Akristo wa nsɔsɔlɔ wapawola kaanga ekete kɛmɔtshi kana onto ɔmɔtshi ndaashimba djɛ ntɛmɔla Yehova. Nsɔsɔlɔ, nghɔsɔ ndeke nkano djɛko. Yehova ndɔsaka nkɔmano djɛko la ntshina. (Wala 1 Ɛkɔndɔ 28:9.) Akambo wakɔnge w’akoka ndjila nkɔmano djɛko l’ohemba edjinge wopo wɔkɔnge w’okokɛ nana l’akambo wakɔ?

1. Wopo wɔkɔnge anto amɔtshi ɔsɛsawɔ ntɛkɔla me Yehova?

Anto amɔtshi nkoka ntoshimba djɛ nkambela Yehova. Anto wakoká nangha akambo wapɔlɔ wasɔ na? Nkoka ndjala anto amɔtshi wambɔtɔmbɔkɔ, watshanghanyɛ elakanyelo w’engolo lá nkambo dj’olonghanyelo wɔ Ndjambe l’ikanyi yɛ ntshita djawo djɛso. Anto wasɔ ndeke etawɔ w’apɔsta. Lonkina, ewandji wɛ nkɛlɛsiya ntshanghanyɛka etepela w’engolo lá nkambo djɛso djɛ ntimɛ má akambo wa nsɔsɔlɔ. Alekɔ itondo yɛ mbalaka leso djɛ nsawola kaanga ndambo l’ontonyi, mbala enkanda wɛwɔ, ndjingela lá sitɛ yɛwɔ y’Ɛntɛrnɛtɛ kana ndenda avideo wawɔ. Yeso atepelaka lá nkambo dj’anto wasɛsa djɛ ntoshimba djɛ nkambela Ndjambe ante: ‘Nyaatshike. Iwɔ oyɛwɔnde tɔlɔndjɛ tombowodjɛ wiso. Ntsha onto wombowodjɛ wiso ndɔndjɛ onto wombowodjɛ wiso, yape kɛkɔ wangokitela tá mpeku.’—Mateo 15:14.

Okokaso nangha mo ntsha ilongo yɛso kana ose nkfumbo kɛso ambɔsa nkano djɛ nyima Owakɛ wɔ Yehova? Nkambo djɛsɔ ntɔpɛyɛka paa efula l’oloko. Onto wɔkɔ nkoka ntotshinda dj’iso nsɔna Yehova kana nde. Iso ladjɛ ndɔsa nkano djɛ ntshikala la nkɔmano le Ndjambe ndeka onto onkfumɔ. (Mateo 10:37) Djɛkondeke, iso nɛmɛyɛka ɔlɛmbɛ wɔ Yehova wotoshimba dj’ipa ndjokana l’onto wɔ nghɔsɔ.—Wala 1 Kɔrɛtɔ 5:11.

2. Wopo wɔkɔnge w’okokaso nyɛnyɛ nkɔmano djɛso te Yehova má akano wɔsaso?

Ngandji k’okaso Yehova kengototshindake dj’ipa nangha ekete kenkfumɔ kelekɔ́ la djokanelo la ntolo dj’engolo. Olemo wɔso, eloyi wɛso, nonghanyi yɛso kana nkete nkina nkfumɔ djepakoke ndjalá la djokanelo la ntolo dj’engolo. Yehova ntoshimelaka ante: ‘Anto wami, nyopose má Babilɔnɛ dj’Ekekete.’—Ndjiso 18:2, 4.

 TSHIMOLA

3. Wadjɛ lá nkambo djɛ wetsha w’engolo

Kɛkɔnge k’okokaso nangha ntsha tomboka wayi amɔtshi wa nyɛtshi lá nkambo dj’olonghanyelo wɔ Yehova? Wala Woongo 14:15, ko kadjimola lá woopó wɔnɛ:

• Ladjikɛnge sopakoke ndjawola nkambo nkfumɔ dj’okaso?

Wala 2 Djɔanɛ 10, ko kadjimola lá weepó wɛnɛ:

• Wopo wɔkɔnge w’okokaso ndɔsa w’apɔsta?

• Ayale kaanga ntsha topalekɔ la djokanelo djɛ mbala kɛkɔ kɛmɔ la w’apɔsta, wopo wɔkɔnge w’okokaso ndokoma tolokilika elakanyelo wɛwɔ?

• Kokanela wopo wɔ Yehova oyawokande ntsha tilá yimba lá etepela wɛ nyɛtshi w’etepela anto lá nkambo djɛnde kana dj’olonghanyelo wɔnde?

4. Tshikala la nkɔmano le Ndjambe winá wɔ wɔnanyɔ ɔmɔtshi onanghande mpekanto

Kɛkɔnge k’okokaso nangha ntsha tombewa ente wɔnanyɔ ɔmɔtshi wɔl’otshumano ambonangha mpekanto k’ekekete? Tokoshishima ɔlɛmbɛ ɔmɔtshi wɔ Ndjambe ndapɛyɛ ase Isariyɛlɛ yɛ l’etsho wɛ ntondo. Wala Ase Lewi 5:1.

Lá nkilika vɛrse djɛnɛ, ntsha tombewa ente onto ɔmɔtshi ambonangha mpekanto k’ekekete, iso ladjɛ nshimela tokokolo. Koko lá ntondo kɛ nangha nkambo djɛsɔ, alekɔ nkambo djɛ wɔlɔ nshimela onto wombonangha mpekanto djɛ nde ntshɔ ntisola le tokokolo. Ntsha nde apakɔpɛ ntshɔ ntisola, mbɔ koko nkɔmano djɛso te Yehova ngototshinda djɛ ntoshimela tokokolo akambo w’ewaso. Ladjikɛnge nangha nkambo djɛsɔ nyɛnyɛka ngandji kɛso kɛ nkɔmano te . . .

• Yehova Ndjambe?

• onto wombonangha mpekanto?

• anto ankina walekɔ́ l’otshumano?

 5. Posa má Babilɔnɛ dj’Ekekete

 LÁ YOPASƐ

Djɛ ntshikala la nkɔmano te Yehova, iso ladjɛ ndjewɔ ndjokana l’onto onkfumɔ wopalekɔ́ la nkɔmano te nde. Iso ladjɛ lonkina djopa losambi la ntolo dj’engolo.

Mvungo

• Ladjikɛnge isopakoke ndenda filmɛ, mbala kana ndjekameyɛ etepela wɛ w’apɔsta otepelawɔ?

• Wopo wɔkɔnge w’okokaso ndɔsa anto wambotona ndjala Ewakɛ wɛ Yehova?

• Wopo wɔkɔnge w’okokaso nɛmɛyɛ ndjewo ketepela djɛ mposa má ntolo dj’engolo?