WEKELO 41
Bible otepelande nge lá nkambo djɛ wayi wa mbindo wa nsanga mbeto?
Anto efula ndjokaka nsɔnyi ntepela akambo walendana la wayi wa nsanga mbeto. Koko, Bible ntepelaka akambo wa nsanga mbeto lá wopo wɔ papoo edjinge w’ɛdje. Akambo wa Bible otepelande walekɔ ngo lá wɔlɔ wɔso. Akambo wakɔ wɛdje djɛ ndjɛkɛ oloko. Oyɛwɔ ngo nghɔsɔ, ladjikɛnde Yehova ndeke Ontongi wɔso. Djɛkondeke, nde ndjewaka akambo wakɔnge waleka wɔlɔ leso. Nde ntɛnyɛka wopo wɔ nanghedji djɛso okokawɔ ndoosasangɛ edjinge kɛnɛ kekoká ntokotshɛ́ djɛ nsasanga la lowiko lotshinda lotshinda.
1. Ikanyi yɛ Yehova lá nkambo djɛ nsanga mbeto oyɛwɔ mo?
Nsanga mbeto alekɔ opapɛyɛ wɔ Yehova ndapɛyɛ antshukami. Nde nkɔpaka djɛ opapɛyɛ wɔkɔ mpɛyɛ wome nya wadji mbamba kɛ nyɛnyana ngandji l’anteyi kɛwɔ edjinge ndjalá l’osasa. Opapɛyɛ wɔsɔ mpɛyɛka wadji la wome mbamba k’iwɔ nsanga mbeto ape ngo djɛ mbota wana, koko djɛ nyɛnyɛna ngandji la ɛkɔpa lá lɛdji lɔ wɔlɔ. Djɛkondeke Bible otepelakande ante: ‘Sasangaka nya wadjɛko wɔ m’etsho wɛko wɛ m’ɔlɛngɛ.’ (Woongo 5:18, 19) Yehova nkɔpaka dj’antshukami w’Akristo ndjalá la nkɔmano onto te winande dj’ipa iwɔ nangha loseka.—Wala Hebero 13:4.
2. Wayi wa mbindo wa nsanga mbeto osakisolawɔ nge?
Bible ntepelaka ante ‘anto wanangha wayi wa mbindo wa nsanga mbeto . . . wapangokita Onkfumi wɔ Ndjambe.’ (1 Kɔrɛtɔ 6:9, 10) Anto wafunisá Bible wakambaka l’itepela yelá Grɛkɛ pornéïa djɛ ntepela akambo wa mbindo wa nsanga mbeto. Itepela yɛsɔ ndendanaka edjinge la 1) osangelo wɔ mbeto a wɔ l’antenyɛ anto watatshukana, 2) osangelo wɔ mbeto wɔ mpame la mpame kana omoto la omoto, edjinge 3) osangelo wɔ mbeto wɔ la nyama. Iso nsasangɛka Yehova la mbaka wapɔ winá ‘w’otonaso topo tonkfumɔ t’osangelo wɔ mbeto lá wopo wɔ mbindo.”—1 Tesalɔnikɛ 4:3.
TSHIMOLA
Hona wopo w’okokɛ ndjewɔ akambo wa mbindo wa nsanga mbeto edjinge lɔɔla l’okokɛ mba ntsha wɛ nkindjɛ ntshikala la nanghedji djɛ piyɔɔ.
3. Lotá wayi ankfumɔ wa mbindo wa nsanga mbeto
Mpame kɛ nkɔmano kɛ yetaka Yosɛfu ananghaka la wolo djɛ nkindjɛ ndjala piyɔɔ lá nanghedji djɛnde. Wala Ewangelo 39:1-12, ko kadjimola lá weepó wɛnɛ:
-
Ladjikɛnge Yosɛfu ndalote?—Lenda vɛrse 9.
-
Ongokanelake ente Yosɛfu ɔsaka nkano djɛ wɔlɔ? Lamo?
Wopo wɔkɔng elangala l’eseka okokawɔ ndjokola ndjɔmbɔmba kɛ Yosɛfu edjinge ndota wayi wa mbindo wa nsanga mbeto lɔɔko kɛnɛ? Lenda VIDEO.
Yehova ndɔmbaka dj’enkambi wɛnde ntona wayi wa mbindo wa nsanga mbeto. Wala 1 Kɔrɛtɔ 6:18, ko kadjimola lá weepó wɛnɛ:
-
Kɛkɔnge kekoka ntshinda onto djɛ nangha wayi wa mbindo wa nsanga mbeto?
-
Wopo wɔkɔnge w’okokɛ ndota wayi wa mbindo wa nsanga mbeto?
4. Wɛ nkoka mpikama lá ntondo k’ohemba
Ladjikɛnge okokawɔ ndjalá wolo dj’onto ntshika wayi wa mbindo wa nsanga mbeto? Lenda VIDEO, ko kadjimola lá woopó wɔ l’anse.
-
Winá wɔ wɔnanyɔ wɔ lá video ndɛnyi ante tokanyi edjinge nanghedji djɛnde djɛkɔpa ndosambɛ nkɔmano djɛnde te wadjɛnde, kɛkɔnge kɛ ndananghe?
Lá winá ɛmɔtshi, kaanga Akristo wa nkɔmano ladjɛ nana mbandji djɛ nama tokanyi tɔwɔ piyɔɔ. Wopo wɔkɔnge w’okokɛ ndota djɛ nkanelaka tokanyi tɔ mbindo? Wala Filipɛ 4:8, ko kadjimola lá weepó wɛnɛ:
-
Akambo wakɔnge woyɛso ladjɛ nkanelaka?
-
Wopo wɔkɔnge badji djɛ Bible la ndaapɛyɛ l’olemo wɔ Yehova otokotshɛwɔ djɛ mpikama lá ntondo k’ehemba?
5. Yehova ilaka ɛlɛmbɛ ngo lá wɔlɔ wɔso
Yehova ndjewaka akambo waleka wɔlɔ le so. Nde atoshimela kɛnɛ k’okokaso nangha djɛ ndjalá piyɔɔ lá tokanyi edjinge wɛlɔ w’okokaso mba ntsha iso nangha nkambo djɛsɔ. Wala Woongo 7:7-27 kana lenda VIDEO, ko kadjimola lá weepó we l’anse.
-
Wopo wɔkɔnge woyawilisá olangala wɔ lá video djɛnɛ l’ilonga?—Lenda Woongo 7:8, 9.
-
Lá nkilika Woongo 7:23, 26, wayi wa mbindo wa nsanga mbeto nkoka mposɛ akambo wa nyɛtshi efula. Ntsha iso nkindjɛ ndjalá la tokanyi tɔ piyɔɔ, ekakasano wɛkɔnge w’okokaso ndota?
-
Wopo wɔkɔnge piyɔɔ kelá tokanyi okokawɔ ntokotshɛ́ djɛ nsasanga la lowiko lotshinda lotshinda?
Anto amɔtshi nkanelaka ambɔ kɛnɛ kɛ Bible otepelande lá nkambo djɛ osangelo wɔ mbeto wɔ mpame la mpame kana omoto la omoto apɛnyɛ djɛ Ndjambe alekɔ ngandji. Koko Yehova Ndjambe kɛ ngandji, nkɔpaka djɛ anto ankfumɔ mba lowiko lɔ lotshinda. Djɛ mba lowiko, iso ladjɛ mbika lá wopo wokana l’ɛlɛmbɛ wɛnde. Wala 1 Kɔrɛtɔ 6:9-11, ko kadjimola lá woopó wɔnɛ:
-
Lá nkilika ikanyi yɛ Ndjambe, ngo djewanelo djɛ mpame la mpame kana omoto la omoto toko ndeke nyɛtshi?
Djɛ nsasangɛ Ndjambe, isankfumɔ ladjɛ nangha etshikitano. Alekɔ djonyi dj’iso nangha etshikitano? Wala Yeembo 19:8, 11, ko kadjimola lá weepó wɛnɛ:
-
Okanelɛ mo, tɔkfɔ tɔ Yehova tolendana la nanghedji tolekɔ wɔlɔ? Ladjikɛnge otepelɛ nghɔsɔ?
Yehova ambokotshɛ anto efula djɛ nɛmɛyɛ ɛlɛmbɛ wɛnde welendana la eyalelo. Angokokotshɛ edjinge wɛ djɛ ntshikitana
ANTO EFULA NTEPELAKA AMBƆ: “Lako nyɛtshi ntsha anto ape wambɔkɔpana, la koko lako nyɛtshi nsanga mbeto l’ilá k’okanawɔ ngandji l’anteyi kɛwɔ.”
-
Wɛ okokɛ ntepela ente mo?
LÁ YOPASƐ
Nsanga mbeto alekɔ opapɛyɛ wɔ Yehova ndapɛyɛ mpame nya wadjɛnde dj’iwɔ nsasanga la ndjoka wɔlɔ wɔ bala.
Mvungo
-
Lá nkilika ikanyi yɛ Bible, kɛkɔnge kɛkɔpa ntepela akambo wa mbindo wa nsanga mbeto?
-
Kɛkɔnge kekoka ntokotshɛ́ djɛ ntona akambo wa mbindo wa nsanga mbeto?
-
Wɛlɔ wɛkɔnge w’okokaso mba ntsha iso nkilika tɔkfɔ tɔ Yehova tolendana la nanghedji?
TOKANYI TONKINA
Lenda lamo mpame nya omoto wɔkɔpa ntshukana lá bala ladjɛ ndjila bala djɛwɔ l’onkanda wɔ lɛɛta.
Lenda wopo wɔ tɔkfɔ telá Bible tolendana la osangelo wɔ mbeto wɔ mpame la mpame kana omoto l’omoto yopatotshinde djɛ ntona anto wanangha nkambo ntshɔ.
“Osangelo wɔ mbeto wɔ mpame la mpame alekɔ nyɛtshi?” (Djamba djelá jw.org)
Lenda wopo wotolama ɛlɛmbɛ wɛ Ndjambe má wayi ankfumɔ wa mbindo wa nsanga mbeto.
Lá djamba djetepela ante “Iwɔ wandɔsaka l’odjito,” lenda wopo wokadjimolisá mpame kɛmɔtshi kenanghaki wayi wa mbindo wa nsanga mbeto nya winande mpame ndakandjimola lowiko lɔnde djɛ nsasangɛ Ndjambe.
“Bible ntshikitanyɛka mbiko” (Etange k’Olami, Ngɔndɔ k’anɛyi 1, 2011 lá Otetela)
a L’anteyi kɛ topo tɔsɔ ndjila edjinge, ndjɔmbɔmba nsanga mbeto, ntshɛngi djelá ɔlɔmɔ kana nsoma kana ndɔmbɔla ntenyi djɛ botshi, nsanga mbeto ny’onto má ntshɔkɔ, edjinge mɔnya mɔnya ntenyi djɛ demba djɛ botshi dj’onto ngo djɛ mbetshola mposɛ yɛnde.
