Nkambo djɛ yɛnyi nde, winá wɔ mokomaka l’ɛnɔnyi djomi l’esato, djokanelo djɛ wolo djɛ djeyalaki l’antenyɛ lemi isa Yehova djetateyɛka mpɔla. Ɛnamaki etengo winami welá nkalasa wayalaki la lotshungɔ lopalekɔ l’elelo, edjinge ntateyɛka nkombola djɛ ndjala la lotshungɔ lɔsɔ. Ntateyɛka ndjoka etengo ɛlɔndjɛIɔ k’ambotshi wami la ɛlɛmbɛ w’Akristo wemboleka nkenya efula edjinge l’ɛnaki lonkina etengo akambo wa nyuma wamboleka odjito edjinge wolo efula le lemi. Kaanga mawolaka ete Yehova alekɔ, ntayawokaki lonkina entshupa isande.

Ntahɔla yɔɔ lá nyuma, koko lapoposanyɛki ngo ndambo daambi. Winá wɔ matshɔka t’olemo w’ipoposanyɛ, ntayalɔngɔsalaki ntondo, djɛkondeke lakakatanaki djɛ mbanga djamba kana nkindjɛ djamba isa onto. Eposelo weyalisa la nkambo djɛsɔ nde, ntawaki kaanga mbembo kɛmɔ kɛ mbembola kana onto wɔ ndjeka isa nde Bible edjinge ntayalaki lonkina l’osasa, kɛsɔ kenkomɛka lonkina djɛ ndeka ndjoka oloko ntshulu mposa t’olemo w’ipoposanyɛ. Ntateyɛka ndawopola mɔmɔlɛ ente, ‘Wopo wɔkɔnge onto okokande nkindjɛ mpoposanyɛ nghɔsɔ mbengo la mbengo edjinge ngɔndɔ inkfumɔ?’

 Winá wɔ mowaka ɛnɔnyi 17, ndjalaka la mposɛ k’efula kɛ ndalɔndjɛ ngo mɔmɛlɛ. Djɛkondeke, ndɔsaka nkete djɛmi, mposaka má lopango edjinge nsɛkɔka tá Australie. Ambotshi wami wokaka paa efula winá wɔ mime má lopango. Iwɔ wakiyanaka efula, koko wakanelaki ambɔ mpangotshika nkambela Yehova.

Lá Australie, lonyuma lɔmi lolekaka mpɔla efula. Ntateyɛka mpetshɛ nsanghanyɛ. Nkɔpɛka ilongo isa dangala mɔtshi djɛ ngete lemi wakɔpaki ndjingela lá nsanghɛnyɛ nkɔlɔ mɔtshi, ko nkɔlɔ nkina, ntshɔ ntɔnɔ waná edjinge ntomina lá wa bara l’otsho. Winá wɔ makanelaka lowiko lɔmi lɔsɔ, nsipisoyɛka ente layalaki etambe ntepela ente, lokolo lɔnɛ l’akambo wa nsɔsɔlɔ edjinge lokolo lonkina l’andja wanɛ, koko ntayalaki l’osasa lá djena djɛkɔ mpe.

M’ɔkɔngɔ w’etengo ɛnɔnyi epe, mpomanaka isa nkaana kɛmɔtshi k’ipa la nde ndjewa, ankomɛka djɛ lemi nkanela lá kɛnɛ kelendana lá lowiko l’imawikaka. L’intansɛki mvulu kɛmɔ isa nkaana itano yɛ mpolo, edjinge t’etaka onami w’edjingadjinga nya wadjɛnde Tamara, dj’iwɔ nd’intansɛ lá mvulu kɛso l’ilá kɛ lombengo lɔmɔ. Winá wɔ womɛnde ndananghaka akambo wa l’otshumano, Tamara ahetshɛki winá laso eseka edjinge ɔlaki laso. Lakɔpaki nkambo djɛsɔ efula. Nde ayalaki onto w’ilanaki yimba edjinge wɔ wɔdju nsawola lande. Nkamɔka djɛ nyɛna onto wolekɔ l’akambo efula wanangha l’olemo wɔ Yehova nghɔsɔ, ko mpetshɛka winá djɛ ndjɔla l’anto ankina.

Tamara ayalaki omoto w’osasalo efula. Ngandji kɛnde tá akambo wa nsɔsɔlɔ edjinge t’olemo w’ipoposanyɛ kasambeyanaki. Nde ayalaki l’osasa wɔ mpɛyɛ Yehova k’enkfumɔ k’indayalaka l’akoka, ko lemi ntayalaki l’osasa mande layalaki l’akoka koko lokambelaki ngo ndambo daambi. Enanghendji kɛnde kɛ wɔlɔ kɛsɔ edjinge efula k’osasa woyalaki lande, woyalaka l’eposelo wɛ wɔlɔ efula lá lowiko lɔmi. Ndjɔmbɔmba kɛnde kentshindaka djɛ lemi ntɔnɔla lá nsɔsɔlɔ kɛ djonyi kelá Afunelo kɛnɛ: Yehova nkɔpaka djɛ isankfumɔ ndokambela ‘l’osasa’ edjinge la ‘tɛɛndjɛ t’osasa.’​—Yee. 100:2.

Lakɔpaki wopo w’osasa w’oyalaki la Tamara, koko djɛ lemi ndjala l’osasa wɔsɔ, ndjalaka ladjɛ nangha etshikitano wɛ nkekete. Nkambo djɛsɔ  ndɔsɛlaka winá efula, ntanangha etshikitano mbala kɛkɔ kɛmɔ, koko ntateyɛka nangha ndambo ndambo. Ntateyɛka ndalɔngɔsɔla lá ntondo kɛ mposa t’olemo w’ipoposanyɛ edjinge ndɔsa olemo wɔ yat’ekalo mbala la mbala. Kɛsɔ k’enkotshɛka djɛ nyimɛ wɔma woyalaki la lemi edjinge ndjala l’oloko wolo. Etengo motateyɛka ndeka nkamba la Bible mbala la mbala l’olemo w’ipoposanyɛ, ndjɛka ndoyala l’osasa wɔ nsɔsɔlɔ. Ataheta ilá, ndɔsaka olemo wɔ yat’ekalo y’itenyi yɛ ngɔndɔ inkfumɔ.

Ntateyɛka nkɔpɛ tolongo l’anto ankfumɔ walekɔ l’ɛnɔnyi wetshikitanyi wananghaki k’enkfumɔ koyɛwɔ l’akoka l’olemo wɔ Yehova edjinge wookambelaki l’osasa. Ndjɔmbɔmba yɛwɔ yɛ wɔlɔ yenkotshɛka djɛ lemi nkalɔ ndenda akambo waleka djonyi lá lowiko lɔmi edjinge ndjala la nonghanyi kɛ wɔlɔ k’akambo welá nyuma. Ntateyɛka nkɔpa olemo w’ipoposanyɛ efula edjinge ekomo ekomo, ndjɛka ndoyala yat’ekalo yɛ lotshinda. L’ilá k’ɛnɔnyi efula wembohetá, ɔsɔ ayalaka mbala kɛmi kɛ ntondo k’imashikimala, k’imayale l’osasa edjinge k’imoyawoke wɔlɔ l’otshumano.

M’ɔkɔngɔ w’ɔnɔnyi ɔmɔ, mpomanaka l’Alex, onto wɔ wɔlɔ, wɔkɔpaki Yehova efula edjinge olemo w’ipoposanyɛ. Nde akambaki etengo onkambi wokotshɛ edjinge amboshiyɛka ndjala yat’ekalo l’ilá k’ɛnɔnyi esamalo. Alex akambaka lonkina ndekana ngɔndɔ esambele l’edjena k’iyayalaka la djonyi efula dj’ansakodji lá Malawi. L’eteyi nde ayalaka esanga la wamisiɔnɛrɛ imɔtshi yeyalaki ndjɔmbɔmba yɛ wɔlɔ lende edjinge y’okembɛki djɛ nde nkindjɛ ndjila wapɔ w’Onkfumi l’edjena kɛ ntondo.

Lá 2003, totshukanaka isa Alex, edjinge tokindjɛka l’olemo wɔ winá enkfumɔ. Tekaka elakanyelo efula edjinge Yehova atɔtshɔkɔlaki lá topo efula.

Lá 2009, watetaka djɛ ntokamba etengo wamisiɔnɛrɛ lá Timor-Oriental, iwawandja yɛ daambi yelá archipel Indonésie. Tokamɔka, toyalaka l’osasa koko tokaka edjinge wɔma. Ngɔndɔ itano m’ɔkɔngɔ, tokomaka lá Dili, capitale k’owila wɔkɔ.

Lowiko lɔ lá edjena kɛso kɛ bango kɛsɔ, lotshikitanaka efula la l’isawikaka ntondo. Toyalaka ladjɛ ndjekela  nkfumbo, otepela, nkete djɛ ndɛ edjinge yopo yɛ lowiko lɔ bango. Winá w’isaposaka t’olemo w’ipoposanyɛ, tapomanaki mbala efula l’anto wayalaki ɔmvɔ efula, w’ingelisa nkalasa ndambo kana lako, edjinge w’iyɛnyɛka ndjolo. Edjinge tɛnaka anto ankina efula wayalaki l’elando l’alemba kana lá wɔɔngɔ m’ɔtɛ w’ambandji edjinge wɔ wayi wa lopango. *

Olemo w’ipoposanyɛ woyalaki nkambo djɛ nkamɔ efula! Ndjɔmbɔmba, mpomanaka isa mbayi kɛmɔtshi k’oseka kɛ djandji efula keyalaki l’ɛnɔnyi 13 k’iyetaka Maria. * Nyɔ kɛnde avɔka ɛnɔnyi emangha lá ntondo kɛ lasɔ, edjinge nde ndɛnaka papa kɛnde ngo taangoyi. Etengo dɛngɛ efula djelá lɔsɔkɛ lɔnde, Maria atewaki kɛnɛ k’okokande nangha lá lowiko lɔnde. Mvungɔ mbala kɛmɔtshi djɛ nde alelaki winá wɔ ndankɔndɔlaka wopo wɔ ndoyawokaka. Koko, ntasipisoyɛki kɔɔ kɛnɛ k’indashimelaka, mande ntewaki otepela wɔwɔ wɔlɔ. Ndɔmbaka Yehova djɛ nde nkotshɛ lemi, djɛ lemi ndokembɛ, edjinge m’ɔkɔngɔ ntateyɛka ndowalela avɛrse wakembɛ w’imá Bible. M’ɔkɔngɔ w’ɛnɔnyi emangha, nyɛnaka wopo wɔ akambo wa nsɔsɔlɔ ndatshikitanyɛ nanghedji, ɛnamelo, edjinge lowiko l’onkfumɔ lɔ Maria. Nde alongolaka batisimo edjinge winá wɔsɔ, nde nyɔmɛlɛ ayotateyɛ ndjeka l’anto Bible. Lɔɔko kɛnɛ, Maria ambowa nkfumbo k’ekekete kelá nyuma edjinge winá wɔsɔ, nde ayoyawoka djɛ nde nkɔpamaka.

Yehova atshɔkɔla olemo w’ipoposanyɛ lá Timor-Oriental. Kaanga efula k’ansakodji iyombolongola batisimo ngo l’ɛnɔnyi emangha wemboheta wɛnɛ, efula kɛwɔ walekɔ nkamba etengo tat’ekalo, enkambi wekotshɛ kana tokokolo. Ankina wakamba lá biro dj’okadjimwelo edjinge wapɛyɛ lɔwɔ l’oposelo wɔ nkete djɛ ndɛ djelá nyuma l’etepela wetepelama l’eteyi. Winá w’awɛnami wa tshumba teembo lá nsanghanyɛ, wɛnami omonghamongho welá dongi djɛwɔ edjinge wawɛnami watafule lá nyuma, nkambo djɛsɔ mpɛyɛka lemi osasa efula.

Lowiko lowikaso lanɛ lá Timor-Oriental lotshikitana la l’isawikaka lá Australie, koko ntakanelaki ente langoyala la lowiko l’osasa efula nghɔsɔ. Lá winá ɛmɔtshi tingelaki lá bisi djɛ daambi anto efula la nse yemboma, l’ampɔpɔlɔ, la tɔyɛshi má lobengo lɔ l’eteyi. Nfu imɔtshi tekaki Bible l’onto ɔmɔtshi l’imvuvulu yɛ daambi, yɛ djangasa la ukfukfukfu efula, yeyalaki la lowomba lɔ mbindo edjinge ankɔkɔ walotalotaki l’eteyi. Koko, kaanga ekakasano efula wɛsɔ, latepelaki mbala efula ente, ‘Ɔnɛngo wɔlɔ!’

Winá w’okanelami akambo wamboheta, lemi nkawoyɛka ambotshi wami lokasa efula lá wopo w’iyandakanyɛ mboka yɛ Yehova edjinge iyansuke kaanga l’etsho wɛ wolo wɛ ɔlɛngɛ wɔmi. Woongo 22:6 akotshamaka nsɔsɔlɔ le lemi. Papa la mama walekɔ l’ofuno efula lá nkambo djɛmi isa Alex, edjinge walekɔ l’osasa djɛ nyɛna wopo wɔ Yehova ndombokamba laso. Ntateyɛ má 2016 tokamba l’olemo w’edjingadjinga l’etatshi kɛ looko kɛ filialɛ kel’Australie.

Nyɛnamaka djɛ alekɔ wolo ndjawola ente, l’etsho ɛmɔtshi, lemi lokaki olemo w’ipoposanyɛ onunghu. Winá wɔsɔ, ndɔkɔpa olemo w’ipoposanyɛ! Lambosipisoyɛ ente, ayale kaanga wopo wɔ lowiko lɔkɔnge lolekɔ laso, osasa wɔ nsɔsɔlɔ ndjɛka ngo má nkambela Ndjambe l’oloko ɔmɔ. Ee, ɛnɔnyi 18 w’isombohetshɛ lemi l’Alex l’olemo wɔ Yehova alekɔ ɛnɔnyi weleka osasa lá lowiko lɔmi. Winá wɔsɔ, lambɛna nsɔsɔlɔ k’etepela w’ontshumbi yeembo Davidɛ ndashimela Yehova ante: ‘Anto ankfumɔ wahona djiisa lewɛ wangoyalaka l’osasa, iwɔ wangofulaka tɛɛndjɛ t’osasa winá enkfumɔ. . . . Edjinge waakɔpa djiina djɛko wangoyalaka l’osasa lewɛ.’​—Yee. 5:11.