1. Kɛkɔnge kɛ Yehova ɛnakande le enkambi wɛnde?

YEHOVA NDJAMBE ‘nkɔpaka anto wande.’ (Yee. 149:4) Nkambo djɛsɔ ntɔpɛyɛka osasa efula! Yehova nyɛnaka wekeka waso wa wɔlɔ, nde nyɛnaka akoka waso, edjinge ntosepaka tende dj’iso ndjala tolongo tɔnde. Ntsha tombotshikala la nkɔmano tende, tongoyalaka entshupa lande lotshinda lotshinda!​—Dj. 6:44.

2. Lamo anto amɔtshi okokawɔ ndjala l’okakasano wɔ ndjawola ambɔ Yehova ndakɔpaka?

² Anto amɔtshi nkoka ntepela ambɔ: ‘Lemi ndjewaka ente Yehova nkɔpaka anto wande etengo oloyi, ko wopɔkɔnge okokami ndashikikɛ ente nde nkɔpaka lemi mɔmɛlɛ?’ Kɛkɔnge ketshindaká anto amɔtshi djɛ ndjopola nghɔsɔ? Oksana, * nkaana kɛso kɛnisa ndjolo efula m’ɔlɛngɛ wɔnde, ntepelaka ante: “Ndjalaka l’osasa efula winá wɔ malongola batisimo edjinge wɔ mawange nkamba etengo y’atekalo. Koko m’ɔkɔngɔ wɔ ɛnɔnyi 15, ntateyɛka mvungɔ akambo wa nyɛtshi wankomelisa winá wɔ mayalaka ilɛngɛ. Ntateyɛka nkanela ente Yehova apakoke ndjawola lemi edjinge apakoke nkɔpa lemi kaanga ndambo daambi.” Yua, nkaana kɛso kɛ yat’etakalo kepomanisa edjinge nde l’ekakasano efula m’ɔlɛngɛ wɔnde, ntepelaka ante: “Ndambolaka lowiko lɔmi te Yehova mande lakɔpaki ndosasangɛ. Koko ndashikikɛki ente, nde apakokaki ndjoka lemi ngandji kaanga ndambo daambi.”

3. Kɛkɔnge kɛnaso lɔ lá djamba djɛnɛ?

³ Ngo ngete nkaana ipe y’Akristo yɛ nkɔmano yɛ sombolumola yɛsɔ, wɛ nkɔpaka Yehova efula, koko okoka ndjala lehamo ente nde nkɔkɔpaka. Lamo oyɛ ladjɛ ndashikikɛ ente nsɔsɔlɔ nde nkilaka yimba? Edjinge kɛkɔnge kekoka nkokotshɛ winá w’okanelɛ ente Yehova apakɔkɔpɛ? Nyontshɔ tokolenda nsakiso lá weepó wɛsɔ.

4. Lamo oyɛwɔ ilonga ndjala l’ehamo tá ngandji kɛ Yehova leso?

⁴ Ngandji alekɔ wolo wototshinda djɛ nangha nkambo mɔtshi. Ntsha tolekɔ l’eshikikelo ente Yehova ntɔkɔpaka edjinge ntosukaka, tongotshindama djɛ ndokambela kaanga opomanaso l’ekakasano wɛkɔnge lá lowiko lɔso. Koko ntsha tomboyala l’ehamo ente Ndjambe apatile yimba, ‘wolo wɔso wongokakita.’ (Woo. 24:10) Edjinge winá w’ɔlɛmbaso, la w’otshutshɛso djawo djɛso tá ngandji kɛ Ndjambe, topangoyala l’akoka wa mpikama l’ehemba wɛ Satana.​—Ɛfɛ. 6:16.

5. Kɛkɔnge kekomelisa wananyɔ l’ankana imɔtshi y’ilaki ehamo lá ngandji kɛ Ndjambe tewɔ?

⁵ Akristo amɔtshi wa l’etsho wɛso, wayɛka ndoyala la lonyuma lɔ wɔdju má ehamo. Ekokolo kɛmɔtshi ketawɔ James, ntepelaka ante: “Kaanga makambaka lá Betɛlɛ edjinge makɔpaka olemo wɔmi w’ipoposanyɛ l’otshumano w’otepela w’angangɛnda, ndawopolaki ntsha nsɔsɔlɔ Yehova awolaki kɛnɛ kɛ mananghaka. Lá winá ɛmɔtshi, ntateyɛka ndawopola ntsha kana Yehova awekameyɛki alɔmbɛlɔ wami.” Eva, nkaana kekamba edjinge nde l’olemo wɔ winá enkfumɔ, ntepelaka ante: “Lambosipisoyɛ ente ndjila ehamo lá ngandji kɛ Yehova otokande alekɔ ilonga, mande nangha nghɔsɔ nkomɛka onto djɛ mpɔla lá nyuma. Nkambo djɛsɔ nkotshutsheyɛka mposɛ k’akambo wa nyuma edjinge osasa wɔko l’olemo wɔ Yehova.” Michael, kanga lolekɔ yat’ekalo y’itenyi edjinge ikokolo, ntepelaka ante: “Ntsha opawola ente Ndjambe nkilaka yimba, mbɔ ongowangɔ otale nyande.”

6. Kɛkɔnge k’oyɛso ladjɛ nangha ntsha tombotateyɛ ndjala l’ehamo ente Ndjambe apatɔkɔpɛ?

⁶ Akambo wapomanisa l’anto wasɔ nyɛnyɛka wopo wɔ, ndjila ehamo la nkanela ente Ndjambe apatɔkɔpɛ okokawɔ ntshita djawo djɛso. Ko kɛkɔnge koyɛso ladjɛ nangha ntsha tombotateyɛ nkanela ente Ndjambe apatɔkɔpɛ? Iso ladjɛ ntshika nkanela ikanyi yɛsɔ mbala kɛkɔ kɛmɔ! Lɔmba Yehova djɛ nde nkokotshɛ djɛ wɛ nyimɛ ‘tokanyi tokotshimbɛ wɔɔngɔ’ tɔsɔ edjinge mpɛnyɛ la vu djɛ Ndjambe djeleka tokanyi tonkfumɔ djengolama oloko wɔko edjinge yimba yɛko. (Yee. 139:23; nɔtɛ; Flp. 4:6, 7) Edjinge vungɔ ente, apalekɔ nghɔmɛlɛ toko ndeke lokanelaka nghɔsɔ. Wananyɔ l’ankaana inkina yɛ nkɔmano, wanana la tokanyi tɔnyɛtshi tɔ nghɔsɔ. Kaanga enkambi wɛ Yehova wel’etsho wɛ ntondo wananaki la tokanyi tɔ  nghɔsɔ. Tokolenda olakanyelo w’okokaso mba ma ndjɔmbɔmba kɛ ɔpɔstɔlɔ Poolo.

7. Ekakasano wɛkɔnge wepomanisa la Poolo?

⁷ Ongoyawokake winá ɛmɔtshi ente olekɔ l’edjito efula, edjinge olekɔ l’okakasano wɔ nangha akambo ankfumɔ w’oyɛ la djonyi djɛ nangha? Ntsha nghɔsɔ, ongosipisoyɛ wopo woyawokisa Poolo. Nde ayakiyanyɛki ape ngo nkambo djɛ otshumano ɔmɔ, koko djɛ ‘ntshumano nkfumɔ.’ (2 Kɔ. 11:23-28) Olekɔ l’olando ɔmɔtshi wopakɔnɔka lá demba wokotshutsheyɛka osasa wɔko? Poolo ɛnaki ndjolo ‘l’ɔnsɛsɛ lá demba,’ nkoka ndjala olando ɔmɔtshi welá demba, edjinge nde akombolaki djɛ olando wɔsɔ nshila. (2 Kɔ. 12:7-10) Ɔngɔlɛmbake winá ɛmɔtshi m’ɔtɛ wɔ wɛdju wɛko? Nkambo djɛsɔ djakomelaki Poolo lá winá ɛmɔtshi. Nde ayawetaka nyɔmɛlɛ ante ‘onto wɔ ndjolo’ m’ɔtɛ wɔ mbandji k’indananaka la wɛdju wɛnde nyɔmɛlɛ.​—Ɔrɔ. 7:21-24.

8. Kɛkɔnge kekotshisa Poolo djɛ ndongela ekakasano wɛnde?

⁸ Kaanga ndapomanaka l’ehemba w’etshikitanyi edjinge l’akambo wɔlɛmbɛki, Poolo akindjɛka nkambela ngo Yehova. Kɛkɔnge k’ɔpɛyisa wolo wɔ nangha nghɔsɔ? Kaanga ndananaka winá enkfumɔ la wɛdju wɛnde, nde ayalaki la djawo djɛ wolo t’oshinga wɔ mbendo. Nde ewaki daka djɛ Yeso dj’inda tepela ante ‘onto onkfumɔ woyala la djawo te [Yeso] . . . nkoka mba lowiko l’etshinda.’ (Dj. 3:16; Ɔrɔ. 6:23) Poolo ayalaki nsɔsɔlɔ l’anteyi kɛ wanɛ wayalaki la djawo t’oshinga wɔ mbendo. Nde ayashikikɛki ante Yehova alekɔ entshupa djɛ nyimeyɛ kaanga wanɛ wananghisa evunga wɛ nkekete ntsha wamboyapɛla.​—Yee. 86:5.

9. Olakanyelo wɔkɔnge w’owaso má etepela wɛ Poolo welekɔ lá Ngalatiya 2:20?

⁹ Poolo ayalaki lonkina la djawo tá ngandji kɛ Ndjambe, k’indɛnyɛ má lotshimbo lɔ Kristo. (Wala Ngalatiya 2:20.) Kolenda etepela w’ekomo wekembɛ welekɔ l’ekomo kɛ vɛrse djɛsɔ. Poolo atepelaka ante: ‘Wɔna Ndjambe . . . andjokaka ngandji edjinge ayalambolaka lá nkambo djɛmi.’ Poolo atayawoka djɛ nde alekɔ onto wɔ nyɛtshi efula wɔ Ndjambe ndopakoke nyimeyɛ. Nde atakanela ante: ‘Lemi nyɛnaka ente Yehova nkɔpaka wananyɔ wami, koko nde apakoke nkɔpa lemi.’ Poolo avungolaka ase Ɔrɔma ante: ‘Kaanga isayalaka ase evunga, Kristo avɔka nkambo Djɛso.’ (Ɔrɔ. 5:8) Ngandji kɛ Ndjambe kepalekɔ l’elelo!

10. Olakanyelo wɔkɔnge w’owaso má Ɔrɔma 8:38, 39?

¹⁰ Wala Ɔrɔma 8:38, 39. Nsɔsɔlɔ, Poolo  ewaki nkfulu kelekɔ la ngandji kɛ Ndjambe. Nde afunaka ante: ‘Lako ekete kekoka ntokapola má ngandji kɛ Ndjambe.’ Poolo ewaki wopo wɔ Yehova ndananghelaka owila w’Isariyɛlɛ akambo la balentshitshi nkfumɔ. Nde ewaki lonkina wopo wɔ Yehova ndowoke djandji. Iso nkoka ntepela lá yopasɛ ekanedji kɛ Poolo lá yopo yɛnɛ: ‘Ntsha Yehova atomaka Wɔnande djɛ ndovɔ lá nkambo djɛmi, ndekɔ l’elonga kenkina k’okokami ndjala l’ehamo tá ngandji kɛnde?’​—Ɔrɔ. 8:32.

11. Kaanga Poolo ndananghe evunga w’etengo w’owalawɔ lá 1 Timɔte 1:12-15, lamo ndoyashikikɛ ante Ndjambe ndɔkɔpaka?

¹¹ Wala 1 Timɔte 1:12-15. Winá ɛmɔtshi, Poolo akokaki ndakiyanyɛ l’ɔtɛ w’akambo w’indananghe lá ntondo kɛnde nkoma Okristo. Djɛkondeke topakamɔ djɛ nyɛna nde nyɔmɛlɛ atepela lá nkambo ndjɛnde ante, l’ɔnɔnghɔ w’ananghi w’evunga nde ndeke loyalisa ‘pili!’ Lá ntondo kɛ nde ndjewa akambo wa nsɔsɔlɔ, Poolo ɛnyɛki Akristo wa ngando la ngando ndjolo, ilaki amɔtshi l’ankando edjinge awolaki nyɔyi kɛ ankina. (Ele. 26:10, 11) Okoka nkanela wopo wɔ Poolo ndakokaka ndawoka winá wopomanande l’ilɛngɛ y’Okristo yɛ ndawola nyɔyi k’ambotshi wande? Poolo ayakiyanyɛki nkambo dj’evunga wɛnde, koko nde ewaki ante apakoke ntshikitanyɛ akambo wamboheta. Nde awolaka ante Kristo avɔka nkambo djɛ nde, edjinge nde afunaka la ndashikikɛ kenkfumɔ ante: ‘Má wɔlɔ wopa w’ɔsɔdjɔmba wɔ Ndjambe ndeke oyɛmi wopo woyalami.’ (1 Kɔ. 15:3, 10) Olakanyelo wɔkɔnge w’owaso? Awola ente Kristo avɔka lá nkambo djɛko edjinge akodjipolelaka mboka djɛ wɛ ndjala la djokanelo djɛ wɔlɔ nya Yehova. (Ele. 3:19) Kɛnɛ kelekɔ djonyi le Ndjambe nde, kɛnɛ k’onanghɛ winá wɔsɔ edjinge kɛ nghonghonangha l’etsho weyaye, koko apalekɔ evunga w’ingananghe l’etsho wemboheta,  ayale kaanga ngayalaka nde Owakɛ wɔ Yehova l’etsho wɛsɔ kana lako.​—Iza. 1:18.

12. Wopo wɔkɔnge etepela welekɔ lá 1 Djɔanɛ 3:19, 20 okokawɔ ntokotshɛ ntsha toyawoka etengo topalekɔ la ntshina kana tɔpɛlama djɛ nkɔpama?

¹² Winá w’okanelɛ lá kɛnɛ kelendana la nyɔyi kɛ Yeso djɛ ndjipa evunga wɛko, okoka ntepela ente, ‘mpɛlama mba lomo lɔsɔ.’ Lamo okokɛ ndawoka nghɔsɔ? Oloko wɔso wɔ ntshamba djɛ djɔ, nkoka ntotshinda edjinge ntodjimba djɛ ndawoka etengo topalekɔ la ntshina. (Wala 1 Djɔanɛ 3:19, 20.) Winá w’otateyɛso nkanela nghɔsɔ, iso ladjɛ mvungɔ ente ‘Ndjambe ndeka oloko wɔso ekekete.’ Papa kɛso kel’olongo kɛ ngandji edjinge kelekɔ entshupa djɛ nyimeyɛ, ndeka tokanyi tonkfumɔ tɔ nyɛtshi t’okoka ndjisama l’oloko wɔso wolo. Iso ladjɛ ndjeka djɛ ndjawola ente, Yehova ntɔkɔpaka. Djɛ nangha nkambo djɛsɔ, iso ladjɛ ndjekaka Otepela wɔnde mbala la mbala, ndɔmbaka winá la winá edjinge ndjalaka esanga mbala la mbala l’anto wande wa nkɔmano. Lamo nangha akambo wasɔ oyɛwɔ djonyi?

13. Wopo wɔkɔnge ndjekaka Otepela wɔ Ndjambe otokotshɛwɔ? (Lenda ipapango “ Wopo wɔ Otepela wɔ Ndjambe ndaakotshɛ.”)

¹³ Ekaka Otepela wɔ Ndjambe lofu la lofu, ko ongoleka nsipisoyɛ nghɔmɛlɛ wekeka wa wɔlɔ wa Yehova. Ongosipisoyɛ wopo w’ɔkɔkɔpande efula. Ntɔnɔla l’etenyi kɛmɔtshi k’Otepela wɔ Ndjambe lofu la lofu, angokokotshɛ djɛ ndjala l’ekanedji kɛ yimba kɛ wɔlɔ, ‘ndjila akambo l’ɔnɔnghɔ’ lá wɔɔngɔ edjinge l’oloko wɔko. (2 Ti. 3:16) Ikokolo imɔtshi y’etawɔ Kevin, kanga l’onanaki l’ikanyi yɛ nsamba ndawɔsa la ntshina, atepelaka ante: “Mbaláká lá Yeembo 103 edjinge ntɔnɔlaká l’eteyi ankotshɛka djɛ lemi nsembola ekanedji kɛmi kɛ yimba edjinge nsipisoyɛ kɛnɛ kɛ Yehova okanelakande nsɔsɔlɔ lá nkambo djɛmi.” Eva, kanga sotepelaki má djiko, ntepelaka ante: “L’ekomo kɛ lofu, lemi ndɔsaka winá djɛ nkanela akambo walekɔ djonyi walendana la Yehova. Nkambo djɛsɔ mpɛyɛka vu l’oloko edjinge nkembɛka djawo djɛmi.”

14. Wopo wɔkɔnge dɔmbɛlɔ otokotshɛwɔ?

¹⁴ Lɔmbaka winá la winá. (1 Te. 5:17) Winá w’ɔkɔpaso ndjala la djokanelo djɛ wolo l’onto ɔmɔtshi, iso ladjɛ nsawolaka lande mbala la mbala edjinge ndoshimelaka wopo w’oyawokaso. Nkambo djɛsɔ dekɔ nsɔsɔlɔ kaanga lá djokanelo djɛso la Yehova. Winá w’oshimelaso wopo w’oyawokaso, tokanyi tɔso edjinge ekiyano wɛso lá dɔmbɛlɔ, iso nyɛnyɛka ente, iso ndawɛkɛka tende edjinge ndashikikɛka ente nde ntɔkɔpaka. (Yee. 94:17-19; 1 Dj. 5:14, 15) Yua, kanga sotepelaki má djiko, ntepelaka ante: “Winá wɔlɔmbami, mpakome ngo lá ntepela kɛnɛ kenkomelisa lá lofu toko. Koko lemi nshimelaka Yehova nsɔsɔlɔ wopo w’oyawokami edjinge w’okanelami. Ndambo ndambo ndjɛka ndɛna Yehova ape etengo owandji w’olemo, koko  Papa kɛ nsɔsɔlɔ kɛkɔpaka wana wande.”​—Lenda impapango “ Wɛ owalaka?”

15. Wopo wɔkɔnge Yehova ɔtɛnyɛnde djɛ nde ndjilaka ɔmɔmɔ l’anteyi kɛso yimba?

¹⁵ Yalaka esanga la tolongo tɔ nkɔmano, oyɛwɔnde epapɛyɛ w’ime Yehova. (Dja. 1:17) Papa kɛso kel’olongo nyɛnyɛka djɛ nde ntilaka yimba má ntɔpɛyɛ nkfumbo kɛ wananyɔ l’ankaana ‘yetokaka ngandji winá enkfumɔ.’ (Woo. 17:17) L’onkanda wɔnde te ase Kɔlɔsɛ, Poolo awalaka Akristo amɔtshi w’osukaki, edjinge atepelaka lá nkambo djɛwɔ ante ‘ikɔkɔ y’ekembelo k’efula.’ (Kɔl. 4:10, 11) Kaanga Kristo Yeso ayalaki la djonyi dj’okotshɔ, edjinge nde ayalaki la djedjɛ l’okotshɔ w’indawaka me tolongo tɔnde, ayale andjelo kana anto.​—Luka 22:28, 43.

16. Wopo wɔkɔnge tolongo tɔ nkɔmano otokotshɛwɔ dj’iso ndjala entshupa la Yehova?

¹⁶ Ongohonake edjinge ongowake wapɔ me tolongo tɔko te l’otshumano? Nshimela tolongo tombotshunda lá nyuma ekakasano wɛso, apɛnyɛ ente tolekɔ wɔdju lá nyuma koko nkambo djɛsɔ nkoka ntolama. Kolenda kɛnɛ kɛ James kanga sotepelaki má djiko, ndatepela ante: “Ndjala la djokanelo djɛ wɔlɔ l’Okristo w’ombotshunda lá nyuma ankotshɛka lemi efula. Winá w’onanami la tokanyi tɔ nyɛtshi lá wɔɔngɔ, tolongo tɔ ngandji tɔsɔ ndjekameyɛka lemi la balentshitshi nkfumɔ edjinge nshimelaka ambɔ iwɔ nkɔpaka lemi. Winá w’onanghelawɔ nghɔsɔ, lemi nsipisoyɛka ente Yehova nkɔpaka lemi edjinge ndjilaka lemi yimba.” Ɔsɔngo oyɛwɔ djonyi dj’iso ndjala edjinge nama djokanelo djɛ ma ma iso la wananyɔ l’ankaana yɛso yelá nyuma!

17-18. Onto wɔkɔna w’oyɛso la djɛ ndjawola, edjinge lamo?

¹⁷ Satana nkɔpaka dj’iso ndɛmba lá mbandji k’onanaso kɛ nangha kɛnɛ kelekɔ wɔlɔ. Nde nkɔpaka ntawoyɛ ante Yehova apatɔkɔpɛ, edjinge topalekɔ anto wa wɔlɔ w’okokande mbikɛ. Koko etengo isɛnaki ɔsɔ apalekɔ nsɔsɔlɔ.

¹⁸ Yehova nkɔkɔpaka. Wɛ olekɔ lɔwɔkɔ lɔ ntshina lá wiso wande. Ntsha wɛ ɔmbɔlɛmɛyɛ, ‘ongotshikala lá ngandji’ kɛnde lotshinda lotshinda etengo Yeso. (Dj. 15:10) Djɛkondeke, tawolake Satana kana oloko wɔko. Koko awola Yehova kanga lɛnaka wɔlɔ w’olekɔ le ɔmɔmɔ wel’anteyi kɛso. Lokoyashikikɛ ente, ‘nde nkɔpaka anto wande’ ndjila edjinge wɛ!