WEKELO 40
Wopo wɔkɔnge w’okokaso ndjalá piyɔɔ lá wiso wa Ndjambe?
Kɔsa djɛ mama kɛmɔtshi kɛ ngandji alɔngɔsɔla wɔnande wɔ mpame djɛ nde ntshɔ tá nkalasa. Nde amboyashikikɛ ante nde ambɔkaka la ntshendja djɛnde dekɔ piyɔɔ edjinge wɔlɔ. Nkambo djɛsɔ namaka demba djɛnde la nyɛnyɛka anto ankina ante ambotshi wande ndoowilaka yimba. Wopo wɔk’ɔmɔ ndeke, Papa kɛso kɛ ngandji Yehova, nkɔpaka dj’iso ndjalá piyɔɔ lá demba la lá nanghedji. Winá woyalakaso piyɔɔ, tongowake isɔmɛlɛ wapɔ edjinge nkambo djɛsɔ numɛka Yehova.
1. Wopo wɔkɔnge w’okokaso ndjalá piyɔɔ lá demba?
Yehova ntoshimelaka ante: ‘Nyo ladjɛ ndjalá ekina.’ (1 Pɛtɛlɔ 1:16) Djɛ ndjalá ekina, iso ladjɛ ndjalá piyɔɔ lá yimba yɛso edjinge lá demba. Iso nkoka ndjalá piyɔɔ lá demba má ndjɔkaka mbala la mbala, nanghaka djɛ ntshendja djɛso, mvulu, otuka, otutu edjinge nkalo djɛso ndjala piyɔɔ la wɔlɔ. Iso nkoka nsuka nonghanyi k’osolelo wɔ Mvulu kɛso k’Onkfumi. Má nkindjɛ ndjala piyɔɔ lá demba, iso mpɛyɛka Yehova lomo.—2 Kɔrɛtɔ 6:3, 4.
2. Dj’iso ndjalá piyɔɔ, nanghedji djɛkɔnge dj’oyɛso ladjɛ ntona?
Bible ntokembɛka dj’iso ‘[ndawɛdjɛ] má mbindo inkfumɔ yelá demba la yelá yimba.’ (2 Kɔrɛtɔ 7:1) Djɛkondeke, iso ladjɛ ntona ekete kenkfumɔ kekoka ntshita demba djɛso kana tokanyi tɔso. Tokanyi tɔso ladjɛ nsasangɛ Yehova, djɛko ndeke iso nanghaka kenkfumɔ k’okokaso nangha djɛ nyimɛ tokanyi tɔ mbindo. (Yeembo 104:34) Iso nanghaka lonkina la wolo djɛ mposɛka ngo etepela wɛ piyɔɔ.—Wala Kɔlɔsɛ 3:8.
Akambo wakɔnge wakoka ntila mbindo lá demba edjinge lá tokanyi? Nkete mɔtshi nkoka ndjila alemba waso mbindo. Djɛkondeke iso ladjɛ ntona nkete dj’etengo ikaya, kangi la nnɔ nnɔ nkina djɛ wolo. Winá w’otonaso nkete djɛsɔ, tongoyalake l’alemba wa wɔlɔ edjinge tɔngɛnyɛke ente iso ndɔsaka lowiko, opapɛyɛ wɔ Yehova ndɔtɔpɛyɛ la ntshina. Iso nanghaka la wolo djɛ ndjalá piyɔɔ lá tokanyi winá w’otonaso nanghedji djɛ nyɛtshi dj’etengo, mɔnghɔnyɔla ntenyi djɛso djɛ demba djɛ botshi kana ndenda avideo wɛnyɛwɔ anto enghanghunya. (Yeembo 119:37; Ɛfɛsɛ 5:5) Nkoka ndjalá okakasano djɛ ntshika nanghedji djɛsɔ, koko Yehova nkoka ntokotshɛ́ djɛ nangha nkambo djɛsɔ.—Wala Izaya 41:13.
TSHIMOLA
Lenda ladjikɛnge ndjalá piyɔɔ lá demba olumɛwɔ Yehowa edjinge wopo w’okokɛ ntshika nanghedji djɛ mbindo.
3. Ndjalá piyɔɔ lá demba numɛka Yehova
Iso nkoka ndjewa ikanyi yɛ Yehova ilendana la ndjalá piyɔɔ lá nshishima ɛlɛmbɛ wɛ ndapɛyɛ owila w’Isariyɛlɛ. Wala Eposelo 19:10 edjinge 30:17-19, ko kadjimola lá weepó wɛnɛ:
-
Kɛkɔnge ketolakanyɛ avɛrse wanɛ lá wopo wɔ Yehova ɔsande piyɔɔ kelá demba?
-
Akambo wakɔnge wakoka nkokotshɛ́ djɛ ndjalá winá enkfumɔ piyɔɔ lá demba?
Nanghá djɛ ndjalá piyɔɔ lá demba dɔsaka winá edjinge ndɔmbamaka ndjila welo. Koko tokoka nangha nkambo djɛsɔ kaanga edjena kɛkɔnge k’intasɛso kana nkete dj’okotshɛso. Lenda VIDEO, ko kadjimola lá woopó wɔl’anse.
-
Ntsha tomboyalá piyɔɔ lá demba edjinge lá djena djɛso, anto w’opoposanyɛso yongotepela ambɔ mo?
4. Totshike nanghedji djɛ nyɛtshi
Mpeyi l’okotshɔ wɔ Yehova, tokoka ntshika nkɔmɔ djɛ nyɛtshi
Ntsha wɛ nɔɔka ikaya kana nnɔ nnɔ djɛ wolo, ewa ente ongoyala l’okakasamo wɔ wolo djɛ ntshika enanghedji kɛsɔ. Kɛkɔnge kekoka nkokotshɛ́? Sipisoyɛ eposelo wɛ nyɛtshi wengoposá má enangedji kɛko kɛsɔ. Wala Mateo 22:37-39, ko nyosawole wopo w’okoka ɔnwɛlɔ w’ikaya kana nnɔ nnɔ djɛ wolo nkina lá yopo yɛ nyɛtshi okokawɔ ndjalá l’eposelo wɛ nyɛtshi lá . . .
-
djokanelo dj’onto nya Yehova.
-
djokanelo dj’onto nya nkfumbo kɛnde edjinge nya ansukanyi.
Ɔsa nkano djɛ ntshika nanghedji djɛ nyɛtshi. a Lenda VIDEO.
Wala Filipɛ 4:13, ko kadjimola lá woopó wɔnɛ:
-
Wopo wɔkɔnge ndjala l’ekfumbo kɛ wɔlɔ kɛ ndɔmbaka, kɛ ndjekaka Bible la kɛ nsanghanaka lá nsanghanyɛ okokawɔ mpɛyɛ onto wolo wɔ ntshika nanghedji mɔtshi djɛ mbindo?
5. Nana la tokanyi edjinge la nanghedji djɛ mbindo
Wala Kɔlɔsɛ 3:5, ko kadjimola lá weepó wɛnɛ:
-
Wopo wɔkɔnge w’ewaso ente ndenda avideo yɛnyɛwɔ anto enghanghunya, ntomana mesajɛ yelendana l’akambo wa mbindo, foto edjinge mɔnghɔnyɔla ntenyi djɛ demba jɛ botshi oyɛwɔ nyɛtshi lá wiso wa Yehova?
-
Ongokanelake ente alekɔ djoyi djɛ wɔlɔ djɛ Yehova ntɔlɔmba dj’iso ndjalá piyɔɔ lá nanghedji? Lamo?
Lenda wopo w’okokɛ nanyɛ tokanyi tɔ mbindo. Lenda VIDEO.
Yeso apɛyɛka ndjɔmbɔmba kɛmɔtshi kɛ wopo w’okokaso nangha la wolo djɛ ndjalá piyɔɔ. Wala Mateo 5:29, 30, ko kadjimola lá woopó wɔnɛ:
-
Kaanga Yeso ndotatepela djɛ nanghela demba djɛso nyɛtshi, koko nde ɛnyɛka ante iso ladjɛ ndɔsa nkano djɛ wolo. Nkano djɛkɔnge djɛ wolo djekoka onto ndɔsa djɛ ndjewɔ tokanyi tɔ nyɛtshi? b
Ntsha onana la tokanyi tɔ mbindo, ewa ente Yehova ndɔsaka welo wilɛ l’odjito. Wala Yeembo 103:13, 14, ko kadjimola lá woopó wɔnɛ:
-
Ntsha onana la enanghedji kɛmɔtshi kɛ nyɛtshi, wopo wɔkɔnge wokokembɛ avɛrse wanɛ djɛ nkindjɛ nana ipa la mpekɔ?
Topekɔke!
Wɛ nkoka nkanela mbala kɛkɔ kɛmɔ ente: ‘Ladjikɛnde ntalonga mbala kɛ ntondo, mpongolonga lonkina.’ Kokanela lá nkambo djɛnɛ: Onto ɔmɔtshi atalote ko ambohela dja ko ambɔkfɔ, nkambo djɛsɔ mpɛnyɛ djɛ nde apangokindjɛ la lowango lɔnde. Wopo wɔk’ɔmɔ ndeke, nkalɔ nangha nkambo mɔtshi djɛ nyɛtshi apɛnyɛ djɛ wɛ opangoyala l’akoka wa ndongela nkambo djɛkɔ. Ntsha ɔmbɔkfɔ topekɔke. Nkambo djɛsɔ mpɛnyɛ djɛ weelo enkfumɔ wɛ ngombila welekɔ ngo anyanya. Topekɔke! L’okotshɔ wɔ Yehova, wɛ nkoka ntshika enanghedji kɛ nyɛtshi kɛsɔ.
ANTO EFULA NTEPELAKA AMBƆ: “Lemi lambekela akambo wakɔ. Mpangokoka ntshika.”
-
Vɛrse djɛkɔnge dj’okokɛ nkamba djɛ nyɛnyɛ onto wɔkɔ ente m’okotshɔ wɔ Yehova nde nkoka ntshika enanghedji kɛmɔtshi kɛ nyɛtshi?
LÁ YOPASƐ
Iso nsasangɛka Yehova winá woyalaso piyɔɔ lá demba, lá yimba edjinge lá nanghedji djɛso.
Mvungo
-
Ladjikɛnge oyɛwɔ djonyi ndjalá piyɔɔ?
-
Wopo wɔkɔnge w’okokɛ ndjalá piyɔɔ lá demba?
-
Wopo wɔkɔnge w’okokɛ nkindjɛ nama tokanyi la nanghedji djɛko piyɔɔ?
TOKANYI TONKINA
Akambo amɔtshi wakɔnge wa daambi w’okokɛ nangha djɛ ndjala piyɔɔ lá demba kaanga opalekɔ l’okfudji?
Lenda wina wa kɔɔ w’okokɛ ntapola djɛ ntshika nnɔ ikaya.
‘Wopo wɔ ntshika nnɔ ikaya’ (Wetshɔ!, Ngɔndɔ k’atano 2010 lá Otetela)
Isola eposelo welekɔ́ lá ndenda avideo wɛnyɛwɔ anto enghanghunya.
‘Pɔrnɔgrafi—Alekɔ wɔlɔ kana nyɛtshi?’ (Etange k’Olami, Ngɔndɔ k’enanɛyi 1, 2013 lá Otetela)
Lenda wopo wɔ mpame kɛmɔtshi keyalaki mfumbe kɛ ndendaka enghanghunya w’anto ndatshike enanghedji kɛ nyɛtshi kɛsɔ.
‘Nkfɔka mbala efula lá ntondo kɛ lemi ndonga’ (Etange k’Olami, No. 4 2016 lá Otetela)
a L’etenyi Tokanyi tonkina, lá djamba djelekɔ́ l’ɔtɛ wɔ djoyi ante “Wopo wɔ ntshika nnɔ ikaya,” nsakisolaka wina wa wɔlɔ w’okokaso ntapola djɛ ntshika ndjala mfumbe kɛ ikaya la kɛ nnɔ nnɔ djɛ wolo.
b Djɛ ntshika ɛkɔmɔ kɛ mɔnghɔnyɔla ntenyi djɛso djɛ demba djɛ botshi, lenda “djamba djelekɔ́ l’ɔtɛ wɔ djoyi ante “Wopo wɔkɔnge w’okokami ntshika enanedji kɛ mɔnghɔnyɔla ntenyi djɛ demba djɛ botshi?” lá onkanda Les jeunes s’interrogent—Réponses pratiques, Vɔlumɛ 1, shapitrɛ 25 lá Falase.
