1-2. Lá wopo wɔkɔnge okokaso ndɔnda wina wa Yeso? Pɛyɛ ndjɔmbɔmba.

KOKANELA djɛ olekɔ l’anteyi k’anto watakɛnde m’ɔkɔngɔ wɔ mvula l’osowe w’ekekete. Ilɔndjɛ yɛ balo atanyɔlɔndjɛ. Winá wɔ ndotakɛnde, nde atatshike wina wande kana tolembetelo tɔmɔtshi tɛnama lá looko edjena kɛ ndohetaki. Lá winá ɛmɔtshi, opawa mbamba kɛ nyɛna ilɔndjɛ! Koko opalekɔ la wɔma. Ladjikɛnde, wɛ nya anto watokilika nyotananghe la wolo djɛ ndɔnda wina wande wɔlɔwɔlɔ!

² Andja wa nyɛtshi w’ɔsɛnaso lɔɔko kɛnɛ, walekɔ etengo osowe w’ekekete wopalekɔ la mboka, edjinge Akristo wa nsɔsɔlɔ walekɔ etengo oloyi w’anto wotakɛndɛ l’eteyi. Mpeyi nde, Yehova atɔpɛyɛka Ilɔndjɛ yɛ djɔ, Wɔnande Yeso Kristo, nde ndeke kanga wina w’okokaso ndɔnda wɔlɔwɔlɔ. (1 Pɛ. 2:21) Lá nkilika onkanda ɔmɔtshi wosakisola Bible, Pɛtɛlɔ ɛdjɛka Yeso lanɛ nya ilɔndjɛ. Ngo ngete ilɔndjɛ ndotshikaka wina kana tolembetelo m’ɔkɔngɔ wɔnde, Yeso atshikaka wina kana tolembetelo tɔmɔtshi m’ɔkɔngɔ wɔnde tokokaso nkilika. Nyontshɔ tokadjimole weepó welendana lá ɔlɔndɛlɔ wɔ wina wande. Wina wasɔ osakisolawɔ nge? Lamo ndalɔnda? Edjinge wopo wɔkɔnge?

3. Kɛkɔnge kesakisola ndɔnda wina w’onto ɔmɔtshi?

³ Kɛkɔnge kesakisola ndɔnda wina w’onto ɔmɔtshi? Lá Bible, itepela ‘nkɛnda’ edjinge ‘ekolo’ nsakisolaka lá winá ɛmɔtshi, kɛnɛ k’onto ndananghe lá lowiko lɔnde. (Ewa. 6:9; Woo. 4:26) Ndjɔmbɔmba k’onto ɔmɔtshi ndatshike, nkoka ndjɛlama la wina kana la tolembetelo tɔ ndotatshike l’ɔkɔngɔ winá wɔ ndotakɛndɛ.  Djɛkondeke, ndɔnda wina w’onto ɔmɔtshi nsakisolaka nkilika ndjɔmbɔmba kɛnde, kana ndowokola.

4. Kɛkɔnge kesakisola nkilika wina wa Yeso?

⁴ Iya, kɛkɔnge kesakisola ndɔnda wina wa Yeso? Nsakiso kɛ yopasɛ nde, ndjokola ndjɔmbɔmba kɛnde. Lá vɛrse dj’ɔsamisa djamba djɛso djɛnɛ, ɔpɔstɔlɔ Pɛtɛlɔ atepela lá kɛnɛ kelendana la ndjɔmbɔmba kɛ wɔlɔ ketshikisa Yeso mande nde akfulumeyɛka ndjolo, koko wayi ankina efula walekɔ w’okokaso ndjokola Yeso. (1 Pɛ. 2:18-25) Lá nsɔsɔlɔ, lowiko lɔ Yeso l’otondo ntepela ente kenkfumɔ k’indatepela edjinge k’indananghe, alekɔ ndjɔmbɔmba leso kɛ nkilika.

5. Anto wa ntshamba djɛ djɔ nkokaka nsɔsɔlɔ nkilika ndjɔmbɔmba kɛ djɔ kɛ Yeso? Pakisola.

⁵ Etengo oyɛso anto wa ntshamba djɛ djɔ, tokoka nsɔsɔlɔ nkilika ndjɔmbɔmba kɛ Yeso? Ee, iso nkokaka. Vungɔ ente Pɛtɛlɔ atokembɛka dj’iso ‘ndɔnda wina [wa Yeso] wɔlɔwɔlɔ’ koko ape lá lɛdji lɔ djɔ. Ntsha iso ndɔnda wina wande la nkɔmɛ nkfumɔ, lá nangha kenkfumɔ k’okaso nangha etengo anto wa ntshamba djɛ djɔ, tɔngɔlɛmɛyɛ etepela wɛ ɔpɔstɔlɔ Djɔanɛ wɛnɛ: ‘Kɛndaka ngo ngete Yeso ndakɛndaka.’​—1 Dj. 2:6.

6-7. Lamo okokaso ntepela ente ntsha tɔmbɔlɔnda wina wa Yeso tongoyala entshupa la Yehova?

⁶ Ndɔnda wina wa Yeso ntokotshɛka dj’iso ndjala entshupa la Yehova. Lamo okokaso ntepela nghɔsɔ? Ntondontondo, Yeso atotshikelaka ndjɔmbɔmba kɛ wɔlɔ efula kɛ wopo w’okokaso mbika lá yopo yesasangɛ Ndjambe. (Dj. 8:29) Djɛkondeke, má ndɔnda wina wa Yeso, tongosasangɛ Yehova. Edjinge iso nkoka ndashikikɛ ente Papa kɛso kel’olongo ndasukanyɛka la wanɛ wanangha la wolo djɛ ndjala tolongo tɔnde.​—Dja. 4:8.

⁷ Elonga kepende, Yeso okolaka Papa kɛnde  lá lɛdji lɔ djɔ. Djɛkondeke Yeso ndatepela ante: ‘Onto w’ɔmɔnyɛna amɛna edjinge Papa.’ (Dj. 14:9) Winá w’okolaso wekeka wa Yeso edjinge wopo wɔ ndanaghelaka anto ankina akambo, ndjɔmbɔmba nkɛtshi k’indoke kanga olando w’anghɛnyi, djandji dj’indoke omoto wɛnaki djolo l’olando wɔ wolo edjinge djandji dj’indoke wanɛ wavusisa anto wawɔ, tongokola Yehova wɔlɔwɔlɔ. (Mar. 1:40, 41; 5:25-34; Dj. 11:33-35) Winá w’isotaleke ndjokola wekeka wa Yehova, ndeke ilongo yɛso lande yotaleke ndjala wolo.

8. Kopakisola lamo ndɔnda wina wa Yeso otokotshɛwɔ djɛ ‘ndjila andja wanɛ otshumba.’

⁸ Ndɔnda wina wa Yeso ntokotshɛka dj’ipa iso ndjimbɔ má nkfumbo dj’andja wa nyɛtshi wanɛ. L’otsho w’ekomo wɔ lowiko lɔnde lanɛ lá looko, Yeso ayalaka l’akoka wa ntepela ante: ‘Lambila andja wanɛ otshumba.’ (Dj. 16:33) Nde akɔpaka ntepela ante, nde atawola djɛ ekanedji, ekoma, edjinge nanghedji djel’andja wanɛ ndodjimbola. Yeso atavungɛ kaanga ndambo daambi elonga k’indaye lanɛ lá looko, kɛndoseela Yehova. Nkambo djɛsɔ olendamawɔ laso ngete mo? Andja wanɛ walekɔ la nkete efula djekoka ndjɛkɔla yimba yɛso m’olemo wɔ Yehova. Koko, etengo Yeso, ntsha iso nkindjɛ ndjila yimba yɛso lá nangha ɛkɔpa kɛ Yehova, mbɔ edjinge iso, ‘tongila’ andja wanɛ otshumba.​—1 Dj. 5:5.

9. Kɛkɔnge k’oyɛso ladjɛ nangha djɛ ntshikala lá mboka ketá lowiko l’etshinda?

⁹ Ntsha iso ndɔnda wina wa Yeso tongowa lowiko l’etshinda. Winá wɔ olangala ɔmɔtshi wɔ kanga okfudji ndopola kɛnɛ k’oyɛnde ladjɛ nangha djɛ mba lowiko l’etshinda, Yeso okadjimolaka ante: ‘Yɛka onkilike.’ (Mat. 19:16-21) Yeso ashimelaka ase Juda amɔtshi watawolaki djɛ nde alekɔ Kristo ante: ‘Ɛnkɔkɔ wɛmi . . . nkilikaka lemi. Langapɛyɛ lowiko l’etshinda.’ (Dj. 10:24-29) Yeso ashimelaka Nikɔdɛmɛ, ose Tominanyi telá djiko t’ase Juda wɔkɔkɔpaki ndjewa akambo efula walendana la Yeso ante: ‘Wanɛ walekɔ la djawo tende,’ wangowa ‘lowiko l’etshinda.’ (Dj. 3:16) Iso ndjalaka la djawo te Yeso má nkamba la kɛnɛ k’indalakanyɛ edjinge má ndjokola ndjɔmbɔmba kɛnde. Ntsha iso nangha akambo wasɔ tongotshikala lá mboka kɛ lowiko l’etshinda.​—Mat. 7:14.

10. Lá nkilika Djɔanɛ 17:3 kɛkɔnge k’oyɛso ladjɛ nangha djɛ ‘djewa’ Yeso wɔlɔ?

¹⁰ Lá ntondo k’iso ndoyala l’akoka wa ndɔnda wina wa Yeso wɔlɔwɔlɔ, iso ladjɛ ntondontondo ndowewa. (Wala Djɔanɛ 17:3.) ‘Ndjewa’ Yeso alekɔ nkambo dj’oyɛso ladjɛ nkindjɛ nangha. Iso ladjɛ nkindjɛ ndjeka djɛ ndowewa wɔlɔwɔlɔ, ndjeka wekeka wande, ekanedji kɛnde edjinge ɛlɛmbɛ wɛnde. Kaanga ilá kɛkɔnge k’oyɛso lá akambo wa nsɔsɔlɔ, iso ladjɛ nkindjɛ nangha la wolo djɛ ‘ndjewa’ Yehova nya Wɔnande.

11. Kɛkɔnge k’otanaso lá Evanjiliyo ɛnɛyi?

 ¹¹ Djɛ ntokotshɛ djɛ ndjewa Wɔnande, la ngandji kenkfumɔ Yehova ilaka enkanda ɛnɛyi w’etawɔ Evanjiliyo l’Otepela wɔnde. Evanjiliyo nkɔndɔlaka lowiko edjinge olemo wɔ Yeso. Enkanda wɛsɔ ntoshimelaka kɛnɛ kɛ Yeso ndatepela la kɛnɛ k’inda nanghe edjinge ntɛnyɛka wopo wɔ ndoyawokaka. Enkanda ɛnɛyi wɛsɔ ntokotshɛka djɛ ‘nkana yimba wɔlɔ’ lá ndjɔmbɔmba kɛ Yeso. (Heb. 12:3) Lá nsɔsɔlɔ welekɔ lá wina wa Yeso ndatshike. Djɛkondeke má ndjekaka Evanjiliyo, iso nkoka ndjewa Yeso wɔlɔwɔlɔ. Eposelo wengoyala lá nkambo djɛsɔ nde, tongoyala l’akoka wa ndɔnda wina wande wɔlɔwɔlɔ.

12. Kɛkɔnge k’okokaso nangha djɛ mba wapɔ efula má Evanjiliyo?

¹² Djɛ mba wapɔ efula má Evanjiliyo, totakomake ngo lá ndaawalaka toko. Iso ladjɛ ndɔsaka winá wɔ ndaawekaka la nkɔmɛ nkfumɔ edjinge ntɔnɔlaka l’eteyi la ntɔnɔ nkfumɔ. (Ɛdjɛ la Yosua 1:8, nɔtɛ.) Nyontshɔ tolende topo tope tokoka ntokotshɛ djɛ ntɔnɔlaka edjinge nkambaka la kɛnɛ k’owalaso m’Evanjiliyo.

13. Wopo wɔkɔnge okokɛ nangha djɛ ɔkɔndɔ wɔ lowiko lɔ Yeso ndjala le wɛ etengo onanghemawɔnde lɔɔko kɛnɛ?

¹³ Yopo yɛ ntondo, nangha djɛ wamba wel’Evanjiliyo ndjala etengo onanghemawɔnde win’ɔsɔ. Kamba l’ekanedji kɛko kɛ yimba djɛ nyɛna, ndjoka, edjinge ndawoka etengo olekɔ l’eteyi winá wonanghema nkambo djɛkɔ. Djɛ nkokotshɛ djɛ nangha nkambo djɛsɔ, nangha ehonelo ɛmɔtshi l’enkanda wɛ wekelo weposisa me olonghanyelo wɔ Yehova. Lenda lá mbamba kɛkɔnge kenanghemisa akambo w’asɔ ntepela ente, akambo wananghemisa lá ntondo edjinge l’ɔkɔngɔ w’akambo wakɔ w’ekɛ. Nangha ehonelo efula djɛ ndjewa akambo walendana l’anto edjinge djena dj’otepelawɔ l’eteyi. Ɛdjɛ ɔkɔndɔ w’owalɛ la ɔkɔndɔ wɔk’ɔmɔ wolekɔ lá Evanjiliyo onkina. Lá mbamba imɔtshi, onfunyi ɔmɔtshi w’Evanjiliyo afunaka akambo amɔtshi wa djonyi efula wa onfunyi onkina ndotatepela lakande.

14-15. Kɛkɔnge k’oyɛso ladjɛ nangha djɛ nkamba la kɛnɛ k’ekaso má Evanjiliyo wɛkɔndɔla lowiko lɔ Yeso?

 ¹⁴ Yopo y’ape, kamba la ɛkɔndɔ welekɔ lá Evanjiliyo lá lowiko lɔko. (Dj. 13:17) Wopo wɔkɔnge okokɛ nangha nkambo djɛsɔ? M’ɔkɔngɔ wɔ wɛ ndjeka la ntɔnɔ nkfumɔ ɔkɔndɔ ɔmɔtshi wel’Evanjiliyo, yawopóla ente: ‘Olakanyelo ɔmɔtshi wolekɔ l’ɔkɔndɔ wɔnɛ w’okokami nkamba la wɔkɔ lá lowiko lɔmi? Wopo wɔkɔnge okokami nkamba l’ɔkɔndɔ wɔnɛ djɛ nkotshɛ anto ankina?’ Kanela onto ɔmɔtshi w’ewɛ, edjinge m’ɔkɔngɔ kapana nyape olakanyelo wɔ ngowaki má wekelo wɔko la ngandji edjinge la nkɔmɛ nkfumɔ.

¹⁵ Nyontshɔ tokolenda ndjɔmbɔmba kɛmɔtshi kɛ wopo w’okokaso nkamba la topo tope tɔsɔ. Tongoshishima ɔkɔndɔ wɔ wadj’odjo wɔ Yeso ndɛnyi lá tɛmpɛlɔ.

16. Kɔkɔndɔla ɔkɔndɔ wolekɔ lá Marko 12:41.

¹⁶ Nangha djɛ ɔkɔndɔ ndjala etengo onanghemawɔnde winá wɔsɔ. (Wala Marko 12:41.) Kanela djɛ nyɛna akambo wahetisa. Tolekɔ lá Nisana 11, 33 Ɛ.K., lasɔ ko ambotshikala ngo etsho emangha lá ntondo kɛ Yeso mvɔ. Yeso ambohetshɛka winá wɛnde efula djɛ ndakanyɛ lá tɛmplɛlɔ. Nkambo djɛsɔ mpayalisa wɔdju le nde, m’ɔtɛ w’antonyi wande w’ewandji wɛ ntolo. Ntondo, efula l’anteyi kɛwɔ w’owopolaka má wolo wɔna onanghande ansese. Ankina wambohonaka ndotadjɛ ilonga la woopó ɔmɔtshi wɔ wolo. (Mar. 11:27-33; 12:13-34) Winá wɔsɔ Yeso ambɔsɛkɔ t’etenyi kenkina kɛ tɛmpɛlɔ. L’eteyi, l’edjena k’iyetaka mbala imɔtshi ambɔ Ntshɛkɛ djɛ amato, nde nkoka nyɛna tonsesete tɔ iyilaka epapɛyɛ tolekɔ l’omamo wɔ mpele djelá ntshɛkɛ. Nde ambintansɛ edjinge ambotateyɛ ndenda wopo w’anto iyilaka nfalanga lá tonsesete yɛsɔ. Nde amɛna anto walekɔ l’okfudji efula w’ila nfalanga efula. Mbala imɔtshi nde alekɔ entshupa efula djɛ ndjoka wopo wɔ nfalanga yɛ kɛngɛlɛ yɛsɔ ɔkfɔwɔ l’insesete.

17. Kɛkɔnge kɛ wadj’odjo w’ɔnvɔ w’otepelawɔ lá Marko 12:42 ndananghe?

¹⁷ Wala Marko 12:42. Ndambo l’ɔkɔngɔ, omoto ɔmɔtshi ambosepa ikanyi yɛ Yeso. Omoto wɔkɔ nde ‘wadj’odjo w’ɔnvɔ.’ (Luka 21:2) Lowiko lolekɔ wolo efula lende, edjinge nyɛnamaka etengo apawa nfalanga y’okokande nsomba nkete dj’oyɛnde la djonyi. Koko nde, ambɔsɛmɛla t’insesete imɔtshi ko ambila nfalanga ipe yɛ kɛngɛlɛ lá wisisa, yɛ mbala imɔtshi ipilisa edjipo winá wɔ ndilaki lá insesete. Yeso ewaka kɛnɛ kɛ ndile, nde ilaka lɛpta ipe, kɛngɛlɛ ipe y’akfuta watayalaki la ntshó l’etsho wɛnde. Nfalanga yɛsɔ itakokaki nsomba kaanga ifulu y’ɛnsɔlɛ imɔ, tofulu toyalaki l’anteyi kɛ tofulu t’oshinga wɔdju efula, t’iyasadjɛka djɛ ndɛ.

18. Lá nkilika Marko 12:43, 44, kɛkɔnge kɛ Yeso ndatepela lá kɛnɛ kelendana l’opapɛyɛ wɔ wadj’odjo?

¹⁸ Wala Marko 12:43, 44. Wadj’odjo wɔsɔ ambokamoyɛ Yeso efula. Djɛkondeke, ndombeta ambeki wande edjinge ambosepa ikanyi yɛwɔ te wadj’odjo wɔkɔ, ko ambashimela ante: ‘Wadj’odjo wɔnɛ ambila opapɛyɛ woleka nfalanga inkfumɔ y’ilisa anto ankina.’ M’asɔ nde apakisolaka ante: ‘Iwɔ ntepela ente ase okfudji, iyankfumɔ wambilaka efula m’okfudji w’okotshɛwɔ, koko nde m’ɔnvɔ wɔnde ambilaka kenkfumɔ k’okotshɛnde djɛ mbika.’ Winá wɔ wadj’odjo wɔ nkɔmano ndilaki ndambo kɛnde kɛ nfalanga keyalisa lande lofu lonyi, nde ambotshikaka lowiko lɔnde l’ɛwɔ wɛ Yehova djɛ nde ndolama.​—Yee. 26:3.

19. Olakanyelo wɔkɔnge wɔ djonyi w’okokaso mba má etepela wɛ Yeso te wadj’odjo w’ɔnvɔ?

¹⁹ Kamba la ɔkɔndɔ wɔsɔ lá lowiko lɔko. Yawopóla ente, ‘olakanyelo wɔkɔnge w’owami má etepela wɛ Yeso te wadj’odjo w’ɔnvɔ?’ Kanela nkambo djɛ wadj’odjo. Ape l’ehamo, nyɛnamaka djɛ nde akombolaki mpɛyɛ Yehova efula.  Koko, nde ananghaka kɛnɛ k’indakoke nangha, nde apɛyɛka Yehova kɛnɛ keleka wɔlɔ lende. Edjinge Yeso ewaka ante opapɛyɛ wɔnde w’olekɔ la ntshina efula lá wiso wa Papa kɛnde. Ɔnɛ, alekɔ olakanyelo wɔ djonyi efula leso: Yehova nsasangaka winá w’ɔpɛyɛso kɛnɛ kelekɔ wɔlɔ leso ntepela ente, oloko wɔso onkfumɔ edjinge olemo wonanghelaso l’oloko ɔmɔ. (Mat. 22:37; Kɔl. 3:23) Yehova ndjalaka l’osasa winá w’ɛnande tonangha kenkfumɔ k’okokaso nangha! Ikfɔ yɛsɔ, ndendanaka la winá w’ohetshɛso la wolo w’otshutshɛso djɛ ndɔtɛmɔla, mpoposanyɛ edjinge ndjingela nsanghanyɛ.

20. Wopo w’ɔkɔnge okokɛ nkamba l’olakanyelo wimá ɔkɔndɔ wɔ wadj’odjo? Pɛyɛ ndjɔmbɔmba.

²⁰ Wopo wɔkɔnge okokɛ nkamba l’olakanyelo wimá ɔkɔndɔ wɔ wadj’odjo? Hona onto w’okoka mba lokembo ntsha wɛ ndovungola ente, Yehova alekɔ l’osasa lá kɛnɛ k’oyɛnde l’akoka wa nangha lá nkambo djɛnde. Ndjɔmbɔmba, ongewake nkaana kɛmɔtshi k’ekokolo keyakiyanyɛka kana keyawɔsaka ante nde apalekɔ la ntshina mande apalekɔ la demba djɛ wɔlɔ kana wolo wɔ ndapɛyɛ l’olemo w’ipoposanyɛ etengo ndananghaka ntondo? Kana ovungɔ wɔnanyɔ ɔmɔtshi wɛna ndjolo l’olando wopakɔnɔ, ko ambɔlɛmba mande apalekɔ l’akoka wa ntshɔ tá nsanghanyɛ inkfumɔ yenanghema lá Mvulu k’Onkfumi? Kotshɛ anto wa nghɔsɔ má ndashimela etepela welekɔ ‘wɔlɔ djɛ ndakembɛ.’ (Ɛfɛ. 4:29) Kapana nyawɔ elakanyelo wekembɛ wɛ ngowaki má ɔkɔndɔ wɔ wadj’odjo w’ɔmvɔ. Etepela wɛko wekembɛ nkoka ndashikikɛ ambɔ Yehova nsasangaka winá wɔpɛyɛso kɛnɛ k’oyɛso l’akoka. (Woo. 15:23; 1 Te. 5:11) Winá w’owandolaso anto ankina mande wapɛyɛ Yehova kɛnɛ keleka wɔlɔ lewɔ, kaanga okokawɔ nyɛnama etengo kɛnɛ keleka daambi, iso ndɔndaka wina wa Yeso wɔlɔwɔlɔ.

21. Kɛkɔnge kɛ ngombokana djɛ nangha?

²¹ Tolekɔ nsɔsɔlɔ la djedjɛ efula m’ɔtɛ w’ɛkɔndɔ welekɔ l’Evanjiliyo wetoshimela akambo efula walendana la lowiko lɔ Yeso, mande wengotokotshɛke dj’iso ndowokola ntepela ente, ndɔnda wina wande wɔlɔwɔlɔ! Lamo ngɔpɔshi nonghanyi kɛ ndjekaka Evanjiliyo lá wekelo wɔko nghɔmɛlɛ, kana lá Losanghanyɛ lɔ nkfumbo? Nyontshɔ tovungɔke ente djɛ mba wapɔ má wekelo wɛ nghɔsɔ, iso ladjɛ nangha djɛ ɔkɔndɔ ndjala etengo onanghemawɔnde lɔɔko, edjinge nkamba l’ɔkɔndɔ wɔkɔ lá lowiko lɔso. Lá djiko djɛ ndjokola kɛnɛ kɛ Yeso ndananghaka, iso ladjɛ ndjekameyɛ kɛnɛ k’indatepelaka. Lá djamba djeyaye, tongeka elakanyelo w’okokaso mba, má etepela w’ekomo wɛ Yeso ndatepela lá ntondo kɛ nde mvɔ.