1. Kɛkɔnge ketepela 2 Kɔrɛntɔ 3:1-3 ketokotshɛ djɛ ndjoka ente ndɔmbɔla wekelo wɔ Bible alekɔ opapɛyɛ w’ekekete efula? (Lenda n’tshango djelá loposo.)

WOPO WƆKƆNGE oyawokakɛ wina wɛnɛ ombeki wɔ Bible welá etatshi kɛnyo kɛ looko ambolongola batisimo? Ongoyalake nsɔsɔlɔ l’osasa efula. (Mat. 28:19) Iya ntsha wɛ ndeke onto w’ekisa l’ombeke wɔ bango wɔsɔ, ape ongoyala l’ofuno edjinge l’osasa lá n’kambo djɛnde! (1 Te. 2:19, 20) Ambeki wambolongola batisimo ntato, ‘walekɔ enkanda wɛ wɔlɔ w’ɔsɔnwɛlɔ’ apengo le anto wekisa lawɔ toko, koko edjinge le otshumano w’otondo.​—Wala 2 Kɔrɛntɔ 3:1-3.

2. a) Woopó wɔkɔnge wɔ djonyi woyɛso la djɛ nkadjimola, edjinge ladjikɛnge? b) Etawɔ wekelo wɔ Bible nge? (Lenda nɔtɛ.)

² Alekɔ wɔlɔ efula djɛ nyɛna ente l’ɛnɔnyi ɛnɛyi wemboheta wɛnɛ 10 000 000 yɛ wekelo wɛ Bible * wenanghema Ngɔndɔ tshɛ l’andja w’otondo. Edjinge l’ɛnɔnyi ɛnɛyi wɛsɔ, anto ndekana 280 000 walongola batisimo ɔnɔnyi tshɛ djɛ nkoma Ewakɛ we Yehova edjinge ambeki wabango wa Yeso Kristo. Wopo wɔkɔnge wokokaso nangha djɛ nkotshɛ wa miliyɔ y’ambeki wa Bible yɛsɔ dj’iwɔ ndongola batisimo? Yehova apɛyɛ anto mbamba djɛ nkoma ambeki wa Kristo, djɛkondeke oyɛso ladjɛ nangha k’enkfumɔ k’okokaso nangha djɛ ndakotshɛ dj’iwɔ nfula tii tá batisimo ngo má win’ɔsɔ. Wina wotahete lankeke!​—1 Kɔ. 7:29a; 1 Pɛ. 4:7.

3. Kɛkɔnge kɔkɔpaso nyɛna lá djamba djɛnɛ lá kɛnɛ kelendana la ndɔndjɛ wekelo wɔ Bible?

 ³ Ladjikɛnde nkomɛ anto ambeki alekɔ djonyi efula nshi yɛnɛ, Iloyi yɛlɔndjɛ ndjopolaka ase kɔmite kɛ filialɛ kɛnɛ koyɛso ladjɛ nangha djɛ ndeka nkotshɛ ambeki waso wa Bible dj’iwɔ nfula tá batisimo. Lá djamba djɛnɛ edjinge djeyaye, tɔngɛna wopo wokokaso mba olakanyelo má wa kɔmantɛrɛ yɛ tat’ekalo, wa misiɔnɛrɛ, edjinge anami wɛ djingadjinga. * (Woo. 11:14; 15:22) Iwɔ wasipisoyɛ kɛnɛ kɛ wetsha wɛ Bible edjinge ambeki wa Bible okokawɔ nangha djɛ wekelo wɔ Bible ndjala l’eposelo wɛ wɔlɔ. Lá djamba djɛnɛ, tɔngɛna akambo atanu w’ombeki wɔ wɔlɔ oyɛnde ladjɛ nangha djɛ nde nfula tii tá batisimo.

4. Kɛkɔnge koyɛso ladjɛ ndjewa lá kɛnɛ kelendana la wekelo wɔ Bible w’itenyi?

⁴ Efula kɛ wananyɔ la wankaana ndjekaka l’anto Bible lá todjena tɔmɔtshi topalekɔ mvu. Ɔsɔ alekɔ yopo yɛ wɔlɔ yɛ mbanga nkona mposɛ k’akambo welá Bible le onto, koko wamba wa lá ndjena djɛ nghɔsɔ ndjalaka mbala efula totenyi edjinge wapa nanghemaka lobengo tshɛ. Djɛ nfudjɛ mposɛ, ansakodji amɔtshi ndɔmbaka numelo yɛ anto wayapɛyɛ djɛ ndawetaka kana ndafunelaka akambo amɔtshi welá Bible. Wekelo w’itenyi wɔ nghɔsɔ nkoka nanghema l’ilá kɛ Ngɔndɔ imɔtshi ipa nde ndjala ombeki wɔ nsɔsɔlɔ wɔ Bible. Ombeki wɔ nghɔsɔ, nkoka nfula tá batisimo ntsha nde * apɔshi wina edjinge apile welo djɛ ndjeka Otepela wɔ Ndjambe? Lako.

5. Lá nkilika Luka 14:27-33, kɛkɔnge ketepelisa Yeso kokokaso nkamba la kɛkɔ djɛ nkotshɛ ambeki waso wa Bible?

⁵ Lá mbamba kɛmɔtshi Yeso akambaka la ndjɔmbɔmba kɛmɔtshi, djɛ nyɛnyɛ kɛnɛ k’onto oyɛnde ladjɛnangha djɛ nkoma ombeki wɔnde. Nde atepelaka n’kambo dj’onto ɔmɔtshi wɔkɔpa mpika mvulu k’etange edjinge n’kambo dj’owandji ɔmɔtshi wɔkɔpa ntshɔ tá mbandji. Yeso atepelaka ante ompiki ladjɛ ‘ndjitansɛ ntondo edjinge nkamba akumi’ djɛ ndenda ntsha nde angoyala l’akoka wa nshiyɛ mvulu kɛkɔ edjinge owandji ladjɛ ‘ndjitansɛ ntondo djɛ ndenda’ ntsha oloyi wɔnde w’angala wangoyala l’akoka wa nkotshɛ kɛnɛ kɔkɔpawɔ nangha. (Wala Luka 14:27-33.) Wopo ɔkɔmɔ ndeke, Yeso ewaki ante onto wɔkɔpa nkoma ombeki wɔnde ladjɛ nkanela la n’tɔnɔ nkfumɔ kɛnɛ kesakisola ndokilika. Djɛko ndeke, iso ladjɛ nkeketshɛ ambeki waso wa Bible djɛ ndjekaka lobengo tshɛ. Wopo wɔkɔnge okokaso nangha n’kambo djɛsɔ?

6. Kɛkɔnge k’okokaso nangha djɛ mba ambeki wa Bible watafule?

 ⁶ Wanga la nsɔngɔla ndambo kɛ wina wɔsanyo djɛ ndjeka. Mbala imɔtshi wɛ nkoka mbala nyande apengo vɛrse mɔ toko, koko avɛrse ape wema Bible wina tshɛ w’owembolɛ. Ntsha onto wowembolɛ nkɔpaka nsawola ndambo k’ilá, opolande ntsha nde alekɔ l’etena kɛmɔtshi k’okokanyo ndjitansɛka djɛ nkindjɛka la wekelo wɔnyo. Ekadjimwelo wɛnde wɛnghɛnyɛ ntsha nde angɔsake wekelo wɔ Bible la djonyi. L’ekomo, djɛ wɛ ndokotshɛ djɛ nde nfula, wɛ nkokaka ndowopola ntsha nde angɔkɔpa ndjekaka mbala ipe lá lobengo. Koko, akambo ankina wa djonyi walekɔ ladjiko djɛ ndjeka mbala ipe lá lobengo.

7. Wopo wɔkɔnge wetsha okokande ndalɔngɔsɔla wɔlɔ lá ntondo kɛ wekelo onkfumɔ?

⁷ Etengo wetsha, wɛ la djɛ ndɔngɔsɔlaka wina tshɛ la ntondo kɛ wekelo wɔ Bible onkfumɔ. Wɛ nkoka ntateyɛ mbala kɛnɛ kinyongeka nyape edjinge mbala avɛrse. Kota wayi wa djonyi lá wɔɔngɔ. Kanela lá ɔtɛ wɔ djamba, tɔtɛ tɔ wamba tɔ daambi, weepó, avɛrse wiyombofuna ambɔ “wala,” asango edjinge tovidɛo tokoka nkokotshɛ djɛ wɛ mpakisola olakanyelo wɔnyoteke. Maasɔ, kanela lá n’kambo djɛ ombeki wɔko edjinge wopo wokokɛ ndompakisola akambo lá yopo yɛ wɔdju la yokama papoo djɛ nde nsipisoyɛ edjinge nkamba l’akambo wakɔ ipa l’okakasano.​—Nɛh. 8:8; Woo. 15:28a.

8. Olakanyelo wɔkɔnge owaso ma etepela wɛ ɔpɔstɔlɔ Poolo welekɔ la Kɔlɔsɛ 1:9, 10 la kɛnɛ kelendana la ndɔmba la n’kambo djɛ ambeki waso?

⁸ Wina wɔlɔngɔsɔlɛ wekelo, lɔmba Yehova la n’kambo djɛ ombeki edjingɛ djɛ ehomba wɛnde. Lɔmba Yehova djɛ nde nkokotshɛ djɛ wɛ ndakanyɛ wayi wela Bible la yopo yɛ wɛ nkota oloko w’onto. (Wala Kɔlɔsɛ 1:9, 10.) Yawopola n’kambo tshɛ djekoka ndjala okakasano le ombeki wɔko djɛnde nsipisoyɛ kana djɛ nyopongawola mbala kɛkɔ kɛmɔ. Lama lá wɔɔngɔ ente okoma wɔko nde, wɔ nkotshɛ ombeki djɛ nde nfula tii tá batisimo.

9. Wopo wɔkɔnge wetsha okokande nkotshɛ ombeki djɛ ndɔngɔsɔlaka wekelo wɔnde? Pakisola.

⁹ Iso nkombolaka djɛ wekelo wɔ Bible wonangema wina la wina, wongokotshɛ ombeki djɛ nde ndjala la djedjɛ la kɛnɛ tshɛ kɛ Yehova nya Yeso iyananghe edjinge angokotshɛ ndjɛ ndjeka akambo efula. (Mat. 5:3, 6) Djɛ nde mba wapɔ enkfumɔ má wekelo wɔnde wɔ Bible, ombeki ladjɛ ndjila yimba yɛnde tshɛ l’akambo wekande. Djɛ nkotshɛ okoma wɔsɔ, sipisoyɛnde ladjikɛnge alekɔ djonyi nde ndɔngɔsɔlaka lá ntondo  kɛ wekelo tshɛ, lá mbalaka kɛnɛ kinyongeka lá ntondo edjinge ntɔnɔlaka lá wopo wokokande nkamba l’akambo wakɔ wekande. Wopo wɔkɔnge wetsha okokande nangha djɛ ndɔwɛnyɛ djɛ ndɔngɔsɔla? Lɔngɔsɔla wekelo wɔmɔtshi esanga nyande djɛ ndɔwɛnyɛ wopo wɔlɔngɔsɔlawɔ. * Sipisoyɛnde wopo wokokande ndjisola nsakiso yɛ djɔ lá weepó, edjinge ndɔwɛnyɛ wopo wokokande nkfula esidji ngo lá totepela kana wayi wa djonyi toko wangokotshɛ djɛ nde mvungɔka nsakiso. Maasɔ, lɔmbande djɛ nde mpɛyɛ nsakiso l’etepela wɛnde nyɔmɛlɛ. Ntsha nde nanghaka nghɔsɔ, ongoyala l’akoka wa nsipisoyɛ wopo wokande akambo wekande. N’kambo nkina dekɔ djokokɛ nagha djɛ wɛ nkembɛ ombeki wɔko djɛ nde nanghaka.

10. Ladjikɛnge alekɔ djonyi mbalaka Bible lofu tshɛ, edjinge kɛkɔnge kɛ ombeki oyɛnde ladjɛ nangha djɛnde mba wapɔ má badji djɛnde djɛ Bible?

¹⁰ Ladjiko djɛ ndjeka lombengo tshɛ nya wetsha wɔnde, ombeki ladjɛ mpona djɛ mba wapɔ má nanghaka n’kambo nkina nyɔmɛlɛ lofu tshɛ. Nde landjɛ nsawolaka nya Yehova. Wopo wɔkɔnge? Má ndjekameyɛ edjinge nshimelaka Yehova. Nde nkoka ndjekameyɛ Ndjambe má mbalaka Bible lofu tshɛ. (Yos. 1:8; Yee. 1:1-3) Ɛnyɛnde wopo wɔ nkamba la “Nonghanyi kɛ badji djɛ Bible djɛ lofu tshɛ” djetanema lá jw.org. * Djɛko ndeke, djɛ ndokotshɛ djɛnde mba wapɔ má badji djɛnde djɛ Bible, kembɛnde djɛnde ntɔnɔlaka efula lá kɛnɛ kɛ Bible olakanyɛnde lá n’kambo djɛ Yehova edjinge la wopo wokokande nkamba l’akambo wekande lá lowiko lɔnde.​—Ele. 17:11; Dja. 1:25.

11. Wopo wɔkɔnge ombeki okokande ndjeka djɛ ndɔmbaka wɔlɔ, edjinge ladjikɛnge alekɔ djonyi djɛnde ndɔmbaka Yehova mbala la mbala?

¹¹ Kembɛ ombeki wɔko djɛnde nshimelaka Yehova akambo wande má nanghaka dɔmbɛlɔ lofu tshɛ. Lɔmba m’anse k’oloko wɔko wina wowanganyo la wina wokomeyɛnyo wekelo, edjinge lumolaka ombeki wɔko lá alɔmbɛlɔ wakɔ. Ladjikɛnde nde ekameyɛ alɔmbɛlɔ wako, nde angeka wopo wɔ ndɔmbaka m’anse k’oloko wɔnde edjinge angeka ante nde ladjɛ ndɔmbaka ngo Yehova Ndjambe lá djína djɛ Yeso Kristo. (Mat. 6:9; Dj. 15:16) Kokanela wopo wɔ badji djɛ Bible djɛ lofu la lofu (ndjekameyɛ Yehova) edjinge dɔmbɛlɔ (nshimelaka Yehova tokanyi tɔnde) iyongokotshɛ ombeki wɔko djɛ ndjala entshupa la Ndjambe! (Dj. 4:8) Ntsha nde nanghaka nghɔsɔ lofu tshɛ, kɛsɔ kengokotshɛ djɛ nde nangha  etshikitano lá lowiko lɔnde edjinge nfula tii ta batisimo.

12. Wopo wɔkɔnge wetsha okokande nkotshɛ ombeki djɛ ndjala la djokanelo djɛ wɔlɔ nya Yehova?

¹² Kɛnɛ kɛ ombeki ekande má wekelo wɔ Bible ladjɛ ndjingela apengo la wɔɔngɔ toko, koko edjinge lá oloko wɔnde. Ladjikɛnge? Iso nkɔpaka djɛ ombeki wɔso ndjeka akambo walendana la Yehova, koko djɛ nde nkamba l’akambo w’ekande, kɛnɛ k’ekande ladjɛ nkota oloko wɔnde. Yeso alakanyɛki lá yopo yekotshɛki anto djɛ ntɔnɔla. Koko anto efula wakɔpaki ndokilika ladjikɛnde nde ewaki nkota eloko wɛwɔ. (Luka 24:15, 27, 32) Ombeki wɔko ladjɛ nyɛna Yehova etengo Onto wɔ nsɔsɔlɔ, onto wokokande ndjala la djokanelo iyape, edjinge Ndɔwɔsa etengo Papa kɛnde, Ndjambe kɛnde, edjinge Ilongo yɛnde. (Yee. 25:4, 5) Wina wekanyo Bible, sepa yambalo yɛnde la wekeka wa wɔlɔ wa Ndjambe kɛso. (Epo. 34:5, 6; 1 Pɛ. 5:6, 7) Kaanga wopo wɔkɔnge wɔ djamba dj’ekanyo, ila yimba yɛko lá wopo w’Onto wolekɔ Yehova. Nkotshɛ ombeki djɛnde ndjisola wekeka wa wɔlɔ wa Yehova, etengo ngandji kɛnde, wɔlɔ wɔnde, edjinge djandji djɛnde. Yeso atepelaka ante: ‘Ɔlɛmbɛ woleka ekekete edjinge wɔ ntondo’ wokinɛ ‘kɔpa Yehova Ndjambe kɛko.’ (Mat. 22:37, 38) Hona djɛ nkotshɛ ombeki djɛnde nkɔpa Ndjambe l’oloko wɔnde onkfumɔ.

13. Pɛyɛ ndjɔmbɔmba kɛnyɛ wopo wɔ nkotshɛ ombeki djɛnde ndembetela akambo walendana la wekeka wa wɔlɔ walekɔ la Yehova.

¹³ Wina wosawolanyo l’ombeki wɔko, sipisoyɛnde ladjikɛnge oyɛnde ladjɛ nkɔpa Yehova. Nanghaka nghɔsɔ, nkoka nkotshɛ ombeki wɔko djɛnde nyɛna ante, nde nyɔmɛlɛ ladjɛ mpona djɛ ndjala ilongo yɛ Ndjambe edjinge ndɔkɔpa. (Yee. 73:28) Ndjɔmbɔmba, itepela imɔtshi yɛnyɛ n’kambo mɔtshi lá kɛnɛ kelendana la Yehova, la ngandji, balo, sii, kana nkfulu kɛnde y’ekota oloko wɔko, ilekɔ l’ɔnɔnghɔ kana lá vɛrse ye l’onkanda wekanyo? Ɛnyɛ ombeki wɔko itepela yɛkɔ, edjinge nkotshɛnde djɛ nde ndjewa ante ɔsɔ alekɔ elonga kɛmɔtshi kelekɔ l’anteyi kɛ donga efula dj’ɔkɔpɛ Papa kɛso kel’adjiko. N’kambo nkina dekɔ dj’ombeki onkfumɔ wɔ Bible oyɛnde ladjɛ nangha djɛnde nfula tá batisimo.

14. Kɛkɔnge kɛ Hebero 10:24, 25 otoshimelande lá kɛnɛ kelendana la nsanghanyɛ yel’otshumano yekotshɛ ambeki waso wa Bible djɛ nfula?

¹⁴ Isankfumɔ nkɔpaka dj’ambeki waso nfula tii tá batisimo. Yopo imɔtshi yɛ djonyi yɛ ndakotshɛ nde, ndakeketshɛ dj’iwɔ ndjingelaka nsanghanyɛ yɛ l’otshumano. Wetsha wɛ  balo ntepelaka ambɔ ambeki wingela nsanghanyɛ nfulaka lankeke lankeke lá nyuma la wopo wɔ wɔlɔ, nanghaka etshikitano. (Yee. 111:1) Wetsha ɛmɔtshi nsipisoyɛka ambeki wawɔ ambɔ, dj’iwɔ ndjewa akambo ankina efula walendana la Bible, ng’iwɔ ndjingelaka nsanghanyɛ. Wala Hebero 10:24, 25 wɛ nya ombeki wɔko, edjinge ɛnyɛnde wapɔ wɔndongowa ntsha nde ndjingelaka nsanghanyɛ. Ɛnyɛnde ivideo Kɛkɔnge keta lá Mvulu k’Onkfumi? * Kotshɛ ombeki wɔko djɛ mpetshɛ nsanghanyɛ l’etena kɛ ntondo kɛ lowiko lɔnde.

15. Kɛkɔnge k’okokaso nangha djɛ nkeketshɛ ombeki djɛnde ndjingelaka mbala la mbala lá nsanghanyɛ?

¹⁵ Kɛkɔnge kokokɛ nangha ntsha ombeki wɔko apayɛká lá nsanghanyɛ kana ndjɛka ngo taangoyi? Shimelande l’osasalo n’kambo mɔtshi djɛ ngeke lá losanghanyɛ lɔmɔtshi lomboheta. Wina wɛnande wopo woyawokɛ lá n’kambo djelendana lá nsanghanyɛ, nde nkokaka nkɔpa djɛ ndjɛ lá nsanghanyɛ. Pɛyɛnde Etange k’Olami kana Lowiko edjinge olemo wɔso w’Okristo kengekama lá losanganyɛ. Ɛnyɛnde kɛnɛ kɛnyongeka lá losanghanyɛ l’ɔkɔngɔ, edjinge opolande etenyi kɛkɔnge k’okande ante kelekɔ djonyi efula lende. Kɛnɛ k’ombeki wɔko ndɔngɛna edjinge ndongoka lá mbala kɛnde kɛ ntondo kɛ ndjingela lá losanghanyɛ, kengoleka nkete tshɛ djɛ ndɛnaka lá djɛ ndokaka lá n’kɛlɛsiya nkina. (1 Kɔ. 14:24, 25) Nde angotopomana l’anto ankina wangoyala ndjɔmbɔmba yɛ wɔlɔ yɛnde nkilika edjinge yekoka ndjokotshɛ djɛnde nfula tii tá batisimo.

16. N’kambo djɛkɔnge djelekɔ djonyi djɛ ndɔndjɛ ambeki wa Bible tii tá batisimo, edjinge kɛkɔnɔ k’isongeka lá djamba djeyaye?

¹⁶ Wopo wɔkɔnge w’okokaso ndɔndjɛ w’ekelo wɔ Bible wotafule tii tá batisimo? Iso nkoka nkotshɛ ombeki onkfumɔ djɛnde nyɛna djonyi djelekɔ lá wekelo wɔ Bible má ndakeketshɛka dj’iwɔ ndjekaka lobengo tshɛ edjinge ndɔngɔsɔlaka wekelo tshɛ. Iso nkɔpaka ndakeketshɛ lonkina dj’iwɔ nsawolaka la Yehova lofu tshɛ edjinge dj’iwɔ ndjala la djokanelo djɛ wɔlɔ la Nde. Iso nkɔpaka nkeketshɛ ombeki wɔso djɛnde ndjingelaka lá nsanghanyɛ ye l’otshumano. (Lenda ipapango: “ Kɛnɛ k’ambeki oyɛwɔ ladjɛ nangha djɛ nfula tii tá batisimo.”) Koko, etengo djamba djeyaye yongosipisoyɛ, akambo ankina atano walekɔ, wa wetsha wɛ Bible okokawɔ nangha djɛ ndɔndjɛ ambeki tii tá batisimo.