1. Kɛkɔnge kekoka ntokomela ntsha tɔmbɔlɛmba?

LOFU la lofu, iso mpomanaka l’ekakasano edjinge iso nanghaka k’enkfumo k’okokaso nangha djɛ kfulumeyɛ. Koko ɔpɛnaka ente alekɔ wolo ndongela ekakasano ntsha tɔmbɔlɛmba? Djɛkondeke ngo iso nvungɔka ente, ɔlɛmbɛlɔ nkoka ntotshutsheyɛ djawo, oloko wolo, edjinge osasa wɔso. Woongo 24:10 edjinge nɔtɛ kɛnde ntepelaka ante: ‘Ntsha wɛ ɔmbɔlɛmba lá ntena djɛ ndjolo, wolo wɔko wongokitakita.’ Nsɔsɔlɔ, ɔlɛmbɛlɔ nkoka ntotshutsheyɛ wolo woyɛso la djonyi djɛ ndongela ekakasano welá lowiko.

2. Akambo amɔtshi wakɔnge wakoka ntɔlɛmbɛ, ko kɛkɔnge kɛnaso lɔ lá djamba djɛnɛ?

² Iso nkoka ndɛmba m’ɔtɛ w’akambo efula, akambo wakɔ nkoka ndjala wel’eteyi kana welá bandja djɛ demba djɛso. L’anteyi k’akambo wasɔ ndeke otonaso edjinge evunga wɛso, wɛdju wɛso, edjinge elando. Iso nkoka ndɛmba lonkina ladjikɛnde topawa edjito w’okombolaso l’olemo wɔ Yehova, kana topowa eposelo wɛ wɔlɔ l’etatshi kɛso kɛ looko. Lá djamba djɛnɛ, tɛɛna lɔ akambo amɔtshi w’okokaso nangha djɛ nana l’ɔlɛmbɛlɔ.

3. Kɛkɔnge kekoka ntokotshɛ djɛ ndjala l’ikanyi yɛdje lá nkambo dj’evunga wɛso?

³ Nkoka ndjala wɔndju djɛ ndjala l’ikanyi yɛ nyɛtshi nkambo djɛ evunga la wɛdju wɛso. Eposelo welekɔ la nkambo ntshɔ nde, iso nkoka ndokanela ente Yehova apongawola iso ndjingela l’andja wa bango m’ɔtɛ w’evunga wɛso. Ikanyi yɛ nghɔsɔ nkoka ntɔtɔla tá nyɛtshi. Ko wopo wɔkɔnge woyɛso ladjɛ ndɔsa evunga wɛso? Bible nyɛnyɛka djɛ nyimɛ ngo Yeso, anto ankfumɔ ‘wananghaka ovunga.’ (Ɔrɔ. 3:23) Koko, Yehova Ikɔkɔ yɛ Bible apahone ntovunda la nkɔmɔ kana mpona dj’iso ndjala djɔ. Nde alekɔ Papa kɛ ngandji kekombola ntokotshɛ. Nde alekɔ lonkina la bale ntshitshi.  Nde nyɛnaka welo w’ilaso djɛ nana la wɛdju wɛso la dj’ipa nsamba ikanyi yɛdje lá nkambo djɛ evunga wɛkɔ edjinge nde alekɔ entshupa djɛ ntokotshɛ.​—Ɔrɔ. 7:18, 19.

4-5. Lá nkilika 1 Djɔanɛ 3:19, 20 lamo ankaana ipe iyotakindjɛ ndjala l’ɔlɛmbɛlɔ?

⁴ Tokoshishima ndjɔmbɔmba kɛ Deborah nya Maria. * Wina w’indayalaka ilɛngɛ, ase nkfumbo kɛ Deborah wonanghelaki akambo lá yopo y’otshindaki djɛ ndaawoka etengo wambɔpɛyɛ nsɔnyi. Ayalaki wolo dj’iwɔ ndowandola. Djɛkondeke ndaye ndoyala l’ikanyi yɛ nyɛtshi lá nkambo djɛ nde nyɔmɛlɛ. Wina w’indananghaka evunga wɛ daambi, nde ayawokaki etengo apananghaka nkambo djɛ wɔlɔ. Maria ayalaki l’okakasano wɔk’ɔmɔ. Ase nkfumbo kɛnde wɔpɛyɛki nsɔnyi. Eposelo weyalisa la nkambo ntshɔ nde, nde ayɛka ndoyawoka entengo onto wopalekɔ la ntshina. Kaanga mɔkɔngɔ wɔ nde ndjewa akambo wa nsɔsɔlɔ nde ayawokaki etengo apɛlama ndjɛmba djiina djɛ Ndjambe!

⁵ Koko, ankaana ipe yɛsɔ watatshika nkambela Yehova. Lamo? Mande iwɔ wɛkɛka edjito wɛwɔ le Yehova má lotshimbo lɔ alɔmbɛlɔ wa l’entete. (Yee. 55:22) Iwɔ wayɛka ndawola djɛ, Papa kɛso kel’olongo ndjewaka djɛ akambo wa nyɛtshi watokomela lá lowiko nkoka ntotshinda djɛ ndjala l’ikanyi yɛ nyɛtshi lá nkambo djɛso isɔmɛlɛ. Koko, nde nyɛnaka lonkina kɛnɛ kelekɔ wɔlɔ l’eloko wɛso, ntepela ente nanghedji dj’isopɛnyi isɔmɛlɛ.​—Wala 1 Djɔanɛ 3:19, 20.

6. Kɛkɔnge kekoka onto nangha ntsha nde ambokfɔ lonkina l’ovunga w’indananghe ntondo?

⁶ Onto wonangha la wolo djɛ ntshika nkambo mɔtshi djɛ nyɛtshi djembɔtɔtɔmɛla, nkoka ndɛmba ntsha nde ambɔkfɔ lonkina l’ovunga wɔkɔ. Lá nsɔsɔlɔ, lako nyɛtshi ndakiyanyɛ lá lɛdji lɔmɔtshi wina wonanghaso ovunga. (2 Kɔ. 7:10) Koko, topakoke ndakiyanyɛ amboleka edjinge nfɛnyɛ ente: ‘Tolekɔ anyanya. Yehova apotimeyɛki lotshinda.’ Tokanyi tɔ nyɛtshi tɔ nghɔsɔ topaye má olakanyelo wɔ nsɔsɔlɔ edjinge nkoka ntotshinda dj’iso ntshika nkambela Yehova. Vungɔka kɛnɛ k’isowalaki lá Woongo 24:10​—wolo wɔso nkitakitaka wina wɔlɛmbaso. L’edjena kɛ nangha nghɔsɔ, ‘tile akambo l’ɔnɔnghɔ’ iso la Yehova má ndɔlɔmba la mpona nkɛtshi kɛnde. (Iza. 1:18) Wina wɔ Yehova ɛnande djɛ wɛ omboyapɛla nsɔsɔlɔ, la onangha la wolo djɛ nangha etshikitano, nde angokimeyɛ. Má djiko djɛ lasɔ, hona okotshɔ wɔ tokokolo. La bale ntshitshi nkfumɔ, iwɔ wangokokotshɛ djɛ wɛ ndjala la lonyuma lɔ wɔlɔ lonkina.​—Dja. 5:14, 15.

7. Lamo isopakoke ndɛmba wina wonanaso djɛ nangha kɛnɛ kelekɔ wɔlɔ?

⁷ Jean-Luc, ikokolo imɔtshi yelá France, nshimelaka wanɛ wanana la wɛdju ɛmɔtshi ante: “Lá wiso wa Yehova, onto wɔ wɔlɔ apalekɔ kanga  lopananghaka ovunga koko, onto woyakiyanyɛ la woyapɛla win’onkfumɔ lá nkambo dj’evunga wɛnde.” (Ɔrɔ. 7:21-25) Djɛkondeke, ntsha olekɔ nana la wɔdju ɔmɔtshi, toyawɔnyɔlake. Vungɔ ente, lako onto wolekɔ djɔ lá ntondo kɛ Ndjambe. Koko, isankfumɔ tolekɔ la djonyi djɛ wɔlɔ wɔ Ndjambe wopa wɔs’ɔdjɔmba ma lotshimbo lɔ oshinga wɔ mbendo.​—Ɛfɛ. 1:7; 1 Dj. 4:10.

8. Ntsha tolekɔ l’ɔlɛmbɛlɔ, le na okokaso mpona okotshɔ?

⁸ Toyawɛkɛ le wananyɔ l’ankaana, walekɔ nkfumbo kɛso kelá nyuma dj’iwɔ ntokeketshɛ! Iwɔ nkoka ntekameyɛ wina woyɛso la mposɛ kɛ ntepela wopo woyawokaso edjinge nkoka ntokeketshɛ l’etepela wɛ wɔlɔ. (Woo. 12:25; 1 Te. 5:14) Joy, nkaana kɛmɔtshi kelá Nigéria kenanaki l’ɔlɛmbɛlɔ, atepelaka ante: “Otasambawɔ okotshɔ wɔ wananyɔ l’ankaana otayalami ngetemo? Ekeketshelo k’ime wananyɔ l’ankaana alekɔ ilembetelo yɛnyɛnyɛ djɛ Yehova nkadjimolaka alɔmbɛlɔ wami. Mewɔ ndeke momewa wopo wɔ nkeketshɛ anto ankina walekɔ la djonyi dj’okotshɔ.” Koko, iso ladjɛ nama lá wɔngɔ ente, wananyɔ l’ankaana yɛso wapangewaka wina onkfumɔ woyɛso la djonyi dj’okotshɔ. Djɛkondeke angoyalaka djonyi iso ntapolaka djina lá nsawolaka la winaso Okristo wombotshunda edjinge ndoshimela papoo djɛ tolekɔ la djonyi dj’okotshɔ.

9. Wopo wɔkɔnge Yeembo 41:3 edjinge 94:19 otokeketshɛwɔ?

⁹ Lɔmba Yehova djɛ nde nkosuka. Wina w’isopoyawoke wɔlɔ, pekapeka ntsha tolekɔ l’olando wopakɔnɔ, iso nkoka ndjala l’okakasano wɔ ndjala l’ikanyi yɛ wɔlɔ. Kaanga Yehova ndopotɔkɔnɔla lá nsese l’etsho wɛnɛ, nde angotokeketshɛ edjinge angotɔpɛyɛ wolo woyɛso la djonyi djɛ nkfulumeyɛ. (Wala Yeembo 41:3; 94:19.) Ndjɔmbɔmba, nde nkoka ntshinda winaso Akristo djɛ ntokotshɛ wina woyɛso la djonyi djɛ nangha elemo welá mbandja kana djɛ ntosomba ekete kɛmɔtshi. Nde nkoka ntshinda wananyɔ dj’iwɔ ntɔlɔmbɛla. Kana koko, nde nkoka ntovungola etepela wekembɛ welekɔ l’Otepela wɔnde, ndjɔmbɔmba nkongi djɛ wɔlɔ efula djɛ lowiko lɔ djɔ l’ipa l’elando edjinge ndjolo l’andja wa bango.​—Ɔrɔ. 15:4.

10. Lamo Isang ndotakindjɛ ndɛmba m’ɔkɔngɔ wɔnde nangha aksida?

¹⁰ Isang, kanga l’intansɛ lá Nigéria, ananghaka aksida amɔtshi wayisa ndokomɛ ekfuse. Dɔktɛrɛ djɛnde oshimelaka ante opangɔkɛnda lonkina. Isang ntepelaka ante: “Ndjalaka l’okiyano efula edjinge ndɛmbaka efula.” Koko nde akidjɛka ndɛmba l’okiyano? Lako! Iya kɛkɔnge k’okotshisa? Isang apakisola ante: “Wadjɛmi edjinge lemi mɔmɛlɛ totatshikaki ndɔmba Yehova edjinge nkindjɛ ndjeka Otepela wɔnde. Tɔsaka lonkina nkano djɛ ndjila yimba l’ɛtshɔkɔ enkina efula wowaso, ndjɔmbɔmba nkongi djɛ ndɔsɛna l’andja wa bango wa Ndjambe.”

11. Wopo wɔkɔnge Cindy ndayale l’akoka wa ndjala l’osasa wina windayalaka l’olando w’ekekete?

¹¹ Cindy, nkaana kɛso kɛmɔtshi k’intansɛ lá Mexique, wowisolaka l’olando w’ekekete wokokisa ndoyaka. Iya kɛkɔnge k’indananghe djɛ nkfulumeyɛ? Wina w’indayalaka l’opitalo, nde ɔsaka nkano djɛ mpoposanyɛ nfu ikfumɔ. Nde afunaka ante: “Nangha nghɔsɔ, ankotshɛka djɛ lemi ndjila anto ankina yimba l’edjena kɛ nkanelaka ngo epaso, ndjolo kana olando woyalaki la lemi. Mananghaka nde nghɔnɛ: Wina wosawolami l’adɔktɛrɛ kana la tofulume, láwopólaki nsango má ankfumbo yɛwɔ. Masɔ láwopólaki lamo iyasɔnɛ olemo wɔwɔ wɔ wolo wɔnɛ. M’ɔkɔngɔ wɔ masɔ, ayalaki wɔdju le lemi djɛ ndjewa akambo wakokaki nkota eloko wɛwɔ. Efula kɛwɔ watepelaki ambɔ alekɔ wolo djɛ ɔkɔnyi ndáwopólá ambɔ ‘Nyo mo?’ Edjinge efula wampɛyɛki lokasa lá wopo wɔ mawilaka yimba. Ankina wampɛyɛki edjinge nimɛlo yɛwɔ yɛ telefɔnɛ. Djɛkondeke, l’eleko kɛ ndjolo kelá lowiko lɔmi kɛsɔ, Yehova ampɛyɛka wolo wɔ nkfulumeyɛ edjinge osasa w’imotakanelaki!”​—Woo. 15:15.

12-13. Wanɛ wayalisa l’elando kana la nkɔmɔ iyananghe nge djɛ mpoposanyɛ, ko epeselo wɛkɔnge weyalisa la nkambo ntshɔ?

 ¹² Anto walekɔ l’elando kana nkɔmɔ nkoka ndɛmba, mande wapalekɔ l’akoka wa nangha kɛnɛ k’okombolawɔ nangha l’olemo w’ipoposanyɛ. Koko, efula kɛwɔ ndjalaka l’akoka wa mpoposanyɛ wɔlɔ, lá topo totshikitanyi. Nkaana kɛso kɛmɔtshi kel’États-Unis ketawɔ Laurel, ayalaka ɛnɔnyi 37 l’eteyi kɛ mashinyi ɔmɔtshi wookotshɛki djɛ mpomola! Nde ɛnaki ndjolo la kansɛrɛ, epaso kɛ wolo k’iyowate, edjinge olando wopakɔnɔ welá loposo lɔ demba. Koko kaanga ndayalaka l’elando wɛ nkekete wɛsɔ, nde atatshika mpoposanyɛ. Nde apoposanyɛki adɔktɛrɛ w’osakelaki edjinge anto ankina wayɛki ndolenda. Eposelo wɛkɔnge weyalisa la nkambo ntshɔ? Nde akotshɛka anto 17 djɛ ndjewa akambo wa nsɔsɔlɔ wimá Bible! *

¹³ Richard, ikokolo yelá France, alekɔ l’alako amɔtshi wa kɔɔ wa pɛyɛ wanɛ wadjipama l’amvulu yɛwɔ kana l’amvulu y’olamawɔ ankɔlɔma y’anto. Nde ntepelaka ante: “Lemi ndakembɛka dj’iwɔ mpona imɛmɛsa imɔtshi yɛ daambi dj’iwɔ nyanyɛka enkanda. Kɛsɔ nkoka nsepa ikanyi y’anto edjinge ndatshinda dj’iwɔ ndjopola weepó. Nkambo djɛsɔ nkoka nkeketshɛ wananyɔ l’ankaana yɛso yɛ ngandji yepalekɔ l’akoka wa mposa t’olemo w’ipoposanyɛ wɔ mvulu la mvulu.” Wanɛ wambodjipama l’amvulu yɛwɔ nkoka mpoposanyɛ lonkina lá telefɔnɛ kana má funanela enkanda.

14. Ndjɔmbɔmba kɛkɔnge kɛ wɔlɔ ketotshikelisa Nkfumi Davidɛ?

¹⁴ Ekakasano weyɛ má lotshundo, má demba kana m’akambo ankina nkoka ntosambɛ edjito w’okombolaso l’otshumano kana l’edjingadjinga. Ntsha nghɔsɔ ndeke oyɛwɔ edjinge lewɛ, mbɔ koko, ndjɔmbɔmba kɛ Nkfumi Davidɛ kekoka ntokotshɛ. Wina w’iyoshimela djɛ nde atasɔnama djɛ mpikela Ndjambe tɛmpɛlɔ, nkambo dj’indakombolaka efula djɛsɔ, Davidɛ asukaka onto wɔ Ndjambe ndasɔnɛ djɛ nkamba olemo wɔsɔ. Davidɛ apɛyɛka edjinge epapɛyɛ wɛ l’ɛkɔpa djɛ nsuka olemo wɔsɔ. Ɔsɔ alekɔ nsɔsɔlɔ ndjɔmbɔmba kɛ wɔlɔ lombombe, k’iso nkilika!​—2 Sa. 7:12, 13; 1 Ɛk. 29:1, 3-5.

15. Wopo wɔkɔnge wɔnanyɔ Hugues ndalongela ɔlɛmbɛlɔ?

¹⁵ Lá nkambo dj’ekakasano welendana la demba, Hugues, wɔnanyɔ ɔmɔtshi welá France, atshikaka nkamba etengo ekokolo, edjinge nde atayala lonkina l’akoka wa nkamba kaanga ilelemo yɛ daambi lá mbandja. Nde afunaka ante: “Má bango ndɛmbaka efula edjinge ndawokaki entengo mpalekɔ la ntshina lonkina. M’ɔkɔngɔ, ndjɛka ndɛna djonyi djɛ ndjawola elelo wɛmi edjinge ndjɛka ndowa osasa má nkambela Yehova I’akoka wokotshɛmi. Ndɔsaka nkano  dj’ipa mpekɔ. Etengo Ngidiyɔna nya ampame yɛnde nkam’isato iyakindjɛ nana kaanga iyalɛmbɛ, edjinge lemi langokindjɛ nana!”​—Tos. 8:4.

16. Olakanyelo wɔkɔnge w’okokaso mba má ndjɔmbɔmba kɛ andjelo?

¹⁶ Andjelo wa nkɔmano walekɔ ndjɔmbɔmba yɛ wɔlɔ. L’ɛlɔndjɛlɔ kɛ Nkfumi kɛ nyɛtshi Ahaba, Yehova alɔmbaka andjelo dj’iwɔ mpɛyɛ tokanyi tɔwɔ, djɛ ndodjimba. Andjelo efula wapɛyɛka tokanyi tɔwɔ. Koko Ndjambe awolaka ngo ikanyi yɛ ondjelo ɔmɔ toko. (1 Nk. 22:19-22) Oyɛwɔ mo, andjelo ankina wa nkɔmano wasɔ walɛmbaka, mbala imɔtshi lá ndaawopola ambɔ, ‘Lamo isohetshɛki wina la mpɛyɛ tokanyi tɔso?’ Topalekɔ l’elonga kɛnyɛ djɛ wananghaka nkambo djɛsɔ. Lá nsɔsɔlɔ, andjelo walekɔ l’okitshakitshɛ edjinge iwɔ nkɔpaka djɛ lomo l’okfumɔ lotshu ngo te Yehova.​—Tos. 13:16-18; Ndj. 19:10.

17. Kɛkɔnge k’okokaso nangha ntsha tɔmbɔlɛmba lá wopo w’isopawa edjito ɛmɔtshi l’olemo wɔ Yehova?

¹⁷ Tovungɛke odjito w’ekekete wolekɔ laso wɔ mbɛmba djiina djɛ Ndjambe edjinge wɔ mpoposanyɛ losango l’Onkfumi. Iso nkoka mba odjito kana ntshutshɛ, koko, apalekɔ odjito ndeke l’otila ntshina lá wiso wa Ndjambe. Koko ngo ntsha tolekɔ l’okitshakitshɛ edjinge t’ewa elelo wɛso, ndeke isongoyala la ntshina lá wiso wa Yehova la wa wananyɔ l’ankaana. Djɛkondeke, wɔnda Yehova djɛ nde nkokotshɛ djɛ wɛ ndjala l’okitshakitshɛ edjinge ndjewa elelo wɛko. Tɔnɔla l’efula k’andjɔmbɔmba yelá Bible y’anto wayalisa l’okitshakitshɛ edjinge w’ewaki elelo wɛwɔ. Nangha k’enkfumɔ k’okokɛ nangha djɛ wɛ nkambela wananyɔ l’ɛkɔpa.​—Yee. 138:6; 1 Pɛ. 5:5.

18-19. Wopo wɔkɔnge okokɛ mba osasa l’olemo w’ipoposanyɛ kaanga ntsha opawa eposelo wɛ wɔlɔ l’etatshi kɛko kɛ looko?

¹⁸ Ɔngɔlɛmbake ntsha opawa eposelo wɛ wɔlɔ l’etatshi kɛko kɛ looko kana anto efula wa l’eteyi wapatanema lá mbandja? Ntsha nghɔsɔ, kɛkɔnge k’okokaso nangha djɛ nama osasa wɔso? Alako amɔtshi walekɔ lá ipapango yelekɔ l’ɔtɛ wɔ nkambo ante: “ Topo tɔ ndeka mbɔngɛ olemo wɔko.” Lonkina alekɔ djonyi nama ikanyi yɛ wɔlɔ lá kɛnɛ kelendana l’olemo w’ipoposanyɛ. Kɛkɔnge kɛkɔpa nsakisola nkambo ntshɔ?

¹⁹ Tovungɛke ente, elonga kɛ ntondo k’opoposanyɛso nde, ndjewanyɛ djiina djɛ Ndjambe le anto la ndashimela kɛnɛ kelendana l’Onkfumi wɔnde. Yeso atepelaka papoo ante, anto daambi ndeke longingela lá mboka ke tá lowiko. (Mat. 7:13, 14)  Wina woyɛso l’olemo w’ipoposanyɛ tolekɔ la lomu lɔ nkamba esanga la Yehova, Yeso edjinge w’andjelo. (Mat. 28:19, 20; 1 Kɔ. 3:9; Ndj. 14:6, 7) Yehova nsepaka wanɛ wakɔpa ndokambela. (Dj. 6:44) Djɛkondeke ntsha onto apawolisa ntekameyɛ wina wɔnɛ, nde nkoka ndjekameyɛ losango lɔso mbala kenkina.

20. Olakanyelo wɔkɔnge w’okokaso mba lá Jɛrɛmi 20:8, 9 lá kɛnɛ kelendana la wopo wɔ nana l’ɔlɛmbɛlɔ?

²⁰ Iso nkoka mba elakanyela efula me ɔprɔfɛtɛ Jɛrɛmi. Wotomaka t’etatshi kɛ looko keyalisa wolo efula mpoposanyɛ. Anto wa l’eteyi wotolaki edjinge w’ɔsɔkaki ‘lofu l’otondo.’ (Wala Jɛrɛmi 20:8, 9.) Nde alɛmbaka efula, akɔpaka edjinge ntshika mpoposanyɛ. Koko nde atanangha nghɔsɔ. Lamo? Mande “otepela wɔ Yehova” w’oyalaka l’eteyi kɛ Jɛrɛmi etengo iyɛ edjinge nde atakoka nkfulumeyɛ! Nghɔsɔ ndeke okokawɔ ndjala edjinge leso, ntsha tolodjɛ eloko wɛso edjinge timba tɔso l’Otepela wɔ Ndjambe. Ɔsɔ ndeke elonga kenkina ketotshinda djɛ ndjekaka Bible lufu la lufu la ntɔnɔlalaka l’eteyi. Lá nanghaka nghɔsɔ, tongokindjɛ nama osasa wɔso edjinge tokoka mba eposelo wɛ wɔlɔ l’olemo w’ipoposanyɛ.​—Jɛr. 15:16.

21. Kɛkɔnge k’okokaso nangha djɛ ndongela ɔlɛmbɛlɔ?

²¹ Deborah k’isotepelaki l’adjiko atepela ante: “Ɔlɛmbɛlɔ nkoka ndjala ota w’ekekete wokamba la Satana.” Koko, Yehova Ndjambe ndeka Satana edjinge eta enkfumɔ wekamba lande wolo. Djɛkondeke, wina wɔlɛmbɛ kaanga lá nkambo dj’elonga kɛkɔnge kɛsɔ, wɔnda Yehova djɛ nde nkosuka. Nde angokokotshɛ djɛ wɛ ndongela evunga wɛko edjinge wɛdju wɛko. Nde angokosuka kaanga wina woyalɛ l’olando. Nde angokokotshɛ djɛ wɛ ndjala l’ikanyi yɛdje lá nkambo djɛ edjito w’olemo. Edjinge nde angokokotshɛ djɛ wɛ ndjala l’ikanyi yɛ wɔlɔ lá nkambo dj’olemo wɔko w’ipoposanyɛ. Djɛkondeke, ɛkɛ edjito wɛko te Papa kɛko k’el’olongo. Má okotshɔ wɔnde, okoka ndjala l’akoka wa wɛ ndongela ɔlɛmbɛlɔ.