1-2. Djokanelo djɛkɔnge djelekɔ l’anteyi kɛ Losanghanyɛ 11:6 la olemo w’ipoposanyɛ wɔ losango lɔ wɔlɔ l’Onkfumi?

LÁ EWILA ɛmɔtshi, anto efula nkɔpaka ndjewa akambo efula wina wekameyɛwɔ losango lɔ wɔlɔ. Kɛsɔ ndeke iyakongaka! Lá ewila enkina, anto efula wapayapɛyɛka lá kɛnɛ kelendana la Ndjambe kana la Bible. Lá mbandja kɛnyu, wopo wɔkɔnge anto efula okadjimolakawɔ wina w’ashimelanyu losango lɔ wɔlɔ? Kaanga wangawolake kana lako, Yehova nkɔpaka dj’iso nkindjɛ mpoposanyɛ tii wina wɔ ndongotepela ante ambokoka.

² Yehova amboshiyɛka nshikikɛ wina wɔ olemo w’ipoposanyɛ iyongokoma edjinge ‘ekomo iyongoyɛ.’ (Mat. 24:14, 36) Lá ntondo kɛ wina wɔsɔ nkoka, wopo wɔkɔnge okokaso nɛmɛyɛ etepela wɛnɛ, ‘tohomodjɛke lɔwɔ lɔko’? *​—Wala Losanghanyɛ 11:6.

3. Kɛkɔnge kɛnaso lɔ lá djamba djɛnɛ?

³ Lá djamba djemboheta tɛnaka topo tɔnɛyi toyɛso la djonyi djɛ nangha dj’iso ndjala ‘ansakodji yɛ wɔlɔ.’ (Mat. 4:19) Lá djamba djɛnɛ tɛna lɔ topo tosato tokokaso nkembɛ n’kano djɛso djɛ mpoposanyɛ, kaanga lá ntondo kɛ ekakasano wɛkɔnge wekoka mpomana laso. Tongeka lonkina ladjikɛnge alekɔ djonyi djɛ 1) ndjila yimba kana nkidjɛ mpetshɛ olemo w’ipoposanyɛ l’etena kɛ ntondo kɛ lowiko lɔso, 2) ndjala la bale ntshitshi, edjinge 3) ndjala la djawo djɛ wolo.

4. Ladjikɛnge oyɛso la djɛ ndjila yimba l’olemo wɔ Yehova ndatɔpɛyɛ?

⁴ Yeso ewoyɛka akambo edjinge tolembetelo tɔngɛnama ente tɔsɛna l’etsho w’ekomo edjinge tongilélá ambeki wande onkeka  djɛ nkotshɛ olemo w’ipoposanyɛ. Nde ashimelaka ambeki wande ante ‘nyowadjɛke.’ (Mat. 24:42) Lɔɔko kɛnɛ, tolekɔ mpomana l’akambo etengo wanɛ washimbaki anto w’etsho wɛ Noe dj’iwɔ ndjila yimba lá ndjewo kɛ Noe ndapoposanyɛka. (Mat. 24:37-39; 2 Pɛ. 2:5) Djɛko ndeke, iso nkɔpaka ndjila yimba l’olemo wɔ Yehova ndatɔpɛyɛ djɛ nangha.

5. Wopo wɔkɔnge Elemo 1:6-8 ɛnyɛnde polo lampe olemo w’ipoposanyɛ iyongonanghema?

⁵ Lɔko kɛnɛ, tolekɔ nsɔsɔlɔ la djonyi djɛ nkidjɛ ndjila olemo w’ipoposanyɛ w’Onkfumi l’edjena kɛ ntondo lá lowiko lɔso. Yeso ewoyɛka djɛ ambeki wande wango kindjɛ nangha olemo w’ipoposanyɛ m’ɔkɔngɔ wɔ nyɔyi kɛnde edjinge wangopoposanyɛ efula ndeka wina wɔ ndayalaka la lowiko. (Dj. 14:12) Mɔkɔngɔ wɔ nyɔyi kɛ Yeso, ambeki wande wamɔtshi wakɔpaka nkalɔ t’olemo wɔwɔ wɔ nsaka ndjale. Ndambo mɔkɔngɔ w’ekfundwelo kɛnde, Yeso ananghaka nsese edjinge akotshɛka ambeki wande amɔtshi dj’iwɔ mba nse efula. Nde akambaka la mbamba kɛsɔ djɛ ndashikikɛ ante, olemo wɔ ndjala onsaki w’anto ndeke olemo woleka elemo enkina djonyi. (Dj. 21:15-17) Lá ntondo kɛ Yeso mpanda t’olongo, nde ashimelaka ambeki dj’olemo wɔ nyɛnyɛ owakɛ windatatsheyɛ ante, wongo mpoposanyɛma otale ndekana Isariyɛlɛ. (Wala Elemo 1:6-8.) Ɛnɔnyi efula mɔkɔngɔ, Yeso ɛnyɛka ɔpɔstɔlɔ Djɔanɛ wɛnɛlɔ wɔ ndɔwɛnyɛ kɛnɛ kengonanghema lá ‘Loshi lɔ Nkfumi.’ * Lá lɛdji lɔmɔtshi, Djɔanɛ ɛnaka ɛnɛlɔ kɛnɛ m’okotshɔ wɔ nyuma k’ekina: ‘Losango lɔ wɔlɔ lɔ lotshinda’ loyalisa ladjɛ mpoposanyɛma lá ‘ewila enkfumɔ edjinge nkopo inkfumɔ edjinge etepela enkfumɔ edjinge wepo w’anto ankfumɔ,’ má ɛlɔndjɛlɔ kɛ ondjelo. (Ndj. 1:10; 14:6) Nyɛnamaka papoo ente, ɛkɔpa kɛ Yehova teso lɔɔko kɛnɛ nde, iso ndjila lɔwɔ lá olemo w’ekekete wɔ nyɛnyɛ owakɛ tii wina wɔ ndongotepela ante ambokoka.

6. Wopo wɔkɔnge wokokaso nkindjɛ ndjila yimba l’olemo w’ipoposanyɛ?

 ⁶ Iso nkoka nkindjɛ ndjila yimba l’olemo w’ipoposanyɛ ntsha iso nkanelaka efula wopo wɔ kɛnɛ kɛ Yehova onanghande djɛ ntokotshɛ. Ndjɔmbɔmba, nde ntɔpɛyɛka n’kete djɛ ndɛ djɛ lonyuma lombombe má n’tshulatshula la m’enkanda, má tovideo tɔ lekameyɛ kana tɔlɛna, edjinge má nsango yel’ɛntɛrnɛtɛ. Kokanela ndambo: Sitɛ kɛso k’ɛntɛrnɛtɛ kembokadjimwama l’etepela ndekana 1 000! (Mat. 24:45-47) Anto wal’andja wamboyawatola ladjikɛnde iwɔ nsukaka tokanyi totshikitanyi tɔ politikɛ, edjinge walekɔ lá n’kɛlɛsiya djetshikitanyi, lonkina wanɛ ɛmvɔ ankina ekfudji. Koko anto ndekana miliyɔ enanɛyi walekɔ nkambela Ndjambe l’osanga lá nkfumbo kel’andja w’otondo k’onto la wɔna nyɛnghɛnde. Ndjɔmbɔmba, Loshi l’atano, Ngɔndɔ k’anɛyi 19, 2019, Ewakɛ wɛl’andja w’otondo wekameyɛka esanga ivideo yɛ vɛrse djɛ loshi. La nkɔlɔ djɛ loshi lɔkɔ, anto 20 919 041 wananghaka Bokfɔ djɛ nyɔyi kɛ Yeso. Iso ndjalaka la m’posɛ kɛ ndjila yimba l’olemo w’Onkfumi wina wokanelaso mpeyi k’okotshɛso djɛ nyɛna edjinge ndjila lɔwɔ lá nsese n’tshɔ djenanghema l’etsho wɛso wɛnɛ.

7. Wopo wɔkɔnge ndjɔmbɔmba kɛ Yeso okokawɔ ntokotshɛ djɛ ndjila yimba l’olemo w’ipoposanyɛ?

⁷ Wopo onkina wokoka ntokotshɛ djɛ ndjila yimba l’olemo w’ipoponyɛ nde, nkilika ndjɔmbɔmba kɛ Yeso. Nde atawola djɛ kaanga ekete kɛmɔ ndjɛkɔla yimba yɛnde djɛ nyɛnyɛ owakɛ l’akambo wa nsɔsɔlɔ. (Dj. 18:37) Nde atawola wina wɔ Satana ndɔpɛyɛ ‘enkfumi enkfumɔ wel’andja wanɛ la lowando lɔwɔ,’ kaanga wina wɔ anto ankina iyakɔpɛ ndowila owandji. (Mat. 4:8, 9; Dj. 6:15) Nde atadjimbwama má mposɛ kɛ mba n’kete efula dj’andja, kana nde ndjoka ndjolo wɔma. (Luka 9:58; Dj. 8:59) Wina wopomanaso l’ehemba welendana la djawo djɛso, iso nkoka nkidjɛ ndjila yimba l’olemo wɔso ntsha iso nvungɔka dako dj’ɔpɔstɔlɔ Poolo. Nde akembɛka Akristo dj’iwɔ nkilika ndjɔmbɔmba kɛ Yeso kɛ ‘ipa ndɛmba la mpekɔ’!​—Heb. 12:3.

8. Etawɔ bale ntshitshi nge, edjinge ladjikɛnge oyɛwɔ djonyi efula lɔɔko kɛnɛ?

⁸ Bale ntshitshi alekɔ n’koka djɛ nkonga l’oloko onkfumɔ djɛ n’kambo mɔtshi ntshikitana. Ayale kaanga tokongela l’oloko wɔ pakipaki ekomo kɛ n’kambo mɔtshi djɛ nyɛtshi kana ekotshamela kɛ n’kambo mɔtshi djɛ wɔlɔ, tolekɔ ngo la djonyi djɛ bale ntshitshi. Ɔprɔfɛtɛ Abakuka ákombolaki dj’akambo wanyɛtshi wayalaki lá Juda nshila. (Aba. 1:2) Ambeki wa Yeso wakanelaki ambɔ Onkfumi ladjɛ ‘nyɛnama ngo wina wɔkɔ’ edjinge wongatshungola má ndjolo y’ase Ɔrɔma iyawɛnyɛka. (Luka 19:11) Iso nkombolaka ente loshi lɔmɔtshi Onkfumi wɔ Ndjambe w’ongimɛ anto wa nyɛtshi edjinge wongoyakala andja wa bango wangolola l’anto wa sii. (2 Pɛ. 3:13) Koko, alekɔ djonyi dj’iso ndjala la bale ntshitshi djɛ nkonga wina wɔ Yehova ndashikikɛ djɛ nangha akambo wasɔ. Tokolenda topo tɔmɔtshi tɔ Yehova otolakanyɛnde djɛ ndjala la bale ntshitshi.

9. Ndjɔmbɔmba yɛkɔnge yɛnyɛ djɛ Yehova alekɔ la bale ntshitshi?

⁹ Yehova alekɔ ndjɔmbɔmba kɛ wɔlɔ kɛ bale ntshitshi. Nde apɛyɛka Noe wina efula djɛnde nangha wato edjinge nkamba etengo ‘osambisha w’akambo wa wɔlɔ.’ (2 Pɛ. 2:5; 1 Pɛ. 3:20) Yehova ekameyɛka Abrahama wina wɔ ndowopolaka la dilɛmɛlɔ nkfumɔ akambo walendana la n’kano djɛnde djɛ ntshita anto wa nyɛtshi wintansɛki lá ngando kɛ Sɔdɔmɔ la Gɔmɔra. (Ewa. 18:20-33) L’ila kɛ nkama y’ɛnɔnyi, Yehova ɛnyɛka bale ntshitshi djɛ nsɔsɔlɔ te owila wɔ nyɛtshi w’Isariyɛlɛ. (Nɛh. 9:30, 31) Lɔɔko kɛnɛ, iso nyɛnaka papoo djɛ bale ntshitshi djɛ Yehova  mbɔpɛyɛ anto ankfumɔ wakɔpa ndjala tolongo tɔnde ‘mbamba k’iwɔ ndaapɛla.’ (2 Pɛ. 3:9; Dj. 6:44; 1 Ti. 2:3, 4) Ndjɔmbɔmba kɛ Yehova ntɔpɛyɛka donga djɛ wɔlɔ djɛ ndjala la bale ntshitshi wina wokindjɛso mpoposanyɛ la ndakanyɛ. Nde ntolakanyɛka lonkina djɛ ndjala la bale ntshitshi má ndjɔmbɔmba kɛmɔtshi kotanaso l’Otepela wɔnde.

10. Lá nkilika Djakɔbɔ 5:7, 8, olakanyelo wɔkɔnge wokokaso mba ma ndjɔmbɔmba kɛ onkambi w’awedji?

¹⁰ Wala Djakɔbɔ 5:7, 8. Ndjɔmbɔ kɛ onkambi w’awedji ntolakanyɛka wopo wɔ ndjala la bale ntshitshi. Nsɔsɔlɔ etamba ɛmɔtshi nfulaka lankeke lankeke. Koko, wepo w’etamba efula, pekapeka etamba wɛtɔ mbambo, ndɔsaka wina efula djɛ ntshunda. L’Isariyɛlɛ, deko djeposɛki n’kete djeyalaki l’ila kɛ ngɔndɔ isamalo. Onkambi w’awedji akonaki n’kete l’eleko k’ɔhɔ edjinge avukaki l’eleko k’amvula. (Mar. 4:28) Iso nkoka ndjala la balo ntsha iso ndjokola bale ntshitshi dj’onkambi w’awedji. Koko, n’kambo n’tshɔ mpalekɔ wɔdju.

11. Wopo wɔkɔnge wɔ bale ntshitshi okokande ntokotshɛ l’olemo wɔso?

¹¹ Mbala efula, anto wa n’tshamba djɛ djɔ nkɔpaka nyɛna eposelo wɛ wɔlɔ wimá elemo wɛwɔ ngo wina wɔkɔ. Koko, ntsha tɔkɔpa djɛ jardɛ yɛso nghɔnyɛ n’kete, iso ladjɛ ndjila yimba efula djɛ mbondola, nkona, nfumola wilo la mvutela washi. Ansakodji ndɔmbamaka djɛ nkindjɛ nangha weelo wɛkɔ ɛmɔ. Ndɔmbamaka wina efula djɛ nkotshɛ ambeki waso dj’ipa ndjala l’isɔnɔdji edjinge ndjala la ngandji. Bale ntshitshi djɛso ngotokotshɛ dj’ipa ndɛmba wina w’anto otonawɔ ntekameyɛ. Wina wopomanaso l’anto wakɔpa ntekameyɛ la ndjeka, ngo iso ndjala la bale ntshitshi. Topakoke ntshinda ambeki wa Bible la wolo dj’iwɔ ndjala la djawo. Atayalaká wina tshɛ wɔdju kaanga le ambeki wa Yeso, djɛ ndjoka kɛnɛ tshɛ kindalakanyɛka wɔlɔ. (Dj. 14:9) Tovungɔke ente iso okonaso nde nkona la mvutele washi, koko Ndjambe nyɔmɛlɛ ndeke loposɛ.​—1 Kɔ. 3:6.

12. Wopo wɔkɔnge okokaso nyɛnyɛ bale ntshitshi djɛso te ase nkfumbo yɛso wapalekɔ Ewakɛ?

 ¹² lso nkoka ndjala l’okakasano wɔ ndjala la bale ntshitshi wina wopoposanyɛso le ase nkfumbo yɛso yepalekɔ Ewakɛ. Ikfɔ y’otanaso l’onkanda wɔ Losanghanyɛ 3:1, 7 nkoka ntokotshɛ. Ikfɔ yɛkɔ ntepelaka ante: ‘Etena kelekɔ kɛ . . . mvumba la etena kelekɔ kɛ ntepela.’ Iso nkoka ntshika nanghedji djɛso djɛ wɔlɔ nsepa ase nkfumbo yɛso djɛ ndjawola losango lɔso. Koko, lá wina ɛmɔtshi iso ladjɛ nangha wepo enkfumɔ djɛ ndashimela akambo wa nsɔsɔlɔ. (1 Pɛ. 3:1, 2) Iso ladjɛ mpoposanyɛ l’osasalo koko, ngo iso ndjalaka la bale ntshitshi te anto ankfumɔ, ndjila edjinge ase nkfumbo yɛso.

13-14. Ndjɔmbɔmba yɛkɔnge yɛ bale ntshitshi y’okokaso ndjokola?

¹³ Iso nkoka ndjeka djɛ ndjala la bale ntshitshi má ndjɔmbɔmba y’anto wa n’kɔmano yotanaso lá Bible edjinge y’anto w’etsho wɛso wɛnɛ. Abakuka ákombolaki ekomo k’anto wanyɛtshi, koko nde ɛnyɛka bale ntshitshi wina ndatepela ante: ‘Lemi langokindjɛka nyemala l’edjena kɛmi kɛ djamo.’ (Aba. 2:1) Ɔpɔstɔlɔ Poolo ɛnyɛka mposɛ kɛnde kɛ ‘nshiyɛ’ olemo wɔnde. Koko, la bale ntshitshi nkfumɔ nde akindjɛka ‘mpoposanyɛ wɔlɔ wɔlɔ losango lɔ wɔlɔ.’​—Ele. 20:24.

¹⁴ Tolende ndjɔmbɔmba kɛ wadji la wome ɔmɔtshi wowisa m’pɔlɔmɛ lá Nkalasa kɛ Ngiliyadɛ, edjinge watomaka t’owila ɔmɔtshi wolekɔ l’Ewakɛ daambi edjinge anto efula walekɔ l’eteyi wapalekɔ Akristo. Anto efula watakɔpaka ndjeka Bible. Koko, winɛwɔ w’oyalisa nyawɔ nkalasa kɛmɔ lá Ngiliyadɛ, washimelaki eposelo wɛ wɔlɔ wiyawaka lá n’kambo djelendana l’anto ankfumɔ wekaki lawɔ Bible, edjinge wiyakotshɛ djɛ ndjala Ewakɛ m’ewila w’iyayalaka. Koko, kaanga anto efula we l’owila w’iyayalaka iyatonaka ndjawola losango lɔwɔ, antshukanyi wasɔ wakindjɛka mpoposanyɛ la bale ntshitshi nkfumɔ. Mɔkɔngɔ w’iwɔ mpoposanyɛ ɛnɔnyi enanɛyi l’owila wɔkɔ w’anto iyotakɔpaka ndawekameyɛ wɔsɔ, wayɛka ndoyala l’osasa djɛ nyɛna, l’anteyi kɛ ambeki wawɔ wa Bible ɔmɔ ambolongola batisimo. Olakanyelo wɔkɔnge wowaso má ndjɔmbɔmba y’anto wa ntondo edjinge wa lɔɔko kɛnɛ wasɔ? Anto wa n’kɔmano wasɔ watatshika osasalo wɔwɔ kana mpomodjɛ lɔwɔ, ko Yehova átshɔkɔlaka má bale ntshitshi djɛwɔ. Nyontshɔ ‘tokole wanɛ wa hɛna alaka lá wopo woyɛwɔ la djawo edjinge la bale ntshitshi.’​—Heb. 6:10-12.

15. Akambo wakɔnge wɛnama papoo wakembɛ djawo djɛso djɛ mpoposanyɛ?

¹⁵ Tolekɔ la djawo lá losango lopoposanyɛso, djɛko ndeke ɔkɔpaso nshimela anto ankfumɔ kɛnɛ kelendana la losango lɔkɔ. Iso ndaawɛkɛka l’alaka walekɔ l’Otepela wɔ Ndjambe. (Yee. 119:42; Iza. 40:8) Iso tɔmbɛna ekotshamelo kɛ prɔfɛsiya lá nshi yɛso yɛnɛ. Iso nyɛnaka wopo w’anto otshikitanyɛwɔ nsɛnɔ yɛwɔ wina wotateyɛwɔ nkamba l’alako watanema lá Bible lá nsɛnɔ yɛwɔ. Akambo wasɔ nkembeka djawo djɛso dj’ente losango lɔwɔ l’Onkfumi lolekɔ losango l’onto onkfumɔ oyɛnde la djonyi djɛ ndjekameyɛ.

16. Lá ndenda Yeembo 46:1-3, wopo wɔkɔnge ndjala la djawo te Yehova la te Yeso okeketshɛwɔ n’kano djɛso djɛ mpoposanyɛ?

¹⁶ Tolekɔ lonkina la djawo te Yehova, Ikɔkɔ yɛ losango lopoposanyɛso, edjinge te Wɔnande wɔ nyombila Owandji w’Onkfumi, Yeso. (Dj. 14:1) Kaanga n’kambo djɛkɔnge djengopomaná l’iso, Yehova angoyalaka win’enkfumɔ djisa djɛso edjinge nkfulu kɛso. (Wala Yeembo 46:1-3.) Lonkina, toyashikikɛ ente Yeso akamba la nkfulu edjinge la lowandji lɔ Yehova ndɔpɛyɛ, djɛ ndɔndjɛ olemo w’ipoposanyɛ m’olongo.​—Mat. 28:18-20.

17. Pɛyɛ ndjɔmbɔmba kɛnyɛ ladjikɛnge oyɛso la djɛ nkindjɛ mpoposanyɛ.

¹⁷ Djawo djɛso ntokotshɛka dj’iso ndjala l’eshikikelo  k’efula ente Yehova angɔtshɔkɔla welo wɛso kaanga lá wopo w’isopakanela. (Los. 11:6) Ndjɔmbɔmba, loshi l’onkfumɔ loheta, miliyɔ y’anto nyemalaka lá Prezatwarɛ yɛso y’emadjɛso enkanda la Mɛsa y’anyɛso enkanda l’olemo w’ipoposanyɛ. Yopo yɛ mpoposanyɛ yɛsɔ ndjalaka l’eposelo wɛ wɔlɔ? Ee! Olemo wɔso w’Omkfumi wɔ Ngɔndɔ kɛ djomi l’ɔmɔ 2014 (lá Otetela) atepela n’kambo djɛ oseka ɔmɔtshi w’ingelaki l’univɛrsite wɔkɔpaki nfuna walendana l’Ewakɛ wɛ Yehova. Nde atayala l’akoka wa ndjisola etena kelekɔ Mvulu k’Onkfumi, koko nde atanaka wambemɛ Prezatwarɛ k’enkanda lá campus, ko atanaka enkanda windayalaka la djonyi. L’ekomo, nde ayɛka ndolongola batisimo, ko akomaka Owakɛ wokambela Yehova win’ɔsɔ etengo yatekalo yɛ lotshinda. Ndjɔmbɔmba yɛ nghɔsɔ ntotshindaka dj’iso nkidjɛ mpoposanyɛ ladjikɛnde itɛnyɛ djɛ anto walekɔ la djonyi djɛ ndjisola la djekamɛyɛ losango l’Onkfumi walekɔ.

18. Ladjikɛnge oyashikikɛso ente olemo w’ipoposanyɛ w’Onkfumi wongo nanghema etengo Yehova ɔkɔpande?

¹⁸ Iso nkoka ndaatshikikɛ ente olemo w’ipoposanyɛ w’Onkfumi wongokotshɛma l’etena kɛ wɔlɔ. Tokolenda kɛnɛ kenanghemisa l’etsho wɛ Noe. Yehova ɛnyɛka djɛ nde angonake akambo ngo lá wina wɔ wɔlɔ. Lá ntondo k’ɛnɔnyi ngete 120, Yehova ashikikɛka wina wɔ mvula k’elola iyakoke ntateyɛ. Ɛnɔnyi efula l’ɔkɔngɔ, Yehova apɛyɛka Noe odjito wɔ nangha wato. Ɛnɔnyi etengo 40 kana 50 lá ntondo kɛ Mvula k’elola ntateyɛ, Noe ankidjɛka nkamba wolo. Kaanga anto iyatone ndowekamɛyɛ, nde akindjɛka mpoposanyɛ losango lɔ ndjewo tii wina wɔ Yehova ndootshimelaka djɛ ndjingeyɛ anyama ta wato. Ko, wina wokokisa wina wɔ wɔlɔ, ‘Yehova adjipaka lokfuke.​—Ewa. 6:3; 7:1, 2, 16.

19. Kɛkɔnge kokaso nkongela ntsha topahomodjisa ɛwɔ wɛso?

¹⁹ Lako ila, Yehova akɔpa nkomɛ olemo w’ipoposanyɛ; nde akɔpa ‘ndjipa nkfuke’ yɛ n’kfumbo dj’akambo wa Satana edjinge ndjakala andja wa bango. Lá ntondo k’akambo wasɔ nkotshama, nyotshɔ tokole Noe, Abakuka, edjinge anto ankina watahomodjɛ ɛwɔ wɛwɔ. Nyotshɔ tile yimba yɛso inkfumɔ l’olemo w’ipoposanyɛ, toyale la bale ntshitshi, endjinge toyale la djawo djɛ wolo te Yehova edjinge l’alaka wande.