1. Kɛkɔnge kekoka nkfumbola yopo yɛ mpame onanghelande wadjɛnde la wana wande akambo?

LEWƐ, itepela ‘owandji’ osakisolande nge? Ampame imɔtshi nanghelaka wadji la wana wawɔ akambo lá nkilika nkfumbo kana nanghedji dj’imá ankfumbo yɛwɔ. Kolenda kɛnɛ kɛ Yanita, nkaana kɛmɔtshi k’intansɛ l’Europe otepelande: “L’edjena k’oyalami, walekɔ l’ekfumbo kɛ ndɔsa omoto etengo onto wolekɔ l’anse kɛ mpame kana etengo ose olemo.” Edjinge Luke, wɔnanyɔ l’intansɛ l’États-Unis, ntepelaka ante: “Wa papa imɔtshi ndakanyɛka wana wawɔ w’Ampame ambɔ omoto apewaka djoyi, lasɔ mpame apakoke ndɔsa ikanyi yɛpɛyɛ omoto la ntshina.” Koko, ɔsɔ apalekɔ yopo yɛ Yehova ɔkɔpande djɛ Ampame nanghela amato akambo. (Ɛdjɛ la Marko 7:13.) Iya ko, wopo wɔkɔnge mpame okokande ndjeka djɛ ndjala owandji wɔ nkfumbo wɔ wɔlɔ?

2. Kɛkɔnge kɛ owandji wɔ nkfumbo oyɛnde ladjɛ ndjewa, ko lamo?

² Djɛ ndjala owandji wɔ nkfumbo wɔ wɔlɔ, mpame ladjɛ ntondo ntondo ndjewa kɛnɛ kɛ Yehova ɔlɔmbande. Nde ladjɛ ndjewa lonkina lamo Yehowa ndile nonghanyi kɛ lowandji, pekapeka wopo wokokande ndjokola ndjɔmbɔmba kɛ Yehova nya Yeso. Lamo oyewɔ djonyi mpame ndjewa akambo wasɔ? Mande Yehova apɛyɛka ewandji wɛ nkfumbo ndambo kɛ lowandji edjinge nde ndalɔmbaka dj’iwɔ nkamba la lowandji lɔkɔ lá yopo yɛ wɔlɔ.​—Luka 12:48b.

3. Okanda wɔ 1 Kɔrɛntɔ 11:3 otolakanyɛnde nge lá kɛnɛ kelendana la lowandji?

³ Wala 1 Kɔrɛntɔ 11:3. Vɛrse djɛnɛ nyɛnyɛka wopo wɔ Yehova ndalonghanyɛ nkfumbo kɛnde kel’olongo la kelá looko. Ladjikɛnde Yehova ndeke ‘owandji,’ nde alekɔ la lowandji lapemela lá djiko djɛ nkete nkfumɔ. Lá nkilika wopo wɔ ndalɔngɔsɔla akambo, nde apɛyɛka anto amɔtshi ndambo kɛ lowandji koko, anto wasɔ wangooshiyɛ lande lá nkilika wopo w’okambawɔ la lowandji lɔ ndapɛyɛ.  (Ɔrɔ. 14:10; Ɛfɛ. 3:14, 15) Yehova apɛyɛka Yeso lowandji l’adjiko djɛ otshumano, koko Yehova angooshiyɛ la Yeso lá nkilika wopo w’otonanghelande akambo. (1 Kɔ. 15:27) Yehova apɛyɛka lonkina womi lowandji l’adjiko djɛ wadjɛnde la wana wande, koko Yehova nya Yeso wangooshiyɛ lande lá nkilika wopo wonanghelande nkfumbo kɛnde akambo.​—1 Pɛ. 3:7.

4. Lowandji lɔkɔnge lolekɔ la Yehova nya Yeso?

⁴ Etengo Yehova oyɛnde Owandji wɔ nkfumbo kɛnde kel’olongo edjinge kelá looko, nde alekɔ la lotshungɔ lɔ ndjila ɛlɛmbɛ welendana la wopo wokoka wana wande ndalɔndjɛ edjinge ndenda kana walekɔ la ntshunamo l’ɛlɛmbɛ wɛkɔ. (Iza. 33:22) Etengo oyɛnde owandji w’otshumano w’Akristo, Yeso alekɔ la lotshungɔ lɔ ndjila ɛlɛmbɛ edjinge ndenda kana walɛmɛyɛ ɛlɛmbɛ wɛkɔ.​—Nga. 6:2; Kɔl. 1:18-20.

5. Lowandji lɔkɔnge lolekɔ la owandji wɔ nkfumbo k’Akristo, edjinge elelo wɛkɔnge welekɔ lande?

⁵ Etengo Yehova nya Yeso, owandji wɔ nkfumbo k’Akristo alekɔ la lotshungɔ lɔ ndjila ɛlɛmbɛ lá nkfumbo kɛnde. (Ɔrɔ. 7:2; Ɛfɛ. 6:4) Koko, lowandji lɔnde lolekɔ l’elelo. Ndjɔmbɔmba, ɛlɛmbɛ wɛnde ladjɛ mpikama lá tɔkfɔ t’Otepela wɔ Ndjambe. (Woo. 3:5, 6) Edjinge nde apalekɔ la lotshungo lɔ ndjila ɛlɛmbɛ le anto wapalekɔ ase nkfumbo kɛnde. (Ɔrɔ. 14:4) Lonkina, ntsha wana wande wambofula edjinge wambima má lopango, iwɔ wangokindjɛ ndɔlɛmɛyɛ, koko wapangoyala lonkina l’anse kɛ lowandji lɔnde.​—Mat. 19:5.

6. Lamo Yehova ndile nonghanyi kɛ lowandji?

⁶ Yehova ilaka nonghanyi kɛ lowandji ladjikɛnde nde nkɔpaka nkfumbo kɛnde. Nonghanyi kɛsɔ kelekɔ opapɛyɛ wɔ me nde. Lowandji nkotshɛka djɛ akambo mpeta lá vu, ipa l’ofutano l’anteyi kɛ nkfumbo kɛ Yehova. (1 Kɔ. 14:33, 40) Otasambande nyɛnyɛ papoo onto wolekɔ owandji lá nkfumbo kɛnde, ntshimi nkfumbo ketayala l’ofutano edjinge ketasamba ndjala l’osasa. Ndjɔmbɔmba, lako onto wotewá ante ɔnɛ kana onyi ndeke lokoka ndɔsa nkano dj’ekomo, kana onto wokoka ndenda djɛ ndjewa ntsha akano wakɔ walɛmɛyama.

7. Lá nkilika Ɛfɛsɛ 5:25, 28, Yehova nkɔpaka djɛ Ampame nyɛnyɛ wadji wawɔ ndjolo?

⁷ Ntsha nonghanyi kɛ Ndjambe kelendana la lowandji kelekɔ wɔlɔ nghɔsɔ, lamo amato efula oyawokakawɔ etengo wame wawɔ wawɛnyɛ ndjolo edjinge wawapemela? Mande Ampame efula wapalɛmɛyɛ ɛlɛmbɛ wɛ Ndjambe lá kɛnɛ kelendana la nkfumbo, koko nkilikaka nkfumbo djɛ mbandja la djɛ andoyi yɛwɔ. Lonkina iwɔ nkoka nanghela wadji wawɔ wayi wa nyɛtshi djɛ nkotshɛ mposɛ yɛwɔ. Ndjɔmbɔmba nde nkoka ndjapemela wadjɛnde l’ikanyi yɛ mba lomu kana djɛ nyɛnyɛ anto ankina ante nde ndeke “mpame ise djema.” Nde apakoke ntshinda wadjɛnde la wolo djɛ nde ndɔkɔpa, koko nde nkoka nangha k’enkfumɔ kokokande nangha djɛ nde ndowoka wɔma. Edjinge nde nkoka nkamba la wɔma wɔsɔ djɛ ndjapemela wadjɛnde. * Wame wakanelaka la wanaghaka nghɔsɔ, walekɔ nsɔsɔlɔ l’ovunga. Iwɔ wapalɛmɛyɛ wadji wawɔ etengo ɔlɔmbamawɔ, koko wina wonanghawɔ nghɔsɔ iwɔ nanyɛka ikanyi yɛ Yehova.​—Wala Ɛfɛsɛ 5:25, 28.

8. Wopo wɔkɔnge mpame okokande ndjeka djɛ ndjala owandji wɔ nkfumbo wɔ wɔlɔ?

⁸ Mpame nkoka ndjeka djɛ ndjala owandji wɔ nkfumbo wɔ wɔlɔ má ndjokola yopo yɛ Yehova nya Yeso okambawɔ la lowandji lɔwɔ. Tokolenda  wekeka ape wakamba la Yehova nya Yeso edjinge tokote wopo wɔ owandji wɔ nkfumbo okokande nkamba la wekeka wakɔ wina wonanghelande wadjɛnde la wana wande akambo.

9. Wopo wɔkɔnge Yehova ɛnyɛnde djɛ nde alekɔ l’okitshakitshɛ?

⁹ Okitshakitshɛ. Yehova ndeke Onto woleka balo, koko nde ndjekameyɛka tokanyi t’enkambi wɛnde. (Ewa. 18:23, 24, 32) Nde apɛyɛka anto walekɔ l’anse kɛ lowandji lɔnde mbamba k’iwɔ mpɛyɛ tokanyi tɔwɔ. (1 Nk. 22:19-22) Yehova alekɔ djɔ, koko nde apahone dj’iso ndjala djɔ wina wɔnɛ. Koko nde nkotshɛka anto wa ntshamba djɛ djɔ wokambela dj’iwɔ ndonga. (Yee. 113:6, 7) Lá nsɔsɔlɔ, Bible ntepelaka ante Yehova alekɔ ‘okotshɔ.’ (Yee. 27:9; Heb. 13:6) Nkfumi Davidɛ awolaka ante nde ayalaka l’akoka wa nangha olemo w’ekekete w’iyɔpɛyɛ, mande Yehova alekɔ l’okitshakitshɛ edjinge okotshɛki.​—2 Sa. 22:36.

10. Wopo wɔkɔnge Yeso ndɛnyɛ okitshakitshɛ?

¹⁰ Tokoshishima ndjɔmbɔmba kɛ Yeso. Kaanga ndayalaka Owandji edjinge Nkfumi k’ambeki wande, nde asolaka ekolo. L’ɔtɛ wɔ elonga kɛkɔnge kɛ Yehova ndananghe djɛ ɔkɔndɔ wɔsɔ nfunama lá Bible? Ape l’ehamo iyayale nde djɛ mpɛyɛ ewandji wɛ nkfumbo edjinge anto ankina ndjɔmbɔmba k’iwɔ nkilika. Yeso nyɔmɛlɛ atepelaka ante: ‘Lemi lambonyɔpɛyɛ ndjɔmbɔmba kɛ etengo momonyonanghela, edjinge nyo nyonanghele anto ankina.’ (Dj. 13:12-17) Kaanga ndayalaka la lowandji l’ekekete, Yeso atakongela djɛ anto ndokambela koko nde akambelaka anto ankina.​—Mat. 20:28.

11. Olakanyelo wɔkɔnge w’okoka mba owandji wɔ nkfumbo má ndjɔmbɔmba k’okitshakitshɛ k’ɛnyisa Yehova nya Yeso?

¹¹ Olakanyelo w’owaso. Owandji wɔ nkfumbo nkoka nyɛnyɛ okitshakitshɛ lá topo efula. Ndjɔmbɔmba, nde apakoke nkongela djɛ wandjɛnde la wana wande ndjala djɔ. Nde ndjekameyɛka tokanyi tɔ ase nkfumbo kɛnde kaanga lá wina wɔ tokanyi tɔwɔ topafɛnɛ la tɔnde. Marley, nkaana k’intansɛ l’États-Unis, ntepelaka ante: “Lá mbamba imɔtshi, lemi la womɛmi ndjalaka la tokanyi totshikitanyi. Koko lemi ndjewaka ente ndekɔ la ntshina lá wiso wande edjinge nde nɛmɛyɛka lemi, mande nde ndjopolaka lemi ikanyi edjinge nde ntɔnɔlaka efula la ikanyi yɛkɔ lá ntondo kɛ nde ndɔsa nkano.” Lonkina, wome wolekɔ l’okitshakitshɛ ndjawolaka nangha tolelemo telá mbandja, ayale kaanga anto walekɔ l’edjena k’intansɛwɔ ndɔsaka  elemo wɛsɔ etengo elemo wɛ amato. Nkambo djɛsɔ nkoka ndjala itondo y’okakasano. Lamo? Nkaana kɛmɔtshi ketawɔ Rachel ntepelaka ante: “Lá mbandja kɛso, ntsha wome nkotshɛ wadjɛnde la nsola alɔnga kana ndjɔmba mvulu, ansukanyi edjinge ase nkfumbo kɛnde ndawopolaka ambɔ ‘ɔnɛ nsɔsɔlɔ alekɔ mpame?’ Iwɔ ntepelaka ambɔ omoto ambotshuka.” Ntsha ikanyi yɛsɔ ndeke lolekɔ lá mbandja koyalɛ, vungɔ ente Yeso asolaka ambeki wande ekolo, kaanga olemo wɔsɔ iyɔsamaka etengo w’afumbe. Owandji wɔ nkfumbo wɔ wɔlɔ apahone djɛ anto ndowedjɛ ambɔ ɔmbɛna mpame, koko nde nanghaka k’enkfumɔ k’okokande nangha djɛ wadjɛnde ndjala l’osasa. M’adjiko djɛ okitshakitshɛ, djekeka nkina djɛkɔnge djelekɔ djonyi te owandji wɔ nkfumbo wɔ wɔlɔ?

12. Kɛkɔnge kɛ ngandji otshindande Yehova nya Yeso djɛ nangha?

¹² Ngandji. K’enkfumɔ kɛ Yehova onanghakande, nde nanghaka má ngandji. (1 Dj. 4:7, 8) La ngandji k’enkfumɔ, nde ntokotsheyɛka ehomba wɛso má lotshimbo lɔ Otepela wɔnde Bible, edjinge lɔ olonghanyelo wɔnde. Nde ntokotsheyɛka ehomba wɛso wɛ ngandji má wopo wotoshikikɛnde djɛ nde ntɔkɔpaka. Iya ko ehomba wɛso welá demba? Yehova ‘ntɔpɛyɛka la lokapo l’onkfumɔ nkete nkfumɔ dj’osasangaso la djɛkɔ.’ (1 Ti. 6:17) Wina wonanghaso evunga nde ntosembolaka, koko apatshike ntɔkɔpa. Má ngandji kɛnde, Yehova afutaka oshinga wɔ mbendo lá nkambo djɛso. Edjinge Yeso ntɔkɔpaka efula, djɛkondeke ndapɛyɛ lowiko lɔnde lá nkambo djɛso. (Dj. 3:16; 15:13) Lako ekete k’ekoka nshimba Yehova nya Yeso djɛ nkindjɛ nkɔpa wanɛ walekɔ la nkɔmano te nde.​—Dj. 13:1; Ɔrɔ. 8:35, 38, 39.

13. Lamo oyɛwɔ djonyi djɛ owandji wɔ nkfumbo nyɛnyɛ nkfumbo kɛnde ngandji? (Lenda impapango “ Wopo wɔkɔnge mpame kembotshuka bango okokande nangha djɛ wadjɛnde ndɔlɛmɛyɛ?”)

¹³ Olakanyelo w’owaso. K’enkfumɔ kɛ owandji wɔ nkfumbo onanghande, nde ladjɛ nangha má ngandji. Lamo nkambo djɛsɔ oyɛwɔ djonyi efula? Ɔpɔstɔlɔ Djɔanɛ akadjimolaka ante: ‘Onto wopakɔpɛ wɔnanyɔ wɛnande [kana nkfumbo] kɛnde, apakoke nkɔpa Ndjambe kanga ndɔpɛnyi.’ (1 Dj. 4:11, 20) Djɛkondeke,  mpame kɛkɔpa nkfumbo kɛnde la kɛkɔpa ndjokola Yehova nya Yeso, angokotsheyɛ nkfumbo kɛnde ehomba wɛwɔ wɛ nyuma, wɛ ngandji edjinge wɛ demba. (1 Ti. 5:8) Nde nkfumbaka edjinge ndakaka wana wande. Nde nkindjɛka lonkina ndjeka djɛ ndɔsa akano wa lumɛ Yehova edjinge wayakala ɛtshɔkɔ lá nkfumbo kɛnde. Nyontshɔ tokoshishima nkambo la nkambo edjinge tolende wopo wɔ owandji wɔ nkfumbo okokande ndjokola Yehova nya Yeso.

14. Wopo wɔkɔnge owandji wɔ nkfumbo okokande nkotshɛ nkfumbo kɛnde djɛ ndjala entshupa la Yehova?

¹⁴ Nkotshɛka ehomba wɛ nyuma wɛ nkfumbo kɛnde. Djɛ ndjokola Papa kɛnde, Yeso ananghaki djɛ ambeki wande ndesɛma wɔlɔ lá nyuma. (Mat. 5:3, 6; Mar. 6:34) Wopo wɔk’ɔmɔ ndeke, owandji wɔ nkfumbo ladjɛ ntondo ntondo nkotshɛ ehomba wɛ nkfumbo kɛnde wɛ nyuma. (Mvu. 6:6-9) Nde ladjɛ nangha nkambo djɛsɔ má ndashikikɛ ante, nde la nkfumbo kɛnde mbalaka la ndjekaka Otepela wɔ Ndjambe, ndjingelaka nsanghanyɛ, mpoposanyɛka losango lɔ wɔlɔ edjinge nkembɛka la namaka djokanelo djɛ wɔlɔ iwɔ la Yehova.

15. Yopo imɔtshi yɛkɔnge owandji wɔ nkfumbo okokande nkotshɛ ehomba wɛ ngandji wɛ nkfumbo kɛnde?

¹⁵ Nkotshɛka ehomba wɛ nkfumbo kɛnde wɛ ngandji. Yehova ɛnyɛka papoo lá wiso w’anto ankfumɔ ante nde nkɔpaka Yeso. (Mat. 3:17) Ole Yeso koko ɛnyɛka papoo ante nde nkɔpaka ambeki wande má kɛnɛ k’indananghaka la k’indatepelaka. Ambeki wande lá wedji wɔwɔ, wɔwɛnyɛki ngandji kɛwɔ. (Dj. 15:9, 12, 13; 21:16) Owandji wɔ nkfumbo nyɛnyɛka ante nde nkɔpaka wadjɛnde la wana wande má kɛnɛ k’onanghande, ndjɔmbɔmba ndjekaka lawɔ Bible. Lonkina nde ladjɛ ndashimelaka ante nde ndakɔpaka la ndawɔsaka l’odjito edjinge, lá mbamba imɔtshi ndawandolaka lá wiso w’anto ankina.​—Woo. 31:28, 29.

16. Kɛkɔnge kɛ owandji wɔ nkfumbo oyɛnde ladjɛ nangha lonkina, ko wopo wɔkɔnge w’okokande nama ikanyi y’ɛdje?

¹⁶ Nkotshɛka ehomba wɛ demba wɛ nkfumbo kɛnde. Yehova akotshɛka ehomba wɛ demba w’ase Isariyɛlɛ kaanga lá wina windapɛyɛ iloku l’ɔtɛ wɔ pendo kɛwɔ. (Mvu. 2:7; 29:5) Edjinge lɔɔko kɛnɛ nde atokotsheyɛ ehomba wɛso welá demba. (Mat. 6:31-33; 7:11) Wopo wɔk’ɔmɔ ndeke, Yeso alesɛki wanɛ watokilikaki. (Mat. 14:17-20) Nde akɔnɔlaka edjinge elando wɛwɔ. (Mat. 4:24) Djɛ nsasangɛ Yehova, owandji wɔ nkfumbo ladjɛ nkotshɛ ehomba wɛ demba w’ase nkfumbo kɛnde. Koko, nde ladjɛ ndjala l’ikanyi y’ɛdje lá nkambo djɛsɔ. Nde apakoke ndapɛyɛ amboleka efula l’elemo wɛ demba djɛ nkotshɛ ehomba wɛ demba wɛ nkfumbo kɛnde, ko mvungɛ nkotshɛ wɔlɔ wɔlɔ ehomba wɛ nyuma edjinge wɛ ngandji wɛ nkfumbo kɛnde.

17. Ndjɔmbɔmba kɛkɔnge Yehova nya Yeso iyɛnyɛ lá wopo w’otonkfumbawɔ lá wopo wɔtɔpɛyɛwɔ alanyɛ?

¹⁷ Mpɛyɛka okfumbelo. Yehova ntokfumbaka edjinge ntɔpɛyɛka alanyɛ lá wapɔ wɔso.  (Heb. 12:7-9) Lá nkilika ndjɔmbamba kɛ Papa kɛnde, Yeso nkfumbaka wanɛ walekɔ l’anse kɛ lowandji lɔnde la ngandji k’enkfumɔ. (Dj. 15:14, 15) Nde mpɛyɛka alako wa wolo koko la ngandji. (Mat. 20:24-28) Nde ndjewaka ante tolekɔ anto wa ntshamba djɛ djɔ edjinge mbala efula iso nanghaka evunga.​—Mat. 26:41.

18. Kɛkɔnge kɛ owandji wɔ nkfumbo wɔ wɔlɔ ovungɔkande?

¹⁸ Owandji wɔ nkfumbo wokolaka Yehova nya Yeso mvungɔka ante wadjɛnde la wana wande wapalekɔ djɔ. Nde apomadjɛ wadjɛnde la wana wande ‘nkɛlɛ k’efula.’ (Kɔl. 3:19) Koko, nde nkambaka l’ikfɔ y’otanaso lá Ngalatiya 6:1 edjinge nde mpembaka ndavungola la ‘yimba yɛ ndakota,’ lá mvungɔka ante, edjinge nde apalekɔ djɔ. Etengo Yeso, nde ndjewaka ante yopo yɛ wɔlɔ yɛ ndakanyɛ nde má mpɛyɛ ndjɔmbɔmba.​—1 Pɛ. 2:21.

19-20. Wopo wɔkɔnge owandji wɔ nkfumbo oyɛnde ladjɛ ndjokola Yehova nya Yeso wina w’ɔsande akano?

¹⁹ Ndɔsaka akano w’ipa la lokaki. Yehova ndɔsaka akano walekɔ la wapɔ te anto ankina. Ndjɔmbɔmba, nde ɔsaka nkano djɛ ntonga lowiko, ape lá wapɔ wɔnde nyɔmɛlɛ, koko djɛ nkapana l’anto ankina osasa woyɛ má ndjala la lowiko. Lako onto wotshindisa djɛ nde mpɛyɛ lowiko lɔ Wɔnande nkambo djɛ evunga wɛso. Nde ɔsaka nkano djɛ mpɛyɛ olambo wɔsɔ l’ɛkɔpa lá wapɔ wɔso. Ole Yeso koko ɔsaka akano wayalisa ntondo ntondo la wapɔ te anto ankina. (Ɔrɔ. 15:3) Ndjɔmbɔmba, wina w’indalɛmbɛ l’edjena kɛ nde mpomola, nde alakanyɛka oloyi w’anto.​—Mar. 6:31-34.

²⁰ Owandji wɔ nkfumbo wɔ wɔlɔ ndjewaka ante nkambo mɔtshi djɛ wolo djoyɛnde ladjɛ nangha nde, ndɔsa akano wa balo lá nkambo djɛ nkfumbo kɛnde. Edjinge nde ndɔsaka odjito wɔsɔ la ntshina efula. Nde mbadjɛka dj’ipa ndɔsa akano wa w’ɔsɔsa kana wa lopopa lopopa. Koko, nde ndjawolaka djɛ Yehova ndokfumba. * (Woo. 2:6, 7) Má nangha nghɔsɔ nde nkanelaka wapɔ w’anto ankina, koko ape ngo wɔnde nyɔmɛlɛ.​—Flp. 2:4.

21. Kɛkɔnge k’isɔngɛna lá djamba djeyaye?

²¹ Yehova apɛyɛka ewandji wɛ nkfumbo odjito wɔ wolo efula edjinge nde angooshiyɛ nyawɔ lá nkilika wopo w’okotshɛwɔ odjito wɔkɔ. Koko ntsha wome nangha la wolo djɛ nkilika ndjɔmbɔmba kɛ Yehova nya Yeso, nde angoyala owandji wɔ nkfumbo wɔ wɔlɔ. Edjinge ntsha wadji nkotshɛ edjito wɛnde lá wopo wɔ wɔlɔ, bala djɛwɔ djengoyala l’osasa efula. Iya wopo wɔkɔnge wadji oyɛnde la djɛ ndɔsa lowandji, edjinge ekakasano wɛkɔnge wekoka mpomana lande? Djamba djeyaye ngokadjimola lá weepó wɛsɔ.