1-2. Kɛkɔnge kesakisola oshinga wɔ mbendo, edjinge lamo oyɛso la djonyi dj’oshinga wɔkɔ?

WINÁ wɔ Adama mpame kɛ djɔ ndananghe ovunga, nde atshutshɛka mbamba keyalisa lande kɛ mbika etshinda l’etshinda, ape ngo le nde nyɔmɛlɛ toko koko edjinge le tonkana la tonkanola tɔnde. Mande Adama ananghaka ovunga w’ɔsɔ l’ɛkɔpa kɛnde, Yehova atakoka ndowimeyɛ. Iyako kɛkɔnge k’okokaso ntepela lá nkambo djɛ wana wande? Iwɔ watanangha kaanga ovunga ɔmɔ edjinge watatshinda Adama djɛ nde nangha ovunga. (Ɔrɔ. 5:12, 14) Yehova akokaka nangha nkambo mɔtshi djɛ ndaatshungola má nyɔyi kayakalisa ndoyi kɛwɔ? Ee! Ataheta ilá, Yehova atateyɛka nyɛnyɛ wopo wɔ ndakoke ntshungola miliɔ yɛ tonkana la tonkanola tɔ Adama m’ovunga edjinge nyɔyi. (Ewa. 3:15) L’etena kɛ ndashikikɛ, Yehova atomaka Wɔnande m’olongo ‘djɛ ndɔpɛyɛ lowiko lɔnde lá wapɔ w’anto ankfumɔ.’​—Mar. 10:45; Dj. 6:51.

² Kɛkɔnge kesakisola oshinga wɔ mbendo? Lá nkilika Efunelo w’ase Ngirika, oshinga wɔ mbendo alekɔ oshinga wɔ Yeso ndafute djɛ mbendola kɛnɛ kɛ Adama ndatshutshɛ. (1 Kɔ. 15:22) Lamo oyɛso lá djonyi dj’oshinga wɔ mbendo? Mande lá nkilika ɛlɛmbɛ wɛ djɔ wɛ Yehova, etengo iyafunama l’Ɛlɛmbɛ, ndɔmbamaka lowiko mpɛyama tá lowiko. (Epo. 21:23, 24) Adama atshutshɛka lowiko lɔnde lɔ djɔ. Djɛ nɛmɛyɛ ɛlɛmbɛ wɛ Ndjambe welendana la sii, Yeso alambolaka lowiko lɔnde lɔ djɔ. (Ɔrɔ. 5:17) Má nangha nghɔsɔ nde akomaka ‘Papa kɛ lotshinda’ te onto onkfumɔ w’ɛnyɛ djawo t’oshinga wɔ mbendo.​—Iza. 9:6; Ɔrɔ. 3:23, 24.

3. Lá nkilika Djɔanɛ 14:31 edjinge 15:13, lamo Yeso ndawola ndambola lowiko lɔnde lɔ djɔ?

³ Yeso awolaka ndambola lowiko lɔnde má ngandji k’efula k’okande Papa kɛnde kel’olongo edjinge k’otokande iso. (Wala Djɔanɛ 14:31; 15:13.) Lá ntshindama má ngandji kɛsɔ, nde ayashikikɛka djɛ nama nkɔmano djɛnde tii t’ekomo edjinge akotshɛka  ɛkɔpa kɛ Papa kɛnde. Yeso anaghaka nkambo djɛsɔ má ntshikala la nkɔmano tii tá nyɔyi. Eposelo weyalisa la nkambo djɛsɔ nde, ikanyi yɛ Yehova yɛ má bangabango lá nkambo dj’anto edjinge djɛ looko yengokotshama. Lá djamba djɛnɛ, tɔngɛna lamo Ndjambe ndawola djɛ Yeso nyɛna ndjolo efula lá ntondo kɛnde mvɔ. Lonkina tɔngɛna lá yopasɛ ndjɔmbɔmba kɛ onfunyi ɔmɔtshi wɔ Bible woyalisa la djedjɛ efula t’oshinga wɔ mbendo. Edjinge l’ekomo, tɔngɛna wopo w’okokaso nyɛnyɛ djedjɛ djɛso t’oshinga wɔ mbendo, edjinge wopo w’okokaso nfudjɛ djedjɛ djɛso t’olambo wɔ Yehova nya Yeso iyatonanghela.

4. Kɔkɔndɔla wopo woyalisa nyɔyi kɛ Yeso.

⁴ Kokanela wopo w’okokisa ndjala lofu l’ekomo lɔ Yeso lanɛ lá looko. Kaanga ndakoke ndjeta eloyi wɛ andjelo djɛ ndolama, nde awolaka nyɔmɛlɛ nvudama me angala w’ase Ɔrɔma, wokfusisa ape la ndowoka djandji. (Mat. 26:52-54; Dj. 18:3; 19:1) Iwɔ wakambaka la owambo w’opawolaki ankfunda winá w’iyokfusaka. M’ɔkɔngɔ, wɔwɛmbɛka otamba w’odjito efula ngo l’apɛka wa ndahotala ampota. Yeso atateyɛka ntinina l’otamba w’odjito wɔsɔ t’edjena k’iyalɔngɔsɔla djɛ ntoyaka, koko lako ndjala ilá angala w’ase Ɔrɔma wavundaka mpame kɛmɔtshi djɛ ndɔwɛmbɛla. (Mat. 27:32) Winá wɔ Yeso ndakome l’edjena k’iyalɔngɔsɔla djɛ ndoyaka, angala w’ɔkɔkɔmɛka sɛti l’ɛwɔ wɛnde edjinge l’ekolo wɛnde. Odjito wɔ demba djɛ Yeso wotalekaki ndjata ampota y’iyɔkɔkɔmɛ sɛti. Tolongo tɔnde wakiyanaka edjinge nyɔ kɛnde alelaki, koko ewandji w’ase Juda wɔlaki Yeso. (Luka 23:32-38; Dj. 19:25) Yeso ɛnaka ndjolo l’ilá kɛ winá efula. Oloko la apopo wande wambopanema edjinge lohomo lomboyala nkenya efula lende djɛ mpomola. Lá ntondo kɛnde nkitsheyɛ, ndombonangha lɔlɔmbɔ lɔnde l’elonga. Masɔ nde inaka ɔtɛ ko akitsheyɛka. (Mar. 15:37; Luka 23:46; Dj. 10:17, 18; 19:30) Ɔsɔ ayalaka nsɔsɔlɔ yopo yɛ nyɔyi kɛ ndjolo edjinge kɛ nsɔnyi efula!

5. Le Yeso, nkambo djɛkɔnge djelekisa yopo yɛ nyɔyi kɛ ndavu nyɛtshi?

⁵ Le Yeso, yopo yɛ ndavu atayala nkambo djeleka nyɛtshi l’anteyi k’ehemba wepomanisa lande. Ndalekaka ndakiyanyɛ nde l’ɔtɛ wɔ elonga k’iyapɛyɛ edjinge k’iyatepela ambɔ nde ladjɛ ndjakema. Wotonghanyɛka ambɔ nde ambotola Ndjambe ntepela ente, nde alekɔ onto wopalekɔ la dilɛmɛlɔ te Ndjambe kana tá djiina djɛ Ndjambe. (Mat. 26:64-66) Nkambo dj’iyawande Yeso djɛsɔ, dj’okiyanyɛka efula, djɛkondeke ndakongelaka dj’ipa Papa kɛnde ndjawola nde ndɔsa nsɔnyi kɛsɔ. (Mat. 26:38, 39, 42) Lamo Yehova ndawola Wɔnande wɔ ngandji nyɛna djolo edjinge mvɔ? Nyontshɔ tolende donga ntshato.

6. Lamo Yeso ndayale ladjɛ mpanyema l’otamba wɔ ndjolo?

⁶ Ntondontondo, Yeso apanemaka l’otamba djɛ ntshungola ase Juda má dɔki. (Nga. 3:10, 13) Iwɔ wawaka dɔki djɛsɔ mande watshikaka daka djɛ nɛmɛyɛ Ɔlɛmbɛ wɔ Ndjambe koko watakindjɛ nɛmɛyɛ. Eposelo weyalisa la nkambo djɛsɔ nde, dɔki djɛsɔ djesanghanaka la nkolo kiyakite má ovunga wɔ Adama. (Ɔrɔ. 5:12) Ɔlɛmbɛ wɔ Ndjambe te ase Isariyɛlɛ watepelaki djɛ onto wonangha ovunga w’ɔtɔla tá nyɔyi ladjɛ ndjakema. M’ɔkɔngɔ, odjo wɔnde ladjɛ mpanema l’otamba. * (Mvu. 21:22, 23; 27:26) Djɛkondeke má mpanema l’otamba, Yeso akokaka ntshungola ase Juda má dɔki djɛwɔ edjinge olambo wɔnde wokokaka ndakotshɛ kaanga iyotone.

7. Elonga k’epe kɛkɔnge kɛ Ndjambe ndawola djɛ Wɔnande nyɛna ndjolo?

⁷ Kolenda elonga k’epe kɛ Ndjambe ndawola  djɛ Wɔnande nyɛna ndjolo. Nde akfumbaki Wɔnande djɛnde ndewa nkotshɛ odjito wɔnde winá wɔ ndongoyala Nkfundji kɛso k’ekekete. Yeso asipisoyɛka ante alekɔ wolo nɛmɛyɛ Ndjambe winá w’opomanɛ l’ehemba wɛ wolo. Nde okaka paa efula djekondeke ndananghe alɔmbɛlɔ djɛ mba okotshɔ la ‘tɛɛndjɛ edjinge la wisɔyi lá wiso.’ Lá nsɔsɔlɔ, mande nde okaka paa efula winá wɔ ndapomanaka l’ehemba, Yeso angosipisoyɛka ehomba wɛso edjinge ‘angoyalaka l’akoka wa ntokotshɛ’ winá ‘w’oyalaso l’ehemba.’ Tolekɔ la djedjɛ efula te Yehova lá wopo wɔ ndɔtɔsɔnɛla Nkfundji k’ekekete kekoka ‘ntoka djandji lá wɛdju wɛso’!​—Heb. 2:17, 18; 4:14-16; 5:7-10.

8. Elonga k’asato kɛkɔnge ketshidisa Ndjambe djɛ ndjawola djɛ Yeso mpembama wolo nghɔsɔ?

⁸ Elonga k’asato nde, Yehova awolaka djɛ Yeso nyɛna ndjolo efula l’ɔtɛ wɔ nkadjimola lá woopó wɔ djonyi wɔnɛ: Anto nkoka ntshikala la nkɔmano te Yehova kaanga lá winá w’opomanawɔ l’ehemba wɛ wolo? Satana atepalaka ante lako! Nde apomelaka ikole ante onto nkambelaka Ndjambe ngo lá ndonga djɛ lokaki. Edjinge nde ndjawolaka ante etengo ndoyi kɛwɔ Adama, iwɔ wapangoyala la ngandji te Yehova. (Djɔ. 1:9-11; 2:4, 5) La ndaawɛkɛ lá nkɔmano djɛ Wɔnande, Yehova awolaka djɛ Yeso mpembama tii l’ekomo k’onto okokande nkfulumeyɛ. Yeso alamaka nkɔmano djɛnde edjinge ɛnyɛka ante Satana alekɔ kanga ongolo.

9. Ndjɔmbɔmba kɛkɔnge ketotshikelisa ɔpɔstɔlɔ Djɔanɛ?

⁹ Nkɔmano dj’Akristo efula nkembaka má olakanyelo wɔ oshinga wɔ mbendo. Iwɔ nkindjɛka mpoposanyɛ kaanga awɛnyɛwɔ ndjolo edjinge nkindjɛka nkfulumeyɛ ekakasano lowiko lɔwɔ l’otondo. Kolenda ndjɔmbɔmba kɛ ɔpɔstɔlɔ Djɔanɛ. Nde apoposanyɛka la nkɔmano nkfumo akambo wa nsɔsɔlɔ walendana la Kristo edjinge l’oshinga wɔ mbendo, l’ilá k’ɛnɔnyi ndekana etengo 60. Winá wɔ ndayale l’ɛnɔnyi nsuke la 100, onkfumi w’Ɔrɔma wakanelaka ambɔ nde alekɔ onto wɔ nyɛtshi edjinge wotomaka tá lokando lá ntshanga djɛ Patmosɛ. Nyɛtshi kɛkɔnge kɛ ndananghe? ‘Nde atepelaki akambo walendana la Ndjambe edjinge apoposanyɛki wayi wa Yeso.’ (Ndj. 1:9) Ɔsɔngo ndjɔmbɔmba kɛ wɔlɔ kɛ djawo edjinge k’okfulumeyelo!

10. Wopo wɔkɔnge efunelo wɛ Djɔanɛ ɛnyɛwɔ djɛ nde ayalaki la djedjɛ t’oshinga wɔ mbendo?

¹⁰ Djɔanɛ ɛnyɛka ngandji kɛnde k’efula te Yeso edjinge djedjɛ djɛnde t’oshinga wɔ mbendo lá enkanda wɛnde wɛ ndafune má wolo wɔ nyuma k’ekina. L’enkanda wɛsɔ, nde atepelaka nkambo dj’oshinga wɔ mbendo kana wapɔ woyɛ m’oshinga wɔ mbendo ndekana mbala 100. Ndjɔmbɔmba, Djɔanɛ afunaka ante: ‘Ntsha onto ɔmɔtshi amonangha ovunga, tolekɔ la okotshɛ wolekɔ esanga la Papa kɛso, Yeso Kristo, onto wɔ wɔlɔ.’ (1 Dj. 2:1, 2) Efunelo wɛ Djɔanɛ wɛnyɛ lonkina djonyi djɛ ‘mpoposanyɛ akambo walendana la Yeso.’ (Ndj. 19:10) Nyɛnamaka papoo ente, Djɔanɛ ayalaki la djedjɛ efula t’oshinga wɔ mbendo. Wopo wɔkɔnge w’okokaso edjinge iso nyɛnyɛ djedjɛ djɛso?

11. Kɛkɔnge kekoka ntokotshɛ dj’iso mpikama l’ehemba?

¹¹ Topikame l’ohemba wɔ nangha ovunga. Ntsha iso ndɔsaka oshinga wɔ mbendo la ntshina, topangokanelaka ente: ‘Mpɛnyi djonyi djɛ nangha la wolo djɛ mpikama winá w’ohembamami. Lemi nkoka nangha ovunga ko l’ɔkɔngɔ ndɔlɔmba imeyelo.’ Koko l’edjena kɛ nangha nghɔsɔ, winá w’ohembamaso djɛ nangha nkambo mɔtshi djɛ nyɛtshi, tongotepela ente: Lako! ‘Wopo wɔkɔnge w’okokami nangha nkambo djɛ nyɛtshi djɛnɛ m’ɔkɔngɔ wɔ kenkfumɔ kɛ Yehova nya Yeso iyombonanghela?’ L’ikanyi yɛkɔ imɔ, iso nkoka ndɔmba Yehova  wolo, ndɔwɔnda ente: ‘Tawolake djɛ lemi nkfɔ l’ohemba wɔnɛ.’​—Mat. 6:13.

12. Wopo wɔkɔnge w’oyɛso ladjɛ nkamba la dako dj’otanaso lá 1 Djɔanɛ 3:16-18?

¹² Kɔpaka wananyɔ l’ankaana wako. Winá w’ɔkɔpaso wananyɔ l’ankaana, iso nyɛnyɛka ente tolekɔ la djedjɛ l’oshinga wɔ mbendo. Lamo? Mande Yeso apɛyɛka lowiko lɔnde apengo nkambo djɛko nghɔmɛlɛ koko edjinge nkambo djɛ wananyɔ l’ankaana yɛso. Ntsha nde ayalaka entshupa djɛ mvɔ lá nkambo djɛwɔ, kɛsɔ nyɛnyɛka papoo ente, iwɔ walekɔ la ntshina lá wiso wande. (Wala 1 Djɔanɛ 3:16-18.) Iso nyɛnyɛka ngandji te wananyɔ l’ankaana yɛso má wopo w’ananghelaso akambo. (Ɛfɛ. 4:29, 31–5:2) Ndjɔmbɔmba, iso ndakotshɛka winá w’oyalawɔ l’elando kana la ekakasano wɛ wolo, ndjila edjinge winá w’opomanawɔ l’ambalaka yeyɛ má nkete djetongamisa. Ko kɛkɔnge koyɛso ladjɛ nangha ntsha winaso Okristo amonangha kana ambotepela nkambo mɔtshi djɛmbɔtɔkɔtá efula l’oloko?

13. Lamo oyɛso ladjɛ nyimeyanaka?

¹³ Ongoyalake winá ɛmɔtshi l’okakasano djɛ nyimeyɛ winako Okristo? (Lew. 19:18) Ntsha oyɛwɔnde nghɔsɔ, kilika dako djɛnɛ: ‘Nyokindjɛ nkfulumeyana nyɛtshi edjinge nyokindjɛ nyimeyana l’oloko ɔmɔ l’anteyi kɛnyo. Ayale kaanga onto alekɔ la nkambo djɛ nkiyanela winande, etengo Yehova ndanyimeyɛ l’oloko ɔmɔ, edjinge nyo ladjɛ nyimeyɛ winanyo.’ (Kɔl. 3:13) Win’enkfumɔ w’isongimeyɛka wananyɔ kana ankaana yɛso, tɔngɛnyɛka Papa kɛso kel’olongo ente iso ndɔsaka nsɔsɔlɔ oshinga wɔ mbendo la ntshina. Wopo wɔkɔnge w’okokaso nfudjɛ djedjɛ djɛso tá opapɛyɛ wɔ me Ndjambe wɔsɔ?

14. Yopo imɔtshi yɛkɔnge y’okokaso nangha djɛ nfudjɛ djedjɛ djɛso tá oshinga wɔ mbendo?

¹⁴ Kawoyɛka Yehova lokasa m’ɔtɛ w’oshinga wɔ mbendo. Joanna, nkaana k’intansɛ lá Inde, kelekɔ l’ɛnɔnyi 83 atepelaka ante: “Lemi nkanelaka ente alekɔ djonyi efula numolaka oshinga wɔ mbendo lá ndɔmbɔ yɛmi yɛ lofu la lofu edjinge nkawoyɛka Yehova lokasa lá nkambo djɛkɔ.” Etsho enkfumɔ winá w’ɔlɔmbɛ nghɔmɛlɛ, shimela Yehova kɛnɛ kɛ nyɛtshi kɛ ngonanghaki lofu lonkfumɔ edjinge m’ɔkɔngɔ lɔmbande djɛnde nkimeyɛ. Koko lá nsɔsɔlɔ, ntsha ombonanghaka ovunga w’ekekete, wɛ ladjɛ mpona edjinge okotshɔ wɔ tokokolo. Iwɔ wangokekameyɛ edjinge wangɔkɔpɛyɛ alako wa ngandji wimá Otepela wɔ Ndjambe. Iwɔ wangɔlɔmba esanga la wɛ, wangɔlɔmba Yehova djɛnde nkindjɛ nkimeyɛ má lotshimbo  lɔ olambo wɔ Yeso ‘djɛ wɛ nkɔnɔ [lá nyuma].’​—Dja. 5:14-16.

15. Lamo oyɛso ladjɛ ndɔsaka winá djɛ mbalaka edjinge ntɔnɔlaka lá nkambo djelendana l’oshinga wɔ mbendo?

¹⁵ Tɔnɔlaka lá oshinga wɔ mbendo. Rajamani, nkaana kɛmɔtshi kelekɔ l’ɛnɔnyi 73 ntepelaka ante: “Winá enkfumɔ w’owalami akambo walendana la ndjolo yɛ Yeso, wiso wami ndolaka la wisɔdji.” Edjinge wɛ nkoka ndjoka paa efula l’oloko winá w’okanelɛ efula kɛ ndjolo yɛnisa Wɔna Ndjambe. Koko winá w’olekɛ ntɔnɔla lá olambo wɔ Yeso ndapɛyɛ, ndeke ngandji kɛko tende edjinge te Papa kɛnde iyotaleke nfula. Djɛ nkokotshɛ djɛ wɛ ntɔnɔla wɔlɔ lá oshinga wɔ mbendo, lamo ngopananghe nonghanyi kɛ wɔlɔ kɛ ndjekaka nkambo djelendana l’oshinga wɔ mbendo?

16. Wopo wɔkɔnge ndakanyɛ anto ankina akambo walendana l’oshinga wɔ mbendo okokawɔ ntokotshɛ? (Lenda ntshango djɛ loposo.)

¹⁶ Lakanyɛ anto ankina akambo walendana l’oshinga wɔ mbendo. Winá enkfumɔ w’oshimelaso anto nkambo djelendana l’oshinga wɔ mbendo djedjɛ djɛso t’eteyi nfulaka. Tolekɔ l’enkanda edjinge la tovideo tɔ wɔlɔ totokotshɛ djɛ ndjewa nsipisoyɛ anto ankina lamo Yeso ndawola mvɔ nkambo djɛso. Ndjɔmbɔmba, iso nkoka nkamba la wekelo 4 wolekɔ l’inkankanda Lokumu lʼɔlɔlɔ lʼoma le Nzambi! (lá Otetela) Wekelo wɔsɔ wolekɔ l’ɔtɛ wɔ djoyi ante: “Yeso Kristo ende na?” Kana iso nkokaka nkamba la shapitrɛ 5 y’onkanda Kakɔna kakoka Bible tetsha? Shapitrɛ yɛsɔ ilekɔ l’ɔtɛ wɔ djoyi ante: “Tshungɔ ekɔ woshasha wa nɛmɔ woma le Nzambi.” Edjinge ɔnɔnyi onkfumo iso nfudjɛka djedjɛ djɛso tá oshinga wɔ mbendo má nsanghanaka lá bokfɔ djɛ nyɔyi kɛ Yeso edjinge má ndjetaka anto ankina djɛ ndosanghana laso. Ɔsɔngo mpeyi k’ekekete kɛ Yehova ndatɔpɛyɛ kɛ ndakanyɛ anto ankina akambo walendana la Wɔnande!

17. Lamo oshinga wɔ mbendo oyɛwɔ opapɛyɛ woleka ekekete wime Ndjambe?

¹⁷ Ape l’ehamo, tolekɔ la donga djɛ wɔlɔ efula djɛ nyɛnyɛ edjinge nkindjɛ nfudjɛ djedjɛ djɛso l’oshinga wɔ mbendo. M’ɔtɛ w’oshinga wɔ mbendo, iso nkoka ndjala la djokanelo djɛ wɔlɔ la Yehova kaanga oyɛso anto wa ntshamba djɛ djɔ. Mande oshinga wɔ mbendo wofutamaka, elemo wɛ Djabolo wengotshitana lotshinda lotshinda. (1 Dj. 3:8) Mánde oshinga wɔ mbendo wofutamaka, ikanyi yeyalisa la Yehova lá nkambo djɛ looko ingokotshama. Looko l’otondo longokadjimɔ paradiso. Onto onkfumɔ wongopomanaka la wɛ angɔkɔpaka Yehova edjinge angookambelaka. Djɛkondeke, nyontshɔ tohonake lofu la lofu topo tɔ nyɛnyɛka djedjɛ djɛso t’oshinga wɔ mbendo, opapɛyɛ woleka ekekete wime Ndjambe!