1. N’kano djɛkɔnge djeleka wɔlɔ dj’okokaso ndɔsa?

MBALA efula, ɛsɔnwɛlɔ wɛ nyɛtshi wenangha ambotshi ndjalaka l’eposelo wɛ nyɛtshi te wana wawɔ ilá efula. Ntsha ambotshi wambonangha ɛsɔnwɛlɔ wɛ nyɛtshi, iwɔ nkoka mponela wana wawɔ ekakasano. Koko ntsha wambonangha ɛsɔnwɛlɔ wɛ wɔlɔ, iwɔ mpɛyɛka wana wawɔ mpeyi kɛ wɔlɔ kɛ mba lowiko l’osasa. Koko kaanga wana ladjɛ ndɔsa lonkina akano wa wɔlɔ. N’kano djeleka wɔlɔ dj’okokaso ndɔsa nde, nkambela Papa kɛso kɛ ngandji, kel’olongo Yehova.​—Yee. 73:28.

2. Ɛsɔnwɛlɔ wɛ wɔlɔ wɛkɔnge Yeso nya ambotshi wande iyananghe?

² Ambotshi wa Yeso wayashikikɛka djɛ nkotshɛ wana wawɔ djɛ nkambela Yehova, edjinge ɛsɔnwɛlɔ w’iyananghe wɛnyɛka ambɔ, nkambela Yehova ndeke n’kambo djeleka djonyi lá lowiko lɔwɔ. (Luka 2:40, 41, 52) Edjinge Yeso ananghaka ɛsɔnwɛlɔ wɛ wɔlɔ w’okotshisa djɛ nangha ɛkɔpa kɛ Yehova. (Mat. 4:1-10) Yeso akomaka onto wɔ sii, wɔ wɔlɔ, w’oloko wolo, lokopo lɔ wɔna wokomɛ ambotshi woka Ndjambe wɔma djɛ ndjala l’onfuno edjinge l’osasa.

3. Weepó wɛkɔnge ɔkɔpaso nkadjimola lá djamba djɛnɛ?

³ Lá djamba djɛnɛ, tongokadjimola lá weepó wɛnɛ: Ɛsɔnwɛlɔ wɛkɔnge wɛ wɔlɔ Yehova ndananghe la n’kambo djɛ Yeso? Olakanyelo kɔnge ambotshi w’Akristo okokawɔ mba má ɛsɔnwɛlɔ wenanghisa Yosɛfu nya Mariya? Edjinge olakanyelo wɔkɔnge dangala dj’Akristo okokawɔ mba má ɛsɔnwɛlɔ wenanghisa Yeso?

4. Ɔsɔnwɛlɔ wɔkɔnge wɔ djonyi Yehova ndananghe lá n’kambo djɛ Wɔnande?

⁴ Yehova asɔnɛlaka Yeso ambotshi wa wɔlɔ efula. (Mat. 1:18-23;  Luka 1:26-38) Etepela wɛ Mariya w’imanse k’oloko wefunamisa lá Bible nyɛnyɛka ngandji kɛnde kɛ nsɔsɔlɔ te Yehova la tá Otepela wɔnde. (Luka 1:46-55) Edjinge ndjelo kɛ Yosɛfu l’ɛlɔndjɛlɔ kɛ Yehova nyɛnyɛka ente nde okaki Ndjambe wɔma edjinge akɔpaki ndosasangɛ.​—Mat. 1:24.

5-6. Kɛkɔnge kɛ Yehova ndawola djɛ Wɔnande ndjewa?

⁵ Ewa ente Yehova atasɔnɛla Yeso ambotshi w’ekfudji. Olambo wɔ Yosɛfu nya Mariya iyapɛyɛ mɔkɔngɔ wɔ Yeso mbotshɔ, nyɛnyɛka ente iwɔ wayalaki ase ɔmvɔ. (Luka 2:24) Nkoka ndjala Yɔsɛfu ananghaki olemo wɔnde w’otshundji w’awaya l’isambo yɛ daambi entshupa la mvulu kɛnde lá Nazarɛtɛ. Iwɔ watayalaki nsɔsɔlɔ la n’kete kana la nfalanga efula, pekapeka ladjikɛnde wayɛka ndoyala la wana esambele kana ndekana.​—Mat. 13:55, 56.

⁶ Yehova alamaka Yeso má ekakasano ɛmɔtshi, koko Nde atalama Wɔnande má ekakasano enkfumɔ. (Mat. 2:13-15) Ndjɔmbɔmba, ase nkfumbo kɛ Yeso amɔtshi watayala la djawo te nde. Kokanela wopo wɔ Yeso ndoyawoke djɛ nyɛna wopo w’ase nkfumbo kɛnde iyotowawola ma bango djɛ nde alekɔ Mɛsiya. (Mar. 3:21; Dj. 7:5) Lonkina, papa kɛnde, Yosɛfu avɔka wina windayalaka olangala, edjinge n’kambo n’tshɔ djeyalaka nsɔsɔlɔ okakasano wɔ wolo lende. Nyɔyi kɛ Yɔsɛfu, k’etshindaka Yeso kangaloyalaki wɔna wɔ ntondo, djɛ nangha elemo w’isekɛnde ndananghaka djɛ kotshɛ ehomba wɛ nkfumbo. (Mar. 6:3) Wina wɔ ndafule, Yeso ekaka wopo wɔ ndɔsa odjito wɔ nkfumbo kɛnde. Nsɔsɔlɔ, nde akambaka la wolo djɛ mba nfalanga la n’kete djoyɛwɔ la djonyi. Nde okaka wopo wɔ lɔlɛmbɔ oyalakawɔ m’ɔkɔngɔ wɔ nkamba olemo loshi l’ontondo.

7. a) Weepó wɛkɔnge wekoka nkotshɛ antshukanyi lá kɛnɛ kelendana l’olakanyelo wɔ wana wawɔ? b) Wopo wɔkɔnge Woongo 2:1-6 okokande nkotshɛ ambotshi djɛ ndakanyɛ wana wawɔ?

⁷ Ntsha nyombotshukana edjinge nyɔkɔpa mbota, nyoyawopole ente: ‘Tolekɔ wopo w’anto walekɔ l’okitshakitshɛ edjinge la lonyuma lɔ wɔlɔ, wakoka Yehova nsɔna djɛ nama wɔna wɔ bango?’ (Yee. 127:3, 4) Ntsha nyomboshiyɛka mbota, nyawopole ente: ‘Lemi ndakanyɛka wana wami lamo oyɛwɔ djonyi nkamba olemo la wolo?’ (Los. 3:12, 13) ‘Lemi nanghaka la wolo djɛ nama wana wami m’ekakasano welá demba la welá yimba wekoka mpomana lawɔ l’andja wa Satana?’ (Woo. 22:3) Opangokoka nama  wana wako má ekakasano enkfumɔ wekoka ndakomela. Alekɔ wolo nangha n’kambo n’tshɔ. Koko wɛ nkoka ndalɔngɔsɔla lá kɛnɛ kelendana l’ekakasano welá lowiko má nkindjɛ ndalakanyɛ la ngandji wopo w’okokawɔ ndawɛkɛ l’Otepela wɔ Ndjambe djɛ mba alako. (Wala Woongo 2:1-6.) Djɔmbɔmba, ntsha ose nkfumbo kɛnyo ambotshika nkambela Yehova, kotshɛ wɔnako djɛ ndjeka m’Otepela wɔ Ndjambe ladjikɛnge oyɛwɔ djonyi ntshikala la n’kɔmano le Yehova. (Yee. 31:23) Kana ntsha nyombovusɛ onto ɔmɔtshi wɔ ngandji, ɛnyɛ wɔnako avɛrse welá Bible wakoka ndakotshɛ djɛ nkfulumeyɛ yɛnyi edjinge mba mvu.​—2 Kɔ. 1:3, 4; 2 Ti. 3:16.

8. Ɛlɔndjɛlɔ kɛkɔnge kelekɔ lá Mvungo K’ɛlɛmbɛ 6:6, 7, Yosɛfu nya Mariya iyakiliká?

⁸ Yosɛfu nya Mariya wakotshɛka Yeso djɛ nkoma olangala w’ɔkɔpama me Ndjambe, ladjikɛnde iwɔ wakilikaka ɛlɔndjɛlɔ kɛ Yehova ɔpɛyɛnde ambotshi. (Wala Mvungo K’ɛlɛmbɛ 6:6, 7.) Yosɛfu la Mariya wayalaka la ngandji kɛ nsɔsɔlɔ te Yehova, edjinge okoma wolekaki djonyi lewɔ nde, nkeketshɛ wana wawɔ djɛ ndjala la yopo yɛ ngandji kɛ nghɔsɔ.

9. Ɛsɔnwɛlɔ wɛkɔnge wɛ djonyi wenanghisa Yosɛfu nya Mariya?

⁹ Yosɛfu nya Mariya wasɔnaka djɛ ndjala l’ekfumbo kɛ wɔlɔ k’akakambo wa nyuma lá nkfumbo kɛwɔ. Ape l’ehamo, iwɔ wingelaki nsanghanyɛ lobengo tshɛ lá sinangɔnga kelá Nazarɛtɛ, edjinge Pasaka ɔnɔnyi tshɛ lá Jerusalɛmɛ. (Luka 2:41; 4:16) Mbala imɔtshi, wina wiyananghaka lɔkɛndɔ la nkfumbo k’otondo tá Jerusalɛmɛ, walakanyɛki Yeso nya wankfune wande akambo amɔtshi waledana l’enkambi wɛ Yehova wɛ ntondo, nkoka ndjala watáwɛnyɛki todjena tɔkɔndɔlaki Afunelo. Wina wiyayalaka la wana efula, atayala wɔdju le Yosɛfu nya Mariya djɛ nkindjɛ l’ekfumbo kɛwɔ kɛ wɔlɔ kelá nyuma. Koko wawaka wɛlɔ efula lá nkindjɛ nangha nghɔsɔ! Ladjikɛnde wahetshɛka ɔtɛmwɛlɔ wɔ Yehova l’etena kɛ ntondo, nkfumbo kɛwɔ keyalaka la lonyuma lɔ wɔlɔ.

10. Elakanyelo wɛkɔnge wekoka ambotshi w’Akristo mba me Yosɛfu nya Mariya?

¹⁰ Olakanyelo wɔkɔnge ambotshi woka Ndjambe wɔma okokawɔ mba me Yosɛfu la Mariya? N’kambo djeleka djonyi nde, ndakanyɛ wana wanyo m’etepela la má nanghedji djɛnyo ente,  nyo nkɔpaka Yehova efula. Opapɛyɛ w’ekekete w’okokanyo ndapɛyɛ nde ndakotshɛ dj’iwɔ nkɔpa Yehova. Edjinge olakanyelo woleka djonyi w’okokanyo ndalakanyɛ nde, wopo w’okokawɔ ndjekaka Bible mbala la mbala, ndɔmbaka, ndjingelaka nsanghanyɛ, edjinge ndapɛyɛ l’olemo w’ipoposanyɛ. (1 Ti. 6:6) Nsɔsɔlɔ, nyo ladjɛ mpɛyɛka wana wanyo n’kete djelá ndemba dj’oyɛwɔ la djonyi. (1 Ti. 5:8) Koko nyovungɔ ente, djokanelo djɛ wɔlɔ la Yehova ndeke lokoka nkotshɛ wana wanyo djɛ mbika l’ekomo kɛ n’kfumbo dj’akambo wa Satana wanɛ edjinge ndjingela l’andja wa bango wa Ndjambe, koko ape nfalanga yɛwɔ kana n’kete djɛwɔ djelá demba. *​—Ezk. 7:19; 1 Ti. 4:8.

11. a) Wopo wɔkɔnge alako wotanaso lá 1 Timɔte 6:17-19 okotshɛwɔ ambotshi djɛ nangha ɛsɔnwɛlɔ wɛ wɔlɔ wina wowongolawɔ wana wawɔ? b) Okoma wɔkɔnge nkfumbo kɛko okokawɔ ndawilela, edjinge ɛtshɔkɔ wɛkɔnge wokokawɔ mba? (Lenda ipapango: “ Okoma wɔkɔnge wokokɛ ndawilela?”)

¹¹ Ɔsɔngo ekeketshelo djɛ nyɛna wopo wɔ efula k’ankfumbo y’Akristo onanghawɔ ɛsɔnwɛlɔ wɛ wɔlɔ djɛ nkotshɛ wana wawɔ djɛ ndjala entshupa la Yehova! Iwɔ ntɛmɔlaka esanga mbala la mbala. Iwɔ ndjingelaka lá nsanghanyɛ y’otshumano edjinge lá nsanghanyɛ yɛ n’kekete. Edjinge iwɔ mpoposanyɛka losango lɔ wɔlɔ. Nkfumbo imɔtshi ntshɔka ntopoposanyɛ l’etatshi kɛ nkɛtɛ k’iyotawembola efula. Inkina ntshɔka towembola Betɛlɛ edjinge mpɛyɛka lɔwɔ l’olemo wa teokrasi w’opikelo. Nkfumbo y’enangha ɛsɔnwɛlɔ wɛsɔ ntshutshɛka nfalanga yɛwɔ efula, edjinge nkoka ndjala wolo lewɔ djɛ nangha nghɔsɔ. Koko iwɔ mbaka ɛtshɔkɔ efula má kɛnɛ konanghawɔ. (Wala 1 Timɔte 6:17-19.) Wana wafula lá nkfumbo yɛ nghɔsɔ, nkindjɛka mbala efula nangha akambo wa wɔlɔ w’iyeke wina w’iyotafule edjinge iwɔ ndjalaka l’osasa lá wopo wɔ ambotshi wawɔ iyawongola nghɔsɔ! *​—Woo. 10:22.

12. Kɛkɔnge k’enanghisa Yeso wina windaafulaka?

¹² Papa kɛ Yeso kel’olongo angonanghake ngo ɛsɔnwɛlɔ wɛ wɔlɔ, edjinge ambotshi wande welá looko wananghaki ɛsɔnwɛlɔ wɛ wɔlɔ. Koko kaanga Yeso nyɔmɛlɛ ananghaka ɛsɔnwɛlɔ wɛ wɔlɔ, wina w’indaafulaka. (Nga. 6:5) Etengo isankfumɔ, nde ayalaka la lotshungɔ lɔ nsɔna kɛnɛ k’ɔkɔpande nangha. Nde akokaka nsɔna djɛ mpona ngo wapɔ wande, edjinge samba nangha ɛkɔpa kɛ Ndjambe. Koko, nde asɔnaka djɛ ndjala la djokanelo djɛ wɔlɔ nya Yehova. (Dj. 8:29) Wopo wɔkɔnge ndjɔmbambɔ kɛnde okokawɔ nkotshɛ dangala djɛ lɔɔko kɛnɛ?

13. Ɛsɔnwɛlɔ wɛkɔnge wenanghisa Yeso wina windayalaka olangala?

¹³ Wina wɔ Yeso ndayalaka olangala, nde  asɔnaka djɛ ndjala la n’tshunamo te ambotshi wande. Nde atatona kaanga lofu djɛ nkilika ɛlɔndjɛlɔ k’ambotshi wande kana nkanela ante, nde ndjewaka akambo efula ndaleka. Koko, ‘nde akindjɛki ndjala la n’tshunamo tewɔ.’ (Luka 2:51) Ape l’ehamo Yeso akotshɛka odjito wɔnde wɔ wɔna wɔ ntondo wɔlɔ. Nde ananghaka la wolo djɛ ndjeka la nkamba olemo w’otshundji wonanghaki ise kɛnde Yosɛfu, djɛ nde mba lofalanga lɔ nkotshɛ nkfumbo kɛnde.

14. Wopo wɔkɔnge w’ewaso djɛ Yeso ayalaka ombeki wɔ wɔlɔ w’Otepela wɔ Ndjambe?

¹⁴ Ambotshi wa Yeso wakokaka ndoshimela kɛnɛ kelendana la botshɔ djɛnde djɛ nsese edjinge kɛnɛ kɛ totsh’antomɔ tɔ Ndjambe iyatepela lá n’kambo djɛnde. (Luka 2:8-19, 25-38) Koko Yeso atakoma ngo lá kɛnɛ k’iyoshimelaka, nde ekaka lonkina Afunelo nyɔmɛlɛ. Wopo wɔkɔnge wewaso djɛ Yeso ayalaka ombeki wa wɔlɔ w’Otepela wɔ Ndjambe? Ladjikɛnde wina windayalaka olangala, wetsha wase Jerusalɛmɛ ‘wakamɔka lá ndendá balo djɛnde edjinge ekadjimwelo wɛnde.’ (Luka 2:46, 47) Edjinge wina windayalaka l’ɛnɔnyi 12 toko, Yeso ashiyɛka nshikikɛ nyɔmɛlɛ ante Yehova ndeke Papa kɛnde.​—Luka 2:42, 43, 49.

15. Wopo wɔkɔnge Yeso ndɛnyɛ ante nde asɔnaka djɛ nangha ɛkɔpa kɛ Yehova?

¹⁵ Wina wɔ Yeso ndeeke kɛnɛ kɛ Yehova ɔkɔpande nde nangha, nde asɔnaka djɛ nangha ɛkɔpa kɛnde. (Dj. 6:38) Nde ewaki ante anto efula wangootona, kaanga ndotakombola n’kambo djɛsɔ, nde asɔnaka djɛ nɛmɛyɛ Yehova. Wina wɔ Yeso ndalongola batisimo lá 29 Ɛ.K., n’kambo djelekisa djonyi lende nde, nangha ɛkɔpa kɛ Yehova. (Heb. 10:5-7) Kaanga wina wɔ ndotavɔka l’otamba wɔ ndjolo, Yeso atakaakanda djɛ nangha ɛkɔpa kɛ Papa kɛnde.​—Dj. 19:30.

16. Olakanyelo wɔkɔnge wana okokawɔ mba me Yeso?

¹⁶ Lɛmɛyɛka ambotshi wako. Etengo Yosefu nya Mariya, ambotshi wako wapalekɔ djɔ. Koko, ambotshi wako wawaka odjito me Yehova djɛ nkolama, nkolakanyɛ, edjinge nkɔlɔndjɛ. Ntsha wɛ ndɔsa alako wawɔ l’odjito edjinge nɛmɛyɛ lowandji lɔwɔ, ongopomana la ‘lokolo lɔ wɔlɔ.’​—Ɛfɛ. 6:1-4.

17. Lá nkilika Yosua 24:15, n’kano djɛkɔnge dangala oyɛwɔ ladjɛ ndɔsa iyɔmɔlɛ?

¹⁷ Sɔna onto wɔkɔna ngongo kambela. Wɛ ladjɛ ndashikikɛ nghɔmɛlɛ wopo w’onto wolekɔ Yehova, olekɔ ɛkɔpa kɛnde, edjinge wopo w’okokɛ nangha ɛkɔpa kɛkɔ lá lowiko lɔko. (Ɔrɔ. 12:2) Nghɔsɔ ndeke ngongoyala l’akoka wa ndɔsa n’kano  djeleka djonyi lá lowiko lɔko, n’kano djɛ nkambela Yehova. (Wala Yosua 24:15; Los. 12:1) Ntsha wɛ nama nonghanyi kɛ wɔlɔ kɛ mbalaka edjinge kɛ ndjekaka Bible mbala la mbala, ngandji kɛko te Yehova edjinge djawo djɛko tende, djengoyala wolo.

18. Ɛsɔnwɛlɔ wɛkɔnge dangala oyɛwɔ ladjɛ nangha, edjinge eposelo wɛkɔnge wengoyala?

¹⁸ Sɔna djɛ mpetshɛ ɛkɔpa kɛ Yehova l’etena kɛ ntondo lá lowiko lɔko. Andja wa Satana ndakaka ante, ntsha ombokamba l’akoka wako djɛ wɛ mpona ngo wapɔ wɔkɔ nghɔmɛlɛ, ongoyala l’osasa. Koko lá nsɔsɔlɔ, wanɛ wahona wapɔ welá demba ndawatshatshɛka ‘l’ekiyano w’efula.’ (1 Ti. 6:9, 10) Koko ntsha wɛ ndjekameyɛ Yehova edjinge nsɔna djɛ mpetshɛ ɛkɔpa kɛnde l’etena kɛ ntondo lá lowiko lɔko, ongolonga edjinge ‘ongonanghaka akambo la balo.’​—Yos. 1:8.

19. Kɛkɔnge kɛ ambotshi oyɛwɔ ladjɛ mvungɔka?

¹⁹ Ambotshi, nyonanghe tshɛ k’okokanyo nangha djɛ nkotshɛ wana wanyo djɛ nkambela Yehova. Nyoyawɛkɛ lende, ko nde angonyo kotshɛ djɛ nangha ɛsɔnwɛlɔ wɛ wɔlɔ. (Woo. 3:5, 6) Nyovungɔ ente, wana wanyo wangokolake kɛnɛ k’onanghanyo ndeka kɛnɛ k’otepelanyo. Djɛkondeke nyonanghe ɛsɔnwɛlɔ wengokotshɛ wana wanyo djɛ nkɔpama me Yehova.

20. Ɛtshɔ wɛkɔnge dangala iyongowa ntsha wambɔsɔna nkambela Yehova?

²⁰ Dangala, ambotshi wanyo nkoka nyokotshɛ djɛnyo nangha ɛsɔnwɛlɔ wɛ wɔlɔ lá lowiko. Koko, nyo ndeke lonangha djɛ nkɔpama me Ndjambe. Djɛkondeke nyokole Yeso la nyɔsɔnɛ djɛ nkambela Papa kɛnyo kel’olongo. Ntsha nyonangha nghɔsɔ, nyongoyala la lowiko l’osasa lolekɔ l’okoma edjinge lɔ wɔlɔ win’ɔsɔ. (1 Ti. 4:16) Edjinge lá nshi yeyaye, nyongowa lowiko l’osasa wɔ lotshinda!