1. Kɛkɔnge kelekɔ nsɔsɔlɔ lá kɛnɛ kelendana la wananyɔ waso wa dangala?

WANANYƆ wa dangala, nyolekɔ l’akoka wanangha akambo efula l’otshumano. Efula l’anteyi kɛnyo nyolekɔ la wolo edjinge la nkfulu. (Woo. 20:29) Nyolekɔ osukɔ lá ntshumano djɛnyo. Edjinge mbala imɔtshi nyokombola ndjala enkambi wekotshɛ. Koko, nyoyawoka etengo anto wanyɔsa etengo dɛngɛ, kana nyopalekɔ l’akoka wa mbɛmba edjito wɛ djonyi. Kaanga oyɛnyo dɛngɛ, akambo amɔtshi walekɔ w’okokanyo nangha má winá wɔsɔ djɛ nyo mba lomo lɔ wɔlɔ edjinge ase otshumano wɔnyo ndawɛkɛ tenyo.

2. Kɛkɔnge k’ɔkɔpaso ndjeka lá djamba djɛnɛ?

² Lá djamba djɛnɛ, teeka lowiko lɔ Nkfumi Davidɛ. Tongeka lonkina lá yopasɛ, akambo amɔtshi wakomelisa nkfumi ipe yɛ ase Juda, Asa nya Yɛhɔshafatɛ. Tongoshishima ekakasano ɛmɔtshi wepomanisa l’ampame yɛsɔ, wopo w’iyelola l’akambo wasɔ, edjinge elakanyelo wekoka wananyɔ wa dangala mba má ndjɔmbɔmba yɛwɔ.

3. Yopo imɔtshi yɛkɔnge dangala okokawɔ nkotshɛ nkokolo djɛ l’otshumano wɔwɔ?

³ Winá wɔ ndayalaka olangala, Davidɛ ayalaka la nanghedji mɔtshi dj’anto iyɔsaka la ntshina. Nyɛnamaka papoo djɛ nde ayalaki la lonyuma lɔ wɔlɔ, akambaka la wolo djɛ nde nkoma ontshumbi teembo wɔ wɔlɔ, edjinge akambaka l’akoka wande wasɔ djɛ nkotshɛ Saolo djɛ djawolama me Ndjambe etengo nkfumi. (1 Sa. 16:16, 23) Nyo dangala, nyolekɔ la balo l’akambo amɔtshi w’ase  otshumano okokawɔ mba wapɔ m’eteyi? Efula l’anteyi kɛnyo walekɔ la balo mɔtshi. Ndjɔmbɔmba, nkokolo efula nkombolaka djɛ ndalakanyɛ dj’iwɔ ndjewa wopo wɔ nkamba la telefɔnɛ, tablɛtɛ edjinge ɔrdinatɛrɛ wɛwɔ djɛ nangha wekelo w’onto nyɔmɛlɛ edjinge nkilika nsanghanyɛ. Wɛ nkoka nkamba l’akoka w’okotshɛ lá wayi wa ntshula ntshula djɛ nkotshɛ nkokolo djɛ l’otshumano wɔnyo.

4. Etengo Davidɛ, wekeka wɛkɔnge dangala oyɛwɔ ladjɛ nyɛnyɛ? (Lenda ntshango dje lá loposo.)

⁴ Lá lowiko lɔnde lɔ lofu la lofu, Davidɛ ɛnyɛka djɛ nde alekɔ onto wokokawɔ ndjɛkɛ oloko. Ndjɔmbɔmba, winá wɔ ndayalaka ilɛngɛ, nde akambaka la wolo djɛ nama ɛnkɔkɔ wɛ papa kɛnde. Olemo wɔsɔ woyalaka olemo wɔ ndjolo efula wokokisa nkomɛ lowiko lɔnde tá nyɔyi. L’ɔkɔngɔ, Davidɛ ayɛka ndoshimela Nkfumi Saolo ante: ‘Onkambi wɔko ayalaka onami w’ɛnkɔkɔ wɛ papa kɛnde, lofu lɔmɔtshi kimbwe avundaka ɔnkɔkɔ edjinge mbala kenkina lɔɔwondo ayɛka koko ndovunda ɔnkɔkɔ. Ko lemi ndakilikaka, ndavutaka edjinge ndapapolaka ɛnkɔkɔ m’ɛlɔmɔ wɛwɔ.’ (1 Sa. 17:34, 35) Davidɛ ayawokaka ante nde ndeke loyalaki l’odjito wɔ nama ɛnkɔkɔ wɛsɔ edjinge l’oloko wolo onkfumɔ, nde ananaka djɛ ndalama. Wananyɔ wa dangala nkokaka ndjokola Davidɛ má nkotshɛka edjito wapɛyɛwɔ l’osasalo.

5. Lá nkilika Yeembo 25:14, nkambo djɛkɔnge djeleka djonyi djɛ wananyɔ wa dangala okokawɔ nangha?

⁵ Olangala Davidɛ ayalaki la djokanelo djɛ ma ma nya Yehova. Djokanelo djɛsɔ djeyalaka djonyi efula le Davidɛ ndeka oloko wolo wɔnde kana akoka wande wa mpoma lɔngɔmbi. Yehova atayala ngo Ndjambe kɛ Davidɛ toko, koko ayalaka edjinge Ilongo yɛndɛ, Ilongo yɛnde yɛ ma ma. (Wala Yeembo 25:14.) Wananyɔ wa dangala, nkambo deka djonyi dj’okokanyo nangha nde, nkembɛ djokanelo djɛnyo la Papa kɛnyo kel’olongo edjinge kɛsɔ kengonyokotshɛ djɛ mba edjito enkina l’otshumano.

6. Tokanyi tɔkɔnge tɔ nyɛtshi toyalisa l’anto amɔtshi te Davidɛ?

⁶ Okakasano ɔmɔtshi woyalisa la Davidɛ nde, anto wɔwɔsaki ambɔ alekɔ ngo ilɛngɛ kana apalekɔ l’akoka wa nangha akambo. Ndjɔmbɔmba, winá wɔ Davidɛ ndoyapɛyɛ l’ɛkɔpa djɛ ntonana nya Gɔliatɛ, Nkfumi Saolo ahonaka ndokawoyɛ ɔkɔngɔ laandoshimela ante: ‘Olekɔ ngo ilɛngɛ.’ (1 Sa. 17:31-33) Ntondo, mama kɛ Davidɛ ofunaka ante, apakotshɛ edjito w’ɔpɛyɛwɔ. (1 Sa. 17:26-30) Koko, Yehova atɔsaki Davidɛ etengo onto wopewe djoyi kana wopalekɔ l’akoka wa nkotshɛ edjito wɛnde. Nde ewaki Davidɛ  wɔlɔ. Edjinge Davidɛ ayalaka l’akoka wa ndjaka Gɔliatɛ mande, nde ayawɛkɛka te Ilongo yɛnde Yehova.​—1 Sa. 17:45, 48-51.

7. Olakanyelo wɔkɔnge w’owɛ má kɛnɛ kekomelisa Davidɛ?

⁷ Olakanyelo wɔkɔnge w’owaso má kɛnɛ kekomelisa Davidɛ? Olakanyelo w’owasa nde, iso ladjɛ ndjala la balentshitshi. Ndɔmbamaka ndambo k’etsho djɛ wanɛ wɛnisa ɔlɛngɛ wɔko ndawola ambɔ ombokoma olangala w’ombotshunda. Koko yashikikɛ ente, Yehova apɛnyi ngo ɛnamelo kɛko kɛ demba toko. Nde ndjewaka wopo w’onto w’oyalɛ, edjinge kɛnɛ k’oyɛ l’akoka wa nangha. (1 Sa. 16:7) Djɛkondeke, kembɛ djokanelo djɛko nya Ndjambe. Davidɛ ananghaka nkambo djɛsɔ má ndjekaka nkete djɛ Yehova ndatonge. Davidɛ atɔnɔlaki djɛ ndjewa kɛnɛ kɛ nkete djɛsɔ olakanyɛwɔ te Ontongi. (Yee. 8:3, 4; 139:14; Ɔrɔ. 1:20) Nkambo nkina dj’okokɛ nangha nde, ndɔmba Yehova wolo w’oyɛ la djonyi. Ndjɔmbɔmba, ntombe yɛko imɔtshi yelá nkalasa wangɔkɔlake ladjikɛnde olekɔ Owakɛ wɔ Yehova? Ntsha nghɔsɔ, lɔmba Yehova djɛ nkokotshɛ djɛ wɛ nkfulumeyɛ okakasano wɔsɔ. Edjinge djɛ wɛ nkamba l’alako wa djonyi w’otanaso m’Otepela wɔ Ndjambe, la m’enkanda wɛso weposa má Bible edjinge má tovideo. Winá enkfumɔ wɛnɛ Yehova akokotshɛ djɛ wɛ mba nkando l’ekakasano wɛko, ndeke djawo djɛko dj’ente nde angokokotshɛ l’ekakasano enkina iyongoleka nfula. Lonkina, winá w’anto ankina ɛnawɔ djɛ wɛ ndawɛkɛka te Yehova, edjinge iwɔ wangoyawɛkɛ tewɛ.

8-9. Kɛkɔnge kekotshisa Davidɛ djɛ nkonga la balentshitshi tii winá wɔ ndaye ndoyala nkfumi, edjinge olakanyelo wɔkɔnge wananyɔ wa dangala okokawɔ mba má ndjɔmbɔmba kɛnde?

⁸ Tolende okakasano onkina wopomanisa la Davidɛ. M’ɔkɔngɔ wɔ nde nkfutama avuta djɛ ndjala nkfumi, Davidɛ akongaka ɛnɔnyi efula lá ntondo kɛnde ndoyala nkfumi lá Juda. (1 Sa. 16:13; 2 Sa. 2:3, 4) Kɛkɔnge k’okotshisa djɛ nde nkonga la balentshitshi l’ila k’ɛnɔnyi efula wɛsɔ? L’edjena kɛ nde ndɛmba, Davidɛ akambaka la winá wɛnde wɛsɔ djɛ nde nangha kɛnɛ k’indayale l’akoka wa nangha. Ndjɔmbɔmba, winá wɔ ndayalaka l’olotshi, lá mbandja k’ase filistiya, Davidɛ akambaka la mbamba kɛsɔ djɛ nde nanyɛ antonyi w’ase Isariyɛlɛ. Má nangha nghɔsɔ, nde alamaka elelo w’etatshi kɛ looko lɔ Juda.​—1 Sa. 27:1-12.

⁹ Olakanyelo wɔkɔnge wananyɔ wa dangala okokawɔ mba má ndjɔmbɔmba kɛ Davidɛ kɛsɔ? Nyonanghe kenkfumɔ k’okokanyo nangha djɛ nkambela wananyɔ wanyo. Kokanela ndambo kɛnɛ kekomelisa wɔnanyɔ Ricardo. * M’ɔlɛngɛ wɔnde, nde akombolaki ndjala yat’ekalo yɛ lotshinda. Koko, tokokolo woshimelaka ambɔ nde atakoke. L’edjena kɛnde ndɛmba kana nyomala, Ricardo ayapɛyɛki efula l’olemo w’ipoposanyɛ. Nde ntepelaka ante: “Winá w’ovungɔmi wayi wamboheta, lemi nkokaka nyɛna ente, nkambo djɛsɔ djalaka wɔlɔ le lemi djɛ lemi nfula lá nyuma. Ndapɛyɛki djɛ mbembola onto onkfumɔ w’ɛnyisa mposɛ k’akambo wa nsɔsɔlɔ edjinge lalɔngɔswamaki lá ntondo kɛ nkalɔ ntawembola. Ndjɛka ndowa edjinge ombeki wɔmi wɔ Bible wɔ ntondo. Winá wɔ malekaka mpoposanyɛ, balo djɛmi djetafulaki edjinge wɔma wɔmi wotashilaki.” Winá wɔsɔ, Ricardo akamba etengo yat’ekalo yɛ lotshinda edjinge onkambi wokotshɛ.

10. Lá mbamba kɛmɔtshi, kɛkɔnge kenanghisa Davidɛ lá ntondo kɛ nde ndɔsa nkano djɛ djonyi?

¹⁰ Kolenda nkambo nkina djekomelisa Davidɛ lá lowiko lɔnde. Winá w’iyayalaka l’olotshi nde ny’ampame yɛnde, watshikaka ankfumbo yɛwɔ lá mbandja ko watshɔka ntonana mbandji kɛmɔtshi. M’ɔkɔngɔ wɔwɔ, antonyi wawɔ wayɛka watshumbaka amvulu yɛwɔ edjinge watɔlaka ankfumbo yɛwɔ tá lonfumbe. Davidɛ akokaka nkanela ante, etengo oyɛnde onanyi wɔ mbandji wɔ nsɔsɔlɔ, nde nkokaka ndɔsa mbala kɛkɔ kɛmɔ  nonghanyi kɛ wɔlɔ djɛ ntotshungola wanɛ w’iyatɔlɛ tá lonfumbe. Koko l’edjena kɛ nangha nghɔsɔ, Davidɛ ahonaka ngo ɛlɔndjɛlɔ kɛ Yehova. Má lotshimbo lɔ nkfundji k’iyetaka ambɔ Abiatana, Davidɛ opolaka Yehova ante: ‘Nkilike oloyi w’abandi wɔnɛ, langotavunda?’ Yehova ashimelaka Davidɛ ante nde nkoka ntshɔ edjinge oshikikɛka ante angotolonga. (1 Sa. 30:7-10) Olakanyelo wɔkɔnge w’owaso m’ɔkɔndɔ wɔsɔ?

11. Kɛkɔnge k’okokanyo nanghaka lá ntondo kɛnyo ndɔsa akano?

¹¹ Honaka alako lá ntondo kɛ ndɔsa akano. Sawola l’ambotshi wako. Wɛ nkoka lonkina mba alako wa wɔlɔ má nsawolaka la tokokolo tolekɔ la balo. Yehova ndaawɛkɛka te ampame y’indasɔnɛ yɛsɔ, edjinge wɛ nkokaka ndawɛkɛ tewɔ. Yehova ndawɔsaka etengo ‘epapɛyɛ’ wɛ l’otshumano. (Ɛfɛ. 4:8) Ɔngɔsaka akano wa wɔlɔ efula, ntsha wɛ nkilikaka djawo djɛwɔ edjinge ndjekameyɛka alako wawɔ wa balo w’ɔkɔpɛyɛwɔ. Nyontshɔ tokolenda olakanyelo w’owaso me Nkfumi Asa.

12. Wekeka wɛkɔnge wayalisa la Nkfumi Asa winá w’indatateyɛ ndɔndjɛ?

¹² Winá w’indayalaka olangala, Nkfumi Asa ayalaki l’okitshakitshɛ edjinge l’oloko wolo. Ndjɔmbɔmba, m’ɔkɔngɔ wɔ nyɔyi kɛ papa kɛnde Abija, Asa akomaka owandji edjinge atateyɛka nyimɛ tosekandole má owila. Lonkina, ‘nde ashimelaka ase Juda djɛ mpona Yehova Ndjambe kɛ andoyi yɛwɔ la nɛmɛyɛ ɔlɛmbɛ edjinge lotomo.’ (2 Ɛk. 14:1-7) Edjinge winá wɔ Zera ose Etiɔpi ndaye ndonanyɛ Juda la oloyi w’angala 1 000 000, Asa ayalaka la balo edjinge alɔmbaka Yehova okotshɔ, nde atepelaka ante: ‘Ee Yehova, apalekɔ djonyi lewɛ djɛ anto wokotshɛ ndjala efula kana ndjala la nkfulu. Yehova Ndjambe kɛso, otokotshɛ mande tomboyawɛkɛ tewɛ.’ Etepela wɛ wɔlɔ wɛsɔ nyɛnyɛka djɛ Asa ayalaki la djawo djɛ wolo, lá akoka walekɔ la Yehova djɛ ndowikɛ nde edjinge enkambi wɛ nde. Asa ayawɛkɛka te Papa kɛnde ke l’olongo, ko ‘Yehova alongelaka ase Etiɔpi.’​—2 Ɛk. 14:8-12.

13. Kɛkɔnge keyisa ndokomela Asa l’ɔkɔngɔ, edjinge lamo?

¹³ Ipa l’ehamo, wɛ ndjawolaka ente, nana l’oloyi w’angala 1 000 000 ayalaka okakasano w’ekekete efula. Koko ladjikɛnde nde ayawɛkɛka te Yehova, Asa alongelaka. Koko yɛnyi nde, winá wɔ Asa ndoopomanaka l’okakasano onkina, nde atayawɛkɛ te Yehova. Winá wɔ Nkfumi Basha, nkfumi kɛ nyɛtshi k’ase Isariyɛlɛ, ndaye ndoonanyɛ, nde ayawɛkɛka te nkfumi k’ase Asuriya  djɛ mpona okotshɔ. Nkano djɛsɔ djeyalaka l’eposelo wɛ nyɛtshi! Má lotshimbo lɔ ɔprɔfɛtɛ Ananiya, Yehova ashimelaka Asa ante: ‘Mande omboyawɛkɛ te nkfumi kɛ Suriya, ko otayawɛkɛ te Yehova Ndjambe kɛko, angala wa nkfumi kɛ Suriya wambima má ɛwɔ wɛko.’ Lá nsɔsɔlɔ, ntateyɛ masɔ, Asa ayalaki ngo l’ambandji. (2 Ɛk. 16:7, 9; 1 Nk. 15:32) Olakanyelo wɔkɔnge?

14. Wopo wɔkɔnge w’okokɛ ndawɛkɛ te Yehova, ko lá nkilika 1 Timɔte 4:12, kɛkɔnge kengokokomela ntsha ombonangha nghɔsɔ?

¹⁴ Kindjɛ ndjala l’okitshakitshɛ edjinge ndawɛkɛ te Yehova. Winá w’ingalongola batisimo, w’ɛnyɛka djawo dj’ekekete edjinge ɛkamelo kɛko te Yehova. Edjinge Yehova ayalaka l’osasa efula wɔ nkolongola lá nkfumbo kɛnde. Kɛnɛ koyɛ ladjɛ nangha win’ɔsɔ nde, nkindjɛ ndawɛkɛ te Yehova. Nkoka ndjala wɔdju ndawɛkɛ te Yehova winá wɔsɛ akano wa djonyi efula lá lowiko lɔko, ko kɛkɔnge kɛ ngongonangha lá winá enkina? Alekɔ djonyi efula wɛ ndawɛkɛ te Yehova winá wɔsɛ akano walendana la etombo, olemo welá demba edjinge ekoma woyawilelɛ lá lowiko lɔko! Toyawɛkɛke lá balo djɛko nghɔmɛlɛ. Koko hona tɔkfɔ tɔ Bible tongokokotshɛ djɛ wɛ ndɔsa akano wa wɔlɔ walenda la kɛnɛ k’ɔkɔpɛ nangha edjinge kamba la tɔkfɔ tɔkɔ. (Woo. 3:5, 6) Ntsha ombonangha nghɔsɔ wɛ ongosasangɛ Yehova edjinge ongɔlɛmɛyama me ase otshumano wɔko.​—Wala 1 Timɔte 4:12.

15. Etengo 2 Ɛkɔndɔ 18:1-3; 19:2 ɛnyɛnde, evunga wɛkɔnge wenanghisa Nkfumi Yɛhɔshafatɛ?

¹⁵ Ipa l’ehamo, etengo isankfumɔ, wɛ olekɔ onto wɔ ntshamba djɛ djɔ edjinge lá winá ɛmɔtshi ongonanghaka evunga. Koko, kɛsɔ kepakoke nkoshimba djɛ wɛ nangha kenkfumɔ koyɛ ladjɛ nangha l’olemo wɔ Yehova. Tokolenda ndjɔmbɔmba kɛ Nkfumi Yɛhɔshafatɛ. Nde ayalaki la wekeka wa wɔlɔ efula. Winá wɔ ndayalaka olangala, ‘nde ahonaka Ndjambe k’isɛkɛnde edjinge akilikaka lotomo lɔnde.’ Lonkina, nde atomaka ewandji wɛnde djɛ mpeeta lá angando inkfumɔ yɛ Juda djɛ ntalakanyɛ anto akambo walendana la Yehova. (2 Ɛk. 17:4, 7) Koko lá winá ɛmɔtshi Yɛhɔshafatɛ ɔsaka akano wa nyɛtshi. Eposelo ɛmɔtshi weyalisa la nkambo djɛsɔ nde, Yɛhɔshafatɛ awaka dako me ontomami ɔmɔtshi wɔ Yehova. (Wala 2 Ɛkɔndɔ 18:1-3; 19:2.) Olakanyelo wɔkɔnge w’okokɛ mba m’ɔkɔndɔ wɔsɔ?

16. Olakanyelo wɔkɔnge w’okokɛ mba má kɛnɛ kekomelisa Rajeev?

¹⁶ Awola edjinge kamba l’alako w’ɔkɔpɛyɛwɔ.  Mbala imɔtshi lá ndjɔmbɔmba kɛ dangala nkina efula, wɛ olekɔ l’okakasano wɔ ntshikikɛ kɛnɛ keleka djonyi lá lowiko lɔko. Koko, tɔlɛmbake. Kokanela ndambo lá kɛnɛ kekomelisa wɔnanyɔ ɔmɔtshi w’olangala w’etawɔ Rajeev. Nde ntepelaka lá nkambo djelendana l’ɛnɔnyi wɛnde w’ɔlɛngɛ ante: “Lá winá ɛmɔtshi ntewaki kɛnɛ k’okokami nangha lá lowiko lɔmi. Etengo elangala enkina efula, ndapɛyɛka lá wayi w’etombo edjinge lá wayi ankina djɛ ndasasangɛ l’edjena kɛ ntshɔ tá nsanghanyɛ la mposa t’olemo w’ipoposanyɛ.” Kɛkɔnge kekotshisa Rajeev? Wɔnanyɔ ɔmɔtshi w’ekokolo w’oloko wɔlɔ ɔpɛyɛka dako. Rajeev akɔndɔla ante: “Nde ankotshɛka djɛ ntɔnɔla lá ikfɔ y’otanaso lá 1 Timɔte 4:8.” Rajeev ayalaka l’okitshakitshɛ, akambaka la dako djɛkɔ, edjinge akanelaka akambo waleka djonyi lá lowiko. Nde ntepelaka ante: “Ndɔsaka nkano djɛ mpetshɛ olemo wɔ Yehova l’etena kɛ ntondo k’akambo wa djonyi we lá lowiko lɔmi.” Eposelo wɛkɔnge weyalisa la nkambo djɛsɔ? “Rajeev apakisola ante: Ɛnɔnyi emangha m’ɔkɔngɔ wɔ ndongola dako djɛsɔ, ntateyɛka nkamba etengo onkambi wokotshɛ.”

17. Nkokolo djɛ l’otshumano oyawokakawɔ ngetenge lá kɛnɛ kelendana l’elangala wekambela Yehova?

¹⁷ Nkokolo waleko la djedjɛ le nyo, nyo elangala wekambela Yehova ‘mpɛka la mpɛka’ esanga lawɔ! (Sef. 3:9) Iwɔ nkɔpaka entete kɛnyo edjinge welo w’ilanyo l’akambo wa nyuma, la wopo w’okotshɛnyo edjito wɔnyɔpɛyɛwɔ l’osasa. Nyolekɔ la ntshina efula lá wiso wawɔ.​—1 Dj. 2:14.

18. Lá nkilika Woongo 27:11, Wopo wɔkɔnge Yehova oyawokakande lá kɛnɛ kelendana l’elangala w’okambela?

¹⁸ Wananyɔ wa dangala nyotavungɛke kaanga ndambo daambi ente, Yehova nyɔkɔpaka edjinge ndaawɛkɛka te nyo. Nde ewoyɛka ntondo ante l’etsho w’ekomo, angoyala l’oloyi w’angala wɔ dangala wangoyapɛyɛ iyɔmɛlɛ l’ɛkɔpa. (Yee. 110:1-3) Nde ndjewaka ante nyo ndɔkɔpaka edjinge nkombolaka nkamba l’akoka wanyo ankfumɔ djɛ ndokambela. Djɛkondeke nyoyale la balentshitshi te anto ankina edjinge te nyo nyɔmɛlɛ. Winá w’onanghanyo ovunga nyawole okfumbelo edjinge lopango lɔnyɔpɛyɛwɔ, nyɔshi etengo oyɛwɔnde me Yehova. (Heb. 12:6) Nyokambe la wolo djɛ nkotshɛ edjito enkfumɔ w’ɔnyɔpɛyɛwɔ. Edjinge nkambo deka djonyi nde, lá kenkfumɔ kɛ nyonghonanghaka, nyonanghe djɛ Papa kɛnyo kɛ l’olongo ndjala l’ofuno lá nkambo djɛnyo.​—Wala Woongo 27:11.