1-2. Onto wɔkɔna w’okoka nkotshɛ ombeki wɔ Bible djɛ nde nfula tii tá batisimo?

AMY, nkaana kɛmɔtshi k’intansɛki lá Fiji, atepelaka ante: “Lakɔpaki wekelo wɔmi wɔ Bible. Lewaki ente akambo wekami walekɔ nsɔsɔlɔ. Koko ngo wina wɔ motateyɛka mpetshɛ wina isa wananyɔ l’ankaana, ndeke mɛɛnaka djonyi djɛ nangha etshikitano edjinge mɔɔsaka nkano djɛ ndongola batisimo.” Kɛnɛ kekomelisa Amy kɛsɔ ntolakanyɛka nsɔsɔlɔ kɛ djonyi kɛnɛ: Ombeki wɔ Bible mbaka mpeyi efula kɛ nfula tii tá batisimo wina w’owande okotshɔ w’ime anto ankina walekɔ l’otshumano.

² Nsakodji k’enkfumɔ kel’otshumano nkoka ndjila lɔwɔ lá ofulelo wɔ otshumano. (Ɛfɛ. 4:16) Yat’ekalo imɔtshi yetawɔ Leilani, kanga lintansɛ lá Vanuatu, ntepalaka ante: “Wangotepelake ambɔ, wɔna lá nkfundu ndeke oyɛnde w’onto ɔmɔ koko ntsha amboposa, ambokoma w’anto ankfumɔ. Lemi nkanelaka ente nkambo ntshɔ dekɔ nsɔsɔlɔ lá kɛnɛ kelendana la nkfumba ambeki, mbala efula ndɔmbamaka otshumano w’otondo djɛ ndjakala onto ɔmɔtshi lá nsɔsɔlɔ.” Ase nkfumbo, tolongo tɔ ase nkfumbo, edjinge wetsha welá nkalasa, iyakfumɔ walekɔ l’odjito wɔ nkotshɛ wɔna djɛ nde nkoma ekokolo kembotshunda. Iwɔ nanghaka nkambo ntshɔ má nkeketshɛ wɔna edjinge má ndolakanyɛ elakanyelo wɛ djonyi. Wopo wɔk’ɔmɔ ndeke, ansakodji nkoka ndaka, nkeketshɛ, edjinge nyɛnyɛ ndjɔmbɔmba kɛ wɔlɔ le ambeki wa Bible. Má nangha nghɔsɔ iwɔ nkotshɛka ambeki djɛ nde nfula tii tá batisimo.​—Woo. 15:22.

3. Olakanyelo wɔkɔnge wowɛ má kɔmantɛrɛ kɛpɛyisa Ana, Dorin, edjinge Leilani?

³ Lamo nsakodji keka l’ombeki wɔ Bible oyɛnde ladjɛ ndjala l’osasa winá wɔ nsakodji kenkina okotshɛnde ombeki wɔnde? Kolenda  kɛnɛ kɛ nkaana kɛso Ana, kanga lolekɔ yat’ekalo yetshikitanyi lá Moldova, ndafune ante: “Ombeki wɔ Bible alekɔ la djonyi dj’okotshɔ efula edjinge alekɔ wolo djɛ nsakodji k’eka nyande toko, ndokotsheyɛ ehomba wɛnde enkfumɔ.” Dorin, yat’ekalo yetshikitanyi yekamba l’owila wɔk’ɔmɔ ntepelaka ante: “Mbala efula, ansakodji yeposa la lemi nshimelaka ambeki wami akambo wakota eloko wɛwɔ, akambo wa motakanelaki kaanga ndambo daambi.” Leilani mpɛyɛka elonga kenkina k’oyɛso ladjɛ ndjala l’osasa winá wɔ ansakodji ankina okotshɛwɔ ambeki waso ante: “Winá wɔ ombeki ɛnande ngandji edjinge okotshɔ wɔpɛyɛ ansakodji inkina, nkambo djɛsɔ ndokotshɛka djɛ nde nsipisoyɛ ante tolekɔ enkambi wɛ Yehova wɛ nsɔsɔlɔ.”​—Dj. 13:35.

4. Kɛkɔnge k’ɔkɔpaso nyɛna lá djamba djɛnɛ?

⁴ Koko, okoka ndawopola ente: ‘Ntsha apalekɔ lemi ndeke lɔlɔndjɛ wekelo wɔ Bible, kɛkɔnge k’okokami nangha djɛ nkotshɛ ombeki djɛ nde nfula?’ Nyontshɔ tokolenda kɛnɛ k’okokaso nangha winá w’otshɔso l’onto nteka l’ombeki wɔnde wɔ Bible edjinge kɛnɛ k’okokaso nangha winá wɔ ombeki wɔ Bible owangande ndjingela nsanghanyɛ. Tɔngɛna lonkina wopo wɔ tokokolo okokawɔ nangha djɛ nkotshɛ ambeki wa Bible dj’iwɔ nfula tii tá batisimo.

5. Odjito wɔkɔnge wolekɔ lawɛ, winá wɔ nsakodji kɛmɔtshi oketande djɛ wɛ ntotshindjeyɛ te ombeki wɔnde wɔ Bible?

⁵ Winá wɔ wekelo wɔ Bible, wetsha ndeke lolekɔ ntondo ntondo l’odjito wɔ nkotshɛ ombeki djɛ nde nsipisoyɛ Otepela wɔ Ndjambe. Ntsha nsakodji kɛmɔtshi amboketa djɛ wɛ ntotshindjeyɛ te ombeki wɔnde, wɛ ladjɛ ndawɔsa etengo okotshɔ wɔnde. Odjito wɔko nde, wɔ ndosuka. (Los. 4:9, 10) Kɛkɔnge k’okokɛ nangha djɛ wɛ ndjala okotshɔ wɔ wɔlɔ winá wonanghema wekelo wɔ Bible?

6. Winá wotshindjeyɛ nsakodji kɛmɔtshi te ombeki wɔnde, wopo wɔkɔnge w’okokɛ nkamba la ikfɔ y’otanaso lá Woongo 20:18?

⁶ Yalɔngɔsɔla lá ntondo kɛ wekelo wɔ Bible. Ntondo ntondo, opola kanga ombeki djɛ nde nkoshimela akambo amɔtshi walendana l’ombeki. (Wala Woongo 20:18.) Wɛ nkoka ndowopola ente: “Akambo wakɔnge amɔtshi wewɛ lá kɛnɛ kelendana l’ombeki wɔko wɔ Bible? Onkanda wɔkɔnge edjinge shapitrɛ kɛkɔnge nyongoteka? Kɛkɔnge k’okombolɛ djɛ ombeki wɔko ndjewa má wekelo wɔnɛ? Akambo amɔtshi walekɔ w’okokami ntotepela la wa mopakoke ntepela? Lá nkambo djɛkɔnge dj’okokami ntokeketshɛ ombeki djɛ nde nfula? Lá nsɔsɔlɔ, wetsha apakoke nkoshimela akambo amɔtshi walendana l’ombeki, koko kɛnɛ k’okokande nkoshimela nkoka nkokotshɛ. Misiɔnɛrɛ kɛmɔtshi k’etawɔ Joy asawolaki wepo w’asawo wa nghɔsɔ nya wanɛ wotshindjeyɛki djɛ nteka l’ambeki wande wa Bible. Nde ntepelaka ante: “Wamba wasɔ w’akotshɛki winami dj’iwɔ ndapɛyɛ le ambeki edjinge ndjewa kɛnɛ k’okokawɔ ntepela lá wekelo.”

7. Lamo oyɛ ladjɛ ndalɔngɔsɔla wɔlɔ lá ntondo ntsha nsakodji kɛmɔtshi amboketa djɛ wɛ ndotshindjeyɛ djɛ nteka l’ombeki wɔnde?

 ⁷ Ntsha nsakodji kɛmɔtshi amboketa djɛ wɛ ndotshindjeyɛ djɛ nteka l’ombeki wɔnde, angoyala wɔlɔ wɛ ndɔngɔsɔla ntondo wekelo wɔ nyongoteka. (Ɛzr 7:10) Dorin, wɔnanyɔ wɔ isotepelaki m’adjiko ntepelaka ante: “Lemi ndjalaka l’osasa efula winá wɔ winami wotatshu la lemi te ombeki wɔmi, ɔlɔngɔsɔlande wekelo ntondo. Nghɔsɔ ndeke okokande ntɔpɛyɛ akɔmantɛrɛ yɛ wɔlɔ efula.” Lonkina winá wɔ ombeki ɛnande ante, nyape nyɔmbɔlɔngɔsɔlaka wekelo wɔlɔ, nde mbaka ndjɔmbɔmba kɛ wɔlɔ efula. Kaanga ntsha nyopawisa winá wɔ ndɔngɔsɔla wekelo wɔlɔ lá ntondo, nyo nkoka ndɔsa ndambo kɛ winá djɛ ndjila tɔkanyi tɔ djonyi lá wɔɔngɔ.

8. Wopo wɔkɔnge w’okokɛ ndashikikɛ djɛ wekelo wɔkɔ wɔ Bible wolekɔ djɔ?

⁸ Lɔlɔmbɔ lolekɔ etenyi kɛ djonyi efula lá wekelo wɔ Bible, djɛkondeke, kanelaka lá ntondo kɛnɛ k’okokɛ ntepela ntsha wetsha ambɔkɔlɔmba djɛ wɛ nangha lɔlɔmbɔ. Nghɔsɔ ndeke lɔlɔmbɔ lɔko oyalawɔ djɔ. (Yee. 141:2) Hanae, nkaana kɛso kɛmɔtshi k’intansɛ lá Japon, akindjɛ mvungɔ ndɔmbɔ yenanghaki nkaana kɛmɔtshi ketshindjeyɛki wetsha wɔnde wekaki lande Bible. Nde ntepelaka ante: “Má ndɔmbɔ yɛnde, ndjokaka ente nde alekɔ la djokanelo djɛ wolo nya Yehova, edjinge lakɔpaki ndowokola. Lonkina, winá wɔ ndilaka djiina djɛmi lá alɔmbɛlɔ wande, ndawokaki djɛ lemi nkɔpamaka efula.”

9. Lá nkilika Djakɔbɔ 1:19, kɛkɔnge k’okokɛ nangha djɛ wɛ ndjala ontshindedji wɔ wɔlɔ winá wonanghema wekelo wɔ Bible?

⁹ Suka wetsha winá wɔ wekelo. Omamuyovbi, yat’ekalo yetshikitanyi yelá Nigéria ntepelaka ante: “Ontshindedji wɔ wɔlɔ, ndjekameyɛka wɔlɔ, winá wɔ wekelo. Ontshindedji mpɛyɛka kɔmantɛrɛ yɛ wɔlɔ koko, apatepelaka efula ladjikɛnde nde ndjewaka ante, wetsha ndeke lɔlɔndjɛ wekelo.” Ntsha olekɔ ontshindedji, winá wɔkɔnge edjinge wopo wɔkɔnge w’okokɛ ntepela lá wekelo? (Woo. 25:11) Ekameyɛka wɔlɔ winá wɔ wetsha nya ombeki otepelawɔ. (Wala Djakɔbɔ 1:19.) Nghɔsɔ ndeke oyalɛ entshupa ndjɛ nkotshɛ lá winá wɔ wɔlɔ. Lá nsɔsɔlɔ, wɛ ladjɛ ntɔnɔla lá ntondo kɛ ntepela. Ndjɔmbɔmba opakoke ntepela efula, ndjopa kanga lɔlɔndjɛ winá wotepelande, kana ndjingeyɛ djamba nkina djetshikitanyi la kɛnɛ k’ekanyo. Koko la kɔmantɛrɛ k’itenyi, la ndjɔmbamba, kana la woopó, wɛ nkoka nkotshɛ djɛ nsakisola papoo kɛnɛ k’ekanyo. Lá winá ɛmɔtshi okoka dawoka ente opalekɔ l’akambo efula wa wɛ ndjakfɛ lá wekelo. Koko ntsha wɛ mbandola ombeki, edjinge nyɛnyɛ djɛ wɛ ndowilaka yimba, ongokotshɛ efula djɛ nde nfula.

10. Wopo wɔkɔnge nkɔndɔla ombeki wɔ Bible kɛnɛ kekokomelisa okokawɔ ndokotshɛ?

¹⁰ Kɔndɔlawɔ akambo amɔtshi wapomanisa lawɛ. Ntsha nkokaka, wɛ nkoka nkɔndɔla ombeki wopo wɔngeke akambo wa nsɔsɔlɔ, ekakasano wepomanisa lawɛ winá w’ingekaka, kana wopo wɔ Yehova ndakokotshɛ lá lowiko lɔko. (Yee. 78:4, 7) Nkoka ndjala ko, kɛnɛ kekokomelisa kɛsɔ, ndeke ombeki oyɛnde la djonyi djɛ nde ndjoka. Nkambo djɛsɔ  djekoka nkembɛ djawo djɛnde kana ndokeketshɛ djɛ nde nfula tii tá batisimo. Edjinge djekoka ndɔwɛnyɛ wopo w’okokande ndongela okakasano wopomana lande. (1 Pɛ. 5:9) Gabriel, wɔnanyɔ w’intansɛ lá Brézil edjinge wokamba win’ɔsɔ etengo yat’ekalo, mvungɔka wapɔ w’indawa winá windekeka Bible. Nde atepelaka ante: “Winá w’imoke akambo wapomanisa la wananyɔ, mbaka olakanyelo ente, Yehova nyɛnaka ekakasano wepomana la lemi. Edjinge ntsha iwɔ wawaka akoka wandongela, mbɔkoko, edjinge lemi langolongela.”

11-12. Lamo oyɛso ladjɛ nsangela l’osasalo onkfumɔ ombeki wɔ Bible wombotateyɛ ndjɛ lá nsanghanyɛ?

¹¹ Djɛ ombeki wɔ Bible nfula tii tá batisimo, nde ladjɛ ndjingelaka nsanghanyɛ mbala la mbala edjinge mbaka wapɔ má nsanghanyɛ yɛkɔ. (Heb. 10:24, 25) Djɛkondeke, wetsha wɔnde angoweta djɛ nde ndjɛ mbala kɛ ntondo lá losanghanyɛ. Winá woyɛnde mbala kɛ ntondo lá losanghanyɛ, isankfumɔ nkoka ndokeketshɛ djɛ nde nkindjɛ ndjɛka lá Mvulu k’Onkfumi. Lá wopo wɔkɔnge w’okokaso nangha nkambo djɛsɔ?

¹² Tosangele ombeki l’osasalo onkfumɔ. (Ɔrɔ. 15:7) Ntsha mbala kɛ ntondo kɛ ndomboyɛ lá losanghanyɛ, ombeki amboyawoka ante tombosangelaka wɔlɔ efula, nde nkoka nkindjɛ ndjɛka lá Mvulu k’Onkfumi. Ipa la ndɔpɛyɛ nsɔnyi, pɛyɛnde djemo l’osasalo, edjinge ewanyɛnde le anto ankina. Sawola nyande. Totepelake ente, kangeka lande ndeke lokoka nanga nkambo djɛsɔ, mande nkoka ndjala nde atakome kana alekɔ l’elemo ɛmɔtshi lá Mvulu k’Onkfumi. Ila yimba lá kɛnɛ kɛ ombeki otepelande edjinge ɛnyɛ djɛ wɛ ndowilaka yimba. Eposelo wɛkɔnge wekoka ndjala má wopo wosangelɛ ombeki l’osasalo? Kolenda ndjɔmbɔmba kɛ Dmitrii, wɔnanyɔ wombolongolá batisimo l’ilá k’ɛnɔnyi emangha edjinge lolekɔ win’ɔsɔ onkambi w’okotshɛ. Winá w’ovungɔnde lofu lɔnde lɔ ntondo lɔ ndaye lá losanghanyɛ nde ntepelaka ante: “Wɔnanyɔ ɔmɔtshi anyɛnaka nyeme l’ɔsɔnyi onkfumɔ lá bandja djɛ Mvulu k’Onkfumi. Ko nde andɔsaka edjinge antɔlaka la ngandji k’enkfumɔ t’eteyi. Wananyɔ ankina efula wayɛka ndɔmpɛyɛ djemo. Nkamɔka nsɔsɔlɔ efula. Nkɔpaka efula edjinge lakombolaki iso ndjala la nsanghanyɛ nfu inkfumɔ yelekɔ lá lombengo. Akambo wamɔtɛna l’enteyi ntɛnaka ntondo l’edjena kɛmɔtshi.”

13. Eposelo wɛkɔnge wekoka ndjala l’eyalelo kɛko te ombeki wɔ Bible?

¹³ Pɛyɛ ndjɔmbɔmba kɛ wɔlɔ. Enanghedji kɛko kɛ wɔlɔ nkoka nkotshɛ ombeki wɔ Bible djɛ nde ndashikikɛ ante, nde ambotana akambo wa nsɔsɔlɔ. (Mat. 5:16) Vitalii, wɔnanyɔ wokamba etengo yat’ekalo lá Moldova, ntepelaka ante: “Lakɔdjɛki yopo yɛ lowiko lɔ ase otshumano, ekanedji kɛwɔ, edjinge nanghedji djɛwɔ. Kɛsɔ kenshikikɛka ente, Ewakɛ wɛ Yehova walekɔ l’etolo kɛ nsɔsɔlɔ.”

14. Wopo wɔkɔnge ndjɔmbɔmba kɛko okokawɔ nkotshɛ onto omɔtshi djɛ nangha etshikitano?

¹⁴ Djɛ nde ndongola batisimo, ombeki ladjɛ  nkamba la kɛnɛ k’ekande. Nkambo djɛsɔ mpayalaka wɔdju winá enkfumɔ. Koko winá wɔ ombeki ɛnande wopo w’owɛ wapɔ má nkamba la tɔkfɔ tɔ Bible, nde nkoka ndjala la mposɛ kɛ nkokola. (1 Kɔ. 11:1) Kolenda kɛnɛ kekomelisa Hanae, nkaana k’isotepelaki má djiko. Nde ntepelaka ante: “Wananyɔ l’ankaana wakambaki l’akambo w’iyandakanyɛka djɛ nangha lá mbiko yɛwɔ. Nyɛnaka wopo w’okokami nkeketshɛ la nyimeyɛ anto ankina, edjinge wopo w’okokami ndawɛnyɛ ngandji. Iwɔ watepelaki winá enkfumɔ lá nkambo djɛ anto ankina ngo akambo wa wɔlɔ. Lakombolaki ndawokola.”

15. Wopo wɔkɔnge Woongo 27:17 otokotshɛwɔ djɛ nyɛna lamo oyɛwɔ djonyi ndjala ilongo l’ombeki wɔ Bible winá w’okindjɛnde ndjɛ lá nsanghanyɛ?

¹⁵ Kɔpɛ ilongo nya ombeki. Winá wɔ ombeki okindjɛnde ndjɛ lá nsanghanyɛ, kindjɛ ndɔwɛnyɛ ente wɛ ndowilaka yimba. (Flp. 2:4) Wɛ nkoka mpona djɛ ndowewa wɔlɔ. Wɛ nkoka ndowandola lá etshikitano wɛ ndombonangha edjinge ndowopola akambo walendana la wekelo wɔnde wɔ Bible, nkfumbo kɛnde edjinge olemo wɔnde. Koko, yala la ntɔnɔ, dj’ipa ndowopola akambo wakoka ndɔpɛyɛ nsɔnyi. Wamba wa nghɔsɔ nkoka nyokotshɛ djɛ nyo ndjala ma ma. Winá woyalɛ ilongo nya ombeki, ongookotshɛ djɛ nde nfula tii tá batisimo. (Wala Woongo 27:17.) Winá wɔsɔ, Hanae akamba etengo yat’ekalo yɛ lotshinda. Winá w’ovungɔnde mbala kɛnde kɛ ntondo kɛ ndatateyɛ ndjingela nsanghanyɛ, nde ntepelaka ante: “Winá wɔ maye ndowa tolongo l’otshumano, ntateyɛka nkongela nsanghanyɛ l’oloko lukuluku, edjinge latshɔki tá nsanghanyɛ kaanga lambɔlɛmba. Lakɔpaki ɛkɛndɛIɔ kɛmi isa tolongo tɔmi tɔ bango, edjinge kɛsɔ kenkotshɛka djɛ lemi ndjopa ilongo l’anto watatɛmɔlaki Yehova. Lakɔpaki ndjaIa la djokanelo djɛ ma ma isa Yehova edjinge isa wananyɔ l’ankaana. Djɛkondeke maye ndɔsa nkano djɛ ndongola batisimo.”

16. Topo tɔmɔtshi tɔkɔnge tokokɛ nangha djɛ nkotshɛ ombeki wɔ Bible djɛ nde ndjala l’osasa wɔ ndɔsa opiko l’otshumano wɔso?

¹⁶ Winá wɔ ombeki okindjɛnde nfula edjinge nangha etshikitano, kotshɛnde djɛ ndawoka ante ɔsa opiko l’otshumano. Wɛ nkoka nangha nkambo djɛsɔ má ndjala l’ekfumbo kɛ ndongɔnaka. (Heb. 13:2) Winá wovungɔnde etsho w’indekaka Bible, Denis wɔnanyɔ wokamba lá Moldova, ntepelaka ante: “Mbala efula, wananyɔ watetaki lemi isa wadjɛmi tá kawɔ. Watoshimelaki wopo wɔ Yehova ndaakotshɛ. Kɛsɔ katokeketshɛki. Mbamba yɛsɔ, yatokotshɛki dj’iso ndashikikɛ ente, tɔkɔpa nkambela Yehova, edjinge ntsha tombonangha nkambo djɛsɔ, tongoyala la lowiko l’osasa.” Ntsha ombeki wɔ Bible ambokoma nsakodji, wɛ nkoka ndoweta djɛ nde nkotshindjeyɛ t’olemo w’ipoposanyɛ. Diego, nsakodji kelekɔ lá Brézil, ntepelaka ante: “Wananyɔ efula wandjetaki djɛ mposa lawɔ t’olemo w’ipoposanyɛ. Ɔsɔ ayalaki mbamba yɛ wɔlɔ efula yenkotshisa djɛ ndaawewa wɔlɔ. Winá wɔ maposaka is’awɔ, l’ekaki akambo efula, edjinge ntateyɛka ndawoka entshupa isa Yehova edjinge Yeso.”

17. Wopo wɔkɔnge tokokolo okokawɔ nkotshɛ ambeki wa Bible?

¹⁷ Tshungolaka winá djɛ wɛ ndapɛyɛka te ambeki wa Bible. Tokokolo, ngandji kɛnyo edjinge wopo w’ilanyo ambeki wa Bible yimba, nkoka ndakotshɛ dj’iwɔ nfula tii tá batisimo. Opakoke nsawolaka l’ambeki wa Bible mbala la mbala lá nsanghanyɛ? Iwɔ wangɛna ambɔ wɛ ndawilaka yimba ntsha wɛ mvungɔka wiina wawɔ, pekapeka winá wotateyɛwɔ mpɛyɛ kɔmantɛrɛ. Wɛ nkoka mpona mbamba kɛ ntshɔ nya ansakodji y’eka lawɔ Bible djɛ ntawembola? Okoka ntokotshɛ ombeki lá yopo yɛ ngotakanelaká. Yat’ekalo imɔtshi yetawɔ Jackie, kanga l’intansɛ lá Nigéria, ntepelaka ante: “Ambeki wami wa Bible efula nkamɔka winá w’ewawɔ ambɔ wɔnanyɔ woyisa la lemi oyɛnde nde ikokolo. Ombeki ɔmɔtshi wɔ Bible atepelaka ante: ‘Pastɛrɛ kɛmi apakokaki nangha nkambo ntshɔ kaanga ndambo daambi. Nde mbembolaka ngo anto walekɔ l’okfudji edjinge ngo ntsha wangotofuta!’” Ombeki wɔsɔ ambotateyɛ ndjingela nsanghanyɛ winá wɔsɔ.

18. Etengo Elemo 20:28 ɛnyɛnde, wopo wɔkɔnge tokokolo okokawɔ nkotshɛ olemo w’iyapɛyɛ?

¹⁸ Kfumbaka edjinge keketshɛka wetsha wɛ Bible. Tokokolo, nyolekɔ l’odjito wɔ djonyi efula wɔ nkotshɛ ansakodji dj’iwɔ ndjala wetsha wɛ wɔlɔ l’olemo w’ipoposanyɛ edjinge l’olemo wɔwɔ wɔ ndɔndjɛ wekelo wɔ Bible. (Wala Elemo 20:28.) Ntsha nsakodji kɛmɔtshi oka nsɔnyi djɛ ndɔndjɛ wekelo wɔ Bible lá ntondo kɛko, wɛ nkoka ndɔndjɛ wekelo. Jackie, nkaana k’isotepelaki má djiko, ntepelaka ante: “Tokokolo ndjopolaka lemi mbala la mbala lá kɛnɛ kelendana l’ambeki wami wa Bible. Winá woyalami l’okakasano djɛ ndɔndjɛ wekelo wɔ Bible, iwɔ mpɛyɛka lemi alako wa djonyi efula.” Tokokolo nkoka nangha akambo efula dj’iwɔ nkeketshɛ edjinge nsasandjɛ ansakodji djɛ ndjala l’entete. (1 Te. 5:11) Jackie nkotshɛka ante: “Lemi nkɔpaka efula winá wɔ tokokolo onkeketshɛwɔ edjinge oshimelawɔ ambɔ walekɔ la djedjɛ l’olemo wɔmi wɔ wolo wonanghami. Etepela wɛ nghɔsɔ nkembɛka lemi etengo onto wɔmbɔnɔ nkɔpɔ djɛ washi wa ntshitshi duu winá wɔ yane. Djedjɛ djɛwɔ nkeketshɛka djawɔ djɛmi edjinge nfudjɛka osasa w’owami má olemo wɔ ndɔndjɛ wekelo wɔ Bible.”​—Woo. 25:25.

19. Osasa wɔkɔnge w’okokaso ndjala la wɔkɔ isankfumɔ?

¹⁹ Kaanga ntsha topalekɔ l’ombeki wɔ ndjeka lande Bible winá wɔsɔ, iso nkoka nkotshɛ onto ɔmɔtshi djɛ nde nfula tii tá batisimo. Ipa la ntepela efula, iso nkoka nkotshɛ wetsha winá wɔlɔndjɛnde wekelo, má mpɛyɛ kɔmantɛrɛ kɛso k’isalɔngɔsɔla wɔlɔ. Iso nkoka ndjala tolongo l’ambeki winá woyɛwɔ lá Mvulu k’Onkfumi, edjinge nkoka ndjala ndjɔmbɔmba yɛ wɔlɔ lewɔ. Edjinge tokokolo nkoka nkeketshɛ ambeki má ntshungolaka winá lá nkambo djɛwɔ edjinge nkeketshɛ ansakodji má ndakfumbaka edjinge ndawandolaka. Tolekɔ nsɔsɔlɔ l’osasa efula, winá w’ewaso ente, iso nkoka nangha kaanga nkambo mɔtshi djɛ daambi djɛ nkɔpa edjinge nkambela Papa kɛso, Yehova?