WEKELO 38
Tɔsasange l’opapɛyɛ wɔ lowiko
Lowiko lokoka ndola l’akambo wa wɔlɔ efula. Kaanga winá w’oyɛso l’ekakasano, tokoka nsasanga l’akambo amɔtshi welá lowiko. Wopo wɔkɔnge w’okokaso nyɛnyɛ Yehova ente iso ndɔsaka opapɛyɛ wɔ lowiko la ntshina? Edjinge elonga kɛkɔnge kɛ djonyi ketotshinda djɛ nangha nkambo djɛsɔ?
1. Lamo oyɛso ladjɛ nsasanga la lowiko?
Ɛdje dj’iso nsasanga la lowiko, ladjikɛnde oyɛwɔnde opapɛyɛ wimé Papa kɛso kɛ ngandji, Yehova. Nde ndeke ‘ikɔkɔ yɛ lowiko’—ntepela ente kanga lotongisá nkete nkfumɔ djelekɔ́ la lowiko. (Yeembo 36:9) ‘Ladjikɛnde ngo nde ndeke lɔpɛyɛ anto ankfumɔ lowiko, lohomo edjinge nkete nkfumɔ.’ (Elemo 17:25, 28) Yehova ntɔpɛyɛka ekete k’enkfumɔ k’oyɛso la djonyi djɛ ndjalá la lowiko. Koko apakome ngo lasɔ toko, nde nanghaka akambo ankina watokotshɛ dj’iso nsasanga la lowiko.—Wala Elemo 14:17.
2. Wopo wɔkɔnge w’okokaso nyɛnyɛ Yehova ente iso nsasangaka l’opapɛyɛ wɔ lowiko?
Yehova ɔsaka lowiko lɔko la ntshina efula, ngo má winá wɔ ngayalaka lá kfundu djɛ mama kɛko. Má okotshɔ wɔ nyuma kɛnde, Davidɛ alɔmbaka Yehova ante: ‘Wiso wako wanyɛnaka kaanga winá wɔ mayalaka okele.’ (Yeembo 139:16) Yehova ndɔsaka lowiko lɔko la ntshina efula. (Wala Mateo 10:29-31.) Nde nkiyanaka efula winá w’onto ɔmɔtshi oyakande winande l’onkonda kana oyayakande. a (Eposelo 20:13) Yehova ndjalaka lokiyano lonkina, winá w’ilaso mbiko yɛso lá mbalaka ngo nghotoko kana tɔpɔshi akano wa nama mbiko y’anto ankina. Winá w’olamaso mbiko yɛso la y’anto ankina, tɔngɛnyɛ ente tolekɔ la djedjɛ lá lowiko, opapɛyɛ wɔ ntshina wɔtɔpɛyisá Yehova.
TSHIMOLA
Tokoshishima akambo amɔtshi w’okokaso nangha djɛ nyɛnyɛ ente iso nsasangaka la lowiko ɔpapɛyɛ wime Yehova.
3. Lama demba djɛko
Akristo wamboyalambola nkambelaka Yehova lowiko lɔwɔ l’otondo. Alekɔ etengo iwɔ ndambolaka alemba wawɔ etengo olambo te Ndjambe. Wala Ɔrɔma 12:1, 2, ko kadjimola lá weepó wɛnɛ:
-
Kɛkɔnge kekoka nkotshinda djɛ wɛ nama demba djɛko?
-
Topo tɔmɔtshi tɔkɔnge t’okokɛ nangha nkambo djɛsɔ?
4. Ɔsa nkano dj’ipa mpotadjɛ kana ndjaka onto
Bible ntokembɛka dj’iso ntona nanghedji nkfumɔ djekoka ndjila lowiko lá mbalaka. Lenda VIDEO djɛ ndjewa akambo amɔtshi w’okokɛ nangha djɛ ndaalama.
Wala Woongo 22:3, ko nyosawole wopo w’okokanyo ndaalama la nama anto ankina . . .
-
lá nkfumbo kɛko.
-
lá edjena kɛko k’olemo.
-
winá w’onanghɛ etombo.
-
winá wɔ ngotakɛndjɛ otuka, otutu kana nkalo.
5. Ɔsa lowiko lɔ wɔna wotawotshɔ la ntshina
Lá yeembo yɛnde, Davidɛ atepelaka wopo wɔ Yehova ɔsande lowiko edjinge lá wopo wilande yimba lá nkambo dj’ofulelo wɔ wɔna wotawotshɔ. Wala Yeembo 139:13-17, ko kadjimola lá woopó wɔnɛ:
-
Lá wiso wa Yehova, lowiko l’onto mbangaka winá w’oyɛnde lá kfundu djɛ nyɛnghɛnde ndokoko winá w’owotshɔnde?
Ɛlɛmbɛ wɛ Yehova ndapɛyɛ ase Isariyɛlɛ yɛ l’etsho wɛ ntondo walamaki wa nyɔ la wana wawɔ walekɔ́ lá nkfundu. Wala Eposelo 21:22, 23, ko kadjimola lá weepó wɛnɛ:
-
Wopo wɔkɔnge Yehova ndɔsaká onto woyaka wɔna wotawotshɔ ape l’onkonda?
-
Yehova ndokaka ngete mo, ntsha onto ambonangha nkambo djɛsɔ l’onkonda? b
-
Wopo wɔkɔnge w’ɔsɛ ikanyi yɛ Ndjambe yɛsɔ?
Lá winá ɛmɔtshi, kaanga omoto wɔsa lowiko l’odjito nkoka nkanela ante mposɛ djemi lako nyɛtshi. Wala Izaya 41:10, ko kadjimola lá weepó wɛnɛ:
-
Ntsha watshinda mama kɛmɔtshi djɛnde mposɛ djemi, lena okokande mpona okotshɔ? Lamo?
ANTO EFULA NTEPELAKA AMBƆ: “Omoto ndeke l’okoka ndɔsa nkano djɛ mposɛ djemi kana lako, ladjikɛnde oyɛwɔnde djemi djɛnde.”
-
Kɛkɔnge ketoshikikɛ ente Yehova ndɔsaka lowiko lɔ mama la lɔ wɔna wolekɔ lá kfundu djɛnde la ntshina?
LÁ YOPASƐ
Bible ntolakanyɛka djɛ nkɔpa la nama lowiko opapɛyɛ wɔ Yehova ndɔtɔpɛyɛ. Nkambo djɛsɔ nsakisolaka lowiko lɔso la l’anto ankina.
Mvungo
-
Ladjikɛnge lowiko l’onto oyɛwɔ la ntshina lá wiso wa Yehova?
-
Yehova okakande mo, winá w’onto oyakande winande l’onkonda?
-
Ladjikɛnge oyɛ la djedjɛ l’opapɛyɛ wɔ lowiko?
TOKANYI TONKINA
Wopo wɔkɔnge w’okokaso nkawoyɛ Yehova lokasa l’opapɛyɛ wɔ lowiko lɔ ndatɔpɛyɛ?
Kokadjimola woopó wɔnɛ, Ndjambe angimeyɛ omoto woposisá djemi?
“Kɛkɔnge kɛ Bible otepelande lá nkambo djɛ oposelo wɔ djemi?” (Djamba djelá jw.org)
Eka wopo wɔsa Ndjambe lowiko okokawɔ ndjala l’eposelo lewɛ djɛ nsɔna etombo wɛ wɔlɔ.
Ya otepelaso mo ntsha onto ɔmɔtshi amboyala la tokanyi tɔ ndayaka? Lenda wopo wɔ Bible okokande ntokotshɛ́.
“Ɔkɔpami nde mvu—Bible nkoka nkotshɛ́ lemi winá w’oyɛmi l’ikanyi yɛ ndayaka?” (Djamba djelá jw.org)
a Yehova nkiyanaka efula lá nkambo dj’anto wambatshɛ eloko. (Yeembo 34:18) Nde nsipisoyɛka okiyano w’efula wokoka ntɔla onto djɛ nde ndayaka, edjinge nde nkɔpaka ndookotshɛ́. Djɛ ndjewa wopo w’okotshɔ wɔnde okokawɔ mpɛyɛ onto wolo, wala djamba djelekɔ́ l’ɔtɛ wɔ djoyi ante: “Lemi nkɔpaka mvɔ—Bible nkoka nkotshɛ́ lemi ntsha lamboyala la tokanyi tɔ ndayaka?” Djamba djɛsɔ dekɔ l’etenyi kɛ wekelo wɔnɛ wotepela ante: Tokanyi tonkina.
b Amato wamboposɛka wemi wapakoke ndaawɛmbɛ lowo lá yopo y’indeko, ladjikɛnde Yehova nkoka ndawimeyɛ. Djɛ ndjewa akambo ankina, lenda djamba djelekɔ́ l’ɔtɛ wɔ djoyi ante: “Kɛkɔnge kɛ Bible otepelande lá nkambo djɛ oposelo wɔ djemi?” djelekɔ́ l’etenyi ketepela ante: Tokanyi tonkina lá wekelo wɔnɛ.
