 15:1 edjinge 1 Kɔrɛtɔ 10:23, 24, ko kadjimola lá weepó wɛnɛ:
-
Lá nkilika avɛrse wanɛ, nkano djɛkɔnge nkaana kɛso okokande ndɔsa? Nkano djɛkɔnge dj’okokɛ ndɔsa ntsha nkfum’oloko kɛko kepakoshimbe djɛ nangha nkambo mɔtshi, koko nkambo djɛkɔ mpasasangɛ nkfum’oloko yɛ winako?
Ndjɔmbɔmba 2: Wɔnanyɔ ɔmɔtshi ndjewaka ante Bible apatopekala djɛ nnɔ waana la wɛdjimo, koko nde ambɔsa nkano djɛ ntona nnɔ waana. Ko wamboweta tá fɛtɛ kɛmɔtshi ko nde ɛna wananyɔ wanɔ waana.
Wala Losanghanyɛ 7:16 edjinge Ɔrɔma 14:1, 10, ko kadjimola lá weepó wɛnɛ:
-
Lá nkilika avɛrse wanɛ, wɔnanyɛnghɛso okokande nangha nge? Okokɛ nangha mo ntsha ɔmbɛna onto ɔmɔtshi anangha nkambo djepasasangɛ nkfum’oloko kɛko?
Akambo wakɔnge wakoka nkokotshɛ́ djɛ ndɔsa akano wa wɔlɔ?
1. Lɔmba Yehova akokotshɛ́ djɛ ndjewa akambo w’okokɛ nangha.—Djakɔbɔ 1:5.
2. Hona lá Bible kana l’enkanda wɛso djɛ ndjewa tɔkfɔ tolendana lá nkambo djɛko. Wɛ nkoka mpona okotshɔ me wananyɔ w’Akristo wewa akambo.
3. Tɔnɔla lá akambo wakoka mposa má nkano djɛko lá nkfum’oloko kɛko edjinge nkfum’oloko y’anto ankina.
ANTO EFULA NTEPELAKA AMBƆ: “Ndekɔ la lotshungɔ lɔ nangha k’enkfumɔ k’ɔkɔpami. Tilake yimba lá tokanyi t’anto ankina!”
-
Ladjikɛnge oyɛso ladjɛ ndjila yimba lá wopo wɔ Ndjambe la anto ankina yongoka?
LÁ YOPASƐ
Iso ndɔsaka akano wa wɔlɔ winá wɛnaso akambo lá wopo ɔmɔtshi etengo Yehova ɛnande la iso nkanela ntsha nanghedji djɛso ngokotshɛ anto ankina kana nghananghela nyɛtshi.
Mvungo
-
Wopo wɔkɔnge w’okokɛ ndɔsa akano wasasangɛ Yehova?
-
Wopo wɔkɔnge w’okokɛ nkfumba nkfum’oloko kɛko?
-
Wopo wɔkɔnge w’okokɛ nyɛnyɛ ente wɛ nɛmɛyɛka nkfum’oloko y’anto ankina?
TOKANYI TONKINA
Wopo wɔkɔnge w’okokɛ ndɔsa akano wangokembɛ djokanelo djɛko nya Ndjambe?
‘Tɔshi akano wasasangɛ Ndjambe’ (Etange k’Olami, Ngɔndɔ k’anɛyi 15, 2011 lá Otetela)
Isola akambo ankina watɛnyɛ wopo wɔ Yehova ɔtɔpɛyɛnde alako.
Lenda akambo wakotshisá olangala ɔmɔtshi djɛ ndɔsa akano amɔtshi wa wolo.
Eka wayi ankina walendena la wopo wɔ Yehova osasangande winá w’oyɛso lá ntondo kɛ nkambo mɔtshi djɛ ndotatɔpɛyɛ ɔlɛmbɛ wɔ kɔɔ.
