1-2. Wopo wɔkɔnge okokaso nkamba la dako djelá Woongo 4:25? Pɛyɛ ndjɔmbɔmba.

KOKANELA lá ndjɔmbɔmba yɛnɛ. Nkaana kɛmɔtshi k’ekokolo k’Okristo akanela lá n’tena djɛ wɔlɔ dj’indahetshɛ lá lowiko lɔnde. Kaanga lowiko lɔnde oyɛwɔ wolo wina wɔsɔ, nde akindjɛ nangha k’enkfumɔ kokokande nangha l’olemo wɔ Yehova. (1 Kɔ. 15:58) Lofu la lofu, nde nkanelaka wopo wɔ ndongoyala nya nkfumbo kɛnde la tolongo tɔnde l’andja wa bango. Nkaana kenkina avungɔ wopo wɔ nkaana kɛmɔtshi kel’otshumano ndotshutshumadjɛ ko ambolamela onkomba. (Kɔl. 3:13) Wɔnanyɔ ɔmɔtshi avungɔ evunga wɛnde wɛ ntondo koko nde ambila yimba yɛnde ngo l’akambo w’okokande nangha djɛnde ntshikala la n’kɔmano má win’ɔsɔ.​—Yee. 51:10.

² Akristo asato wasɔ ɔfɔnawɔ lá n’kambo djɛkɔnge? Iyankfumɔ wakanela akambo wahetisa lá lowiko lɔwɔ, koko wapakindjɛ nkanela l’akambo wakɔ. Koko, iwɔ ‘ntokomelaka wiso wawɔ ngo tá ntondo.’​—Wala Woongo 4:25.

3. Ladjikɛnge oyɛso la djonyi djɛ ‘ntokomela wiso waso tá ntondo?’

³ Lamo oyɛwɔ djonyi ‘ntokomela wiso waso tá ntondo?’ Etengo onto wombokadjimɔ t’ɔkɔngɔ ndopakoke nsembɔ tɔɔ lá mboka wina wɔ ndotakɛndɛ, topakoke ntshɔ tá ntondo l’olemo wokambelaso Yehova ntsha tokawoyɛ wiso t’ɔkɔngɔ djɛ nkanela akambo wamboheta lá lowiko lɔso.​—Luka 9:62.

4. Kɛkɔnge kɛnaso lɔ lá djamba djɛnɛ?

⁴ Lá djamba djɛnɛ, tɔkɔpa nyɛna tolonga tosato tokoka totshinda djɛ nkanela akambo wamboheta. * Tolonga tɔkɔ tokinɛ: 1) ankombola, 2) onkomba, edjinge 3) ndaawɛmbɛ lowo l’indeko. Lá n’kambo la n’kambo, tɔngɛna wopo wɔ tɔkfɔ tɔ Bible  okokawɔ ntokotshɛ, dj’ipa ndjila yimba ‘l’akambo wamboheta,’ koko lá ‘akambo welá ntondo’ kɛso.​—Flp. 3:13.

5. Kɛkɔnge kɛ Losanghanyɛ 7:10 otewolande?

⁵ Wala Losanghanyɛ 7:10. Vɛrse djɛnɛ m’patepela ante alekɔ nyɛtshi ndjopola ente: ‘Ladjikɛnge etsho wɛ ntondo iyayalaka wɔlɔ?’ Mvungɔ akambo wa wɔlɔ wamboheta alekɔ opapɛyɛ wɔ Yehova. Koko vɛrse djɛnɛ, ntepelaka ante: ‘Totepelake ente, ‘Ladjikɛnge etsho wɛ ntondo ndeka etsho wɛnɛ wɔlɔ?’’ Lá etepela enkina, ilonga yelekɔ lanɛ nde, ndjɛdjɛ wopo wɔ lɔsɛnɔ lɔso lomboheta la lɔ win’ɔsɔ, ko ndotepala ente lɔsɛnɔ lɔ win’ɔsɔ ndeke lomboleka nyɛtshi. Bible mɔtshi nkadjimolaka vɛrse kɛnɛ ante: ‘Tosombɔke ntepela ente, ‘Aa, lamo akambo iyayalaka wɔlɔ l’etsho wɛ ntondo?’ Ɔsɔ apalekɔ woopó wɔ mbalo.’

6. Ladjikɛnge iyopalekɔ balo nkindjɛ nkanela ente, lɔsɛnɔ lɔso l’isasɛnaka ntondo loleka lɔsɛnaso win’ɔsɔ wɔlɔ? Pɛyɛ ndjɔmbɔmba.

⁶ Ladjikɛnge iyopalekɔ n’kambo djɛ balo djɛ nkidjɛ nkanela ente lɔsɛnɔ lɔso l’isasɛnaka ntondo loleka lɔsɛnaso win’ɔsɔ wɔlɔ? Nkombola lɔsɛnɔ l’isasɛnaka ntondo nkoka ntotshinda djɛ, mvungɔka ngo akambo wa wɔlɔ ko mvungɛ ekakasano wepomanaki laso ntondo. Tɔkɔsa ndjɔmbɔmba k’ase Isariyɛlɛ. M’ɔkɔngɔ wiwɔ mposa má Egipito, iwɔ wavungɛka mbala kɛkɔ kɛmɔ lɔsɛnɔ lɔ ndjolo l’iyasɛnaka l’eteyi. Koko, wilaka yimba ngo lá elelo wɛ wɔlɔ wiyakɔpaka. Iwɔ watepelaka ambɔ: ‘Wole nse, kɔnkɔmbrɛ, amɔkɛ, atungulu w’akishi, atungulu wa mbambo edjinge atungulu wa hayi w’isalɛka lá Egipito ɔlɛlɛ koo!’ (Ew. 11:5) Oyɛwɔ nde nsɔsɔlɔ ɔlɛlɛ ndeke iyalɛka mma djɛsɔ? Lako. Ase Isariyɛlɛ wɛnaki ndjolo efula, etengo iyayalaka anfumbe l’etena kɛsɔ, iwɔ wɛnaki nkɛtshi la djɛmɔ l’Egipito. (Epo. 1:13, 14; 3:6-9) Koko, iwɔ wayɛka ndovungɛ lɔsɛnɔ lɔ ndjolo inkfumɔ yɛsɔ, edjinge ntateyɛ nkombola lɔsɛnɔ l’iyasɛnaka ntondo lɔsɔ. Iwɔ wasɔnaka ndjila yimba ngo ‘l’etsho w’osasa wemboheta,’ lá ntondo kɛ ndjila yimba l’akambo wa wɔlɔ wa Yehova ndombananghela. Yehova atasasanga enanghedji kɛwɔ kɛsɔ.—Ew. 11:10.

7. Kɛkɔnge kekotshisa nkaana kɛso kɛmɔtshi djɛ ndjewɔ ilonga y’ankombola?

 ⁷ Wopo wɔkɔnge okokaso ndjewɔ ilonga y’ankombola? Tɔkɔsa ndjɔmbɔmba kɛ nkaana kɛmɔtshi ketateyisa nkamba lá Betɛlɛ djɛ Brooklyn lá 1945. M’ɔkɔngɔ w’ɛnɔnyi ɛmɔtshi, nde atshukanaka nya wɔnanyɔ ɔmɔtshi wokambaki lá Betɛlɛ etengo nde, edjinge wakambaka esanga ɛnɔnyi efula. Koko, lá 1976, womɛnde akfɔka olando. Nkaana kɛkɔ ntepelaka ante wina wɔ womɛnde ndɛnyi ante nyɔyi kɛnde kemboyala entshupa, nde ɔpɛyɛka ndambo k’alako wa wɔlɔ wangokotshɛ m’ɔkɔngɔ wɔ nyɔyi kɛnde. Nde oshimelaka ante: “Towaka bala dj’osasa efula. Anto efula watawa bala etengo djɛso.” Ko nde owewoyɛka lonkina ante: “Toyakiyanyɛke efula l’akambo wamboheta, kaanga iyongokalɔka lá wɔngɔ wɔko. Ongotavungɛka ndambo ndambo. Tɔlɛmbake efula kana ndaakiyanyɛ amboleka lá kɛnɛ kembokokomela. Yala l’osasa lá ntena djɛ wɔlɔ dj’imahetshɛ isape l’olemo wɔ Yehova. . . . Vungɔ akambo wamboheta alekɔ opapɛyɛ wɔ Ndjambe ndatɔpɛyɛ.” Opawola ente dako n’tshɔ djalaka dako djɛ wɔlɔ?

8. Wopo wɔkɔnge nkaana kɛso ndawa ɛtshɔkɔ má nsamba nkanela akambo w’etsho wemboheta?

⁸ Nkaana kɛso alamaka etepela wɛsɔ l’oloko wɔnde. Nde akambelaka Yehova la n’kɔmano tii tá nyɔyi kɛnde, lasɔ ko ambowa ɛnɔnyi 92. Ɛnɔnyi emangha lá ntondo kɛnde mvɔ, nde atepelaka ante: “Wina wokawoyɛmi wiso l’ɛnɔnyi 63 wokambelami Yehova l’olemo wɔ n’tena nkfumɔ, lemi nkoka ntepela ente ndjalaka nsɔsɔlɔ la lowiko l’osasa.” Lamo? Nde asakisola ante: “Kɛnɛ k’ila lowiko osasa nde, ngandji kɛso k’onto la wɔnanyɔ edjinge n’kongi djɛ nsɛna la wananyɔ l’ankaana yɛso lá paradiso kelá looko, nkambela Yehova Ontongi wɔso w’ekekete, Ndjambe kɛ nsɔsɔlɔ lotshinda lotshinda.” * Ɔsɔngo ndjɔmbɔmba kɛ wɔlɔ k’onto wopika wiso wande tá ndondo!

9. Etenge ɛnaso lá Ase lewi 19:18, wina wɔkɔnge woyalakaso l’okakasano wɔ mvungɛ onkomba?

⁹ Wala Ase lewi 19:18. Mbala efula iso ndjalaka l’okakasano wɔ nama onkomba ntsha kangombotonanghela nyɛtshi oyɛnde nde winaso Okristo, ilongo yɛso, kana ose nkfumbo kɛso. Ndjɔmbɔmba, nkaana kɛmɔtshi winande owandaka ante amɔndjɔngɔla nfalanga. M’ɔkɔngɔ, nkaana kowandisa wibi ɛnaka ante lambonanghela nyɛtshi ko ayɛka ndɔlɔmba edimanyelo, ko nkaana kiyawande wibi alamaka onkomba. Omboyawoka nghɔsɔ mbala kɛmɔtshi? Kaanga apalekɔ, n’kambo djɛ nghɔsɔ ndeke ngombopomana, efula l’anteyi kɛso wapomanaka la n’kambo etengo djɛsɔ, edjinge wayawokaka etengo wapavungɛki lotshinda.

10. Kɛkɔnge kekoka ntokotshɛ wina wolamaso onkomba?

¹⁰ Kɛkɔnge kekoka ntokotshɛ wina wolamaso onkomba? Iso ladjɛ mvungɔka ente Yehova nyɛnaka n’kambo nkfumɔ. Nde ndjewaka n’kambo nkfumɔ djetokomela, ndjila edjinge akambo wa n’tshamba djɛ djɔ. (Heb. 4:13) Nde ndjokaka djodjo wina wɛnaso ndjolo. (Iza. 63:9) Edjinge nde ntolakaka ante nde akɔpa nyimɛ ndjolo inkfumɔ iposa m’akambo wa n’tshamba djɛ sii.​—Ndj. 21:3, 4.

11. Wɛlɔ wɛkɔnge wokokaso mba wina w’ovungɛso onkomba?

¹¹ Iso nkɔpaka mvungɔ lonkina ente, wina wovungɛso onkomba iso ndananghelaka wɔlɔ isɔmɛlɛ. Kɛsɔ ndeke nkaana kiyawande wibi ndɛɛnaka. M’ɔkɔngɔ w’etsho ɛmɔtshi, nde ayɛka ndovungɛ onkomba windalamela nkaana kowandisa wibi. Nde avungɔ ante wina wimeyɛso anto ankina, Yehova ntimeyɛka edjinge iso. (Mat. 6:14) Nde ewaka ante kɛnɛ kɛ nkaana kɛsɔ ndonanghela keyalaka nyɛtshi, koko nde asɔnaka djɛ ndowimeyɛ. Eposelo weyalisa la nkambo n’tshɔ nde, nkaana kɛso kɛsɔ ayɛka ndoyala l’osasa edjinge ayɛka ndila yimba l’olemo wɔ Yehova.

12. Olakanyelo wɔkɔnge w’owaso má 1 Djɔanɛ 3:19, 20?

¹² Wala 1 Djɔanɛ 3:19, 20. Isankfumɔ ndaawɛmbɛka lowo. Ndjɔmbɔmba, wamɔtshi ndaawɛmbɛka lowo l’akambo w’iyananghe lá ntondo kɛ ndjewa akambo wa nsɔsɔlɔ. Ankina ndawɛmbɛka lowo má evunga w’iyananghe m’ɔkɔngɔ wɔ batisimo. Isankfumɔ ndawokaka nghɔsɔ. (Ɔrɔ. 3:23) Djɛkondeke, iso nkɔpaka nangha kɛnɛ kelekɔ wɔlɔ. Koko ‘isankfumɔ ntalaka mbala efula.’ (Dja. 3:2; Ɔrɔ. 7:21-23) Kaanga isopoyawokaka wɔlɔ wina woyawɛmbɛso lowo, koko n’kambo n’tshɔ nkoka ntonanghela wɔlɔ. Lamo? Mande ndawɛmbɛ lowo nkoka ntotshinda djɛ nangha etshikitano lá lowiko lɔso edjinge ndɔsa n’kano dj’ipa nkalɔ lá evunga wisananghe ntondo.​—Heb. 12:12, 13.

13. Lamo isopakoke nkindjɛ ndaawɛmbɛ lowo l’indeko?

¹³ Koko angoyala nyɛtshi ntsha tokindjɛ ndaawɛmbɛ lowo, kaanga m’ɔkɔngɔ w’iso ndaapɛla m’evunga wɛso edjinge wɔ Yehova ntɛnyɛ djɛ nde ambotimeyɛ. Ndaawɛmbɛ lowo l’indeko lɔ nghɔsɔ nkoka ntɔtɔla tá nyɛtshi. (Yee. 31:10; 38:3, 4) Lamo nghɔsɔ? Tɔkɔsa ndjɔmbɔmba kɛ nkaana kɛmɔtshi kekindjɛki ndaawɛmbɛ lowo m’evunga wɛnde wɛ ntondo. Nde atepela ante: “Ndaawoka ente mpakoke ndaapɛyɛ tshɛ l’olemo wɔ Yehova ladjikɛnde nyɛna etengo mpongowika.” Efula l’anteyi kɛso nkoka ndawoka etengo nkaana kɛsɔ. Djɛkondeke iso ladjɛ nkindjɛ mbadjɛ dj’ipa nkindjɛ ndaawɛmbɛ lowo l’indeko lɔ nghɔsɔ. Lamo, mande Satana angoyala l’osasa efula ntsha tombotshika nkambela  Yehova, kaanga Yehova ndotatotshike!​—Ɛdjɛ la 2 Kɔrɛntɔ 2:5-7, 11.

14. Wopo wɔkɔnge okokɛ ndashikikɛ ente Yehova nkɔpaka nkimeyɛ?

¹⁴ Lonkina iso nkoka ndawopola ente ‘wopo wɔkɔnge ewami ente Yehova atankadjɛ lemi?’ Ntsha wɛ ndaawopolaka wopo wɔsɔ, kɛso nyɛnyɛka djɛ Yehova nkoka nkimeyɛ. Ɛnɔnyi efula lá ntondo, Etange k’Olami ketepelaka ante: “Iso nkfɔka edjinge ntalaka mbala efula lá n’kfumbo djɛ nyɛtshi dj’isombekelaka ipa la ndjewa. . . . Totshutshɛke n’kongi. Tokanelake ente ombonangha ovunga w’iyopakoke nkimeyɛ. Nghɔsɔ ndeke Satana ɔkɔpande wɛ ndawoka. Wopo woyakiyanyɛ la woyawatshatshɛ l’okinyano nyɛnyɛka ente otatshu otale. Totshikake nkalɔ te Ndjambe edjinge ndɔlɔmba m’anse k’oloko, l’okitshatshɛ djɛnde nkɛɛdjɛ la nkosuka. Tshɔka tende etengo wɔna otshɔkande te papa kɛnde wina woyɛnde l’okiyano, kaanga okalwɛ nkfɔ ngo lovunga wɔkɔ, Yehova angokokotshɛ má djandji la má wɔlɔ wɔnde w’ipa wɔs’ɔdjɔmba.” *

15-16. Wopo wɔkɔnge anto amɔtshi iyoyawoka wina w’iyoshikikɛka ambɔ Yehova atakadjɛ?

¹⁵ Efula kɛ enkambi wɛ Yehova wawaka ekeketshelo efula djɛ ndjewa ambɔ Yehova atakadjɛ. Ndjɔmbɔmba, ɛnɔnyi efula lá ntondo, wɔnanyɔ ɔmɔtshi akeketshamaka má kɛnɛ kindawale lá wamba watepela ambɔ, “Bible ntshikitanyɛka nsɛnɔ.” Lá djamba mɔtshi, nkaana kɛmɔtshi atepelaka ante, lende alekɔ wolo djɛ ndjawola ente Yehova ndɔkɔpaka l’ɔtɛ wɔ akambo wa nyɛtshi windananghaka ntondo lá lowiko lɔnde. Nde akakatanaki l’ikanyi yɛsɔ ɛnɔnyi efula m’ɔkɔngɔ wɔnde ndongola batisimo. Koko, wina windatɔnɔla efula l’oshinga wɔ mbendo, nde atshikitanyɛka ikanyi yɛnde. *

¹⁶ Wopo wɔkɔnge kɛnɛ kokomelisa kɛsɔ iyakotshɛ wɔnanyɔ ɔmɔtshi? Nde afunaka ante: “Wina wimayalaka olangala lalendaki wa foto yɛnyɛwɔ anto enghanghunya, edjinge ayalaka wolo efula le lemi djɛ ntshika. Atahete ilá ndjɛka ndɔkfɔ lonkina. Mponaka okotshɔ wɔ tokokoIo edjinge lambotateyɛ ndeka okakasano  wɔmi wɔsɔ wolo. Tokokolo wanshikikɛka djɛ Yehova nkɔpaka lemi edjinge alekɔ entshupa djɛ nyimeyɛ lemi. Koko, mbala efula lemi ndawokaka etengo mpalekɔ la ntshina, etengo Yehova apɔnkɔpa. badji dj’ɔkɔndɔ wɔ nkaana kɛsɔ djenkotshɛka efula. Wina wɔnɛ, lamboka ente wina wokanelami ente Yehova apakoke nyimeyɛ lemi, alekɔ etengo ntepela ente opapɛyɛ wɔ Wɔnande wopakoke ndjipa ovunga wɔmi. Mpawolaka akishi watepelaki ɔkɔndɔ wɔ nkaana kɛkɔ djɛ lemi mbalaka edjinge ntɔnɔlaka wina tshɛ wokanelami etengo mpalekɔ la ntshina.”

17. Wopo wɔkɔnge ɔpɔstɔlɔ Poolo ndalote ilonga yɛ ndaawɛmbɛ lowo l’indeko?

¹⁷ Wayi wa nghɔsɔ ntovungulaka ɔpɔstɔlɔ Poolo. Lá ntondo kɛnde nkoma Okristo, nde ananghaki akambo wa nyɛtshi efula. Poolo avungɔki kɛnɛ kindananghaka koko nde atilaki yimba yɛnde ngo l’eteyi. (1 Ti. 1:12-15) Nde ɔsaka oshinga wɔ mbendo etengo opapɛyɛ wɔ Ndjambe ndɔpɛyɛ. (Nga. 2:20) Poolo atakindjɛ ndaawɛmbɛ lowo l’indeko koko nde ilaka yimba yɛnde ngo lepapɛyɛ wɛ wɔlɔ wɛ Yehova.

18. Kɛkɔnge k’isombeka lá djamba djɛnɛ?

¹⁸ Olakanyelo wɔkɔnge w’isombowa má ndjewa tolonga t’isombeka lá djamba djɛnɛ? 1) Mvungɔ akambo wa wɔlɔ wamboheta alekɔ ɔtshɔkɔ wɔ Yehova, koko, kaanga wopo wɔkɔnge lɔsɛnɔ lɔso iyayalaka wɔlɔ l’etsho wɛ ntondo, lɔsɛnɔ lɔso lel’andja wa bango ndeke ongoleka wɔlɔ. 2) Anto ankina nkoka ntonanghela nyɛtshi, koko wina wɔsɔnaso djɛ ndaawimeyɛ tongoyala l’akoka wa ntshɔ tá ntondo. 3) Ndaawɛmbɛ lowo l’indeko nkoka ntoshimba djɛ nkambela Yehova l’osasa. Djɛkondeke, etengo Poolo, iso ladjɛ ndjala la djawo ente Yehova ambótimeyɛ.

19. Kɛkɔnge kɛnyɛ ente l’andja wa bango topongo vungɔ ndjolo yisɛnaka ntondo?

¹⁹ Tolekɔ la n’kongi djɛ nsɛna lotshinda lotshinda. Edjinge l’andja wa bango wa Ndjambe, topangovungɔka kaanga n’kambo mɔ djɛ nyɛtshi djetovungusanyɛki ntondo. Lá kɛnɛ kelendana la eleko kɛsɔ, Bible ntepelaka ante: ‘Akambo wa ntondo wapangovungɔma lonkina.’ (Iza. 65:17) Kokanela ndambo, anto wamɔtshi l’anteyi kɛso wambotshunda l’olemo wɔ Yehova, koko l’andja wa bango, wangokalɔ ndjala dangala lonkina. (Djɔ. 33:25) Djɛkondeke, nyontshɔ tɔshi n’kano dj’ipa nkanelaka akambo wambohetaka. Koko tile yimba yɛso l’andja wa bango edjinge lá kɛnɛ k’okokaso nangha djɛ ndjingela l’eteyi!