WEKELO 42
Bible otepelande mo lá nkambo djɛ londjemba edjinge djɛ Bala?
Lá djena mɔtshi, anto nkanelaka ambɔ djɛ ndjalá l’osasa ngo ntshuka kana ntshukama. Koko apalekɔ antshukami ankfumɔ ndeke lolekɔ́ l’osasa kana endjemba enkfumɔ ndeke wapalekɔ́ l’osasa. Nkambo djelekɔ́ nsɔsɔlɔ nde Bible ntepelaka ante, ayale londjemba kaanga bala oyɛwɔ nde epapɛyɛ wime Ndjambe.
1. Wɛlɔ wɛkɔnge w’owaso má ntshikalá ondjemba?
Bible ntepelaka ante: ‘Onto wombotshukana ambonangha wɔlɔ, koko onto wopotatshukana amboleka nangha wɔlɔ.’ (Wala 1 Kɔrɛtɔ 7:32, 33, 38.) Ladjikɛnge Bible otepelande ante ondjemba ‘amboleka nangha wɔlɔ?’ Okristo w’ondjemba apalekɔ la wadji w’oyɛnde ladjɛ nkotshɛ ehomba wɛnde. Omboka ente, nde alekɔ la lotshungɔ l’efula. Ndjɔmbɔmba, endjemba ɛmɔtshi walekɔ l’akoka wa mfudjɛ olemo wɔwɔ lá topo tɔ wɔlɔ, etengo ntshɔ t’ewila enkina djɛ ntopoposanyɛ losango lɔ wɔlɔ. Lá djiko dj’akambo wasɔ, nkambo deka djonyi nde iwɔ mpetshɛka winá efula djɛ ndasukanyɛ la Yehova.
2. Wɛlɔ ɛmɔtshi wɛkɔnge weyɛ má ntshukana lá nkilika ɛlɛmbɛ wɛ lɛɛta?
Wopo wɔk’ɔmɔ la londjemba, bala koko dekɔ la wɛlɔ wɛnde. Bible ntepelaka ante ‘anto ape ndeka onto ɔmɔ.’ (Losanghanyɛ 4:9) Nkambo ntshɔ dekɔ nsɔsɔlɔ pekapeka winá w’Akristo okambawɔ la tɔkfɔ telá Bible lá bala djɛwɔ. Anto wakɔpa ntshukana ntshikaka ɛlɔkɔ kɛ nkɔpana la nɛmɛyana l’anteyi kɛwɔ. Lɔɔla lolekɔ́ la nkambo djɛsɔ nde, mbala efula iwɔ ndaawokaka l’elamelo ndeka anto w’intasɛ esanga ipa la ntshukana. Edjinge wana wawɔ wangoyawoka l’elamelo.
3. Wopo wɔkɔnge Yehova ɔsande bala?
Winá wɔ Yehova ndatshukanyɛ mpame la omoto wɔ ntondo, nde atepelaka ante: ‘Mpame angotshika isɛkɛnde la nyɛnghɛnde ko angomamana nya wadjɛnde.’ (Ewangelo 2:24) Yehova nkɔpaka djɛ wadji la wome nkɔpana edjinge ndjalá esanga winá enkfumɔ w’oyɛwɔ la lowiko. Nde ndjawolaka djɛ bala mvɔ ngo ntsha ntshukami kɛmɔtshi ambonangha loseka. Lá winá wɔsɔ, Yehova mpɛyɛka ntshukami kɛ yombonanghela nyɛtshi lotshungɔ lɔ ndjaka bala kana lako. a (Mateo 19:9) Yehova apawola dj’Akristo ntshuka okale (mbanda).—1 Timɔte 3:2.
TSHIMOLA
Lenda wopo w’okokɛ ndjalá l’osasa—edjinge nsasangɛ Yehova—ayale kaanga ondjemba kana ntshukami ndeke oyalɛ.
4. Kamba wɔlɔ opapɛyɛ wɔ londjemba
Yeso ɔsaki londjemba etengo opapɛyɛ. (Mateo 19:11, 12) Wala Mateo 4:23, ko kadjimola lá woopó wɔnɛ:
-
Wopo wɔkɔnge wɔ Yeso ndakambe l’opapɛyɛ wɔ londjemba djɛ nkambela Papa kɛnde edjinge nkotshɛ́ anto ankina?
Akristo nkoka ndjala l’osasa má nkamba la londjemba lɔwɔ lá yopo yɛ wɔlɔ etengo Yeso ndananghaka. Lenda VIDEO, ko kadjimola lá woopó wɔl’anse.
-
Topo tɔkɔnge tɔ Akristo okokawɔ nkamba la londjemba lɔwɔ wɔlɔ?
Ongewake?
Bible apashikikɛ lɛdji l’ɛnɔnyi wekoka onto ntshuka kana ntshukama. Koko, djekembɛ onto djɛ nkonga ilá tii ambolekana “ɛnɔnyi w’ɔlɛngɛ,” winá wɔ mposɛ y’akambo wa nsanga mbeto yoyalaka wolo efula nkoka ntshinda olangala kana oseka djɛ ndɔsa akano wa nyɛtshi.—1 Kɔrɛtɔ 7:36.
5. Ewa nsɔna wadji kana wome wɔlɔ
Nsɔna wadji kana wome, alekɔ nkano djɛ djonyi efula dj’onto okokande ndɔsa. Wala Mateo 19:4-6, 9, ko kadjimola lá woopó wɔnɛ:
-
Ladjikɛnge Okristo oyɛnde ladjɛ ntɔnɔla lá ntondo kɛnde ntshuka kana ntshukama?
Bible nkoka nkokotshɛ́ djɛ ndjisola wekeka wa wɔlɔ wakoka ndjala le wadji kana wome. Nkambo djeleka djonyi nde ntshukana l’onto woka Yehova ngandji. b Wala 1 Kɔrɛtɔ 7:39 edjinge 2 Kɔrɛtɔ 6:14. Ko kadjimola lá weepó wɛnɛ:
-
Ladjikɛnge oyɛso ladjɛ ntshukana ngo l’Owakɛ wɔ Yehova?
-
Yehova okakande ngete mo winá w’ɔsɔnaso djɛ ntshukana l’onto wopowoke ngandji?
Ntsha iwɔ nkowa esanga nyama ipe itshikitanyi, mbɔ koko iyape kɛkɔ wanghɛna ndjolo. Wopo wɔk’ɔmɔ ndeke Okristo wotshukana l’onto wopakambela Yehova, angoyala l’ekakasano efula
6. Ɔsa bala ngo ngete Yehova ɔsande
L’Isariyɛlɛ yɛ l’etsho wɛ ntondo, ampame imɔtshi wayakaki awala la wadji wawɔ l’ɔtɛ wɔ donga djɛ lokaki. Wala Malaki 2:13, 14, 16, ko kadjimola lá woopó wɔnɛ:
-
Ladjikɛnge Yehova otonande djɛ bala mvɔ l’ɔtɛ wɔ donga djepawola Bible?
Loseka la oyakelo wɔ bala mposeka ekakasano l’antshukami edjinge le wana
Lenda VIDEO, ko kadjimola lá woopó wɔl’anse.
-
Ntsha wome kana wadjɛko apalekɔ Okristo, okokɛ nangha mo djɛ bala djɛnyo ndjalá l’osasa?
7. Lɛmɛyɛ tɔkfɔ tɔ Yehova tolendana la bala
Nkamba la tɔkfɔ tɔ Yehova tolendana la bala ndɔmbaka ndjila welo efula. c Koko Yehova ntshɔkɔlaka anto wanangha nghɔsɔ. Lenda VIDEO.
Wala Hebero 13:4, ko kadjimola lá woopó wɔnɛ:
-
Wɛ nkanelaka ente tɔkfɔ tɔ Yehova tolendana la bala tolekɔ wɔlɔ? Ladjikɛnge otepelɛ nghɔsɔ?
Yehova nkɔpaka djɛ Akristo ndjila bala djɛwɔ l’onkanda wɔ lɛɛta kana ndjaka bala laka lɛɛta, ladjikɛnde lá ewila efula ewandji ndɔmbaka nkambo djɛsɔ. Wala Tito 3:1, ko kadjimola lá woopó wɔnɛ:
-
Ntsha wɛ ombotshuka kana ombotshukama, bala djɛko mbingela l’onkanda wɔ lɛɛta?
ANTO AMƆTSHI NKOKA NKOPOLA AMBƆ: “Ladjikɛnge ntshukana nghɔsɔ? Mpame la omoto wapakoke nyintasɛ toko amboshiya?”
-
Wɛ okokɛ nkadjimola ente mo?
LÁ YOPASƐ
Londjemba la bala oyɛwɔ ngo epapɛyɛ wime Yehova. Ondjemba kana ntshukami nkoka ndjala l’osasa ntsha iwɔ nkilika tɔkfɔ tɔ Yehova.
Mvungo
-
Wopo wɔkɔnge onto okokande mba wapɔ má nkamba la londjemba lɔnde lá wopo wɔ wɔlɔ?
-
Ladjikɛnge Bible ɔtɔlɔmbande djɛ ntshukana ngo la winaso Okristo?
-
Ɛtɔyi kɛkɔnge k’elonga kɛ Yehova awolande djɛ bala mvɔ?
TOKANYI TONKINA
Kɛkɔnge kesakisola “ntshukana ngo lá Nkfumi?”
‘Weepó w’antangi’ (Etange k’Olami, Ngɔndɔ k’esambele 1, 2004 lá Otetela)
Lenda alako wa wɔlɔ wakoka nkokotshɛ́ djɛ ndɔsa akano wa wɔlɔ lá nkambo djɛ djembwanelo la bala lá avideo asato wa totenyi.
Lenda ladjikɛnge wɔnanyɛnghɛso ndatepela ante kɛnɛ kɛmbɔmpɛyɛ Yehova ndeka kɛnɛ kɛ matshike ntshó.
Akambo wakɔnge wakoka onto ntɔnɔla lá ntondo kɛnde ndɔsa nkano djɛ nkapwana nya wadji kana nya wome edjinge ndjaka bala?
‘Lɛmɛyɛ “kɛnɛ kɛ Ndjambe ndamamanyɛ”’ (Etanga k’Olami, Ngɔndɔ djomi l’ape 2018 lá Otetela)
a Lenda Nɔtɛ kɛ l’ekomo 4 kelendana la wopo wɔ nkapwana nya wome kana wadji kaanga ntsha ntshukami kɛmɔtshi atananghe loseka.
b Lá djena mɔtshi, ambotshi ndeke lɔsɔnɛlaka wana wawɔ onto w’okoka ntshukana lande. Ntsha oyɛwɔnde nghɔkɔsɔ, ambotshi woka wana wawɔ ngandji mponaka ntondontondo onto woka Yehova ngandji. L’edjena k’iwɔ ndjila yimba ngo lá mfalanga kana ekopo kelekɔ́ lande.
c Ntsha wɛ intasɛ nya onto ɔmɔtshi etengo wadji la wome ko nyotatshukana, wɛ ndeke lokoka ndɔsa nkano djɛ ndjaka bala kana ndootshuka.
