1. Leeta lɔkɔnge Yeso ndete ansaki ndjale anɛyi, ko iyananghe mo?

AMBEKI wanɛ, Pɛtɛlɔ, Andele, Djakɔbɔ, edjinge Djɔanɛ wayalaka ansaki ndjale. Kokanela wopo wiyakamɔ wina wiyoke leeta lɔ Yeso lɔnɛ: ‘Nyonkilike, ko lemi langonyokomɛ ansaki y’anto.’ * Iyananghe mo? Bible ntepelaka ante: ‘Mbala kɛkɔ kɛmɔ iwɔ watshikaka etayi wɛwɔ edjinge wokilikaka.’ (Mat. 4:18-22) N’kano n’tshɔ djetshikitanyɛka nsɛnɔ yɛwɔ lotshinda. L’idjena y’iwɔ ndjala amvundi yɛ nse yɛ nsɔsɔlɔ, iwɔ wayalaka ladjɛ ndjala ‘amvundi w’anto wa wika.’ (Luka 5:10) Lɔɔko kɛnɛ, Yeso akidjɛ ndjeta anto walekɔ l’eloko wɛ wɔlɔ wakɔpa akambo wa nsɔsɔlɔ djɛ nangha wopo wɔk’ɔmɔ. (Mat. 28:19, 20) Wɛ ongawola leeta lɔ Yeso lɔ ndjala onsaki w’anto?

2. Ladjikɛnge oyɛso ladjɛ ndɔsa n’kano djɛ ndjala onsaki w’anto la djonyi, edjinge kɛkɔnge kengotokotshɛ djɛ ndɔsa n’kano djɛkɔ?

² Mbala imɔtshi wɛ ombeka Bible l’ila k’etsho djudji edjinge ombonangha etshikitano wɛmɔtshi lá lɔsɛnɔ lɔko. Win’ɔsɔ wɛ olekɔ entshupa djɛ ndɔsa n’kano djɛ ndjala nsakodji kɛ losango lɔ wɔlɔ. Ntsha wɛ okaakanda djɛ ndjawola leeta lɔ Yeso, mbɔ koko tɔlɛmbake. Okaakando wɔkɔ nyɛnyɛka djɛ wɛ ndjewaka djonyi djelekɔ la n’kano djɛsɔ. Nsɔsɔlɔ, Bible ntepelaka djɛ Pɛtɛlɔ nya winande watshikaka etayi wɛwɔ ngo ‘mbala kɛkɔ kɛmɔ.’ Koko n’kambo n’tshɔ apakɔpe ntepela ante, Pɛtɛlɔ nya wananyɔ wande watatɔnɔla ntondo lá n’kambo n’tshɔ. Iwɔ w’ewaka edjinge wawolaka djɛ Yeso ndeke Mɛsiya ndekana Ngɔndɔ isamalo lá ntondo kɛ n’kambo n’tshɔ. (Dj. 1:35-42) Etengo iwɔ, wɛ koko ekaka akambo efula  walendana la Yehova nya Yeso, edjinge ɔkɔpa nkindjɛ nfula lá nyuma. Koko lá ntondo kɛ wɛ ndɔsa n’kano djɛ nkoma nsakodji, wɛ ladjɛ ntɔnɔla efula lá n’kambo n’tshɔ. Kɛkɔnge kekotshisá Pɛtɛlɔ, Andele, edjinge anto ankina djɛ ndɔsa n’kano n’tshɔ?

3. Wekeka wakɔnge wakoka nkokotshɛ djɛ nfudjɛ mposɛ kɛko kɛ ndjawola leeta lɔ Yeso?

³ Ambeki wa Yeso wa ntondo, wayalaki la mposɛ, w’ewaki wopo wɔ nangha olemo wɔwɔ wɔlɔ, wayalaki l’oloko wolo edjinge w’ewaki ndapekala. Ape l’ehamo, w’ekeka wasɔ ndeke lakotshisa djɛ ndjala ansaki w’anto wa nsɔsɔlɔ. Lá djamba djɛnɛ tɔkɔpa nyɛna wopo wɔkɔnge wekeka wasɔ okokawɔ ntokotshɛ djɛ ndjala ambeki wa Kristo wa wɔlɔ.

4. Kɛkɔnge ketshindaki Pɛtɛlɔ ndjɛ mvunda nse?

⁴ Pɛtɛlɔ avundaki nse djɛ nkotshɛ ehoba wɛ nkfumbo kɛnde, koko ɔsɔ atayala olemo w’anyanya lende. Nyɛnamaka ngete Pɛtɛlɔ akɔpaki olemo wɔnde wɔ nsaka ndjale. (Dj. 21:3, 9-15) Nde ekaka lonkina djɛ nkɔpa olemo wɔ nsaka anto. Edjinge má okotshɔ wɔ Yehova, Pɛtɛlɔ ayɛka ndewa olemo wɔsɔ wɔlɔ efula.​—Ele. 2:14, 41.

5. Lá nkilika Luka 5:8-11, ladjikɛnge Pɛtɛlɔ ndayale la wɔma, edjinge kɛkɔnge kekoka ntokotshɛ djɛ ndongela wɔma wɔ nghɔsɔ?

⁵ Iso mpoposanyɛka ladjikɛnde iso nkɔpaka Yehova, ɔsɔ ndeke elonga kɛ ntondo ketotshinda djɛ nangha olemo wɔsɔ. Ntsha tɛɛna ente topalekɔ l’akoka wa mpoposanyɛ, ngandji kɛso te Yehova nkoka ntokotshɛ djɛ ndongela ikanyi yɛ nghɔsɔ. Wina wɔ Yeso ndete Pɛtɛlɔ djɛ nde ndjala onsaki w’anto, nde oshimelaka ante: ‘Tokake wɔma.’ (Wala Luka 5:8-11.) Pɛtɛlɔ atayala la wɔma wɔ kɛnɛ kekokisa ndokomela ntsha nde amboyala ombeki. Koko, nde akamɔka lá ndenda efula kɛ nse yɛ Yeso ndombakotshɛ djɛ mvunda ma nsese djɛnde, Pɛtɛlɔ ayawokaki djɛ nde apɛlama nkamba esanga nya Yeso. Etengo  Pɛtɛlɔ, wɛ nkoka ndjoka wɔma kana ndjala l’okiyano lá kɛnɛ tshɛ k’okokɛ nangha djɛ ndjala ombeki wɔ Kristo. Ntsha oyawokɛ nde nghɔsɔ, fudjɛ ngandji kɛko te Yehova, te Yeso, edjinge te winako anto, ko ongoyala la mposɛ kɛ ndjawola leeta lɔ Yeso lɔ ndjala onsaki w’anto.​—Mat. 22:37, 39; Dj. 14:15.

6. Donga nkina djɛkɔnge djetotshinda djɛ mpoposanyɛ?

⁶ Donga nkina djetotshinda djɛ mpoposanyɛ n’kinɛ. Iso nkɔpaka nɛmɛyɛ lotomo lɔ Yeso lɔnɛ: ‘Nyotshu . . . nyokfumbe anto ambeki.’ (Mat. 28:19, 20) Iso mpoposanyɛka lonkina ladjikɛnde anto ‘wɛna ndjolo la wapalekɔ l’onto wakotshɛ’ edjinge walekɔ la djonyi dj’efula djɛ ndjeka nsɔsɔlɔ kelendana l’Onkfumi. (Mat. 9:36) Yehova nkɔpaka djɛ nkopo y’anto ankfumɔ mba balo djɛ nsɔsɔlɔ edjinge mbika.​—1 Ti. 2:4.

7. Wopo wɔkɔnge Ɔrɔma 10:13-15 ɛnyɛnde djɛ olemo w’ipoposanyɛ wolekɔ djonyi efula?

⁷ Wina wokanelaso djɛ olemo wɔso w’ipoposanyɛ nkoka mbikɛ nsɛnɔ y’anto, n’kambo n’tshɔ ntotshindaka djɛ mpoposanyɛ. Otshikitanyi l’onsaki ndjale womvundaka nse ngo djɛ nsadjɛ, iso “mvundaka” anto ape djɛ ndasadjɛ kana ndalɛ koko, djɛ mbikɛ nsɛnɔ yɛwɔ.​—Wala Ɔrɔma 10:13-15; 1 Ti. 4:16.

8-9. Kɛkɔnge kɛ onsaki ndjale oyɛnde ladjɛ ndjewa, ko ladjikɛnge?

⁸ L’etsho wɛ Yeso, onsaki ndjale w’ose Isariyɛlɛ ayalaki la djɛ ndjewa wepo wɛ nse wokokande mvunda. (Lew. 11:9-12) Nde ayalaki ladjɛ ndjewa lonkina n’djena dj’okokande mba nse. Mbala efula nse ndjalaka l’itena yɛ washi wa wɔlɔ edjinge l’itena yelekɔ olelo efula. Lonkina wina wɔ ansaki ndjale otshɔwɔ tosaka ndjale, wolekɔ djonyi efula. Lá kɛnɛ kelendana la wina wɔ wɔlɔ wɔ mvunda nse yɛ nsɔsɔlɔ, misiɔnɛrɛ kɛmɔtshi kɛ mpame awaka olakanyelo wina wɔ Owakɛ wɔ Yehova ɔmɔtshi w’itansɛ lá ntshanga djɛ Pacifique ndowete djɛ tosaka ndjale nyande. Misiɔnɛrɛ oshimelaka ante: “Tongopomana lomi l’eshidji djuwa kokele wɛ nkɛsɛ.” Wɔnanyɔ wɔkɔ ndombokadjimola ante: “Wɛ otoke wɔlɔ. Tongotshɔ lá wina wolekɔ wɔlɔ le nse, koko ape wina wolekɔ wɔlɔ leso.”

⁹ Wopo wɔk’ɔmɔ ndeke, ambeki wa Yeso wayisa ndoyala ansaki w’anto wakɔpaki ntshɔ tá todjena tolekɔ “anto” edjinge wina wokokawɔ ndatana. Ndjɔmbɔmba, ambeki wa Yeso wapoposanyɛki lá tɛmpɛlɔ, lá toshinangɔnga lá mvulu la mvulu edjinge lá lombengo. (Ele. 5:42; 17:17; 18:4) Edjinge iso ladjɛ ndembetela wina wokokaso ntana anto walekɔ l’etatshi kɛso kɛ looko, lá mbandja kana lá todjena tɔwɔ t’olemo. Iso ladjɛ ndjekela mpoposanyɛ ngo lá todjena edjinge lá wina woyɛso la mbamba kɛ ntana anto.​—1 Kɔ. 9:19-23.

10. M’peko djɛkɔnge olonghanyelo wɔ Yehova ndombotoposeyɛ?

¹⁰ Onsaki ndjale alekɔ la djonyi djɛ m’peko djɛ wɔlɔ edjinge nde ladjɛ ndjewa wopo wɔ nkamba la m’peko djɛkɔ. Edjinge iso la ndjala la m’peko djɛ wɔlɔ dj’olemo wɔso w’ipoposanyɛ. Iso ladjɛ ndjewa wopo wɔ nkamba la m’peko dj’okotshɛso. Yeso apɛyɛka ambeki wande elakanyelo wɛ papoo lá wopo wokokawɔ mpoposanyɛ losango lɔ wɔlɔ. Nde álakanyɛka kɛnɛ kokokawɔ ntɔla, edjena kɛ mpoposanyɛ la kɛnɛ kokokawɔ ntepela. (Mat. 10:5-7; Luka 10:1-11) Lɔɔko kɛnɛ, olonghanyelo wɔ Yehova ambotoposeyɛ Epeko kɛ n’kete djɛ olakanyelo ketokotshɛ djɛ ndakanyɛ wɔlɔ. * Edjinge olonghanyelo wɔ Yehova ntolakanyɛka wopo wɔ nkamba la n’kete djɛkɔ dj’olakanyelo. Onkfumbelo wɔsɔ ntokotshɛka dj’iso ndjala l’eshikikelo wina wopoposanyɛso edjinge l’akoka wa ndjala wetsha wɛ wɔlɔ.​—2 Ti. 2:15.

11. Ladjikɛnge ansakodji oyɛwɔ ladjɛ ndjala l’oloko wolo?

¹¹ Onsaki ndjale ladjɛ ndjala l’oloko wolo. Iwɔ mpomanaka mbala imɔtshi l’ekakasano wɛ wolo lá washi. Iwɔ nkambaka mbala efula l’otsho edjinge nkoka mpomana la lompopo l’ekekete wina woyɛwɔ lá washi. Wopo wɔkɔ ɔmɔ ndeke ansakodji ladjɛ ndjala l’oloko wolo. Wina wotateyɛso mpoposanyɛ edjinge ndjewama etengo Ewakɛ wɛ Yehova, iso mpomanaka la “lompopo l’ekekete” ntepela ente ɛhɛnyɔhɛnyɔ wimá nkfumbo, lɔsɔkɔ me ntombe yɛso, edjinge anto amɔtshi ntonaka ndjekameyɛ losango lɔso. Koko iso topakamɔ djɛ nyɛna akambo wasɔ. Yeso ewoyɛka ante angotoma ambeki wande djɛ topoposanyɛ l’anteyi k’anto walekɔ antonyi wawɔ.​—Mat. 10:16.

12. Lá nkilika Yosua 1:7-9, kɛkɔnge kekoka ntokotshɛ djɛ ndjala l’oloko wolo?

¹² Wopo wɔkɔnge okokɛ ndjala l’oloko wolo? Ntondontondo, lokoyashikikɛ ente Yeso akindjɛ ndɔndjɛ olemo w’ipoposanyɛ m’olongo. (Dj. 16:33; Ndj. 14:14-16) Lonkina, fudjɛ djawo djɛko lá daka djɛ Yehova djɛ nkowomba. (Mat. 6:32-34) Wina wɔ djawo djɛko yotaleke ndjala wolo, ndeke ngongoleka ndjala l’oloko wolo. Pɛtɛlɔ nya winande wɛnyɛka ambɔ walekɔ la djawo dj’ekekete wina wiyatshike olemo wɔwɔ wɔ nsaka ndjale djɛ nkilika Yeso. Wopo wɔkɔ ndeke, ɔngɛnyɛ ente wɛ olekɔ la djawo dj’ekekete wina woshimelɛ ntombe yɛko edjinge ase nkfumbo kɛko ente ombotateyɛ ndjeka Bible nya Ewakɛ wɛ Yehova la ndjingela lá nsanghanyɛ yɛwɔ! Ipa l’ehamo wɛ  ombonangha etshikitano wɛ n’kekete lá nanghedji djɛko, lá wopo wɔko wɔ lowiko, djɛ nsɛna lá wopo wɛlama la ɛlɛmbɛ wɛ djɔ wɛ Yehova. Djɛ nangha nghɔsɔ ngo ndjala l’oloko wolo. Lá nkindjɛ ndjala l’oloko wolo, okoka ndashikikɛ ente: ‘Yehova Ndjambe kɛko alekɔ esanga nyape etena k’enkfumɔ kɛ ngongotshɔ.’​—Wala Yosua 1:7-9.

13. Wopo wɔkɔnge ntɔnɔla la ndɔmba okokande ntokotshɛ djɛ ndjala l’oloko wolo?

¹³ Wopo wɔkɔnge onkina wokokɛ nangha djɛ ndjala l’oloko wolo? Lɔmba djɛ ndjala l’oloko wolo. (Ele. 4:29, 31) Yehova angokadjimola ndɔmbɔ yɛko edjinge nde apangokokadjɛ. Nde alekɔ wina onkfumɔ nyape djɛ nkosuka. Lonkina, wɛ nkoka ntɔnɔla lá wopo wɔ Yehova ndakotshɛka anto wa l’etsho wɛ ntondo. Lonkina, nkanela wopo wɔ Yehova ndakokotshɛ wina wingapomana l’ekakasano, la wopo wɔkɔpɛyɛnde wolo wɔ wɛ nangha etshikitano lá lowiko lɔko. Nsɔsɔlɔ, Onto wonkotshisá owila wɔnde djɛ ntepɔ Ndjale kɛ teele l’ekolo, nkoka nkokotshɛ edjinge wɛ djɛ ndjala ombeki wɔ Kristo. (Epo. 14:13) Yala la djawo ngete djeyalaki la ontshumbi wɔ yeembo, wotshumbisa ante: ‘Yehova alekɔ l’ompandju wɔmi; lemi mpongoka wɔma. Kɛkɔnge kekoka onto nanghela lemi?’​—Yee. 118:6.

14. Olakanyelo wɔkɔnge ngombowa ma ndjɔmbɔmba kɛ Masae edjinge kɛ Tomoyo?

¹⁴ Wopo onkina wɔ ndjala l’oloko wolo nde, mba olakanyelo lá wopo wɔ Yehova ndakotshɛ anto wawotshisa l’ɔnsɔnyi ko wayɛka ndoyala l’oloko wolo. Tɔkɔsa ndjɔmbɔmba kɛ nkaana kɛmɔtshi ketawɔ Masae. Nde ayalaka l’ɔnsɔnyi efula edjinge akanelaki ante apakoke nangha olemo w’ipoposanyɛ. Nde ɔsaki djɛ ntepela l’angangɛnda alekɔ etengo epele k’otale efula kɛ ndopakoke ntamba lotshinda lotshinda. Koko nde ananghaka la welo efula djɛ nfudjɛ ngandji k’okande Ndjambe la winande anto. Nde akanelaka la n’tɔnɔ nkfumɔ lá kɛnɛ kelendana la wopo wɔ wina iyombotshikala daambi edjinge ananghaka alɔmbɛlɔ djɛ nde nfudjɛ mposɛ kɛnde kɛ mpoposanyɛ. Nde alongelaka wɔma wɔnde edjinge akamba etengo y’atekalo yɛ lotshinda. Yehova nkoka lonkina nkotshɛ asakodji wa bango djɛ ndjala ‘l’oloko wolo.’ Kokanela ndambo lá nkambo djɛ nkaana kɛmɔtshi ketawɔ Tomoyo. Wina winda tateyɛ mpoposanyɛ lá mvulu la mvulu, owadji w’asolemo wopomanisa lande opangolaka ante: “Lemi mpakɔpaka ndjamba la Ewakɛ wɛ Yehova!” ko ndombodjipa lokfuke la wolo ngo mbala kɛkɔ kɛmɔ. L’oloko wolo onkfumɔ Tomoyo ndomboshimela nkaana keposisa lande ante: “Wɛ ɔmbɛnaka n’kambo djenyi? Lemi ntatepela kaanga n’kambo mɔ, koko ambondembetela djɛ ndekɔ Owakɛ wɔ Yehova. Ndekɔ nsɔsɔlɔ l’osasa efula!” Win’ɔsɔ Tomoyo alekɔ nkamba entengo y’atekalo yɛ lotshinda.

15. Ndaalaka nyɔmɛlɛ ɔkɔpawɔ ntepela ante mo, edjinge ladjikɛnge oyɛwɔ djonyi le Akristo?

¹⁵ Djɛ nde ndonga, onsaki ndjale ladjɛ ndjewa ndaalaka nyɔmɛlɛ. Ndaalaka nyɔmɛlɛ alekɔ “n’koka djɛ nangha nghɔmɛlɛ n’kambo mɔtshi djɛ lɔmbamá ngo nanghema.” Onsaki ndjale ladjɛ ndaalaka nyɔmɛlɛ djɛ mbetshɔ la n’kɛsɛ dj’efula, ntshikala tii wina woshila olemo, edjinge nkindjɛ nangha olemo kaanga lá n’tena djɛ ndjolo. Edjinge iso tolekɔ la djonyi djɛ ndaalaka isɔmɛlɛ ntsha iso nkɔpaka nkindjɛ la nshiyɛ olemo wɔso.​—Mat. 10:22.

16. Kɛkɔnge kekoka tokotshɛ dj’isonangha akambo walekɔ wolo leso djɛ nangha?

¹⁶ Mbala efula, oyalakaso nde l’enkfumbo kɛ nkilika ngo akambo wɛnaso wɔdju. Koko, akambo wamɔtshi walekɔ djonyi efula woyɛso ladjɛ nangha wapalekɔ wɔdju. Djɛko ndeke, ngo iso ndjewa ndaalaka isɔmɛlɛ kana ndaankfumba. Tolekɔ la djonyi dj’okotshɔ dj’iso ndjeka  djɛ nangha akambo wɛnaso ndjɛ walekɔ wolo kana topalekɔ l’akoka w’iso nangha. Yehova ntɔpɛyɛka okotshɔ wɔkɔ má lotshimbo lɔ nyuma kɛnde k’ekina.​—Nga. 5:22, 23.

17. Lá nkilika 1 Kɔrɛntɔ 9:25-27, Wopo wɔkɔnge ɔpɔstɔlɔ Poolo ɛnyɛnde welo windananghaka djɛ nangha kɛnɛ kelekɔ wɔlɔ?

¹⁷ Ɔpɔstɔlɔ Poolo ewaki ndaalaka nyɔmɛlɛ djɛ nagha la wolo kɛnɛ kelekɔ wolo lende. Koko nde awolaki djɛ nde ‘apemelaki’ demba djɛnde djɛ nangha kɛnɛ kelekɔ wɔlɔ. (Wala 1 Kɔrɛntɔ 9:25-27.) Nde akembɛka anto ankina dj’iwɔ nangha la wolo djɛ nangha akambo ankfumɔ lá ‘wɔlɔ edjinge l’ɔnɔnghɔ.’ (1 Kɔ. 14:40) Iso ladjɛ nangha la wolo djɛ nkidjɛ ntɛmɔla Yehova edjinge ndjala l’osasalo l’olemo w’ipoposanyɛ wɔ ndakanyɛ losango lɔ wɔlɔ.​—Ele. 2:46.

18. Kɛkɔnge koyɛso ladjɛ nangha ntsha iso nkɔpaka Yehova ntɔsa entengo anto wambolonga?

¹⁸ Onsaki ndjale ndjawolaka ante nde ambolonga ngo ntsha avunda nse efula. Otshikitanyi l’onsaki ndjale, l’olemo wɔso w’ipoposanyɛ, olongelo wɔso wopalendana la lofulo l’anto l’isomboyakala l’olonghanyelo wɔ Ndjambe. (Luka 8:11-15) Ntsha iso nkindjɛ nkfulumeyɛ la mpoposanyɛ losango lɔ wɔlɔ edjinge ndakanyɛ anto ankina, Yehova ntɛnaka entengo anto wambolonga l’olemo wɔso. Ladjikɛnge? Ladjikɛnde tolekɔ nkidjɛ nangha ɛkɔpa kɛ Yehova nya Wɔnande ɔkɔpawɔ dj’iso nangha.​—Mar. 13:10; Ele. 5:28, 29.

19-20. Elonga kɛkɔnge kɛ djonyi ketotshinda djɛ mpoposanyɛ má win’ɔsɔ?

¹⁹ Lá ewila ɛmɔtshi, onsaki ndjale ndjalaka la lotshungɔ lɔ nsaka ndjale ngo ngɔndɔ imangha toko. Lá n’tena djɛ nghɔsɔ onsaki ndjale ndjokaka djɛ olemo wɔnde ladjɛ nanghema la n’keke la n’keke lá ntondo kɛ eleko k’owawɔ nse nshila. Etengo oyɛso ansaki w’anto, iso ladjɛ ndekola mpoposanyɛ la n’keke la n’keke wina wɔnɛ wɔ: Ekomo k’akambo wanɛ iyombolekola ndjala entshupa! Etena kɛ mpoposanyɛ olemo wowikɛ nsɛnɔ y’anto kembotshikala daambi efula. Djɛkondeke, totshatshimbake kana nkonga djɛ ikakambo inkfumɔ yɛ lɔsɛnɔ lɔko ndjala djɔ djɛ wɛ ndotateyɛ nangha olemo wɔ djonyi wɔsɔ.​—Los. 11:4.

²⁰ Má win’ɔsɔ, nangha la wolo djɛ wɛ nfudjɛ mposɛ kɛko, nfudjɛ balo djɛko djɛ Bible, ndjala l’oloko wolo, edjinge ndjewa nghɔmɛlɛ. Ingela l’anteyi kɛ miliyɔ akumi enanɛyi y’ansaki w’anto ntepela ente ansakodji wa losango lɔ wɔlɔ, ko ongowa osasa wɔ Yehovah. (Nɛh. 8:10) Ɔsa n’kano djɛ nangha tshɛ k’okokɛ nangha djɛ ndapɛyɛ efula l’olemo w’ipoposanyɛ edjinge nkindjɛ ndoonangha tii wina wɔ Yehova ndongotepela ante ambokoka. Lá djamba djeyaye, tɔngɛna toopo tosato tokokaso nkembɛ n’kano djɛso djɛ nkindjɛ l’olemo w’ipoposanyɛ w’Onkfumi entengo oyɛso ansaki w’anto.