1. Lá nkilika Mateo 24:9, lamo isopakoke nkamɔ ntsha andja wambotona?

YEHOVA atotongaka dj’iso nkɔpana edjinge nkɔpama. Djɛkonde, wina wɔ onto ɔmɔtshi ototonande, iso ndjokaka paa l’oloko edjinge mbala imɔtshi ndjalaka la wɔmɔ. Ndjɔmbɔmba, nkaana kɛso kɛmɔtshi ketawɔ Georgina, kanga l’intansɛ l’Erɔpɛ, ntepelaka ante: “Winá wɔ mayalaka l’ɛnɔnyi 14, nyɔ kɛmi antonaka l’ɔtɛ wɔ mɔshi nkano djɛ nkambela Yehova. Ndjalaka la yɛnyi efula edjinge ntateyɛka ndawoka etengo wɔna etshike edjinge ntateyɛka nkanela ente, mpalekɔ onto wɔ wɔlɔ.” * Wɔnanyɔ w’etawɔ Danylo afunaka ante: “Winá wɔ angala Iya nkfuse, iyantole, edjinge iyanyane ladjikɛnde ndekɔ Owakɛ wɔ Yehova, ndjokaka wɔma edjinge nsɔnyi efula.” Lotono lɔ nghɔsɔ lɔngɔtɔpɛyɛke paa efula l’oloko, koko lopatokamoyɛ. Yeso ewoyɛka ante, wangototona.​—Wala Mateo 24:9.

2-3. Lamo otonawɔ ambeki wa Yeso?

² Andja walekɔ la lotono le ambeki wa Yeso. Lamo? Mande etengo Yeso, iso topalekɔ ‘ase andja wanɛ.’ (Dj. 15:17-19) Djɛkondeke, kaanga ɔlɛmɛyɛso ewandji wel’andja wanɛ, iso ntonaka ndatɛmɔla kana ntɛmɔla adrapo wawɔ. Iso ntɛmɔlaka ngo Yehova. Iso nsukaka lotshungɔ lolekɔ la Ndjambe lɔ ndɔndjɛ, koko Satana nya ‘ikanola’ yɛnde nanyɛka lotshungɔ lɔ Ndjambe lɔsɔ. (Ewa. 3:1-5, 15) Iso mpoposanyɛka ente Onkfumi wɔ Ndjambe ndeke ɛtɔyi kɛ nkongi dj’anto edjinge Onkfumi wɔkɔ wongotshita anto ankfumɔ w’onanyɛ. (Dan. 2:44; Ndj. 19:19-21) Losango lɔsɔ lolekɔ losango lɔ wɔlɔ le ase okitshakitshɛ koko, le anto wa nyɛtshi oyɛwɔ nde losango lɔ nyɛtshi.​—Yee. 37:10, 11.

³ Iso ntonamaka lonkina mande iso mbikaka lá nkilika ɛlɛmbɛ wɛ Ndjambe wɛ djɔ. Ɛlɛmbɛ wɛsɔ wepokana kaanga ndambo la nanghedji  djɛ nyɛshi djelekɔ l’andja wanɛ. Ndjɔmbɔmba, lɔɔko kɛnɛ anto efula wamboyapɛyɛ lá enanghedji kɛ nyɛshi kɛ nsanga mbeto lá yopo y’indeko etengo anto wa Ndjambe ndatshite lá ngando kɛ Sɔdɔmɔ la Gɔmɔrɔ! (Yuda 7) Ladjikɛnde iso nɛmɛyɛka ɛlɛmbɛ wɛ Ndjambe welá Bible lá kɛnɛ kelendana la enanghedji kɛ nghɔsɔ, anto efula ntɔnyɔlaka edjinge ntɔsaka etengo tolekɔ anto wa wayi wolo.​—1 Pɛ. 4:3, 4.

4. Wekeka wɛkɔnge wakoka ntokembɛ winá wɔ anto ototonawɔ?

⁴ Kɛkɔnge kekoka ntokotshɛ djɛ nkfulumeyɛ winá w’anto ototonawɔ edjinge ototolawɔ? Iso ladjɛ ndjala la djawo djɛ wolo ente Yehova angotokotshɛ. Etengo nguwa, djawo djɛso nkoka ‘nyemadjɛ akfula ankfumɔ walangalanga me kanga nyɛtshi.’ (Ɛfɛ. 6:16) Koko topalekɔ ngo la djonyi djɛ djawo toko. Tolekɔ edjinge la djonyi djɛ ngandji. Lamo? Mande ngandji ‘apokaka nkɛlɛ lankeke.’ Nde nkfulumeyɛka edjinge ndjipaka akambo ankfumɔ. (1 Kɔ. 13:4-7, 13) Nyontshɔ tolendake win’ɔsɔ wopo wɔ ngandji k’okaso Yehova, ngandji k’okaso winaso Akristo, edjinge ngandji k’okaso kaanga antonyi waso okokawɔ ntokotshɛ dj’iso nkfulumeyɛ lotono.

5. Ngandji kɛ Yeso te Papa kɛnde iyotshinde djɛ nangha nge?

⁵ L’otsho w’ɔmɔtshi, lá ntondo kɛ antonyi wande ndoyaka, Yeso ashimelaka ambeki wande ante: ‘Lemi nkɔpaka Papa, [djɛkondeke] ngo ngete papa ndandjilela ɔlɛmbɛ djɛ nangha ndeke onanghami.’ (Dj. 14:31) Mande Yeso akɔpaki Yehova nde ayalaka l’akoka wa nkfulumeyɛ ehemba efula. Ngandji kɛso te Yehova nkoka ntokotshɛ dj’iso nangha wopo wɔk’ɔmɔ.

6. Lá nkilika Ɔrɔma 5:3-5, wopo wɔkɔnge enkambi wɛ Yehova oyawokakawɔ lá kɛnɛ kelendana la nkfulumeyɛ lotono l’ase andja wanɛ?

⁶ Ngandji kɛ Ndjambe angokotshɛke enkambi wɛ Yehova winá enkfumɔ djɛ nkfulumeyɛ ndjolo. Ndjɔmbɔmba, winá wɔ tominanyi telá djiko tɔ ase Juda iyashimbe apɔstɔlɔ dj’ipa mpoposanyɛ, ngandji kɛwɔ te Ndjambe atshindaka dj’iwɔ ‘nɛmɛyɛ Ndjambe etengo oyɛnde nkfumi l’edjena kɛ nɛmɛyɛ anto.’ (Ele. 5:29; 1 Dj. 5:3) Ngandji kɛ wolo kɛ nghɔsɔ nkotshɛka wananyɔ waso lɔɔko kɛnɛ, dj’iwɔ ntshikala la nkɔmano winá wɛnawɔ ndjolo me ewandji wɛ lɛɛta wɛ lopango edjinge wɛ nyɛtshi. Winá wɔ andja wanɛ ototonawɔ, l’edjena kɛ ndɛmba, iso ndjalaka l’osasa wɔ nkfulumeyɛ.​—Ele. 5:41; wala Ɔrɔma 5:3-5.

7. Okokaso nangha ngetemo ntsha ase nkfumbo kɛso watɛnyɛ ndjolo?

⁷ Winá wɔ ase nkfumbo kɛso ɔtɛnyɛwɔ ndjolo, nkambo ntshɔ nkoka ndjala okakasano woleka wolo djɛ nkfulumeyɛ. Winá wɛnawɔ ambɔ tombotateyɛ ndapɛyɛ l’akambo wa nsɔsɔlɔ, iwɔ nkoka nkanela ambɔ wambotodjimba. Amɔtshi nkoka nfɛnyɛ ambɔ tomboyala nkesa. (Ɛdjɛ la Marko 3:21.) Iwɔ nkoka ntateyɛ kaanga tɛnyɛ ndjolo. Akambo wa nghɔsɔ wapatokamoyɛ. Yeso atepelaka ante: ‘Anto welá mvulu wangoyala antonyi wɔ kanga mvulu.’ (Mat. 10:36) Lá nsɔsɔlɔ, kaanga wopo wɔkɔnge wɔ boto djɛso otonanghelawɔ akambo, iso ntonaka ndawɔsa etengo antonyi. Koko, winá wɔ ngandji kɛso te Yehova iyotafule, edjinge ngandji kɛso kete anto nfulaka. (Mat. 22:37-39) Koko topangotshika nɛmɛyɛ ɛlɛmbɛ la tɔkfɔ tɔ Bible kaanga ndambo daambi ngo l’ɔtɛ wɔ nsasangɛ onto.

8-9. Kɛkɔnge kekotshisa nkaana kɛmɔtshi djɛ ntshikala ndii l’anteyi k’ekakasano wɛ wolo?

⁸ Georgina, nkaana k’isotepelaki má djiko, ayalaka l’akoka wa ntshikala ndii kaanga lá ntondo k’efula k’ɛhɛnyɔhɛnyɔ wimé nyɔ kɛnde. Georgina mpakisolaka ante: “Lemi la nyɔ kɛmi towangaka ndjeka Bible l’Ewakɛ. Koko m’ɔkɔngɔ wɔ ngɔndɔ isamalo, winá w’imawange ndjingela nsanghanyɛ, eyalelo kɛ nyɔ kɛmi ketshikitanaka ngo mbala kɛkɔ kɛmɔ. Nsipisoyɛka ente nde asawolaka la wa apɔsta edjinge nde akambaka la tokanyi tɔwɔ t’ongolo winá w’isambaka isande. Nde antolaki, ansepaki l’afo, ankfusaki, edjinge ampɔnyɔlaki  enkanda wɛmi. M’ɔkɔngɔ winá wɔ maye ndowa ɛnɔnyi 15, ndongolaka batisimo. Nyɔ kɛmi ahonaka nshimba djɛ ntɛmɔla Yehova, má ntoma lemi tá mvulu kɛmɔtshi djɛ t’intansɛ l’eseka wɛnɔki tokaya edjinge wenanghaki akambo wa nyɛtshi efula. Ndjolo ndjalaka wolo efula nkfulumeyɛ pekapeka winá woyɛwɔ me onto ɔmɔtshi wokoka nkoka ngandji edjinge nkolama.”

⁹ Kɛkɔnge kekotshisa Georgina djɛ nkfulumeyɛ? Nde atepelaka ante: “Lofu lɔ nyɔ kɛmi ndatateyɛ ntona lemi, ndeke mashiyɛ badji djɛmi djɛ Bible k’otondo. Lá winá wɔsɔ, ko lamboshiyɛka ndashikikɛ ente lambisola nsɔsɔlɔ, edjinge ndawokaki djɛ ndekɔ imama la Yehova. Lawɔmbaki mbala la mbala edjinge nde akadjimolaki alɔmbɛlɔ wami. Winá wɔ mintansɛka lá mvulu kɛsɔ, nkaana kɛmɔtshi andjetaka lá mvulu kɛnde, ko totateyɛka ndjeka Bible esanga. Lá winá wɔsɔ, lakeketshamaki efula me wananyɔ l’ankaana lá Mvulu k’Onkfumi. Iwɔ wandɔsaki etengo ose nkfumbo kɛwɔ. Nsipisoyɛka ente, Yehova ndeka antonyi waso wolo, ayale wopo wɔkɔnge woyɛwɔ.”

10. Kɛkɔnge k’okaso ndashikikɛ lá kɛnɛ kelendana la Yehova Ndjambe kɛso?

¹⁰ Ɔpɔstɔlɔ Poolo afunaka ante ‘lako kaanga ekete k’ekoka ntokapola má ngandji kɛ Ndjambe kɛnama má lotshimbo lɔ Kristo Yeso Nkfumi kɛso.’ (Ɔrɔ. 8:38, 39) Kaanga isɔngɛnaka ndjolo lá winá ɛmɔtshi, Yehova angoyalaka winá enkfumɔ l’ompandju wɔsɔ djɛ ntosuka edjinge ntokembɛ. Edjinge etengo ndjɔmbɔmba kɛ Georgina ɔtɛnyɛwɔ, Yehova ntokotshɛka lonkina má lotshimbo lɔ nkfumbo kɛso kɛ wɔlɔ efula kelá nyuma.

11. Wopo wɔkɔnge ngandji kɛ Yeso k’indatepela lá Djɔanɛ 15:12, 13 iyayale ladjɛ nkotshɛ ambeki wande? Pɛyɛ ndjɔmbɔmba.

¹¹ Otsho wɔmɔtshi, lá ntondo kɛ nde mvɔ, Yeso avungolaka ambeki wande dj’iwɔ nkɔpanaka l’anteyi kɛwɔ. (Wala Djɔanɛ 15:12, 13.) Nde ewaki ante ngandji kɛ ndapekala nkoka ndakotshɛ dj’iwɔ ntshikala iwoke imɔ edjinge nkfulumeyɛ lotono l’andja wanɛ. Tokolenda ndjɔmbɔmba k’ase otshumano wɔ Tesalɔnikɛ. Ntateyɛ má lofu l’iyakfumbama, ase otshumano wɔsɔ wɛnaki ndjolo efula me anto. Koko, wananyɔ l’ankaana yeyalaki l’eteyi wayalaka ndjɔmbɔmba yɛ wɔlɔ lá kɛnɛ kelendana l’okfulumeyelo wɔ la nkɔmano edjinge ngandji. (1 Te. 1:3, 6, 7) Poolo akeketshɛka dj’iwɔ nkindjɛ nyɛnyɛna ngandji lá ‘lɛdji l’efula.’ (1 Te. 4:9, 10) Ngandji atshindaki djɛ nsuka wanɛ wambɔlɛmba edjinge nkeketshɛ wanɛ walekɔ wɔdju. (1 Te. 5:14) Iwɔ wakilikaka alako wa Poolo, djɛkondeke, l’onkanda wande w’ape  w’indafune etengo ɔnɔnyi ɔmɔ m’ɔkɔngɔ, Poolo akokaka ndashimela ante: ‘Ngandji kelekɔ la ɔmɔmɔ l’anteyi kɛnyo te winande ketakindjɛ ngo nfula.’ (2 Te. 1:3-5) Ngandji kɛwɔ k’akotshɛka djɛ nkfulumeyɛ lotono edjinge ndjolo yɛ iyawɛnyɛka.

12. Wopo wɔkɔnge wananyɔ l’ankaana yelá owila ɔmɔtshi iyɛnyana ngandji l’anteyi kɛwɔ lá winá wɔ mbandji?

¹² Kolenda kɛnɛ kekomelisa Danylo, wɔnanyɔ w’isotepelaki má djiko, nya wadjɛnde. Winá wɔ ngando kɛwɔ iyɔsama lá mbandji, iwɔ wakindjɛki ndjingela nsanghanyɛ edjinge nangha k’enkfumɔ k’iyakokaka nangha djɛ mpoposanyɛ, edjinge nkapana nkete djɛ ndɛ dj’iyayalaka la djɛkɔ, iwɔ la wananyɔ l’ankaana yɛwɔ. Lofu lɔmɔtshi, angala wayɛka lá mvulu kɛ Danylo, ko wɔlɔmbaka djɛ nde nyima Owakɛ. Danylo ntepelaka ante: “Iwɔ wanshimelaka djɛ lemi nyima Owakɛ, ko lemi ntonaka. Winá wɔ matone, iwɔ wankfusaka edjinge wananghaka etengo anto wakɔpa nkanda lemi má nkanda lá djiko djɛ ɔtɛ wɔmi. Ko lá ntondo k’iwɔ ntshɔ wanyanaka ambɔ wangokesola wadjɛmi la wolo. Koko lankeke lankeke wananyɔ waso watɔsaka watilaka lá trɛ tá ngando k’enkina. Mpavungɛki kaanga ndambo daambi ngandji kɛ wananyɔ waso wasɔ iyatɛnyɛ. Ko winá w’isakome lá ngando kɛ bango, wananyɔ wel’eteyi, watɔpɛyɛka nkete ndjɛ ndɛ edjinge wankotshɛka djɛ mba olemo edjinge mvulu! Djɛkondeke, ndambo m’ɔkɔngɔ, ndongolaka Ewakɛ welotisa olotshi lá kami.” Ndjɔmbɔmba yɛ nghɔsɔ ntɛnyɛka dj’ente ngandji kɛ winaso Akristo nkoka ntokotshɛ djɛ nkfulumeyɛ lotono.

13. Wopo wɔkɔnge nyuma k’ekina otokotshɛwɔ djɛ nkfulumeyɛ l’olemo w’okambelaso Yehova kaanga winá wɔ anto ototonawɔ?

¹³ Yeso ashimelaka ambeki wande dj’iwɔ nkɔpa antonyi wawɔ. (Mat. 5:44, 45) Nkambo djɛsɔ ndekɔ wɔdju? Lako! Koko djekoka nanghema m’okotshɔ wɔ nyuma k’ekina kɛ Ndjambe. L’anteyi kɛ olowa wɔ nyuma kɛ Ndjambe ndeke otanaso ngandji, balentshitshi, wɔlɔ w’oloko, ɔkɔkɛ, edjinge ndakota. (Nga. 5:22, 23) Wekeka wasɔ ntokotshɛka djɛ nkfulumeyɛ lotono. Anto efula watɛnyɛki ndjolo wayɛka ndotshikitana ladjikɛnde wandjɛnde, womɛnde, wɔnande, kana onsukanyi wɔnde wɔwɛnyɛka wekeka wa wɔlɔ. Ngole efula l’anteyi kɛwɔ wayɛka ndokoma wananyɔ l’ankaana yɛso. Djɛkonde, ntsha olekɔ l’okakasano wɔ nkɔpa wanɛ wakɛnyɛ ndjolo m’ɔtɛ wokambelɛ Yehova, lɔmba djɛ mba nyuma k’ekina. (Luka 11:13) Edjinge yala l’eshikekelo ente nɛmɛyɛ Ndjambe angoyalake winá enkfumɔ, nkambo deka wɔlɔ.​—Woo. 3:5-7.

14-15. Wopo wɔkɔnge Ɔrɔma 12:17-21 ndakotshɛ Yasmeen djɛ nyɛnyɛ womɛnde ngandji kaanga ndɔwɛnyɛka ndjolo?

 ¹⁴ Tokolenda ndjɔmbɔmba kɛ Yasmeen, nkaana kɛso k’intansɛ lá Moyen-Orient. Winá wɔ ndakome Owakɛ wɔ Yehova, womɛnde akanelaki ante ambodjimbama edjinge nde ahonaka ndoshimba dj’ipa nde nkambela Ndjambe. Nde otolaki, atshindaki boto djɛnde, owandji ɔmɔtshi wɔ etolo, la wetshi ɔmɔtshi djɛ ndowana, edjinge ofunaki ante ambokapola nkfumbo. Womɛnde atshɔki edjinge ntotola wananyɔ winá wɔ losanghanyɛ l’otshumano! Yasmeen alelaki mbala efula ngo ndela ladjikɛnde womɛnde onanghelaki akambo wa nyɛnyi efula.

¹⁵ Koko nkfumbo kɛ nyuma kɛ Yasmeen wosukaki edjinge w’okembɛki efula winá w’indatshɔka tá Mvulu k’Onkfumi. Tokokolo wokeketshɛka djɛ nde nkamba l’etepela welá Ɔrɔma 12:17-21. (Wala.) Yasmeen ntepelaka ante: “Ayalaka nkambo djɛ wolo efula. Koko, ndɔmbaka Yehova djɛ nkotshɛ lemi, edjinge nanghaka k’enkfumɔ k’imakoke nagha djɛ nkamba la kɛnɛ kɛ Bible otepelande. Djɛkondeke, kaanga winá wɔ womɛmi ndahɔnyɔlaka mbindo tá nkfuko l’okonda, lemi lɔmbaki. Winá wɔ ndantolaka, lemi ndokadjimolaki ngo ɔkɔkɛ. Edjinge winá wɔ ndayalaka l’olando lemi lolamaki.”

16-17. Olakanyelo wɔkɔnge ngombowa má Ndjɔmbɔmba kɛ nkaana Yasmeen?

¹⁶ Yasmeen awaka eposelo wɛ wɔlɔ má nkindjɛ nyɛnyɛ womɛnde ngandji. Nde ntepelaka ante: “Womɛmi awangaka ndawɛkɛ le lemi mande nde ewaki ante lemi ndoshimelaka winá enkfumɔ ngo nsɔsɔlɔ. Nde awangaka ndjekameyɛ lemi la dilɛmɛlɔ nkfumɔ winá w’isatepelaka akambo walendana l’etolo, edjinge atateyɛka ndjala entshupa djɛ ndjila vu lá nkfumbo. Ko atateyɛka nkembɛ lemi djɛ ntshɔka tá nsanghanyɛ inkfumɔ y’otshumano. Winá wɔnɛ, lemi isa womɛmi tomboyala la djokanelo djɛ wɔlɔ efula, edjinge vu djembingela lá nkfumbo kɛso. Ndekɔ la nkongi ente womɛmi angodjipola oloko djɛ ndjawola akambo wa nsɔsɔlɔ edjinge angontana dj’iso ndokambela Yehova esanga.”

¹⁷ Ndjɔmbɔmba kɛ Yasmeen nyɛnyɛka djɛ ngandji ‘ndjipaka akambo ankfumɔ, . . . nkongelaka akambo ankfumɔ, nkfulumeyɛka akambo ankfumɔ.’ (1 Kɔ. 13:4, 7) Lotono nkoka ndjala la nkfulu edjinge mpɛyɛka paa, koko ngandji ndeke loleka nkfulu. Ngandji ntshikitanyɛka eloko w’anto. Edjinge nsasangɛka oloko wɔ Yehova. Koko, ntsha antonyi waso wambokindjɛ ntotona, iso nkoka nkindjɛ ndjala l’osasa. Lá wopo wɔkɔnge?

18. Lamo okokaso ndjala l’osasa winá w’ototonawɔ?

¹⁸ Yeso atepelaka ante: ‘Osasa lenyo winá enkfumɔ wɔ anto iyongonyotonaka.’ (Luka 6:22) Topakombolaka djɛ anto ntotona. Topahonaka iwɔ tɛnyɛ ndjolo m’ɔtɛ wɔ djawo djɛso. Iya ko lamo okokaso ndjala l’osasa winá w’ototonawɔ? Tolende donga ntshato. Kɛ ntondo, winá w’okfulumeyɛso, Ndjambe nsasangaka laso. (1 Pɛ. 4:13, 14) K’epe, djawo djɛso ndjalaka la ntshina edjinge nkomaka wolo. (1 Pɛ. 1:7) Edjinge k’asato, tongolongola lofuto lɔ wɔlɔ efula ntepela ente, lowiko l’etshinda.​—Ɔrɔ. 2:6, 7.

19. Lamo apɔstɔlɔ iyayale l’osasa m’ɔkɔngɔ wɔ iwɔ nkfusama?

¹⁹ Lako ndjala ilá, m’ɔkɔngɔ wɔ ekfundwelo kɛ Yeso, apɔstɔlɔ wapomanaka l’akambo ankfumɔ wa Yeso ndaashimela. M’ɔkɔngɔ wɔ iwɔ nkfusama edjinge nshimbama dj’ipa mpoposanyɛ, iwɔ wasasangaka. Lamo? ‘Mande iwɔ wɔsamaka etengo anto w’okokawɔ mpɛyɛ nsɔnyi m’ɔtɛ wɔ djiina djɛ’ Yeso. (Ele. 5:40-42) Ngandji kɛwɔ te Wetsha wɔwɔ kelekaka wɔma w’iyokaka antonyi wawɔ wolo. Edjinge iwɔ wɛnyɛka ngandji kɛwɔ kɛsɔ má mpoposanyɛ losango lɔ wɔlɔ ‘ipa la mpekɔ.’ Lɔɔko kɛnɛ, wananyɔ waso efula wakindjɛ nkambela Ndjambe la nkɔmano kaanga l’anteyi k’ekakasano. Iwɔ ndjewaka ambɔ Yehova apavungɛ olemo wɔwɔ edjinge ngandji k’iyɛnyɛ lá djiina djɛnde.​—Heb. 6:10.

20. Kɛkɔnge kɛ isɔngɛna lá djamba djeyaye?

²⁰ Ase andja wanɛ wangokindjɛka ntontona l’ilá k’enkfumɔ kengokindjɛka ndjala nkfumbo dj’akambo djɛnɛ. (Dj. 15:19) Koko topakoke ndjoka wɔma. Etengo isɔngɛna lá djamba djeyaye, Yehova ‘angokeketshɛka . . . edjinge angolamaka’ enkambi wɛnde wɛ nkɔmano. (2 Te. 3:3) Djɛkondeke, nyontshɔ tokindjɛ nkɔpa Yehova, nkɔpa wananyɔ l’ankaana yɛso, edjinge nkɔpa kaanga antonyi waso. Winá w’okindjɛso nkilika dako djɛsɔ, tongokindjɛka ndjala l’osanga edjinge ndjala la lonyuma lɔ wɔlɔ, tɔngɔpɛyɛ Yehova lomo, edjinge tɔngɛnyɛ ente ngandji ndeka lotono nkfulu otalee.