Isankfumɔ tolekɔ la tokanyi totshikitanyi lá nkambo djɛ ɔlɔtɔ la djɛ imelo wɛ afo. Ntsha iso nkilika tɔkfɔ telá Bible, mbɔ koko tɔngɔsɔna wopo w’ɔlɔtɔ wɔ wɔlɔ w’okoka nsasangɛ Yehova. Nyotshɔ tokoshishima tɔkfɔ tɔmɔtshi l’anteyi kɛwɔ

1. Tɔkfɔ tɔkɔnge tokoka ntɔlɔndjɛ djɛ nsɔna ntshendja la ɔlɔngɔswɛlɔ wɔ nkfo?

Iso ladjɛ nsɔna ‘ɔlɔtɔ wɔ wɔlɔ, w’ɛlama edjinge la yimba yɛ wɔlɔ,’ edjinge nkindjɛ ndjalá l’ɛnamelo kɛ wɔlɔ kɛnyɛ ente iso ‘malemaka Ndjambe.’ (1 Timɔte 2:9, 10) Tokoshishima tɔkfɔ tɔnɛyi: 1) Ɔlɔtɔ wɔso ladjɛ ndjalá wɔ “wɔlɔ.” Etengo ngɛnyi lá nsanghanyɛ yel’otshumano, Ewakɛ wɛ Yehova walekɔ l’ɛlɔtɔ wetshikitanyi, koko wopo wɔso wɔ ndɔta la wɔ ndɔngɔsɔla nkfo nyɛnyɛka ente iso nɛmɛyɛka Ndjambe k’ɔtɛmɔlaso. 2) Ndɔta lá wopo wɔ “ndáwɛdjɛ” nkɔpaka ntepela ente ɛnamelo kɛso kepakoke mbetshola mposɛ y’alemba w’anto ankina kana nsepa tokanyi t’anto leso. 3) Tɔngɛnyɛ ente tolekɔ la “yimba yɛ wɔlɔ” ntsha topokola yopo y’ɔlɔtɔ kana yɛ imelo kɛ nkfo y’anto imɛwɔ lɔɔkɔ kɛnɛ. 4) Ɛnamelo kɛso ladjɛ nyɛnyɛ winá enkfumɔ ente “tomalema Ndjambe,” la tɛnyɛ anto ankina ente iso ntɛmɔlaka Ndjambe kɛ nsɔsɔlɔ.—1 Kɔrɛtɔ 10:31.

2. Ɛnamelo kɛso okokawɔ ndjala l’eposelo wɛkɔnge te winaso antɛmɔdji?

Kaanga oyɛso la lotshungɔ lɔ nsɔna nkete dj’oyɛso ladjɛ ndɔta, iso ladjɛ nkanelaka eposelo wengoyala la ɛnamelo kɛso te anto ankina. Iso nanghaka la wolo dj’ipa ndjila onto l’ohemba, koko iso ‘nsasangɛka winaso onto má ndoonanghela akambo wa wɔlɔ edjinge ndokembɛ.’—Wala Ɔrɔma 15:1, 2.

3. Wopo wɔkɔnge ɛnamelo kɛso okokawɔ nsepa anto l’ɔtɛmwɛlɔ wɔ nsɔsɔlɔ?

Kaanga onanghaso la wolo djɛ ndɔta wɔlɔ winá enkfumɔ, iso ndekaka ndjila yimba l’ɔlɔtɔ woso, winá w’ingelaso nsanghanyɛ y’otshunamo edjinge w’oyɛso l’olemo w’ipoposanyɛ. Ɔlɔtɔ wɔso wopakoke nsepa anto leso ko ndeka losango lɔso lɔ djonyi. Iso nkɔpaka djɛ ɛnamelo kɛso nsepa anto l’akambo wa nsɔsɔlɔ edjinge ‘ndɛnga olakanyelo wɔ Ndjambe kɛso.’—Tito 2:10.

 TSHIMOLA

4. Ɛnamelo kɛso kɛ wɔlɔ lá wiso w’anto numɛka Yehova

Elonga kɛkɔnge kɛ djonyi ketotshinda djɛ ndjila yimba lá ɛnamelo kɛso? Wala Yeembo 47:2, ko kadjimola lá weepó wɛnɛ:

• Ɔlɔtɔ wɔso okokawɔ ntshinda anto djɛ ntepela mo lá nkambo djɛ Yehova? Ya kɛsɔ okolakanyɛwɔ nge?

• Okanelɛ mo, alekɔ wɔlɔ ndjila yimba lá wopo w’ɛnamaso winá w’oyɛso lá nsanghanyɛ edjinge l’olemo w’ipoposanyɛ? Ladjikɛnge?

 5. Wopo w’okokaso nsɔna wɔlɔ ntshendja edjinge ɔlɔngɔswɛlɔ wɔ nkfo

Lenda VIDEO.

Kaanga ntshendja djɛso dekɔ djɛ ntsho kana lako, djɛkɔ ladjɛ ndjala piyɔɔ edjinge wɔlɔ lá nkilika mbamba y’oyɛso. Wala 1 Kɔrɛtɔ 10:24 edjinge 1 Timɔte 2:9, 10. Ko masɔ, lenda ladjikɛnge isopakoke ndɔta ntshendja djɛ . . .

• mbindo edjinge djepalekɔ́ kɔɔ.

• maa, djetshika ntenyi dj’alemba lá bandja edjinge djewetshola mposɛ yɛ nsanga mbeto.

Akristo wapalekɔ l’anse k’Ɛlɛmbɛ wɛ Mɔsɛ, koko ɛlɛmbɛ wɛkɔ ntokotshɛka djɛ ndjewa ikanyi yɛ Yehova lá nkambo dj’ɔlɔtɔ. Wala Mvungo k’Ɛlɛmbɛ 22:5, ko kadjimola lá woopó wɔnɛ:

• Ladjikɛnge oyɛso ladjɛ ntona ɛlɔtɔ kana ɔlɔngɔswɛlɔ wɔ nkfo wekadjimola ampame etengo amato, amato etengo ampame?

Wala 1 Kɔrɛtɔ 10:32, 33 edjinge 1 Djɔanɛ 2:15, 16, ko kadjimola lá weepó wɛnɛ:

• Ladjikɛnge oyɛso ladjɛ ndenda ntsha ɛnamelo kɛso ketakanyɛ anto ankina kana wananyɔ wel’otshunamo?

• Ɔlɔtɔ la ɔlɔngɔswɛlɔ wɔ nkfo wɔ ngete nge wonanghema l’edjena kɛko k’oyalɛ?

• Okanelɛ mo, topo tɔmɔtshi tɔ ntshendja la t’afo tolekɔ nyɛtshi le Okristo? Ladjikɛnge?

 LÁ YOPASƐ

Winá w’onanghaso djɛ ndjalá l’ɛnamelo kɛ wɔlɔ, tɔngɛnyɛke ente iso nɛmɛyɛka Yehova edjinge anto ankina.

Mvungo

• Lamo ɔlɔtɔ edjinge ɛnamelo kɛso oyɛwɔ djonyi lá wiso wa Yehova?

• Tɔkfɔ tɔmɔtshi tɔkɔnge tokoka ntɔlɔndjɛ djɛ ndɔsa akano walendana la ɛnamelo kɛso?

• Wopo wɔkɔnge ɛnamelo kɛso okokawɔ ndjalá l’eposelo ɛmɔtshi le anto ankina lá wopo w’ɔsawɔ ɔtɛmwɛlɔ wɔ piyɔɔ?