WEKELO 37
Ikanyi yɛ Bible lá nkambo dj’olemo la djɛ mfalanga
Ongokiyanake, lá nkambo dj’olemo la mfalanga? Nkoka ndjalá nkambo djɛ wolo nkotshɛ mposɛ yɛso inkfumɔ yelá lowiko la koko ntɛmɔla Yehova lá wopo w’awolande. Bible ntɔpɛyɛka alako wa wɔlɔ wakoka ntokotshɛ́.
1. Ikanyi yɛ Bible lá nkambo dj’olemo oyɛwɔ mo?
Ndjambe nkɔpaka dj’iso nsasanga l’olemo wɔso. Bible ntepelaka ante ‘lako nkambo deka wɔlɔ le onto ko ndeka . . . nsasanga l’olemo wɔnde wɔ wolo.’ (Losanghanyɛ 2:24) Yehova nkambaka efula. Winá w’owokolaso lá ndjalá l’entete l’olemo, iso ndosasangɛka edjinge iso ndjalaka l’osasa.
Olemo wolekɔ djonyi. Koko topakoke ndjawola djɛ olemo ndjalá la djonyi ko ndeka ɔtɛmwɛlɔ wɔso te Yehova. (Djɔanɛ 6:27) Yehova atolaka djɛ ntsha iso mpetshɛ olemo wɔnde l’edjena kɛ ntondo lá lowiko lɔso, nde angɔtɔpɛyɛ ekete k’enkfumɔ k’oyɛso la djonyi.
2. Ndjalá l’ikanyi yɛdje lá nkambo djɛ mfalanga osakisolawɔ nge?
Bible ntepelaka ante ‘mfalanga mbombaka,’ koko apalekɔ ngo mfalanga ndeke lɔtɔpɛyɛ osasa. (Losanghanyɛ 7:12) Djɛkondeke, Bible ntolakaka dj’ipa ndjalá la ngandji kɛ mfalanga, koko ‘djɛ nsasanga la nkete dj’okotshɛso win’ɔsɔ.’ (Wala Hebero 13:5.) Winá w’okindjɛso nsasanga la nkete dj’oyɛso la djɛkɔ, tɔpangoyakiyanyɛ la wopo wɔ sopalekɔ́ l’okfudji. Topangɔsa awasa wapalekɔ́ la ntshina. (Woongo 22:7) Lonkina, topangotomba etombo wɛ mfalanga kana mpona djɛ ndjalá l’okfudji lankeke lankeke.
3. Wopo wɔkɔnge w’okokaso nkamba la mfalanga yɛso lá wopo wɔ wɔlɔ?
Yehova alekɔ Ndjambe kɛ lokapo, edjinge iso ndoowokolaka winá woyalaso ‘entshupa djɛ nkapana l’anto ankina.’ (1 Timɔte 6:18) Yopo yɛ wɔlɔ yɛ nkamba la mfalanga yɛso nde, mpɛyɛ epapɛyɛ l’otshumano la nkotshɛ́ anto walekɔ l’osambo, pekapeka wananyɔ la ankaana yɛso y’Akristo. Nkambo deka djonyi le Yehova nde, donga djetotshinda djɛ mpɛyɛ epapɛyɛ koko apalekɔ efula k’ɔpɛyɛso. Winá wɔpɛyɛso kana w’okapa l’oloko ɔmɔ, tongosasanga edjinge tongosasangɛ oloko wɔ Yehova.—Wala Elemo 20:35.
TSHIMOLA
Tokoshishima wɛlɔ w’okokaso mba má nkindjɛ ndjila olemo l’edjena kɛnde edjinge nkindjɛ nsasanga la nkete dj’okotshɛso.
4. Lumɛ Yehova má wopo wokambɛ olemo
Ilongo yɛso isa Yehova ladjɛ ndjala l’eposelo má wopo w’okambaso olemo. Lenda VIDEO, ko kadjimola lá weepó wel’anse.
-
Lá video djɛnɛ, kɛkɔnge kekokamoyɛ má nyɛna eyalelo keyalaki la Jason l’olemo wɔnde edjinge kɛnɛ kɛ ndananghaka?
-
Nde ndananghe mo djɛ ndjila olemo l’edjena kɛnde?
Wala Kɔlɔsɛ 3:23, 24, ko kadjimola lá woopó wɔnɛ:
-
Ladjikɛnge ndjala l’ikanyi yɛdje lá nkambo djɛ olemo oyɛwɔ djonyi?
Olemo wolekɔ djonyi. Koko wopakoke ndjalá la djonyi ko ndeka ɔtɛmwɛlɔ wɔso te Yehova
5. Iso mbaka wapɔ má nsasanga la nkete dj’okotshɛso
Anto efula nanghaka la wolo djɛ ndjala la mfalanga efula. Koko Bible mpatokembɛ dj’iso ndjalá l’ikanyi yɛsɔ. Wala 1 Timɔte 6:6-8, ko kadjimola lá woopó wɔnɛ:
-
Bible otokembɛnde dj’iso nangha nge?
Iso nkoka ndjalá l’osasa ayale kaanga topalekɔ la nkete efula. Lenda VIDEO, ko kadjimola lá woopó wɔl’anse.
-
Lá video djɛnɛ, kɛkɔnge kekotshɛ́ nkfumbo kɛnɛ djɛ ndjalá l’osasa kaanga yopalekɔ́ la nkete efula?
Iya otepelaso mo, ntsha tolekɔ la mfalanga lombombe koko tokombola ngo ndeka ndjala la inkina? Yeso akambaka la ndjɔmbɔmba kɛnyɛ mbalaka keyɛ má nkambo djɛ nghɔsɔ. Wala Luka 12:15-21, ko kadjimola lá woopó wɔl’anse:
-
Olakanyelo wakɔnge w’owaso má ndjɔmbɔmba kɛ Yeso?—Lenda vɛrse 15.
Wala Woongo 10:22 ko edjɛ edjinge 1 Timɔte 6:10. Ko kadjimola lá weepó wɛnɛ:
-
Etengo le wɛ, nkambo djɛkɔnge djeleka djonyi: Ndjalá ilongo yɛ Yehova ndokoko ndjalá la mfalanga efula? Lamo?
-
Ekakasano wɛkɔnge wekoka mposa ntsha iso ndjalá la ngandji kɛ mfalanga?
6. Yehova angokotshɛ mposɛ yɛso
Ekakasano welendana l’olemo edjinge la mfalanga nkoka ndjila djawo djɛso te Yehova l’ohemba. Lenda VIDEO djɛ ndjewa wopo w’okokaso ndekana wepo w’ekakasano wɛsɔ, ko kadjimola lá weepó wel’anse.
-
Lá video djɛnɛ, ekakasano wɛkɔnge wepomanisá la wɔnanyɔ?
-
Ndananghe mo djɛ ndongela ekakasano wɛkɔ?
Wala Mateo 6:25-34, ko kadjimola lá woopó wɔnɛ:
-
Kɛkɔnge kɛ Yehova olakande anto wahetshɛ elemo wɛnde l’edjena kɛ ntondo lá mbiko yɛwɔ?
ANTO EFULA NTEPELAKA AMBƆ: “Lemi ladjɛ ‘kamba efula djɛ nseeyɛ ehomba wɛ ase nkfumbo kɛmi. Mpangowaka winá wɔ ndjingelaka nsanghanyɛ inkfumɔ yɛ l’otshumano.”
-
Vɛrse djɛkɔnge djɛnyɛ ente mpetshɛ ɔtɛmwɛlɔ wɔ Yehova l’edjena kɛ ntondo alekɔ nkano djɛ wɔlɔ?
LÁ YOPASƐ
Olemo welá demba la mfalanga alekɔ djonyi, koko wopakoke ntilela onkeka djɛ nkambela Yehova.
Mvungo
-
Akambo wakɔnge wangokokotshɛ́ djɛ ndjalá l’ikanyi yɛdje lá nkambo dj’olemo?
-
Wɛlɔ wɛkɔnge ngongowa ntsha wɛ nsasangaka la nkete djelekɔ́ la wɛ?
-
Wopo wɔkɔnge w’okokɛ ndjalá la djawo lá daka djɛ Yehova djɛ nkotshɛ mposɛ y’enkambi wɛnde?
TOKANYI TONKINA
Lenda ntsha Bible ntepelaka ante ndjalá la mfalanga alekɔ nyɛtshi.
“Nsɔsɔlɔ, mfalanga alekɔ odjwe w’akambo ankfumɔ wa nyɛtshi?” (Djamba djelá jw.org)
Eka wopo w’okokaso nkamba la mfalanga yɛso djɛ nsasangɛ Ndjambe.
“Ikanyi yɛ Bible oyɛwɔ mo lá nkambo djɛ lokapo?” (Djamba djelá jw.org)
Etombo wɛ mfalanga welekɔ wɔlɔ?
“Ikanyi yɛ Bible lá nkambo dj’etombo wɛ mfalanga?” (Wetshɔ!, Ngɔndɔ k’asato 2015 lá Otetela)
Lenda akambo wakotshisá mpame kɛmɔtshi djɛ ntshika ntomba etombo wɛ mfalanga la wibi.
“Lakɔpaki etombo wɛ mpunda efula” (Etange k’Olami, Ngɔndɔ kɛ djomi l’ɔmɔ 1, 2011 lá Otetela)
