Lamo lá ntondo kɛ nde mvɔ, Yeso ndatepela etepela wɛ Davidɛ welekɔ lá Yeembo 22:1?

L’anteyi k’etepela w’ekomo wɛ Yeso ndatepela lá ntondo kɛ nde mvɔ ndeke otanaso etepela welekɔ lá Mateo 27:46 wetepela ante: ‘Ndjambe kɛmi, Ndjambe kɛmi, lamo nghomonkadjɛ?’ Winá wɔ ndatepela nghɔsɔ, Yeso akotshɛka etepela wɛ ontshumbi yeembo Davidɛ welekɔ lá Yeembo 22:1. (Mar. 15:34) Angoyala nyɛtshi iso ntepela ente, Yeso atepelaka etepela wɛsɔ mande atawolama me Yehova kana mande atshutshɛka djawo djɛnde te Ndjambe lá winá ɛmɔtshi. Yeso asipisoyɛki lamo ndayale ladjɛ mvɔ, edjinge nde awolaka mvɔ. (Mat. 16:21; 20:28) Nde ewaki lonkina ante lá winá wɔ nyɔyi kɛnde, Yehova apangoodjinga la ‘lopango lɔ elamelo.’ (Djɔ. 1:10) Djɛkondeke Yehova ndawola djɛ Yeso nyɛna ndjolo djɛnde nyɛnyɛ ape l’ehamo ante, nde angotshikala la nkɔmano ayale kaanga wopo wɔ nyɔyi kɛkɔnge kindayale ladjɛ mvɔ.​—Mar. 14:35, 36.

Iyako lamo Yeso ndatepela etepela welá yeembo wɛsɔ? Kaanga isopewe kɔɔ, nyontshɔ tokolenda donga mɔtshi djekokisa ndotshinda djɛ nde ntepela etepela wɛsɔ. *

Má ntepela etepela wɛsɔ, mbala imɔtshi Yeso akɔpaka nkɔkɔmɛ ante Yehova apangokotshɛ lá nyɔyi kɛnde. Yeso ayalaka ladjɛ nfuta oshinga wɔ mbendo ipa l’okotshɔ wɔ Yehova. Nde ayalaki onto edjinge ayalaka ladjɛ mvɔ djɛ ‘ndɛta nyɔyi lá nkambo dj’onto onkfumɔ.’​—Heb. 2:9.

 Má mbala etepela welá yeembo yɛsɔ, Yeso akɔpaka mbala imɔtshi dj’anto ankina ntɔnɔla l’etepela enkfumɔ welá yeembo yɛkɔ. L’etsho wɛsɔ, ase Juda efula wayalaki l’ekfumbo kɛ nkota avɛrse efula welá teembo l’ɔtɛ. Winá wɔ iyoke vɛrse mɔ djelá yeembo, iwɔ wakokaka mvungɔ mbala kɛkɔ kɛmɔ avɛrse ankfumɔ welá yeembo yɛkɔ. Ntsha kɛsɔ ndeke Yeso ndakɔpɛ nangha, mbɔ koko nde akokaka nkotshɛ ambeki wande w’ase Juda dj’iwɔ mvungɔ wa prɔfɛsi efula yelá yeembo yɛsɔ yelendana l’akambo wakokisa nanghema lá nyɔyi kɛnde. (Yee. 22:7, 8, 15, 16, 18, 24) Lonkina, avɛrse wel’ekomo kɛ yeembo yɛsɔ, numɛka Yehova edjinge nyɛnyɛka djɛ nde alekɔ Nkfumi k’apemela looko l’otondo.​—Yee. 22:27-31.

Mbala imɔtshi winá wɔ ndawale etepela wɛ Davidɛ wɛsɔ, Yeso akɔpaka ntepela ante nde atanangha kaanga ovunga ɔmɔ. Lá ntondo kɛnde mvɔ, tominanyi telá djiko wolomboyɛka ipa la nkilika ɛlɛmbɛ edjinge watepelaka ambɔ nde ambotola Ndjambe. (Mat. 26:65, 66) Tominanyi telá djiko wasanghanaka lankeke lankeke, wolomboyɛka la kati k’otsho edjinge ipa la nkilika ɛlɛmbɛ. (Mat. 26:59; Mar. 14:56-59) Má mbala etepela wɛsɔ etengo kanga l’opola woopó wopahone onto nkadjimola, Yeso akɔpaka mbala imɔtshi nsepa inkanyi y’anto lá wopo wɔ ndotanangha kaanga ovunga ɔmɔ edjinge watayala kaanga l’elonga kɛmɔ k’iwɔ ndoyaka.

Mbala imɔtshi Yeso akɔpa mvungola anto ante, kaanga Davidɛ onfunyi wɔ yeembo yɛsɔ ndɛnyi ndjolo, nkambo djɛsɔ mpɛnyɛ djɛ Davidɛ atawolama lonkina me Yehova. Woopó wɔ Davidɛ wotakopa nyɛnyɛ ambɔ nde ambotshutshɛ djawo te Ndjambe. M’ɔkɔngɔ wɔ nde ndawopola woopó wɔsɔ, nde atepelaka djɛ nde ndawɛkɛka lá wolo wolekɔ la Yehova djɛ ndowikɛ. (Yee. 22:23, 24, 27) Wopo wɔk’ɔmɔ ndeke, kaanga Yeso, ‘Wɔna Davidɛ,’ ndɛnyi ndjolo l’otamba wɔ ndjolo, nkambo djɛso mpasakisola ente Yehova atawolaki Wɔnande lonkina.​—Mat. 21:9.

Mbala imɔtshi Yeso ɛnyɛki efula k’okiyano woyalaki lande winá wɔ Yehova ndatshike ndolama l’ikanyi yɛnde nyɛnyɛ nkɔmano djɛnde nkfumɔ. Yehova atalonghanyɛ má bango djɛ Wɔnande nyɛna ndjolo edjinge ndovɔ. Nkambo djɛsɔ ndjɛka ndoyala djonyi ngo m’ɔkɔngɔ wɔ mpendo kɛ Adama ny’Eva. Yeso atanangha kaanga ovunga ɔmɔ, koko nde ayalaka ladjɛ nyɛna ndjolo edjinge mvɔ l’ɔtɛ wɔ nkadjimola lá woopó wɔ djonyi wɔ Satana edjinge nfuta oshinga wɔ mbendo woyalisa djonyi djɛ nsomba kɛnɛ kɛ anto iyatshutshɛ. (Mar. 8:31; 1 Pɛ. 2:21-24) Akambo wasɔ wakokaka nkotshama ngo ntsha Yehova ambotshika nama Wɔnande Yeso lá mbala kɛ ntondo lá lowiko lɔnde.

Mbala imɔtshi Yeso ahonaki nkotshɛ ambeki wande dj’iwɔ ndjila yimba l’elonga kɛ Yehova ndawola djɛ nde mvɔ l’otamba wɔ ndjolo. * Yeso ewaki ante mvɔ yopo yɛ nyɔyi kɛ l’otamba wɔ ndjolo etengo onto wɔ nyɛtshi kɛsɔ, angotakanyɛ anto efula. (1 Kɔ. 1:23) Ntsha ambeki wande ndjila yimba lá elonga kɛ nsɔsɔlɔ kɛ nyɔyi kɛnde, iwɔ wangosipisoyɛ nsakiso kɛ nsɔsɔlɔ kɛ nkambo djɛsɔ. (Nga. 3:13, 14) Má nangha nghɔsɔ, iwɔ wangɔwɔsa etengo Onseedji koko ape etengo kanga nyɛtshi.

Ayale kaanga l’ɔtɛ w’elonga kɛkɔnge kɛ Yeso ndatepela etepela wɛsɔ, nde asipisoyɛki ante ekakasano wepomanaki lande iyayalande etenyi kɛmɔtshi k’ɛkɔpa kɛ Ndjambe tende. Lá yopasɛ, m’ɔkɔngɔ wɔ nde ntepela etepela welá yeembo wɛsɔ, Yeso atepelaka ante: ‘Mbokotshama!’ (Dj. 19:30; Luka 22:37) Ee, wopo wɔ Yehova ndatshike nama Yeso l’itenyi yɛ winá, apɛyɛka Yeso mbamba djɛ nkotshɛ akambo ankfumɔ wa ndatomama djɛ ndonangha lá looko wɔlɔ wɔlɔ. Kɛsɔ k’ɔpɛyɛka mbamba lonkina djɛ nkotshɛ akambo ankfumɔ wafunamisa lá nkambo djɛnde ‘l’ɛlɛmbɛ wɛ Mɔsɛ, l’efunelo w’Aprɔfɛtɛ edjinge lá Teembo.’​—Luka 24:44.